UNIVERSALA
METODO

LERNOLIBRO  PRO  IDO
– LA  LINGUO  INTERNACIONA –

Imprimita en la frua Ido revuo
«Internaciona Pioniro»
dum 1909 – 1910

Riskribita e modernigita da
Richard Stevenson
2002

Negrave korektigita da Hermann Philipps en 2010
 

---

UNIVERSALA  METODO

IDO-LERNOKURSO

Dum la frua yari di Ido, plura revui aparis. Un esis Internaciona Pioniro (1909), redaktisto A. Haugg, München, Germania. Ta revuo «kredis helpar la propagala agemeso publikante instruktiv artikli pri historio, evoluciono, e la plufaciligo di la propagado pri mondala helpolinguo generala, e pri nia propra linguo, la internaciona linguo di la delegaciono specale. Iton ante omno servas la Universala Metodo, lernmetodo qua volas instruktar la detali di nia extreme instruktiva linguo.»

Kande me riproduktis ta Metodo, me astonesas ke la gramatiko ed espelado di la 1909-versiono di Ido bezonis tre poka chanji. Do pruvo ke la decidi di la Delegaciono ya esis saja e justa, malgre desfortunoza alegaji.

La precipua chanji esas:

1. La uzado di des- vice mal- (por antonimi).
2. La uzado di ilua edc. vice sa quale pronomi posedala.
3. La uzado di la nombro non vice nov (por evitar la radiko nov-).
4. La uzado di tote vice tute.
5. La litero y nun esas konsonanto. Quale vokalo, l'espelado uzas i.
6. La uzado di ma vice sed.
7. La reguli di acento tonika subisis certena chanji.

Por facar ta Universala Metodo uzebla hodie e do furnisar kurso por nuna lernanti, me efektigabas la chanji deskriptita supre, ma tamen, l'aranjo originala e la diversa exempli restas netushita.

Komprenende, ta kurso ne esas apta por absoluta komencanto, nam on bezonas kelka savo di nia linguo por komprenar la lecioni. Tamen, la Universala Metodo montras ed explikas diversa punti di espelado, gramatiko ed uzado quin lernanto forsan konsideras desfacila o neklara.

Proximigante en 2007 la centyaro di l'origino di nia linguo, esas instruktiva deskovrar la forteso di la gramatiko e l'apteso di la bazala vortaro.

Pro sua flexebla alfabeto, Ido esas tote apta por irga temo e per irga moyeno di komunikado. Konsiderante ke olim on uzis plumo e papero, nuntempe nia linguo esas egale uzebla per elektronala moyeno. Nova vorti pri diversa temi adiras yarope, ankore Ido povas produktar universala e rikonocebla versiono. Ta procedo devas durar.

• Evitez hasto. Konsiderez tre atencose mem la maxim mikra detali. La Linguo Internaciona devas esar extrema facile, e fakte Ido esas tala; ma ca facileso divenas danjero por la ne-atencanti. Ma pro ke li ne sate atencas li montras lore, e sentas ipse, ke li ne posedas bone la linguo.
• Pronuncez laute (se on povas) la vorti di la Exempli ed Exerci. Pozez atencante l'acento tonika sur la konvenanta silabo per plufortigo di la voco.
• Skribez la traduki di l'exempli od exerci, quin on facos sen ula omiso.
• Pos ke vu facas tradukuri a vua linguo nacionala, esas grand avantajo rikonstruktar l'original Ido-exempli od -exerci, t.e. per retrotraduko.
• Komparante la rikonstrukto kun la texto originala, on facile povas vidar la kulpi facita e do emendar oli.
• Kande on renkontras nekonocata Ido-vorto, on bezonas bona dicionario. Tala libro esas vere esenca se on deziras atingar rapida suceso.