Ye la 16ma di marto 2010
Dio di santa Benedikta.
DIO-PROVERBO / Vivez mizere, ma vivez libere !
ZODIAKO / En la zodiako-signo dil Fishi guvernata dal planeto Neptuno.
VETERO / Blua cielo sunoza e quaze printempala temperaturo, cajorne, en Francilia.
KONCIZE
KOLUMBIA / LA DEXTRANI PREPONDERAS LOR LA DEPUTITAL ELEKTO
La rezulto dil elekto di pasinta sundio esas ankore partala, ma la lekto di 80% de la votaji indikis, hiere, nova suceso por la dextrani, precipue por la sociala Partiso di nacionala uniono di prezidanto Uribe. Se on povas dicar kela "guerilla"-ani ne sucesis perturbar la elekto, la observeri raportas pri grandaquanta kompri di voti, tote aparte en la regioni kun forta militistatra prezenteso.
ISRAEL / PLUDURIGO DIL KONSTRUKTI EN EST-YERUSHALAIM
La chefa ministro Benyamin Netanyahou asertis hiere, ke "la konstrukto pluduros en Yerushalaim, quale dum ica 42 recente pasintayari". Ita deklaro 'okuras' dum periodo di krizo kun Washington - "la maxim mala depos 1975", segun l'ambasadisto di Israel en Usa. La dicita krizo eruptis lor l'anunco di nova projeto di koloniigo en Est-Yerushalaim dum la vizito dal vice-prezidanto Usana, Joe Biden.
Benyamin Netanyahou
TAILANDO / DU SOLDATI VUNDESIS LOR MANIFESTI
Du soldati vundesis en Bangkok, hiere, lor l'explozo di grenadi dum ke la "reda kamizi", movado enemika a la guvernerio, manifestis por postular lua falo. L'armeani efektigis aresti. La autoritatozi, qui timas ecesi e saboti, instaligis 50.000 membri dil ordino-trupi en-e-cirkum la Tailandana chefurbo.
Kordiala interretala saluti ad omni. JM :::-:::
Ye la 15ma di marto 2010
Dio di santa Luiza de Marillac.
DIO-PROVERBO / Facilesas kritikar, desfacil plubonigar.
ZODIAKO / En la zodiako-signo dil Fishi guvernata dal planeto Neptuno.
VETERO / Bela sunoza cielo kun preske printempala temperaturo, cajorne, en Francilia.
KONCIZE
PAKISTAN / SUOCIDA ATENTO
Adminime 10 personi mortigesis e 37 plusa homi vundesis, pasinta-saturdie, lor suocida atento en la valo di Swat, nordwest-Pakistan, loko ube la armeani ekpulsis la talibani du yari ante nun. La talibani di TTP federita ad Al-Qaida, qui revendikas facir ica atento, anuncas ke li efektigos plusa atenti tam longatempe kam la Pakistanana armeo pluduros olu operaci en la tribuala arei. Ita atako 'okuris' kurtatempe pos serio de tre mortigera atenti (72 mortinti) en Lahore, est-Pakistan.
TAILANDO / MANIFESTO KONTRE-GUVERNERIA
Dekamili de "reda kamizi" kunvenabis, hiere, en Bangkok, lor la maxim importanta manifesto depos un yaro dal partisani dil ex chefa ministro exilita, Thaksin Shinawatra. Ita personi postulas la falo dil nuna guvernerio ed anticipata elekto. La organizeri asertis ke plu kam 100.000 personi venabis por denuncar la konfisko dil povo dal eminentaro di Bangkok. La polico parolis pri 80.000 manifestanti.
Thaksin Shinawatra
MEXIKIA / MORTIGERA VENJI
Duadek-e-sis personi, inter li quar esis senkapigita, trovesis kom mortinti pasinta-saturdie en la Stato Guerrero, sude di Mexikia, konseque di venji asociata a la komercacho di narkotaji, tale anuncis la autoritatozi. La Stato Guerrero di qua Acapulco esas la turismala afisho havanta mondala famo, esas la feudo di "la Familia" ("la Familio"), t.e. narkotaj-federuro, qua divenas sempre plu potenta en Mexikia.
Kordiala interretala saluti ad omni. JM :::-:::
Ye la 12ma di marto 2010
Dio di santa Paulus di Leon.
DIO-PROVERBO / Ajornita ne esas perdita.
ZODIAKO / En la zodiako-signo dil Fishi guvernata dal planeto Neptuno.
VETERO / Grizeta cielo, ma plu milda temperaturo, cajorne, en Francilia.
KONCIZE
NIGERIA / MILI DE MULIERI SURHAVANTA NIGRA VESTI MANIFESTAS KONTRE LA MASAKRI
Mili de mulieri surhavanta nigra vesti kunvenis, hiere, en la stradi di Jos, Mez-Nigeria, por protestar kontre la masakri qui sangomakulizis ica regiono, pasinta-sundie, tale efektigante inter 109 e 500 mortinti, majoritate Kristani, segun diversa bilanci. Eli agitis mangieri-branchi kom signo di paco, dum brandisar bibli e ligna kruci, ed iranta a la sideyo di la lokala guvernerio dil Stato di la Platajo. Eli postulis la departo dal armeani, ilqui akuzesas ne efektigir lia misiono pro ne sucesirimpedar l'ataki.
UKRAINA / MYKOLA AZAROV DIVENAS CHEFA MINISTRO
Parlamentala koalisuro favoroza a la nova prezidanto Viktor Yanukovich formacesis hiere che la Ukrainana Parlamento e lupropozis nominar por l'ofico di chefa ministro Mykola Azarov. Ita nova federuro kontenas 235 deputiti. Mykola Azarov esas anciena ministro pri Financi edipsa esas membro dil sama partiso kam Viktor Yanukovich. Il havas, same kam ilu, kom origino la urbo Doneck. Ica nova koalisuro povis formacesar danke la apogo da parto del deputiti di la partiso di Viktor Yushchenko, l'anciena prezidanto.
Mykola Azarov
ISRAEL / LA PALESTINANI POSTULAS LA NIHILIGO DI LA MAXIM RECENTA ENPLANTACI DE KOLONIIGANTI
"Omna decidi koncernanta la kolonii en Cisjordania ed en Est-Yerushalaim esas nihiligota. Ico ne esas questiono pri kalendario, pro ke la kolonii, omnamaniere, esas nelegala", tale deklaris, hiere, la negociero Palestinana, Saeb Erakat. Ilu reaktis a l'anunco dal Israelana autoritatozi pri la konstrukto di 1.600 nova lojeyi en Est-Yerushalaim anexita e a la regreti expresita dal Israelana chefa ministro, Benyamin Netanyahu, a la Usana vice-prezidanto Joe Biden "pro lane-oportuna instanto" dil dicita anunco.
Kordiala interretala saluti ad omni. JM :::-:::
Ye la 11ma di marto 2010
Dio di santa Eulogius.
DIO-PROVERBO / Plu bon poke ganar kam multe perdar.
ZODIAKO / En la zodiako-signo dil Fishi guvernata dal planeto Neptuno.
VETERO / Sunoza cielo kun mildeskanta temperaturo, cajorne, en Francilia.
KONCIZE
CHINIA / JURNALISTO PUNISATA
Zhang Hong, chefa redaktero adyunta dil EKONOMIAL OBSERVERO, havanta sideyo en Beijing (Pekino), savigis ke ilesabis punisatapro organizir komuna advoko da 13 informili oficala per postular la supreso dil rezido-permiso, la tale nomizita HUKOU, qua genitas ne-egalaji por la migranta laboranti. Ita dokumento vizis depos la yari 1950 evitar la rurala exodo a la urbi. Plu kam 200 milion rurani laboras tamen hodie en la urbi.
EUROPA / VISTO POR USA
La Europana Komisitaro salutis, hiere, la dispenso pri visti grantita da Usa por la resortisanti Greka. Lu demandis a la guvernerio di Washington rapide profitigar de ol la civitani dil quar lasta Stati membra di EU/UE qui ankore submisesas ad ita devo, nome Chipro, Bulgaria, Polonia e Rumania. La visto-dispenso grantesis a Grekia pos du yari de negociado.
HAITI / LE "GI" LIVOS BALDE ICA LANDO
La Usana kontigento preparas su departar pokope de Haiti, tale produktante desquieteso che la posvivanti dil potenta sismo eventinta ye la 12ma di januaro, olqua efektigis 200.000 mortinti. Dum ke la esforci koncernas nunadie precipue la rikonstrukto, plu kam quarimo de la 11.000 Usana soldati ankore prezenta esasdepartonta lor la venonta proxima dii. Komence ita militisti esis 20.000.
Civili pos la katastrofo
en Haiti
Kordiala interretala saluti ad omni. JM :::-:::
Ye la 10ma di marto 2010
Dio di santa Vivianus.
DIO-PROVERBO / Ad omna bandito segun sua merito.
ZODIAKO / En la zodiako-signo dil Fishi guvernata dal planeto Neptuno.
VETERO / Sunoza cielo e kolda venteto, cajorne, en Francilia.
KONCIZE
TOGOLANDO / L'AFRIKANA UNIONO KONFIRMAS LA RIELEKTO DI FAURE GNASSINGBE
L'Afrikana Uniono konfirmis, hiere, la rielekto dil ekoficeskanta prezidanto di Togolando, Faure Gnassingbe, advokante a la kalmeso la opozantaro qua kontestas ica rezultato. Cirkum 400 personi partoprenis, hiere matine, en Lome a manifesto dal opozantaro kun la klami : "Ni volas chanjo, ni volas nova prezidanto", ante dispersesar dal ordino-trupi.
NORD-IRLANDO / HISTORIALA VOTO POR KONFIRMAR LA PACO
La regionala asemblo Nord-Irlandana, qua asemblas la katolika republikani e la protestanta royalisti, olim enemika, esis signatonta, hiere, interkonsenta kontrato pri la transfero dil povi di polico e di judiciado de London a Belfast. Ica transfero qua valideskos ye la 12ma di aprilo, tale supresas la lasta obstaklo a l'apliko dil paco-proceso. qua finis triadek yari de interkomunaja violentaji en Ulster.
IRAN / LA REPRESO PLUDURAS EN TEHERAN
Onu ne plus havas informi pri Jafar Panahi, evo 49 yari, qua esas un de la filmifisti di la "nova cinemo" Iranana. Il arestesis un semano ante nun dal sekureso-trupi en Teheran. Il preparis filmo pri la pos-elekta manifesti en Iran. Samatempe, reformera jurnalisto, Bahman Ahmadi Amui, kondamnesis ye kin yari de karcero-puniso, dum ke la poetino Simin Behbahani, evo 82 yari, impedesis prehiere livar ica lando. El esis pronunconta, che la urbodomo di Paris, diskurso pri la feminismo okazione dil 8ma di marto, t.e. ye la internaciona dio dil mulieri.
Jafar Panahi
Kordiala interretala saluti ad omni. JM :::-:::
Ye la 9ma di marto 2010
Dio di santa Franciska Romana.
DIO-CITAJO / Ta qua vivas pace kun su ipsa esas en paco kun la tota universo. (Marcus Aurelius, Romana Imperiestro)
ZODIAKO / En la zodiako-signo dil Fishi guvernata dal planeto Neptuno.
VETERO / Kruela blua e sunoza cielo kun vento ye polala koldeso, cajorne, en Francilia.
KONCIZE
PAKISTAN / SUOCIDA ATENTO EN LAHORE
La Pakistanana talibani federita ad Al-Qaida revendikis suocida atento per bomba vehilo kontre edifico dil polico. Ita atento efektigis adminime 13 mortinti, hiere, en Lahore, est-Pakistan. "Ni pluduros entraprezar ita tipo de ataki future", tale deklaris la porparolanto dil Movado dil talibani di Pakistan, t.e. la precipua movado di islamista rebeli, olqua deklaris sua vasaleso ad Al-Qaida quik de lua kreo, ye la fino di 2007.
AUSTRIA / POLEMIKO PRI KONTRE-NAZISTA LEGO
Extreme dextrana kandidatino por la prezidantal elekto en Austria kontestas la interdikto-legokoncerne lanazista partiso, votita en 1947. Barbara Rosenkranz, evo 51 yari, matro di dek filii, direktantino dil populista partiso extreme dextrana FPO, esos la unika kandidatino opozita ye la 25ma di aprilo a la ekoficeskanta Statestro Heinz Fischer, di qua la rolo esas precipue honorizanta ed etikal.
Barbara Rosenkranz
SUD-KOREA / MILITISTAL MANOVRI
La guvernerio di Sud-Korea ed olta di Usa impulsis, hiere, importanta manovri militistal kune. Oli esas duronta til la 18ma di marto, tale mobilizante preske 40.000 soldati malgre la minaci dal guvernerio di Pyongyang. La guvernerio di Nord-Korea rezolvis cesigar la diskuti pri la sen-nukleigo (ja interruptita depos aprilo 2009) kom retroturno ad ita exerci quin lu judikas esar premici di invado di lua teritorio.
Kordiala interretala saluti ad omni. JM :::-:::
Ye la 08ma di marto 2010
Dio di santa Ioannes di Deo.
DIO-CITAJO / "La framasonaro, ya, ne esas sekreta societo, ma lu havas sekretaji" (televizional polic-inspektisto Thomas Barnaby)
ZODIAKO / En la zodiako-signo dil Fishi guvernata dal planeto Neptuno.
VETERO / Blua e sunoza cielo ma tre kolda vento vintrala, cajorne, en Francilia.
KONCIZE
HISPANIA / MANIFESTO KONTRE-ABORTIGO
Plura mili de opozanti al abortigo defilis, hiere, en Madrid kun lamoto "Yes a la vivo, no al abortigo". Li postulis l'abrogo di la nova lego legaligante l'abortigo til 14 semani di gravideso. Delegitaro dil Franca asociuro "Le droit de naître" (La yuro naskar) partoprenis ica defilo, organizita per plu kam 200 asociuri en Hispania.
La manifesto kontre-abortigo en Madrid
YEMEN / MEMBRO DI AL-QAIDA OCIDAS ILUA GARDISTI
Kaptito di Al-Qaida aceptita en hospitalo en Sanaa ocidis du de lua gardisti lor eskapo-probo hiere. Transportita exter lua karcero por medikala flegi, ica viro di qua la nomo ne revelesis, sucesis senarmigar ed ocidar du de la kin policani komisita por lua gardo, ante livrar su. Pasinta-jovdie, la Yemenana autoritatozi arestabis 11 supozata membri dil islamista reto en Sanaa.
SAUDIA ARABIA / ARESTO DI MILITANTI POR LA HOMALA YURI
La Saudiana asociuro por la civitala e politikal yuri protestis, hiere, kontre l'interpelo di kinadeko de personi en la provinco Qassim. Inter li esas, Thamer Al-Kather, studento qua militas por reformi en ita rejio. Segun la aludita NGO, ilu atakadesis dal policani, same kam lua patro, Abdelkarim Al-Kather, profesoro pri teologio.
Kordiala interretala saluti ad omni. JM :::-:::
Ye la 5ma di marto 2010
Dio di santa Olivia.
DIO-PROVERBO / Plu bone uunfoye vidar kam dekfoye audar.
ZODIAKO / En la zodiako-signo dil Fishi guvernata dal planeto Neptuno.
VETERO / Sat sunoza cielo, ma kun kolda temperaturo, cajorne, en Francilia.
KONCIZE
USA / CESIGO DIL KOMERCO PRI RED ATUNO
La Usana autoritatozi savigis hiere ke li postulos interdikto dil internaciona komerco pri reda atuno por protektar ica speco lor kunveno, previdita dum ica monato en Qatar. Ico esas ago tote ne aprobata da Japonia, t.e. lando ube ica fisho esas tre prizata. La Europana Komisitaro propozis recente tala interdikto, olqua esas aprobota da EU/UE pose ratifikata da la Cites, organizuro de 175 membri admisata che UN/ONU e komisita por la protekto dil endanjerigita speci.
Atuni
CHINIA / LA DEFENSO-BUDJETO KELKE AUGMENTAS
La budjeto por defenso Chiniana montras en 2010 lua maxim febla augmento depos plu kam dek yari, per 57 miliard euri, t.e. plualtigo de 7,5% kompare a la reala spensi en 2009. La autoritatozi duras asertar la pure defensiva naturo di lia armeo (2,3 milion viri). Kompare a la interna revenui di Chinia, ita spensi reprezentis cirkum 1,4% dum la recenta yari, opoze a plu kam 4% en Usa , 2% en Francia ed en Unionita Rejio.
INDONEZIA/ ARESTO DI ISLAMISTI DIL JEMAAH ISLAMIYAH
La Indoneziana policani interpelis dum la recenta dii 14 personi suspektata preparar atenti e ligesar al terorista reto islamal Jemaah Islamaiyah, tale li dissavigis hiere. Ita personi arestesis depos la 22ma di februaro en la provincio Aceh, en nord-Sumatra, ube la policani asertas deskovrir exerco-kampeyo en izolita regiono.
Kordiala interretala saluti ad omni. JM :::-:::
Ye la 4ma di marto 2010
Dio di santa Kasimir.
DIO-PROVERBO / Kande du personi interamoras, nulatempe esas nokto. (Afrikana proverbo)
ZODIAKO / En la zodiako-signo dil Fishi guvernata dal planeto Neptuno.
VETERO / Sunoza cielo ma sat forta koldeta vento, cajorne, en Francilia.
KONCIZE
EUROPANA UNIONO / LA STATUTO DI REFUJINTO POVAS FORPRENESAR
Refujinto povas perdar sua statuto kande "la cirkonstanci justifikinta lua timo persekutesar cesis existar en lua origino-lando", tale asertis la Europana Korto por judiciado. La aludita korto deklaris kom justa la decido da Germana tribunali qui forprenesabis ita statuto de Irakani fuginta la rejimo di Saddam Hussain.
NEDERLANDO / MUNICIPAL ELEKTO
Dek-e-du milion Nederlandani vokesis a la urni elektala , hiere, por rinovigar 393 municipala konsilantari okazione di probo-voto, tri monati ante deputital elekto anticipata, ye la 9ma di junio. Pro ke lu esis viktimodi lua deskonkordi pri Afgania, la koalisuro-guvernerio direktita da Jan Peter Balkenende falis ye la 20ma di februraro.
RUSIA / DEMISIONO POS LA DESSUCESO DIL RUSI EN VANCOUVER
La chefo dil Olimpiala Komitato Rusa, Leonid Tiagachev, demisionis hiere konseque dil deceptanta rezulti di la Rusa atleti lor la Olimpiala Ludi di Vancouver. Rusia qua esos organizero di le vintrala OL en Sochi dum 2014, falis de la 4ma til la 11ma rango kompare a la preirinta Olimpiala Ludi. La Rusa publiko e la autoritatozi di ca lando deceptesis per la sportala prodaji di lia lando.
Leonid Tiagachev
(meze)
Kordiala interretala saluti ad omni. JM :::-:::
Ye la 3ma di marto 2010
Dio di santa Katarina Drexel.
DIO-PROVERBO / Jemez e plorez, ma sempre laborez !
ZODIAKO / En la zodiako-signo dil Fishi guvernata dal planeto Neptuno.
VETERO / Sunoza cielo ma koldeta temperaturo, cajorne, en Francilia.
KONCIZE
ISRAEL / PROJETO MINACANTA LA PALESTINANA DOMI REFUZESAS
La municipo di Yerushalaim rezolvis, hiere, refuzar, segun demando dal Israelana chefa ministro, l'exameno di arkeologiala projeto kontroversata, olqua esis konstruktota en la Araba quartero di Silwan, en Est-Yerushalaim, e qua minacas quaradeko de domi.
UGANDA / MORTIGERA TERENO-GLITO
Adminime 55 personi mortigesis e plu kam 350 plusa homi konsideresas kom desaparinta konseque di tereno-glito, qua enterigis hiere plura vilaji en l'esto di ta lando. L'armeani advokesis por rinforco en la distrikto Bududa, ye 40 km del urbo Mbale, proxima a la frontiero an Kenia.
FRANCIA / VIZITO DAL RUSA PREZIDANTO EN NIA-DAMO DI PARIS
Per selektar, hiere, veneracar la Santa Krono de dorni en la katedralo di Paris, Dmitri Medvedev konfirmis sua volo egardar la religii en la politiko dil Rusa Stato. Ita etapo, altagrade religial, en la agendo ja tre kargita dil Rusa prezidanto atestas en la realeso pri la plupromixigo inter la Patriarkeyo di Moskva e la Rusa Stato. La vizito da Medvedev en Francia bone 'okuris' e la Franci vendos ad il la dezirata militistal navi.
Dmitri Medvedev
Kordiala interretal saluti ad omni. JM :::-:::
Ye la 2ma di marto 2010
Dio di santa Henrikus Suso.
DIO-PROVERBO / Stomako hungroza ne oreloza.
ZODIAKO / En la zodiako-signo dil Fishi guvernata dal planeto Neptuno.
VETERO / Bela e sunoza vetero, cajorne, en Francilia.
KONCIZE
MALI / ITALIANA GAJO-HOMO ADVOKAS SOKURSO
Sergio Cicala , evo 65 yari, kaptita kom gajo-homo depos pasinta decembro kun ilua spozino Philomene Kaboure, evo 39 yari, da Al-Qaida en islamal Maghrebia (Aqmi), advokis ilua guvernerio facar "koncesaji" por obtenar lua liberigo ed olta di lua spozino. Segun negociero, la fato di ca paro esas "suciiganta". E la afero koncernanta tri Hispana gajo-homi anke kaptita da Aqmi, esas, lualatere, "ne progresanta".
USA / BARACK OBAMA PREPARAS "SENSACIONALA DIMINUTO" DIL NUKLEALA ARMI DI USA
L'Usana prezidanto preparas, segun importanta informo-fonto anonima, dokumento qua esas prizentota a la kongreso ye klozita pordo e qua "vizos grantar plu importanta rolo por la konvencionala armien la skopodespersuadar repliko" e lu renuncos la kontre-bunkera* armi atomala volita dal preirinta guvernerio di George Walker Bush.
LIBIA / VIZITO DA HANNIBAL KADHAFI A LA ENKARCERIGITA SUISO
La filiulo di la Libiana Statestro, di qua l'aresto en Geneve produktabis krizo inter la guvernerii di Tripoli e Bern, esis hiere en la karcero di Al-Jadaida en Tripoli, ube il vizitis la Suisa aferisto Max Goeldi, kaptita depos 19 monati en Libia konseque di ta incidento. Lua samlandano Rashid Hamdani, qua lu anke esis karcerano dum 19 monati, povis livar Libia ye la 23ma di februaro.
Hannibal Kadhafi (sinistralatere) renkontras Max Goeldi
Kordiala interretala saluti ad omni. JM :::-:::
Ye la 1ma di marto 2010
Dio di santa Albinus.
DIO-PROVERBO / Qua havas oro havas anke honoro.
ZODIAKO / En la zodiako-signo dil Fishi guvernata dal planeto Neptuno.
VETERO / Griza cielo, cajorne, en Francilia.
KONCIZE
IVORA RIVO / INTERKONSENTO DAL PREZIDANTO E DAL OPOZANTARO
La Ivorana opozo partoprenos la guvernerio, qua duris esar en periodo di formaco hiere. Pasinta-venerdie, interkonsento trovesis koncerne la elektala Komisitaro sendependa, olqua prezidesos dal anciena ministro Yussuf Bakayoko, membro dil demokratia partiso di Ivora Rivo, t.e. un de la precipua formaci dil opozantaro. Ita laste dicita nihiligis sua manifesto-impero.
POLONIA / LA MISILI* PATRIOT INSTALESOS DUM APRILO
La unesma misili* Patriot instalesos en Polonia dum venonta aprilo, tale anuncis saturdie la Poloniana ministrerio por Defenso. Usana soldati instalos ica misili* sur militistal provizerio jacanta ye 60 km de la Rusa inkluzajo Kaliningrad. La Usana autoritatozi abandonis ye la 17ma di septembro lia projeto instalor en Mez-Europa shildo kontre la misili* ye atingo-povo por longa disti.
SUISIA / KONDAMNO POS LA MILIT-ADVOKO DA KADHAFI
Suisia recevis grandanombra susteni pos l'advoko a "djihad" (santa milito) impulsata pasinta-jovdie da Muammar Kadhafi kontre Suisia qualifikata kom "miskredanta ed apostata" motive dil interdikto di la konstrukto di minareti. La relati inter la guvernerii di Bern e Tripoli desamelioreskis depos l'interpelo, dum julio 2008 en Geneve, di un de la filii di ca Libiana diktatoro.
Muammar Kadhafi
Kordiala interretala saluti ad omni. JM :::-:::
Ye la 26ma di februaro 2010
Dio di santulo Leander.
DIO-PROVERBO / Nulu esas sen defekti.
ZODIAKO / En la zodiako-signo dil Fishi guvernata dal planeto Neptuno.
VETERO / Sunoza cielo ma ventoza vetero, cajorne, en Francilia.
KONCIZE
ALBANIA / LA OPOZANTARO RETROVENAS A LA PARLAMENTO
La socialista opozantaro Albaniana rezolvis retrovenar, pasinta-jovdie, a la Parlamento di qua lu boikotis la labori depos la deputital elekto dil pasinta 28ma junio pro ke lu kontestas la rezultati di ol. La internaciona komunajo savigabis lua desquietesko opoze ad ita krizo ed a la efekti quan ol povis havar pri la progreso di ca lando vers Europana Uniono.
ARJENTINIA / L'ANCIENA PREZIDANTO ARJENTINIANA FALIIGAS LA KONTROLO-KAPTO DIL SENATO DAL OPOZANTARO
Dum absenteskar lastinstante, Carlos Menem, anciena Arjentiniana prezidanto, un de la maxim mal enemiki dil prezidantino Cristina Kirchner e di elua spozulo, ne posibligis a l'opozantaro rihavar la majoritato che la Senato. Lor la deputital elekto, la partiso dil prezidantino perdabis la kontrolo di amba guverneriala chambri.
Carlos Menem
USA / L'USANA SENATO PROLONGIS DE UN YARO TRI ARANJURI DIL PATRIOT ACT
Ita legifanta rezolvi por luktar kontre la terorismo instalesabis dal Bush-guvernerio. Parolesas pri "la movebla surveyo" dil komuniki di suspektati, segun la principo qua posibligas inquestar pri persono semblanta agar por su ipsa e pri la posibleso por la autoritatozi acesar la elektronikal mesaji di suspektato.
Kordiala interretala saluti ad omni. JM :::-:::
Ye la 25ma di februraro 2010
Dio di santa Robertus d'Abrissel.DIO-PROVERBO / Ne fidez parolo sen propra kontrolo !
ZODIAKO / En la zodiako-signo dil Fishi guvernata dal planeto Neptuno.
VETERO / Grizeta cielo kun milda temperaturo, cajorne, en Francilia.
KONCIZE
IVORA RIVO / NEKOMPLETA GUVERNERIO
La nova Ivorana guvernerio posedos 28 membri. Dek-e-sis titulieri anuncesis mardie vespere, e dek-e-un ofici esas ankore "provizota". La toteso de oli antee okupesis dal opozantaro nuna en la preirinta guvernerial sekretariaro. La ministrerii atribuata esas dispartigata inter la popul-Fronto Ivorana di prezidanto Laurent Gbagbo e la ex-rebeli dil Forci Nova di la chefa ministro Guillaume Soro.
Laurent Gbagbo
ALBANIA / UN/ONU VOLAS INQUESTAR PRI LA KOMERCACHI DI ORGANI
La guvernerio Albaniana mustas aceptar sendependa inquesto pri posibla komercacho di organi, tale deklaris pasinta-mardie en Tirana, la raportisto di UN/ONU okupante supri la temo di mortigi exterjudicia, Philip Alston. La guvernerio di Tirana refuzabis pasinta-yare requizito dal guvernerio di Beograd en la skopo efektigar inquesto en Albania koncerne komercacho di organi forprenita de Serba milit-kaptiti dum e pos la konflikto di 1998-1999 en Kosovo.
ISLANDO / PAZO VERS EUROPANA UNIONO
La Europana komisitaro rezolvis, hiere, rekomandar la komenco di negociado en la skopo posibligar la iro da Islando en Europana Uniono. La Europana Stati esas ankore aprobontaita propozo unanime. La autoritatozi di Bruxelles opinionis ke Islando esas suficante progresinta en la feldo politikala, ekonomiala e legifanta por justifikar plusa avanco.
Kordiala interretala saluti ad omni. JM :::-:::
Ye la 24ma di februaro 2010
Dio di santa Modestus.
DIO-CITAJO / "Neeviteble la kapitalismo falos kande Usa bankrotos". (J. Stalin)
ZODIAKO / En la zodiako-signo dil Fishi guvernata dal planeto Neptuno.
VETERO / Grizeta cielo kun milda temperaturo, cajorne, en Francilia.
KONCIZE
IRAN / ARESTO DI REBELA CHEFO
Abdolmalek Righi, chefo dil rebela sunnista movado Joundallah arestesis hiere. Ilu akuzesas organizir multanombra atenti, quale olta qua mortigis dum pasinta oktobro 42 personi, inter li esis oficiri dil Gardisti di la revoluciono, en la provinco Sistan-Balouchistan, este di ta lando, an la frontiero kun Afgania.
Abdolmalek Righi
NEDERLANDO / ELEKTO YE LA 9ma DI JUNIO
Anticipata deputital elekto produktita per la falo, pasinta-saturdie,dil guvernerio Balkenende, eventos ye la venonta 9ma di junio, tale anuncis hiere la informo-servo di ca rejio. La guvernerio falabis pos la retreto de la guvernerial koalisuro dal Partiso Laboristal, olqua esas opozata ad omna manteno dil trupi Nederlandana en Afgania dum ankore un yaro, quale ico esis dezirata da NATO/OTAN.
TAILANDO / PLU KAM UN MILION ENMIGRANTI EN TAILANDO MINACESAS PER EKPULSO
La guvernerio di Bangkok demandis a la resortisanti Burmana, Kambodjana e Laosana igar su konocata da lia guvernerii ante venonta-sundie, se no li ekpulsesos. Ico esas aranjuro vizanta luktar kontre la nelegala enmigrado. Dum la fino di decembro, la guvernerio di Bangkok ekpulsis a Laos 4.500 "Hmong"-i, inter li 158 esis refujinti agnoskata da UN/ONU.
Kordiala interretala saluti ad omni. JM :::-:::
Ye la 23ma di februaro 2010
Dio di santa Lazarus.
DIO-CITAJO / Olimla Britanianikoloniigis la teritorio di Usa. Hodie la Usani koloniigas Britania. (J. Stalin)
ZODIAKO / En la zodiako-signo dil Fishi guvernata dal planeto Neptuno.
VETERO / Grizeta cielo, cajorne, en Francilia.
KONCIZE
MALI / QUAR ISLAMISTI LIBERIGESAS
Quar membri di Al-Qaida en Maghreb islamista (Aqmi) liberigesis dum la nokto de sundio til lundio. La Nord-Afrikana brancho di Al-Qaida minacabis ocidar la Franca gajo-homo Pierre Camatte, raptita dum la fino di novembro, se lua demandi ne esus kontentigata. Ultre lo, viro, prizentita kom la "precipua autoro" dil rapto di tri humanala laboranti Hispana ye la pasinta 29ma di novembro en Mauritania, arestesis dal Mauritaniana policani.
Pierre Camatte
INSULI MALVINA / ARJENTINIA DESQUIETESKAS PRO BRITANIANA BORADO
Unesma borado por-petrolaBritaniana esis komencota, hiere, opoze a la insuli Malvina. Ico produktas tenso kun Arjentinia qua pluduras revendikar la suvereneso ye ta insuli. La guvernerio di Buenos Aires postulos permiso por la navi trairanta lua marala teritorio en la skopo irar a la insuli Malvina e lu volas instigar kunagar la "Grupo di Rio", olqua asemblas duadek-e-quar landi di Latinida Amerika.
HAITI / PSIKOLOGIISTI RENKONTROS PUERI ED INFANTI
Esquado de pedopsikiatriisti* e de specalisti pri la kindi* iros balde a Haiti por renkontror la adoptita infanti e pueri qui esas aceptota en Francia, tale anuncis hiere la ministrerio pri Exterlandala Aferi en Paris. Akra debato opozas asociuri de skolan-genitori deziranta acelerar la adopto-procedo e specalisti pri infanti e pueri qui avertas kontre la danjero di suplemantala traumato.
Kordiala interretala saluti ad omni. JM :::-:::
Ye la 22ma di februaro 2010
Dio di santa Izabela.
DIO-PROVERBO / Infantal inklino restas til la fino.
ZODIAKO / En la zodiako-signo dil Fishi guvernata dal planeto Neptuno.
VETERO/ Pre-printempala vetero, kelkete sunoza, cajorne, en Francilia.
KONCIZE
PORTUGAL / MORTIGERA PLUVI SUPER L'INSULO MADEIRA
Torentatra pluvi e violentoza venti produktinta inundi e tereno-gliti efektigis adminime 25 mortinti e deki de vunditi e desaparinti, pasinta-saturdie, sur la Portugalana insulo Madeira, segun informo dal guvernerio. La venti superiris 100 kilometri hore e la agitata maro produktis ultre lo importanta materiala destrukturi sur ica insulo jacanta ye 900 km de Portugal.
UKRAINA / YULIA TIMOSHENKO ABANDONAS ELUA REKURSO
La Ukrainana chefa ministrino Yulia Timoshenko renuncis, pasinta-saturdie, kontestar judiciale la vinko di lua adverso lor la recenta prezidantala elekto. Ita egerio* dil "oranjea revoluciono", qua havis 900.000 voti minuse kam lua rivalo, ne agnoskis sua desvinko, ma agis riturno por evitar la vexajo qua esabus desfavoroza judiciala decido.
Yulia Timoshenko
IVORA RIVO / MEDITADO-PROBO POS MORTIGERA KOMBATI
La prezidanto di Burkinabe-Faso, Blaise Compaore, aceptis hiere la du guidanti dil Ivorana opozantaro, Henri Konan Bedie ed Alassane Ouattara. Kin personi mortis pasinta-venerdie en Gagnoa, olqua esas la feudo dil statestro Laurent Gbagbo, lor afronti. Anuncata kom eventonta hodie, la formaco dil sekretariaro di la chefa ministro rienduktas Guillaume Soro, chefo dil ex-rebelaro di Forces Nouvelles (FN), impedesas depos un semano.
Kordiala interretala saluti ad omni. JM :::-:::
IDO • Linguo Internaciona • Universala • Neutra • Facila 
Nederlands
English
Deutsch
Français
Plusa lingui
