IDO • Linguo Internaciona • Universala • Neutra • Facila


English Deutsch Français Plusa lingui

La tombo di Louis Couturat trovita


Vu esas la esma
vizitanto di ca ret-situo

Specala ofro

Ido-Situi

Kurseto por Infanti da A. Martinez (Hispania), PDF-file 2Mb

Interretala dicionarii

Ido-uzantogrupi

Diversa texti, literaturaji, Idokursi ed Idofilmi

Plusa Situi

Idofonduri

Wiki interna

modifikez flanko-bendo

Impressum: / Impresumo:

Inhaber der Internetpräsenz www.ido.li:
propietanto dil retsituo www.ido.li

Deutsche Ido-Gesellschaft e.V.
Germana Ido-Societo r.a.
c/o ver.di Berlin
FB 8 / AG Ido
Köpenicker Str. 30
D- 10179 Berlin

La tombo di Louis Couturat trovita

Informo da Gaël Richard, che l' Yahoogrupo Francidol

Kara samideani,

Me anuncas a vi la granda novajo : me trovis e vidis la tombo di Louis Couturat !

Ol trovesas en la vilajo di Laroche Saint Cydroine en la departmento di Yonne (Burgundia). Laroche Saint Cydroine esas la naskovilajo di ilua patro, Joseph-Alexandre Couturat, qua naskis ibe en 1828 ed anke di lua avi, quale la avulo di la latero di lua patro, Laurent Noel Couturat, qua naskis en Laroche en 1792.

La tombo di Louis Couturat esas en la olda parto di la tombeyo di Laroche Saint Cydroine. Ol havas la numero 18 sur la mapo dil olda tombeyo. Sur la tombo esas nur la yena enskriburi : “FAMILLE COUTURAT NOEL” (familio Couturat Noel) e sube “Concession à perpétuité” (perpetua koncesiono) Ma existas nula dubito : ta tombo esas vere ta di Louis Couturat. Nam me iris en la municipala domo e on montris a me la registro di la tombeyo. En ca registro, ne esas la nomi di ti qui esis enterigita en la tombi ma nur di ti qui kompris la tombi. Pri la numero 18, on lektas ke la nomo di la komprinto esis :

“Louis Couturat à Bois-le-Roi”

e la dato di la kompro esas : 1ma Agosto 1911.

Singlu ek vi savas ke taepoke Couturat havis domo en Bois-le-Roi. Me konjektas ke la antea koncesiono di la familio ne esis perpetua e ke Couturat mustis rikomprar lu por lu ipsa e ke il kompris perpetua koncesiono.

La tombo esas en sat mala stando ma tamen ne ruptita. La stono esas kovrita muski e likeno. La literi esas tamen lektebla. Cirkum la tombo esas greto de forjita fero tote rustizita. La tombo esas klare ne plue uzita. Sur la petrokruco super la tombostono esis fixigita, evidente multe plu tarde kam ilua morto, kruco ek bruna vitro (plexiglas ?) kun kristo e mikra literi INRI ma ta vitrokruco esas grandaparte ruptita.

Me iris a Laroche Saint Cydroine hodie matine frue per treno de Paris. On povas irar de Paris (staciono di Bercy) a la staciono di Laroche-Migennes en 1h20 per treno. De la staciono, me marchis cirkume 5 km til la tombeyo. La vilajo di Laroche esas tre extensita alonge la precipua voyo ed anke alonge la rivero Yonne, qua esas ibe sat larja. La vilajo havas 1300 habitanti cirkume. Tre proxim la tombeyo esas bela kirko dil 12ma yarcento dil romanala stilo konsakrita a Santa Cydroine (Santa Sidroine), qua subisabus martirigo dum la 3ma yarcento proxim la vilajo.

Me remarkis ke Bois-le-Roi situesas ye mivoyo inter Paris e Laroche Saint-Cydroine. Me konjektas ke Couturat selektis Bois-le-Roi ne nur pro ke la cirkumaji esas belega (foresto di Fontainebleau) ma anke pro ke de Bois-le-Roi il povis vehar per lua automobilo ambe a Paris e a Laroche sat rapide. Segun me il havis plura membri di lua familio vivanta en Laroche (e ne obliviez ke lua spozino esis anke ilua kuzino) e probable ke il volis renkontrar li kelkafoye. Il duris havar relati kun Laroche e il kompris (o rikompris) lua familiotombo. Meaopinione, pri la personala historio di Louis Couturat, on subevaluas l’importanteso di la vilajo di lua familio ube naskis lua patro ed avi. Ma certe, l’informi pri Couturat venas a ni de lia filozofiorelati od idorelati qui ne savis pri lua tre privata familiala relati. La deskovro di ilua tombo permisas komprenar kelke plu bone lua biografio.

Me sendos fotografuri di la tombo quik kande to esos posibla. Regretinde, me ne havis mea fotografilo ma nur mea mikra e chipa telefonilo e do la qualeso di la fotografuri ne esos tre bona...

Kordiala Saluti
Gaël Richard
Marseille (Francia)