DIG-JHV-2014

Yarala Chefkunveo di Germana Ido-Societo en Schwielowsee, Germania

Inter venerdio, la 29ma e sundio, la 31ma di agosto 2014 eventis la yarchefkunveno di Germana Ido-Societo en Schwielowsee, Germania. En venerdio ni renkontris en la urbo centro di Potsdam. Potsdam esis somerala rezidio di Prusia reji dum 250 yari. Ni vidis la importanta vidindaji quale la "Brandenburger Tor (pordo)" e la "Peter und Pauls" basilika. La unesma, konstruita kelka yari pos la vinko en la sepyara milito kun Francia, Rusia, Austria kontre Prusia, Anglia e Hesia, symbolo di la mondopovo Prusia, la duesma, finigita en 1870, montris la rikonsilio kun la katolikismo, chefe kun Austria, ma anke la komenco di la Germana Imperio. Ni pose vizitis la "Park Sanssouci" qua esis facita dum la tempo di Friedrich II. (la Granda ma anke la "Alter Fritz") til Friedrich IV. Ni experiencis interesiva ed agreabla exkurso ibe. Pose ni komune manjis en la centro dil urbo opozite la "Brandenburger Tor".

En saturdio ni vizitis antedimeze la somerala domo di Albert Einstein en Caputh, Schwielowsee. Albert Einstein vivis ibe de 1929 til 1932, kande lu restis en la USA. La domo, facita en la stilo di la nova kozaleso, permisis interesiva vidpunti en la historio ante e dum la "Triesma Imperio". Du domi apude situesis skolo por yuda infanti (Gertrud Feiertag-Haus), quo Einstein permisis dum 1933-1935 usar sua domo pro la infanti, kande lu savis ke lu ne retrovenos ek USA. La domo en 1935 esis expropriata. Pos nia promeno tra la vilajo Caputh, vizitante la famoza Stüler-basilika e la parko di la kastelo Caputh, ni dineis kune en la hotelo Müllerhof.

Pos la dineo eventis nia yarala chefkunveno en la hotelo. Partoprenis 7 membri e 3 gasti. La prezidantaro raportis pri la pasinta yaro e pri la nuna membrala e pekuniala aferi. Kompozite la aferi esis positiva, tamen eventis kelka ne tale agreabla aferi qui ofte impedis nia laboro por Ido. Pos la diskuti ni elektis nova prezidantaro. Restis pasinta e nova prezidanto, Dr. Detlef Groth, kasero Dieter Schmidtchen, e sekretario Eberhard Scholz. Pro ke Dr. Thomas Schmidt, segun sua profesionala e personala aferi, ne plu kandidatesis, ni elektis Rudolf Gensch kom nova vice-prezidanto . La atmosfero di nia diskuti esis tre amikala e helpema, qua kurajigis ni en nia sequanta laboro por nia komuna linguo Ido. Pos la yarchefkunveno kelka Idisti pasis la varma e bela vespero kun glacajo ye la rivero Havel en Caputh.

Ni ye la yarchefkunveno anke babilis pri la sequanta Ido-renkontro quon volis organizar la Ido-amiki, en od apude de Berlin. La datumo esos cirkume 26ma -30ma di agosto od 2ma-6ma di septembro 2015. Ni tale anke povus vizitor Potsdam, Caputh e la Ido-biblioteko en Berlin. La Ido-amiki anke serchos apta loko por la lojigo dum la nokti. Qua datumo esas plu apta?

Sundio, kelka Idisti vehis kun shipo ye la Templiner See (lago), de Potsdam a Caputh. La ship-voyajo montris la beleso di la naturo en ta regiono en la sud-westo di Berlin. Ni finigis la renkontro kun komuna dineo en la varma tard-somerala suno ye la Fährhaus en Caputh.

Adavane ...

Kun kordiala saluti,
Dr. Detlef Groth
Prezidanto di GIS

(:galleria list="#DIG-JHV-2014" width="800" heigth="600":)