Ido prizentesis che EXPOLINGUA 2018 en Berlin

Ido prizentesis che EXPOLINGUA 2018 en Berlin

Inter la 16ma e 17ma di novembro 2018 eventis la cayarala internaciona linguoferio EXPOLINGUA en la Rusa Domo en la Germana chefurbo Berlin. Same kam ya en la recenta yari l'Idoamiki Berlin kun helpo di altra membri dil Germana Ido-Societo aranjis estaleyo pri Ido pro reklamar nia komuna linguo.

Multa vizitanti preterpasis l'estaleyo ed informesis pri Ido. La majoritato di li l'unesma foyo audis pri Ido. Li povis kunportar adheme propagili pri Ido en diversa lingui o mem komprar Idokalendario 2019. Cetere montresis kelka literaturaji tradukita aden od origine skriptita en Ido. L'Idoamiki ye la fino dil ferio rezumis, ke l'estaleyo esis tre sucesoza e plu multa homi vizitis ol kam en la recenta yari.

Ultre l'estaleyo anke prizentesis Idokurseto tre diligente preparita e facita da la membro dil Germana Ido-Societo Hans Stuifbergen de Nederlando. Koram askoltinti en preske plena salono Hans docis la bazala reguli di Ido quale alfabeto e gramatiko. Cetere lu kelke parolis pri la historio di Ido. Fine il prizentis la himno "La Mondo Idala" da Brian Drake.

Esas dezirata, ke Idisti anke en altra landi kam en Germania future uzos simila okazioni pro publike reklamar nia komuna linguo.

Me volas uzar l'okaziono pro kordiale gratular l'Idoamiki Berlin, Hans Stuifbergen e Gert Heintze, qua senfatigante imprimas e desegnas literaturaji, ed omna altri, qui kontribuis a l'estaleyo pro lia sucesoza aktivesi favore Ido.

Yen vu povas spektar filmeto, qua kontenas la sequanta e plusa fotografuri.

Ica raporto kreesis da
Frank Kasper

\\