Europana Ido-renkontro 2010 en la Badenia-Wurtemberga universitato-urbo Tübingen (Germania)

Invito ad Europana Ido-renkontro 2010

La direktantaro dil Germana Ido-Societo kordiale invitas omna Idisti ed interesemi asistar l'Europana Ido-renkontro 2010.

L'Europana Ido-renkontro 2010 eventos dum la tempo inter jovdio, la 19ma di agosto 2010 (arivo) e mardio, la 24ma di agosto 2010
en la Badenia-Wurtemberga unviversitato-urbo Tübingen proxime a la chefurbo de Badenia-Wurtemberg Stuttgart.

Kadre di ica renkontro propozesis ed esos aranjata apud la kustumala laborkunsidi ed exkursi informestaleyo pri Ido e pri ULI en l'urbo Tübingen ed Ido-kurseto por interesemi.
Necesa kondiciono por sucesoza realigo di ica propozo kompreneble esus l'asisto e kunhelpo di multa experiencema Idisti.

Loko:
etajo por gasti en la Viktor-Renner-Domo (tel. +497071/559020)

Pro ke omna chambri en la etajo por gasti en la Viktor-Renner-domo intertempe esas exhaustita ti interesemi,
qui nun ankore intencas venar a Tübingen devas ipsa sorgar por lito en irga hotelo!

Programo:
La programo dil Europana Ido-renkontro 2010 en Tübingen trovesas hike.

Pro ke l'Europana Ido-renkontro 2010 eventos en Germania kadre di ca evento anke aranjesos l'yarchefkunveno 2010 dil Germana Ido-Societo.
Ol eventos en saturdio la 21ma di agosto 2010 ye 02.00 kloko posdimeze en Tübingen.
Ad ica yarchefkunveno esas invitata omna membri di GIS ed omna altra interesemi.

La direktantaro dil Germana Ido-Societo pregas omna membri di ULI e di GIS ed omna interesemi notar la termino dil Europana Ido-renkontro 2010
ed anuncar la partopreno tam balde kam posible!!!

Hike trovesas informi pri l'urbo Tübingen ye la Ido Wikipedio en Ido

Hike trovesas mapo kun la voyo de l'autovoyo a la Viktor-Renner-Domo!!

Hike trovesas kloktabelo di autobusi, qui vehas inter la chefa fervoyala staciono e la Viktor-Renner-Domo ed inverse!!

Por l'uzado dil autobusi grup-bilieti esas disponebla.
Ica bilieti esas valida pos 8:30 kloko por admaxime kin personi e kustas 7,20 Euro.

Hike trovesas anuncformulario, qua esas direte plenigebla ye la propra komputoro e pose direte dissendebla e-poste od imprimebla e pose dissendebla per postala letro o per faxilo

Instruciono por plenigar la anuncformulario e dissendar ol e-poste:
Unesme voluntez pleniagar la formulario per la klavaro di vua komputoro.
Pose voluntez kliktar supre dextre a la butono "sendar e-poste".
Se vu ankore nultempe antee plenigis tala elektronikala formulario vu en la sequanta fenestro devas selektar, ka vu uzas e-postala programo por sendar e-postala voyajo o ka vu direte uzas interreta servilo.
Se vu selektis, ke vu uzas e-postala programo ica programo pose aparesas kun adjuntita e-postala mesajo adresita a l'aranjeri dil Ido-renkontro 2010.
Ica mesajo kontenas atachuro e texto en ta linguo, en qua vu uzas la programo "Adobe Reader".
Voluntez simple dissendar ica mesajo, quan l'aranjeri dil Ido-renkontro 2010 pose recevos. Li anke povos apertigar e lektar l'atachuro dil mesaji.
Do, ne timez plenigar l'anuncformulario e sendar ol a l'aranjeri dil Ido-renkontro 2010 per la butono "sendar e-poste"!!

Me ja nun prejoyas pri multnombra partoprenanti dil Europana Ido-renkontro 2010 e dil yarchefkunveno di GIS 2010 en Tübingen!!

Amikala saluti a vi omna
Frank Kasper
prezidanto dil Germana Ido-Societo r.s.

A la programo dil Europana Ido-renkontro 2010 en Tübingen
A l'invito a la yarchefkunveno dil Germana Ido-Societo ye la 21ma di agosto 2010 en Tübingen (Germanlingue)
Retre a la frontispicopagino di ULI