Memoro pri Jerzy Gralak
(*05ma di novembro 1935 - †08ma di januaro 2010)

Kar amiki di mea patro Jerzy Gralak,

Me devas komunikar a vu, ke mea patro Jerzy Gralak mortis ye 8esma januaro di ca yaro.
Lu pregis me transsendar la sequanta mesajo pos lua morto.

respektoza ed omno bona
Piotr Gralak

"Kara amiko,

Kande vu recevos ca-mesajo me ja ne vivos.

Me mortis ye la 08ma di januaro 2010.

Me deziras dankar pro Vua korespondado kun me.
La korespondado kun vu esis granda plezuro por me ed ol esis granda
stoko di nova vorti. Me dankas ankorefoye. Ne pensez male pri me.

Kun saluti amikala , Jerzy"
* * * *

Segun mesajo che forumo di Interlingua, me saveskis ke Jerzy Gralak,
interesati per plura interlingui ed anke per Ido,
transmondeskis ye la 8ma di januaro 2010.
Trista saluti.
Jean Martignon
* * * *

De Mexikia me sendas mea maxim kondolo por la familiani di Sioro Gralak.

Me unionas me al trauro dil idistaro pro la departo di ta estiminda samideano.

Kordiale
Jose Cossio Ramirez
* * * *

Tre estimata sioro Piotr Gralak,

ye la nomo dil Idoamiki Berlin me expresas a vu nia maxim profunda kondolo.
Ni asertas a vu, ke ni ne oblivios vua patro.
Il legacis restanta heredajo por l'Ido-linguo.
Ni perdis bona amiko.

En profunda trauro
Eberhard Scholz
* * * *

Kara gesamideani!

Anke me kun grandega regreto e trauro recevis l'informo pri la morto di
samideano Jerzy Gralak.

Jerzy Gralak anke esis mea amiko.
Me persone konoceskis lu en somero 1998 okazione dil internaciona
Ido-renkontro en Bialobrzegi (Polonia).
Lore me sejornis dum kelka dii ante la komenco dil Idorenkontro en Warszawa.
Jerzy esis tante afabla rezervar por me dormeyo en hotelo.
Lu queris me en la autobus-staciono pos mea arivo en Warszawa.
Dum mea sejorno en la chefurbo di Polonia e la hemurbo di Jerzy il akompanis
me tra la urbo e montris a me la maxim famoza vidindaji inter qui anke esis
la tombo di Ludwig Zamenhof, la kreito di Esperanto.
Ni komune vehis per autobuso de Warszawa a Bialobrzegi e dum la sejorno ibe
komune lojis en un chambro.

Nultempe l'Idistaro anke devez obliviar la diligenta penadi di Jerzy krear
od plenigar precipue dijitala dicionarii Polona-Ido ed inverse, di qui anke
me enretigis un.

Jerzy Gralak sempre restos en mea maxim agreabla memoro.

Lu repozez tranquile.

En profunda trauro
Frank Kasper
prezidanto dil Germana Ido-Societo

* * * *