IDO • Linguo Internaciona • Universala • Neutra • Facila


English Deutsch Français Plusa lingui

Novaji-Martignon-2009-Mayo


Vu esas la esma
vizitanto di ca ret-situo

Specala ofro

Ido-Situi

Kurseto por Infanti da A. Martinez (Hispania), PDF-file 2Mb

Elektronikala dicionarii

Ido-uzantogrupi

Diversa texti, literaturaji ed Idokursi

Plusa Situi

Idofonduri

Wiki interna

modifikez flanko-bendo

Impressum: / Impreso:

Inhaber der Internetpräsenz www.ido.li:
propietanto dil retsituo www.ido.li

Deutsche Ido-Gesellschaft e.V.
Germana Ido-Societo r.a.
c/o ver.di Berlin
FB 8 / AG Ido
Köpenicker Str. 30
D- 10179 Berlin

Onlinekontakt
Interreta kontaktformulario

Administrator der Internetpräsenz www.ido.li:
administranto dil ret-situo www.ido.li

Frank Kasper
Breitscheidstr. 22
D- 90459 Nürnberg

Onlinekontakt
Interreta kontaktformulario

Novaji-Martignon-2009-Mayo

Ye la 29ma di mayo 2009.

Dio di santa Geraldina.

DIO-PROVERBO / Esas preferinda envidiesar kam esar objekto di kompato.

ZODIAKO / En la zodiako-signo dil Jemini guvernata dal planeto Merkuro.

VETERO / Bluega e sunoza cielo, cajorne, en Francilia.

KONCIZE

SENEGAL / ICA LANDO DARFAS NE OKUPESAR PRI HISSENE HABRE
La Internaciona Korto pri judiciado refuzis, hiere, en Den Haag, demando da Belgia por koaktar Senegal mantenar sur lua teritorio la Chadana ex-prezidanto Hissene Habre, en surveyata rezideyo en Dakar e qua akuzesas pri krimini kontre la homaro. Belgia qua emisis aresto-dokumento kontre ilu, kontaktis la Internaciona Korto pri judiciado por ke ol imperez Senegal judiciar ilu od extradar ilu.

MOLDAVIA / PREZIDANTALA ELEKTO AJORNESAS
La komunista majoritato che la Parlamento di Moldavia rezolvis ajornar til la triesma di junio la elekto previdita por hiere di la nova prezidanto di ca lando pro ke lu ne povas impozar lua kandidato, nome la chefa ministro Zinaida Greceanii. Falio di la voto produktus senvalidigo dil Parlamento. Ye la pasinta 20ma di mayo, ja la unesma probo elektar prezidanto dessucesis nur pro un mankanta voto. Plusa falio koaktus organizor nova elekto.

AFGANIA / DU BRITANIANA MORTINTI
Du Britaniana soldati transmondeskis konseque di explozi en sud-Afgania. Militisto ocidesis lor explozo proxim Garmsir. Altra mortis pro la konsequi di vunduri produktita per explozo, dum ke il esis patrolianta, ye la pasinta 22ma di mayo. Ita mortinti irigas til 163 la nombro de Britaniana soldati mortigita depos la komenco dil milit-agi en 2001 en Afgania.

Kordiala interretala saluti ad omni. JM :::-:::

Ye la 28ma di mayo 2009.

Dio di santa Germanus.

DIO-PROVERBO / Hastez lente, agez paciente !

ZODIAKO / En la zodiako-signo dil Jemini guvernata dal planeto Merkuro.

VETERO / Grizeta cielo, cajorne, en Francilia.

KONCIZE

BENGLADESH / DEVASTERA CIKLONO
La potenta ciklono Aila qua balayis, pasinta-lundie, la litoro di Bengladesh e di India efektigis 183 mortinti en ita amba landi. Sat granda nombro de la 113 mortigiti en Bangladesh esas neadulta personi qui perisis per drono. Ita malega vetero produktis anke preske 6500 vunditi e 400.000 senhema personi ed anke devastis la kultivi, animaledukeyi, vilaji e chosei di la sudala chosei di Bengladesh. Soldati e civili disdonas nutrivi, drinkebla aquo ed urjanteso-shirmeyi.

VIETNAM / DEMOGRAFIAL DESEQUILIBRO
La desequilibro, lor la nasko inter la nombro de yunini e de yunuli duras plumaleskar en Vietnam, tale asertis hiere la Kapitalo-fonduro dil Unionita Nacioni por la habitantaro, olqua advokas plu bone aplikar l'interdikto kontre la selektal abortigo. En 2008, la procento sur la toteso di ca lando esis de 112,1 yunuli ye 100 yunini , opoze a 111,6 ye 100 en 2007. La refero-nivelo esas, kande ne esas selekto, 105 ye 100.

GERMANIA / ESOS PLU DESFACILA OBTENAR ARMI
La Germana guvernerio adoptis, hiere, nova aranjuri vizanta desfaciligar l'obteno di armi dal yuni. Ico eventas aproxime tri monati pos masakro facita en gimnazio da adolecanto. Segun la adoptita lego-texto, demandanto por yurizesar surhavar armi mustas denun pruvar ke lu povos konservar sua armo en loko neacesebla a minoro.

Kordiala interretala saluti ad omni. JM :::-:::

Ye la 26ma di mayo 2009.

Dio di santa Filipus Neri.

DIO-PROVERBO / Oldini yuninin ne prizas.

ZODIAKO / En la zodiako-signo dil Jemini guvernata dal planeto Merkuro.

VETERO / Sturmema vetero, cajorne, en Francilia.

KONCIZE

MACEDONIA / KAD BALDE LA VISTI ABOLISESOS ?
Europana Uniono povus supresar balde la visti por la Macedoniana resortisanti, tale savigas raporto dal Europana Komisitaro. Macedonia obtenis la statuto di oficala kandidato ad EU/UE dum la yarofino 2005. Ol ja satisfacas la kondicioni koncerne la sekureso dil identeso-dokumenti, la jerado dil frontieri o la publika sekureso. Opozite, Serbia ne esas pronta, tale konstatas la citita raporto.

MONGOLIA / LA OPOZANTARO GANAS LA PREZIDANTAL ELEKTO
La kandidato dil demokrata opozantaro Mongoliana esis vinkero, hiere, lor la prezidantal elekto opoze a la ekoficeskanta Statestro ex-komunista. La Mongoliana elektala Komisitaro anuncis la vinko di Tsakhiagiin Elbegdorj, evo 46 yari, anciena chefa ministro qua esis un de la guidanti dil pacema revoluciono fininta la komunista rejimo dum la yari 1990.

INDIA / DU MORTINTI LOR SEDICII INTER "SIKH"-I
Du manifestanti mortigesis, hiere, en nord-India dum sedicii sequanta la afronti, ye la predio, inter diversa "sikh"-i en Wien, Austria. Plura kombatachi eruptis en diversa loki dil nordala Stato Pendjab, ube noktala ekiro-interdikto establisesis. Religiala disputo en "sikh"-a templo di Wien eventabis pri la temo di la neceseso egardar o ne la kasti-sistemo.

Kordiala interretala saluti ad omni. JM :::-:::

Ye la 22ma di mayo 2009.

Dio di santa Emilius.

DIO-PROVERBO / Ad olda simio onu ne docas grimasar.

ZODIAKO / En la zodiako-signo dil Jemeli guvernata dal planeto Merkuro.

VETERO / Bluega e sunoza cielo, cajorne, en Francilia.

KONCIZE

USA / QUAR USANI AKUZESAS PRI TERORISTA PROJETI L'Usana judiciisti anuncis, hiere, l'aresto e l'akuzo di quar Usani, qui akuzesas programizar terorista ataki. La quar aludita viri arestesis, pasinta-merkurdie, per l'akuzo di "komploto vizante produktar explozi proxim sinagogo ed en la quartero di Riverdale en Bronx, New York, e pafar a militistala avioni halte restanta sur la militistal provizerio dil nacionala guardo en la aerportuo di Stewart en Newburgh, New York, kun Stinger-misili* ye sulo-aero", segun komunikajo dal prokuratoro. Ica suspektati esis surveyata depos la pasinta yaro.

GABON / OMAR BONGO ESAS GRAVE MALADA La Gabonana prezidanto, Omar Bongo Ondimba, qua esas en hospitalo depos la 6ma di mayo en privata kliniko di Barcelona "standas tre male", segun la Hispana ministro pri Exterlandala Aferi, Miguel Angel Moratinos, ilqua citesas dal diala jurnalo Kataluniana LA VANGUARDIA. Ita maxim anciena de la Afrikana prezidanti evanta 73 yari, e qua esas de quaradek-e-un yari ye la povo, esabus operacita pri intestinala kancero.

UNIONITA REJIO / DU LORD-I REVOKESIS La Chambro di la lord-i revokis pasinta merkurdie du de lua membri pro komercacho pri influo. Lord Peter Truscott e lord Thomas Taylor, amba membri di la Labor-partiso, insidiesis da jurnalisti dil SUNDAY TIMES qui kredigis da li ke li esas mediacanti laboranta ye la servo di exterlandala entraprezeyo pri distributo.

Kordiala interretala saluti ad omni. JM :::-:::

Ye la 20ma di mayo 2009.

Dio di santa Bernardinus.

DIO-PROVERBO / Unu kornin tenas, altru lakton prenas.

ZODIAKO / Iro en la zodiako-signo dil Jemeli guvernata dal planeto Merkuro.

VETERO / Sat sunoza cielo kun humide varma temperaturo, cajorne, en Francilia.

KONCIZE

MALAWI / GENERALA ELEKTO
La Malawani votis, hiere, por elektar lia prezidanto e rinovigar lia Parlamento. Pos la famino qua, en 2005, frapis kin de la dek-e-tri milion habitanti di ca mikra lando di austral Afrika, la ekoficeskanta prezidanto, Bingu wa Mutharika, evo 75 yari, lokizas sua espero pri la suceso di sua subvencioni-programo por la semini e la fertiliganta kemiaji en la skopo obtenor duesma ofico-periodo de kin yari.

INSULI KOMORES / PERMISO POR PLU LONGA TEMPO DIL PREZIDANTALA OFICO-PERIODO
Per 93,8% de la voti, la "yes" vinkis lor la plebicito pri kontroversata revizo konstitucala. La dicita reformo previdas plulongigar de 4 til 5 yari la ofico-periodo dil federural prezidanto e diminutar la povi dil prezidanti di la tri insuli por divenigar li guberniestri. Depos ke ol divenis sendependa de Francia en 1975, ita arkipelago registragis 19 probi de Stato-stroko.

HAITI / NOMINO DI BILL CLINTON
Ica anciena Usana prezidanto esis nominota , hiere, kom sendato dil Unionita Nacioni por Haiti. La dicita ofico-kreo vizas atraktar l'atenco pri la maxim povra lando dil Amerikana kontinento qua devastesis per plura uragani pasintayare. Dum la pasinta monato aprilo, la partoprenanti a konfero dil donaceri en Washington aceptis spensar pekuniala helpo de 240 milion euri por la rikonstrukto di Haiti.

Kordiala interretala saluti ad omni. JM :::-:::

Ye la 19ma di mayo 2009.

Dio di santa Ivo.

DIO-PROVERBO / Quon la kordio portas, ton la vizjo raportas.

ZODIAKO / En la zodiako-signo dil Tauro guvernata dal planeto Venero.

VETERO / Sat sunoza cielo ma sturmoza vetero, cajorne, en Francilia.

KONCIZE

POLONIA / PROTESTI KONTRE HISTORIALA "VIDEO"
Polonia kritikis, hiere "video clip" dil Europana Komisitaro celebranta la 20ma aniversario dil falo di la "fera kurteno", denuncante "omisaji, kurtigaji e flagrant erori". Lu (Polonia) deploras ke la mobilizado dil konstrukteyi di Gdansk en 1980, olqui duktis a legaligo dil sindikato Solidareso, esez mingrandigita e regretas ke la nura anciena persono Polona videbla esas l'anciena diktatoro Wojciech Jaruzelski.

IRLANDO / KA MAJORITATO FAVORE A LA KONTRATO DI LISBOA ?
Opinion-inquesto publikigita, hiere, en la diala jurnalo IRISH TIME revelas ke 52% del Irlandani esus pronta aceptar aprobar per plebicito la kontrato di Lisboa , quan li refuzabis dum junio 2008 per 43,4% de la votanti. Segun ica jurnalo, ita modifiko explikesas per la plumalesko dil ekonomiala situeso di ca lando. Irlando, olqua esas la unika Stato di EU/UE koaktata per lua Konstituco submisar a plebicito la kontrato di Lisboa, esas expresonta su itere carelate ante la venonta yaro-fino.

BOSNIA-HERCEGOVINA / LA ANCIENA KOMBATANTI SERBA PROTESTAS KONTRE L'USANA POLITIKO
La Federuro dil anciena kombatanti Bosniana Serbi advokis lua 110.000 membri manifestar cadie, dum la vizito dal Usana vice-prezidanto, Joe Biden. Lu timas politiko qua " produktus la dominaco da etno* super le cetera", tale deklaris lua porparolanto aludanta la Mohamedana komunajo.

Kordiala interretala saluti ad omni. JM :::-:::

Ye la 18ma di mayo 2009.

Dio di santa Dioskorus.

DIO-PROVERBO / Tablon ne tuko ornas, ma kuko.

ZODIAKO / En la zodiako-signo dil Tauro guvernata dal planeto Venero.

VETERO / Sat sunoza cielo e milda temperaturo, cajorne, en Francilia.

KONCIZE

LITUANIA / EUROPANA KOMISARIO POVUS DIVENOR PREZIDANTINO
Muliero evanta 53 yari, nuna komisario por la konkurenco, konsideresis hiere kom la granda favoratino por divenor prezidantino di Lituania, dum ke la unesma parto del voto 'okuris' hiere. Nome, s-ino Dalia Grybauskaite profitis ye 53% de la vot-intenci, kun granda disto ad elua rivali.

SUDAN / REBELA CHEFO DI DARFUR CHE LA IPK
Un de la grupestri di la rebeli di Darfur, Bahar Idriss Abu Garda, esos prizentata koram la Internaciona Punisala Korto (IPK) adube il iris tote libere. Ica chefo dil Unionita Fronto por la rezisto (URF) suspektesas direktir atako dum qua 12 soldati por paco-manteno di Afrikana Uniono (AU) mortigesis, ye la 29ma di septembro 2007, en Haskanita, Darfur.

RUSIA / LA RUBLO FORSAN DIVENOS REZERV-PEKUNIO MONDALA
La Rusa prezidanto profitos la internaciona somito-interrenkontro dil G8, qua kunvenigos la ok landi maxim industriizita en Italia dum la monato julio, por aludar ica ideo. "Ni reflektas pri la kreo di fundamenti por nova financala arkitekturo, equitatoza arkitekturo", tale adjuntis la sucedanto di Vladimir Putin. La G8 diskutos pri la mondala krizo ekonomiala e financala.

Kordiala interretala saluti ad omni. JM :::-:::

Ye la 14ma di mayo 2009.

Dio di santa Theodora.

DIO-PROVERBO / Yun infanti laborigas ed adulti dolorigas.

ZODIAKO / En la zodiako-signo dil Tauro guvernata dal planeto Venero.

VETERO / Griza e pluvema cielo kun humide varma temperaturo, cajorne, en Francilia.

KONCIZE

RUSIA / PAPAVERO-CHASO
La kuki kun papavero, qui esas tre prizata en Rusia, minacesas desaparar de la vendeyi, pro ke "centi" de vendisti di ta spico akuzesas pro narkotaj-komercacho. Tale anuncis, hiere, lia advokati e la defenseri dil homala yuri. Li opinionas ke parolesas pri "sistematra atako" impulsata dal federural servo kontre-narkotaji desfavore a la furniseri di nutrivala papavero.

CHAD / MANIFESTI KONTRE SUDAN
La Chadana prezidanto Idriss Deby partoprenis, hiere, kunveno da mili de Chadani en N'Djamena "kontre la Sudanana atako", aludante l'atako, pasinta-semane, da rebeli veninta de Sudan. La prezidanto marchis ye la kelka centi de metri qui separas la prezidantal palaco de la placo dil Sendependeso adube venabis cirkume 10.000 personi.

UNIONITA REJIO / LA SKANDALO PRI LA SPENSO-NOTI
La partiso liberala-demokrata, duesma opozo-partiso Britaniana, vizesis hiere per la skandalo pri la exajerita spenso-noti dil deputiti. La labor-partiso ye la povo e la konservema partiso amba ja spricizesis per ca skandalo. Ica spenso-noti por duesma habiteyo esas ya legala ma la profitanti di oli akuzesas explotir ica disponeblajo per pagigar a su koqueyo-utensili, la manteno di lia balno-baseno o nutrivi por hundi. Opoze l'ampleso di ta skandalo, la chefa ministro rezolvis komplete riexamenigar la spenso-noti dil deputiti ye periodo de quar yari.

Kordiala interretala saluti ad omni. JM :::-:::

Ye la 13ma di mayo 2009.

Dio di santa Andreas-Hubertus.

DIO-PROVERBO / Homo fidas, fortuno decidas.

ZODIAKO / En la zodiako-signo dil Tauro guvernata dal planeto Venero.

VETERO / Grizeta, poke sunoza cielo kun humide varma temperaturo, cajorne, en Francilia.

KONCIZE

ITALIA / DU HOMI KUN FRANCA PASPORTO AKUZESAS HAVAR LIGILI KUN AL-QAIDA
Li esas enkarcerigita de sis monati en Bari, sud-Italia, Bassam Ayachi, evo 63 yari, "imam" de Siriana origino, e Raphael Gendron, evo 34 yari, akuzesis hiere pri "aparteno a terorista celulo relatanta Al-Qaida". Li suspektesas preparir atenti en Francia (vizante precipue l'aerportuo di Roissy) ed en Anglia. Li esabis arestata dum novembro 2008. La koncernata servi en Paris esis cirkonspekta pri la realeso di ca atento-minaco.

TURKIA / REAKTO DAL GUVERNERIO DI ANKARA A LA DEKLARI DAL GUVERNERII DI PARIS E BERLIN
La guidanti Franca e Germana "indijas vidorgano" koncerne l'adhero di Turkia ad Europana Uniono, tale deklaris hiere en Ankara la Turka prezidanto Abdullah Gul. Il esis reaktanta a la deklari, dum la pasinta semano-fino, dal Germana kancelerino Angela Merkel qua itere asertis, koram Nikolaos Sarkozius (Nicolas Sarkozy), en Berlin, ke el opozas su a la iro da Turkia en EU/UE.

MOLDAVIA / L'ANCIENA KOMUNISTA PREZIDANTO DIVENAS CHEFO DIL PARLAMENTO
Dum ke il esis unika kandidato, Vladimir Voronin, elektesis hiere kom prezidanto dil Parlamento di ca anciena Sovietala republiko, danke la voti dal 60 komunista deputiti dil asemblo. Ita voti grantis a lu la majoritato. La 41 deputiti dil opozantaro boikotis ica voto. La tenso permanas en Moldavia pos la sedicii genitata dal deputital elekto kontestata dum aprilo.

Kordiala interretala saluti ad omni. JM :::-:::

Ye la 12ma di mayo 2009.

Dio di santa Pancratius.

DIO-PROVERBO / Por omna ago venas tempo di pago.

ZODIAKO / En la zodiako-signo dil Tauro guvernata dal planeto Venero.

VETERO / Grizeta cielo kun humide varma temperaturo, cajorne, en Francilia.

KONCIZE

IRAK / PAFADO CHE LA MAXIM GRANDA MILITISTAL PROVIZEYO USANA EN BAGHDAD Usana soldato pafis, hiere, a lua kamaradi che la militistal provizeyo Liberty, jacanta ye deko de kilometri de la Irakana chefurbo e proxima a la aerportuo internaciona. L'Usana komandantaro qua savigis ica informo en komunikajo ne furnisis detali pri la cirkonstanci di ta pafado.

GERMANIA / JOHN DEMJANJUK EXTRADESOS L'anciena nazista gardisto dil morto-kampeyo di Sobibor extradesos da Usa. John Demjanjuk "povus arivar quik de cadie en Germania", segun la adyunta poparolanto dil Germana ministrerio pri Judicio. Vivante en Usa depos 1952, lu esas judiciota pro kompliceso lor l'extermino di 29.000 Israelidi. Lua advokati facis multa proceduri, qui impedis til nun lua extrado.

GEORGIA / LA NEGOCIADO POR RIKONCILIO HALTESAS La Georgiana prezidanto Mikheil Saakachvili e la guidanti dil opozantaro nule progresis lor la unesma diskuti en la skopo finar la politikala krizo, olqui eventis hiere. La opozantaro organizas de un monato manifesti en Tbilissi e postulas la demisiono dal Statestro, ilqua akuzesas male jerir la konflikto kun Rusia dum pasinta agosto.

Kordiala interretala saluti ad omni. JM :::-:::

Ye la 11ma di mayo 2009.

Dio di santa Estella.

DIO-PROVERBO / Nefideleso ne havas suceso.

ZODIAKO / En la zodiako-signo dil Tauro guvernata dal planeto Venero.

VETERO / Griza e pluvema cielo kun humide varma temperaturo, cajorne, en Francilia.

KONCIZE

PORTUGAL / SEDICII EN LISBOA
Deko de personi interpelesis dum la nokto de saturdio til sundio en suburbala areo di Lisboa, pos nokto de sedicii, dum qua automobili incendiesis. De tri dii, la quartero Bela Vista esas la teatreyo di afronti inter la ordino-trupi e yuna emigrinti, qui protestas kontre la morto di un de li lor persequo da policani.

UNIONITA REJIO / LA LABOR-PARTISO ESAS YE MAXIM BASA NIVELO LOR OPINION-INQUESTI
Per 23% de favoroza opinioni, la favor-evaluo di la Labor-partiso dil chefa ministro Gordonus Bruno (Gordon Brown) falis ye lua maxim basa nivelo depos 1943, t.e. la dato lor qua tala opinion-inquesti enduktesis en Britania, segun aserto dal instituto BPIX por la jurnalo MAIL ON SUNDAY. L'opozantaro reprezentata dal konservemi preferesas per avantajo de 22 plusa punti kompare a lia adversi.

RUSIA / VINKO-FESTO
La Rusa prezidanto, Dmitri Medvedev, avertis, pasinta-saturdie, ke omna atako kontre lua lando produktus "nemediata repliko", okazione di militistala parado ye sovietala stilo, celebrante la 64ma aniversario dil vinko dal Reda Armeo kontre nazista Germania. Dmitri Medvedev e lua chefa ministro, Vladimir Putin, asistis kune ita militistala defileo.

Kordiala interretala saluti. JM :::-:::

Ye la 7ma di mayo 2009.

Dio di santa Maria-Luiza.

DIO-PROVERBO / A la papero ne mankas tolero.

ZODIAKO / En la zodiako-signo dil Tauro guvernata dal planeto Venero.

VETERO / Sunoza cielo, cajorne, en Francilia.

KONCIZE

AUSTRIA / POLITIKALA MOTO QUA TRUBLAS La moto "Ocidento esez en la manui dil Kristani" uzata dal dextrana partiso Austriana FPO, sur lua afishi di elektala kampanio Europana por la voto eventonta ye la venonta 7ma di junio, esis akre kritikata, hiere, dal ekumenika Konsilantaro dil Eklezii en Austria. Ica laste dicita denuncas "monopoligado dil fido Kristana". La Mohamedana komunajo, koncerne lu, kritikas "la permananta supozo segun qua la Mohamedani infiltras Austria".

EUROPANA UNIONO / LA "PARTENERESO ORIENTALA" BALDE IMPULSESOS Europana Uniono impulsos oficale, hodie, lor politikala somito previdita en Praha, nova partenereso en la direciono di la landi jacanta an la estala frontiero. Parolesas pri la orientala equivalanto dil Uniono por la Mediteraneo. Inter la koncernata landi esas Armenia, Azerbaidjan, Belarusia, Moldavia, Ukraina e Georgia. Europana Uniono previdis spensor 600 milion euri til 2013 por sustenar projeti en ica landi.

ISRAEL / LA CHEFA MINISTRO BENYAMIN NETANYAHU IROS AD EGIPTIA VENONTA-LUNDIE Ita voyajo esos la unesma efektigata en stranjera lando dal chefo dil Israelana guvernerio depos lua enoficesko ye la pasinta 31ma di marto. Il diskutos kun prezidanto Mubarak, ilqua esas mediacanto inter la Hebrea Stato e la islamista movado Hamas. Kompense, nul invito sendesis a la ministro pri Exterlandala Aferi, la direktanto extreme dextrana Avigdor Lieberman.

Kordiala interretala saluti ad omni. JM :::-:::

Ye la 6ma di mayo 2009.

Dio di santulo Petronax.

DIO-PROVERBO / Facilesas obliviar, quo ad on ne esas kar.

ZODIAKO / En la zodiako-signo dil Tauro guvernata dal planeto Venero.

VETERO / Grizeta, preske sunoza cielo, cajorne, en Francilia.

KONCIZE

GEORGIA / BATALIONO DE KURASIZITA CHARI SEDICIAS YE LA PREDIO DI NATO/OTAN-EXERCI
Sedicio qua eruptis, hiere matine, en militistala provizerio Georgiala proxim la chefurbo di ca lando e shirmanta bataliono de kurasizita chari, finis dum la posdimezo sen violentaji per la kapitulaco dal rebeli. Tamen kelka de la sediciinti fugis. La ministrerio Georgiana pri Interna Aferi akuzis Rusia organizir la dicita sedicio per asertar ke la rebeli volis subversar la rejimo ed ocidar prezidanto Mikheil Saakachvili. Ita epizodo 'okuras' kurtatempe ante militala exerci dal Atlantika Federuro en Georgia, pri qui Rusia plurafoye demandis la nihiligo.

CHAD / KOLONO DE REBELI VENINTA DE SUDAN KUNVENAS EN EST-CHAD
Chadana rebeli eniris, pasinta-lundie, est-Chad veninta de Sudan, kun "plura centi de vehili", ma nula afronti eventis, til nun, kun l'armeo dil guvernerio di N'Djamena, segun deklaro dal porparolanto dil Chadana autoritatozi. Li esas ye aproxime 100 km este de Goz Beida, ube jacas kampeyi de Sudanana refujinti veninta de Darfur.

TURKIA / MORTIGERA VENJO LOR KURDA MARIAJO
Maskita viri iruptis lor mariajo-ceremonio en Kurda fora vilajo di sudest-Turkia, tale ocidante 44 personi per asalto-fusilo. La plu multa de li esis mulieri e kindi*, segun dissavigo dal autoritatozi. Ita masakro, qua konjekteble esas la konsequo di rivaleso inter familii, produktis konsterno en Turkia e riimpulsis la debato pri la politiko qua konsistas ek rekrutar civili kom "vilajo-gardisti" por helpar l'armeani luktar kontre la Turka rebeli. La Turka chefa ministro deklaris ke sis kindi*, 17 mulieri e 21 viri ocidesabis.

Kordiala interretala saluti ad omni. JM :::-:::

Ye la 4ma di mayo 2009.

Dio di santa Silvanus.

DIO-PROVERBO / Tale esas, tale restas.

ZODIAKO / En la zodiako-signo dil Tauro guvernata dal planeto Venero.

VETERO / Sat sunoza cielo ma kun koldeta temperaturo, cajorne, en Francilia.

KONCIZE

AUSTRIA / MORTIGERA AVALANCHO PROXIM SKI-STACIONO
Sis Chekiana exkursanti mortigesis en la Austriala Alpi per avalancho eventinta proxim la famoza ski-staciono di Soelden, Tirol (west-Austria). Italoke la minaco di avalancho kreskabis, pasinta-saturdie, pro pluvo-fali sur la aludita regiono. La loko ube efektigesis la avalancho, saturdie posdimeze, jacas ye 3000 metri, t.e. 500 metri sub la somito dil monto Schalfkogel. La sokursanti havis desfacilaji arivar a la loko di ca dramato motive dil mala vetero.

PAKISTAN / KREO DIL APEL-KORTO ISLAMAL
La Pakistanana autoritatozi anuncis, hiere, la kreo di apelkorto islamal en departmento dil nordwesto di ca lando. Ico eventas enkadre di paco-interkonsento signatita kun islamala rebeli. Dum pasinta februaro, la autoritatozi aceptabis la demandi dal rebeli, olqui previdis l'apliko dil sharia (islamala lego) en la departmento Malakaland e precipue en la valo di Swat, t.e. anciena importanta turismala loko di ca regiono, en la skopo finar du yari de violentaji.

JAPONIA / RETROVENO DIL DESINFLACO
La preci ye la konsumado diminutis de 1% dum periodo de un yaro. Ico anuncesis, pasinta-venerdie, dal Japoniana guvernerio. Ita preci-plubasigo, qua esas la unesma depos septembro 2007, markizas la retroveno dil desinflaco en Japonia. Ica lando ja subisis la dicita fenomeno de 1997 til 2006. Ultre lo, la chomado augmentis dum marto, per atingar 4,8 % del aktiva habitantaro.

Kordiala interretala saluti ad omni. JM :::-:::