IDO • Linguo Internaciona • Universala • Neutra • Facila


English Deutsch Français Plusa lingui

Novaji-Martignon-2010-Agosto


Vu esas la esma
vizitanto di ca ret-situo

Specala ofro

Ido-Situi

Kurseto por Infanti da A. Martinez (Hispania), PDF-file 2Mb

Elektronikala dicionarii

Ido-uzantogrupi

Diversa texti, literaturaji ed Idokursi

Plusa Situi

Idofonduri

Wiki interna

modifikez flanko-bendo

Impressum: / Impreso:

Inhaber der Internetpräsenz www.ido.li:
propietanto dil retsituo www.ido.li

Deutsche Ido-Gesellschaft e.V.
Germana Ido-Societo r.a.
c/o ver.di Berlin
FB 8 / AG Ido
Köpenicker Str. 30
D- 10179 Berlin

Onlinekontakt
Interreta kontaktformulario

Administrator der Internetpräsenz www.ido.li:
administranto dil ret-situo www.ido.li

Frank Kasper
Breitscheidstr. 22
D- 90459 Nürnberg

Onlinekontakt
Interreta kontaktformulario

Novaji-Martignon-2010-Agosto

Ye la 31ma di agosto 2010

Dio di santa Aristides.

DIO-PROVERBO / Altra domi, altra homi.

ZODIAKO / En la zodiako-signo dil Virgino guvernata dal planeto Merkuro.

VETERO / Sat sunoza vetero, cajorne, en Francilia.

KONCIZE

INDIA / MAOISTA ATAKO
Atako dal Maoista rebelaro produktis la morto di 10 policani proxim Patna, Bihar. Dum pasinta mayo, le "reda "guerilleros"" supozeble efektigabis la ekreligo di treno e, depos kin monati, mortigabis preske 100 membri dil ordino-trupi. La rebelaro, qua esas aktiva depos 1967 ed esas prezenta precipue en la esto di ca lando, asertas ke lu defensas la skopo dil rurani.

DARFUR / LIBERIGO DI USANA HUMANALA HELPANTINO
Ica yunino dil evangeliista organizuro Samaritan's Purse, raptesabis ye la mezo dil monato mayo en Abu Ajura, sud-Darfur (west-Sudan). El akompanesis da du Sudanana humanala helpanti, qui depos ita tempo liberigesis. L'anunco di ca liberigo dal Sudanana ministrerio por la Exterlandala Aferi eventas pos olta di la rapto, pasinta-sundie, da armizita viri di du Rusa pilotisti laboranta por avion-kompanio en Nyala.

ITALIA / KONTROVERSO PRI LA VIZITO DA KADHAFI
La Libiana direktanto Mwammar Kadhafi efektigis hiere en Roma oficala vizito extravagantae markizita per polemiki e un de oli komencis quik lor lua arivo, kande il asertis ke la Mohamedismo esus divenonta "la religio di tota Europa". Il venis celebrar kun lua amiko Berlusconi la duesma aniversario dil amikeso-kontrato signatita ye la 30ma di agosto 2008, olqua finigis la litijaro pri la koloniala periodo.

Kordiala interretala saluti ad omni. JM :::-:::

Ye la 30ma di agosto 2010

Dio di santa Fiakrus.

DIO-PROVERBO / Experta manuo ne restas sen pano.

ZODIAKO / En la zodiako-signo dil Virgino guvernata dal planeto Merkuro.

VETERO / Sat sunoza cielo ma prefere koldeta temperaturo relate la sezono, cajorne, en Francilia.

KONCIZE

YEMEN / PLUSA ATAKO IMPUTATA AD AL-QAIDA
Non soldati ed un civilulo mortigesis pasinta-saturdie lor atako imputata ad Al-Qaida kontre militistala posteno en urbo Jaar, sud-Yemen, segun nova bilanco komunikita hiere da responsivo pri la sekureso. Pasinta-merkurdie, Usana specalisto pri la kontre-terorista lukto ja indikis ke la guvernerio di Washington esas sempre plu sucioza pro la minaco di Al-Qaida en Yemen, per parolar pri danjero "akra".

KENIA / LA SUDANANA PREZIDANTO NE DESQUIETESKAS
Invitita adibe, Omar El Beshir asistis la solena ceremonio pri la promulgo di la nova Keniana Konstituco "desegardante la aresto-dokumenti dal punisala Korto internaciona", tale regretis l'Usana prezidanto. La guvernerio di Kenia teoriale mustis interpelar lu nam la Korto ja emisis du aresto-dokumenti kontre lu, "pro milit-krimini e krimini kontre la homaro" e "pro gentocido" en Darfur.

ARJENTINIA / AFRONTO INTER LA PREZIDANTINO E LA INFORMILI
La guvernerio di Cristina Kirchner prizentis, pasinta-venerdie, lego-projeto por deklarar "ye generala interesto" la produkto e la disdono di papero. Tri dii antee, la prezidantino akuzabis la du maxim importanta diala jurnali dil opozantaro, CLARIN e LA NACION, utiligir komplici lor la diktatoreso por kaptar la kontrolo di Papel Prensa, olqua esas la unika paper-fabrikerio di ca lando.

Kordiala interretala saluti ad omni. JM :::-:::

Ye la 27ma di agosto 2010

Dio di santa Monika.

DIO-PROVERBO / En la marsheto dil mentio natas nur mortinta fishi. (Rusa proverbo)

ZODIAKO / En la zodiako-signo di la Virgino guvernata dal planeto Merkuro.

VETERO / Alternante sunoza e griza cielo, cajorne, en Francilia.

KONCIZE

TAIWAN / USA PERMISAS EXPORTACI DI RADAR-SISTEMI
L'Usana guvernerio grantis permisi por exportaco ad Usana firmiskope vendor radar-sistemi a Taiwan por la chas-avioni di ca lando. Ita ago povus iracigar la guvernerio di Beijing (Pekino). La Chiniana guvernerio ja subite ruptabis lua militistal kontakti kun olta diWashington kande Usa anuncabis dum pasinta januaro signatir armizo-kontrato kun Taiwan.

INDIA / LA RURANI PROTESTAS EN DELHI
Mili de rurani manifestanta, koncerne la plu multa de li, en lia tradicionala kostumo blanka, defilis hiere en la stradi di New Delhi ed asemblis su proxim la Parlamento. Veninta de la vicina Stato Uttar Pradesh, li protestas kontre la expropriadi produktita per la konstrukto di automobilal choseo liganta Delhi ad Agra, ube trovesas la Taj Mahal.

USA / LE "TEA PARTY" MORGE EN WASHINGTON
Mili de membri di le "Tea Party", t.e. tilextreme konservema grupi kun populista traiti, esas konvergonta morge vers la Lincoln Memorial di Washington, ye l'exakta aniversario quaradek-e-sep yari plu tarde pos ke Martin Luther King pronuncis ibe lua famoza diskurso "I have a dream". Naskinta en 2009 pos l'elekto di Barack Obama che la prezidanterio di Usa, ita movado esas sempre plu populara ye kelka monati ante l'elekto di lua mi-tempoen la prezidantal ofico.

Kordiala interretala saluti ad omni. JM :::-:::

Ye la 26ma di agosto 2010

Dio di santa Natasha.

DIO-PROVERBO / Qua posedas, ta esas justa.

ZODIAKO / En la zodiako-signo di la Virgino guvernata dal planeto Merkuro.

VETERO / Pluvema vetero, cajorne, en Francilia.

KONCIZE

IRAK / SERIO DE ATENTI VIZANTA LA POLICANI EFEKTIGESIS HIERE
Ataki per bomba vehili, segun semblo koordinata, eventis en dek urbi di Irak. Dek-e-quar vehili explozis dum periodo de kelka hori. La du maxim sangoza ataki 'okuris' en Baghdad e Kut, t.e. urbo jacanta ye 160 km de la chefurbo. La viktimi esas majoritate policani. Ita atenti efektigesas dum ke la nombro de Usana soldati en Irak jus diminutis til irar sub la quanto de 50.000 viri.

ISRAEL / KONDAMNO DI UN DE LA SIMBOLA PERSONI REZISTANTA KONTRE ISRAEL
Abdallah Abu Rahma,arestita depos decembro 2009, agnoskesis kom kulpinto, pasinta-mardie, da militistal tribunalo Israelana pro "partopreno a nelegala e nepermisata manifesti" en la vilajo Bilin, Cisjordania. Lua puniso, qua povus irar til du yari de karcero-puniso, establisesos dum venonta septembro.

UNIONITA REJIO / LA NERICHA FAMILII AFEKTESAS DAL FINANCALA SEVERESO
La urjanteso-budjeto, anuncita dum junio dal Britaniana guvernerio por diminutar la importanta debajo di ca lando, frapas avan omno la familii havanta filii, qui esas inter le maxim povra di ca lando (10% de la familii), pro la diminuto de la subvencioni por la habiteyi e por la handikapiti, segun analizo publikigita hiere da fakala centro, nome la Instituto por la fiskala studiado.

Kordiala interretala saluti ad omni

Ye la 18ma di agosto 2010

Dio di santa Helena, matro di imperiestro Konstantinus.

DIO-PROVERBO / Tro saltas la rato - lun kaptas la kato.

ZODIAKO / En la zodiako-signo di la Leono guvernata dal Suno.

VETERO / Grizeta cielo divenante kelke plu sunoza, cajorne, en Francilia.

KONCIZE

MEXIKIA / LA HOMEOSEXUALA PARI DARFAS ADOPTAR FILII
La suprega Korto Mexikiana validigis, hiere, la posibleso por homeosexuala pari adoptar filio, tale savigis lua porparolanto. Non judiciisti kontre du votis favore a ca aranjuro. La municipo di Mexiko, direktata da sinistrani, ja legaligis tala adopti dum pasinta decembro. La katolika Eklezio opozesas ad ita legaligo, same kam la dextrana guvernerio ye la povo.

KAUKAZO / ADMINIME DEKO DE VUNDITI LOR EXPLOZO
Exploziva mashino lokizita en automobilo avan kafeeyo di Piatigorsk esus la kauzo dil flagresko eventinta hiere, segun l'unesma informi recevita e ne konfirmita. Piatigorsk esas urbo dil Rusa Kaukazo. Ita regiono esas la ceneyo di violentaji senfine iterata depos la falo di Soviet Uniono, precipue per la du militi en Chechenia quin la Rusi mustis facar.

BANGLADESH / LA PROSTITUCO ESAS AGNOSKATA PROFESIONO
Denun la prostituco esos agnoskata kom normala profesiono ed enskribita sur la elekto-karti, tale proklamis hiere la elektala Komisitaro di Bangladesh. Nome, la prostituco esas legala en ita lando majoritate Mohamedana. La komerco pri sexuo konocas ibe vera florifado ed employas cirkum 200.000 personi (de 156 milion habitanti), segun la humanala organizuri.

Kordiala interretala saluti ad omni. JM :::-:::

Ye la 16ma di agosto 2010

Dio di santa Armel.

DIO-PROVERBO / A granda siniori granda honorumi.

ZODIAKO / En la zodiako-signo di la Leono guvernata dal Suno.

VETERO / Pluvoza vetero, cajorne, en Francilia.

KONCIZE

CHINIO / DIO DI NACIONALA TRAURO
Ita lando facis homajo , hiere, a la cirkume 1.200 personi mortinta lor la tero-glitadi eventinta un semano ante nun en la provinco Gansu. Dum ke forta pluvi permanis hiere, la riski asociita a l'inundi, a la ter-glitadi ed a la flotacanta eskombri duris minacar la vivo dil habitanti dil koncernata regiono.

MEXIKIA / LA MILITO DIL NARKOTAJ-FEDERURI PLUINTENSESKAS
Du yunuli evanta duadeko de yari asasinesis, hiere, en Acapulco, en sud-Mexikia. Ita regiono afliktesas per la kombati quin la narkotaj-federuri havas inter su por la kontrolo di lia komercacho sur la Mexikiana teritorio. Tra ica lando, la milito inter la federuri por la kontrolo dil aludita komercacho e lia afronti kun l'armeo nacionala efektigis 28.000 mortinti depos decembro 2006.

JAPONIA / NULA MINISTRO ESIS PREZENTA CHE LA KONTROVERSATA SANTUARIO YASUKUNI
Unesmafoye dum periodo dequarimo de yarcento, nula ministro iris a la santuario Yasukuni hiere, dum ke Japonia memorigis lua kapitulaco lor la Duesma Mondomilito. Ita santuario produktas debati, pro ke lu honoras samatempe la memoro dil Japoniana soldati falinta dum kombato, ma anke 14 milit-krimininti, judiciita dal federiti pos 1945.

Kordiala interretala saluti ad omni. JM :::-:::

Ye la 13ma di agosto 2010

Dio di santulo Hipolitos.

DIO-PROVERBO / En hungranta familio indijesas harmonio.

ZODIAKO / En la zodiako-signo di la Leono guvernata dal Suno.

VETERO / Pluvema vetero, cajorne, en Francilia.

KONCIZE

UKRAINA / TORFEYI ESAS FAIROZA PROXIM CHERNOBIL
Torfeyo kombustesas sur areo de du hektari depos pasinta lundio ye 60 kilometri sude de la nukleala centralo acidentita di Chernobil (nord-Ukraina), ma la situeso "ne prizentas danjero", tale asertis hiere porparolanto dil ministrerio por urjanta situesi. Ita laste dicita asertis ke l'aludita incendio esas dominacota hodie. La sekureso-zono cirkum la centralo di Chernobil, olqua esas la loko dil maxim granda katastrofo nukleala en 1986, esas areo de 30 kilometri.

BOSNIA / SKELETI TROVESIS
La skeleti di "adminime 50 personi" probable qui esas Mohamedista viktimi dil Bosnia-milito (1992-1995), trovesis da legista expertizisti endigo di est-Bosnia, ube exploradi entraprezesis dum la fino di julio. La squeleti ekterigesos dum la jorno e transportesos a laboratorio por autopsio ed identigo.

EQUADOR / SISMO YE 6,9 GRADI EN LA SUDESTO DI CA LANDO
Sismo de ampleso ye 6,9 gradi frapis Equador hiere matine, ye 170 km sudeste di la chefurbo, Quito, tale anuncis l'Usana instituto pri geofiziko (USGS). Nul alerto pri "tsunami" emisesis, savigis l'oceanografial ed atmosferialAgenterio Usana. La precipua urbo dil atingata regiono esas Ambato, chefurbo dil provinco Tungurahua, jacanta ye 140 km weste dil sismo-centro.

Kordiala interretala saluti ad omni. JM :::-:::

Ye la 12ma di agosto 2010

Dio di santaIoanna de Chantal.

DIO-PROVERBO / Furtiston ne timas povro.

ZODIAKO / En la zodiako-signo di la Leono guvernata dal Suno.

VETERO / Sat bela koldeta autunala vetero, cajorne, en Francilia.

KONCIZE

SRI LANKA / INQUESTO PRI LA INTERCIVITANA MILITO
Komisitaro pri la lasta yari de kombati inter l'armeani e la rebelaro dil Tigri di liberigo dil Eelam Tamul (LTTE) kreesis hiere dal Sri-Lankana autoritatozi. La povozi refuzas inquesto da UN/ONU quo asertas ke 7.000 Tamula civili mortis lor la kombati.

IRAN / LA USANI ESFORCAS IMPEDAR MORTIGI SEGUN JUDICIO
La Usana Statala sekretariino Hillary Clinton exhortis hiere la guvernerio di Teheran nihiligar la kondamno ye morto-puniso di plura Iranani. Inter li esas tri disidenti politikal, nome yunulo evanta 18 yari, qua akuzesas pri homeosexualeso e muliero kondamnita ston-mortigesar pro adultero.

RWANDA / VINKO DA KAGAME
La ekoficeskanta Statestro Paul Kagame obtenis la vinko por la prezidantala elekto, pasinta-lundie, en Rwanda per 93% de la voti, tale anuncis hiere la elektala Komisitaro nacionala. Kagame, qua esis sen vera opozanti e konsiderata kom tre preferato por la voto, solicitis obtenor plusa ofico-tempo ye 7 yari.

Kordiala interretala saluti ad omni. JM :::-:::

Ye la 10ma di agosto 2010

Dio di santa Laurentius.

DIO-PROVERBO / Chasajon ne vartas chasanto.

ZODIAKO / En la zodiako-signo di la Leono guvernata dal Suno.

VETERO / Grizeta cielo, cajorne, en Francilia.

KONCIZE

AFGANIA / GRAVIDA VIDVINO MORTIGESAS PUBLIKE
Afganino, Bibi Sanubar, evo 35 yari, vidvino e gravida, recevis 200 flogilo-frapi ante mortigesar publike per tri kugli en la kapo da talibani, qui akuzis el kulpir pro adultero, en talibana bastiono dil provinco Badghis, west-Afgania, tale savigis hiere dal agenterio AGENCE FRANCE-PRESSE la numero du di la provincala polico.

SIERRA LEONE / PROCESO DI CHARLES TAYLOR
L'aktorino Mia Farrow asertis, hiere, koram la specala Tribunalo por Sierra Leone (STSS), ke Naomi Campbell dicabis ad el receviren 1997 "enorma diamanto" venanta da Charles Taylor, judiciata en Den Haag pro milit-krimini e krimini kontre la homaro. Elu tale kontredicas la atesto da camodo-prizentantino, elqua afirmabis pasinta-semane ignorar la origino dil aludita diamanti.

KOLUMBIA / LA NOVA VICE-PREZIDANTO ACEPTESAS EN HOSPITALO
Angelino Garzon, evo 64 yari, aceptesis en hospitalo hiere konseque di kordiika problemo eventinta du dii pos lua enoficesko apud prezidanto Santos. Lua stando esas "stacionara". Ita anciena sindikatala guidanto esabis ministro pri la laboro, reprezentanto di Kolumbia che la mondala Organizuro di la laboro e guberniestro.

Kordiala interretala saluti ad omni. JM :::-:::

Ye la 9ma di agosto 2010

Dio di santa Teresa-Benedikta dil Kruco (Edith Stein)

DIO-PROVERBO/ Qua shamas pri nulo, ita ne timas Deo.

ZODIAKO / En la zodiako-signo di la Leono guvernata dal Suno.

VETERO / Sunoza ed humide varma vetero, cajorne, en Francilia.

KONCIZE

SUD-KOREA / POLITIKALA MODIFIKO ED INCIDENTI KUN NORD-KOREA
Dum ke la Sud-Koreana prezidanto Lee Myung-bak nominis hiere nova chefa ministro, Kim Tae-ho, e remplasis la duimo dil guvernerio (sep ministri), incidento 'okuris' sur la maro. Pesko-navo Sud-Koreana havante sep maristi en lua internajo kaptesis da Nord-Korea sur la maro di Japonia ed ol remorkesis vers la portuo di Songjin en Nord-Korea.

KUBA / FIDEL KASTRO ESAS CHE LA PARLAMENTO UNESMAFOYE DEPOS QUAR YARI
Okazione di lua unesma diskurso koram la deputiti depos ke lu transmisis la politikala povo a lua fratulo Raul, quar yari ante nun, la Lider Maximo evanta 84 yari avertis, pasinta-saturdie, Barack Obama kontre la konsequi di atako kontre Iran. Ma en lua diskurso durinta dum deko de minuti il ne aludis la situeso en Kuba.

BOLIVIA / TURISTI DURAS BLOKUSESAR EN POTOSI
Quaradeko de turisti, inter li esas aproxime 20 Franci, darfis ekirar Potosi, mineyal urbo di sud-Boliviaube li blokusesis, por uli de li depos un semano, pro sociala konflikto regionala. Altri departis pede o surchosee. Ma kinadeko de personi duras retenesar en ita urbo ye 160.000 habitanti e jacanta ye 4000 metri de altitudo, olqua paralizesas per generala striko.

Kordiala interretala saluti ad omni. JM :::-:::

Ye la 6ma di agosto 2010

Dio dil Transfigureso di Nia Sinioro Iesu Kristo.

DIO-PROVERBO / Filiin ne indijas povri.

ZODIAKO / En la zodiako-signo di la Leono guvernata dal Suno.

VETERO / Sat sunoza cielo, cajorne, en Francilia.

KONCIZE

PERU / INQUESTO PRI KEIKO FUJIMORI
Keiko Fujimori, filiino dil anciena prezidanto Alberto Fujimori, esas la objekto di preliminara inquesto pri la pekuniizo di elua studii e di olti di elua tri gefrati en Usa, dum la yari 1990ma. Keiko Fujimori, qua esas kandidato por la prezidantala elekto di 2011, denuncis "persekuto" politikala-judiciala "por haltigar o nocar" lua kandidateso.

AFGANIA / NATO/OTAN AGNOSKIS MORTIGIR DOZENO DE CIVILI
Ico eventis hiere lor militistal operaco en la provinco Nangahar, entraprezita unionite kun l'Agfaniana armeo. Plu frue dum la jorno, prezidanto Hamid Karzai ja imperabis inquesto pri la morto di adminime dek-e-du civili, 'okurinta' lor operaco entraprezita da trupi dil internaciona koalisuro dum la nokto de merkurdio til jovdio.

USA / DEMANDO DAL PENTAGONO
La Pentagono demandis hiere a la ret-situo WikiLeaks retrodonar la aproxime 92.000 dokumenti sekreta pri la milito en en Afgania posedata da lu, e forprenar oli de lua interretala situo. "La publikigo da WikiLeaks di granda nombro de nia dokumenti ja endanjerigis nia trupi, nia federiti e la Afganiana civitani qui laboras kun ni", tale deklaris Geoff Morrell, la porparolanto dil Pentagono, dum ke la dicitaret-situo anuncis lua intenco publikigar 15.000 plusa dokumenti.

Kordiala interretala saluti ad omni. JM :::-:::

Ye la 5ma di julio 2010

Dio di santa Abel.

DIO-PROVERBO / Pekunio efektigas omna servi.

ZODIAKO / En la zodiako-signo di la Leono guvernata dal Suno.

VETERO / Sunoza vetero, ma sat koldeta temperaturo, cajorne, en Francilia.

KONCIZE

RUSIA / NOVA BILANCO DIL INCENDII IRAS TIL 48 MORTINTI
La Rusa prezidanto Dmitri Medvedev interruptis, hiere, lua vakanco por asembligar en Moskva la sekureso-Konsilantaro di ca lando, dum ke la bilanco dil incendii esas denun ye 48 mortinti. La chefa ministro Vladimir Putin, qua multopleskis lua interveni depos pasinta-venerdie, iris lualatere a la regiono Voronej (500 km sude de Moskva) por kurajigar ibe la akompananta esquadi dil avioni qui luktas kontre la flami.

PAKISTAN / MORTIGERA VIOLENTAJI EN KARASHI E PESHAWAR
Adminime 60 personi mortigesis e plusa cento de homi vundesis dum periodo de du dii en Karashi, nome la maxim grand urbo di Pakistan, tale anuncis hiere la autoritatozi pos la duesma nokto de violentaji sequanta l'asasino di deputito dil provincala majoritato. La chefo dil militistatra trupi e du altra personi mortigesis lor suocida atento hiere en Peshawar, en nordwest-Pakistan, segun anunco da ministro dil provincala guvernerio.

AFGANIA / DESPOPULARA MILITO EN USA
La milito entraprezata dal Usana soldati e lia federiti en Afgania esas plu despopulara kam irgatempe antee en ica trans-Atlantika lando, icon asertas opinion-inquesto publikigita hiere dal Gallup-instituto e dal diala jurnalo USA TODAY : 43% de la questionita personi opinionas ke komencar milito en Afgania pos la atenti dil 11ma di septembro 2001 esis "eroro".

Kordiala interretala saluti ad omni. JM :::-:::

Ye la 3ma di agosto 2010

Dio di santa Lidia.

DIO-PROVERBO / Ta qua questionas, ica ne eroras.

ZODIAKO / En la zodiako-signo di la Leono guvernata dal Suno.

VETERO / Sunoza cielo, cajorne, en Francilia.

KONCIZE

KAUKAZO / LA SUPROKLAMINTA "EMIRO" DIL KAUKAZO EKIRAS LA DJIHAD
En "video" postale sendita a la interreto, la chefo dil islamista "guerilla"-ani en Rusa Kaukazo, Doku Umarov parolas pri lua "fatigo" direktar la lukto kontre Rusia. Il esas la nigra bestio dil guvernerio di Moskva depos ke lu revendikis organizir la duopla suocida atento qua produktabis 40 mortinti en la Rusa chefurbo en 2006, ica militestro prizentis lua sucedanto, Aslambek Usman.

MALI / LA LIBERIGO DIL FRANCA GAJO-HOMO NEGOCIESIS SEGUN L'AQMI
La chefo di Al-Qaida en islamala Maghreb (Aqmi), Abdel-malek Drukdal, asertis negociir kun la guvernerio di Paris por la liberigo dil Franca gajo-homo en Mali, Michel Germaneau, ante la Franca-Mauritaniana inkurso dil 22ma di julio qua supozeble duktis a lua mortigo, segun mesajo brodkastita pasinta-sundie da islamista ret-situi. La Franca guvernerio duras asertar ke nulatempe esis negociado.

INDIA / KRIZO-KUNVENO PRI KASHMIR
La guverneriestro di Indiana Kashmir advokis hiere "ruptar la ciklo dil violento" ye la fino dil krizo-kunveno en New-Dehli pos la morto di adminime 30 personi lor kontre-Indiana manifesti en ita regiono havanta Mohamedana majoritato. La manifesti kontre l'Indiana guvernerio pluforteskis pos la morto ye la 17ma di junio di studento mortigita per pafo di lakrimifanta gaso dal policani.

Kordiala interretala saluti ad omni. JM :::-:::

Ye la 2ma di agosto 2010

Dio di santa Iulianus Eymard.

DIO-PROVERBO / Ta quas iras tranquile, iras facile.

ZODIAKO / En la zodiako-signo di la Leono guvernata dal Suno.

VETERO / Pluvema cielo, cajorne, en Francilia.

KONCIZE

UNIONITA ARABA EMIRII / SERVI DIL BLACKBERRY CESIGESAS
La emiriala autoritatozi rezolvis, hiere, blokusigar l'aceso al interreto, la instantala mesajaro, o la mesaji dil multimedia telefono BlackBerry quik de la venonta 11ma di oktobro, pro ke li judikas ke ica servi esas "nekonforma a la valoranta legaro".

GERMANIA / HOMAJO A LA VIKTIMI DI DUISBURG
Religiala servo ekumenika quan 600 personi partoprenis celebresis, pasinta-saturdie, en Duisburg por la memoro di la 21 viktimi dil turbo-panikoqua traurizis la Love Parade un semano ante nun. La komonestro e la organizeri di ca eventajo imputas reciprokel'unu le altrala responsiveso di ca dramato.

USA / MARIAJO DIL FILIINO DI LE CLINTON
Bill ed Hillary Clinton, anciena prezidanto e la nuna Statala sekretariino, mariajis Chelsea, evo 30 yari, kun la bankisto Marc Mezvinsky, evo 32 yari, saturdie en Astor Courts, en la Stato New York. Ica ceremonio, kuncelebrata da rabino James Ponet e dal veneracindo William Shillady, eventis en privata medio.

Kordiala interretala saluti ad omni. JM :::-:::