Novaji-Martignon-2010-Aprilo

Ye la 30ma di aprilo 2010

Dio di santa Robertus.

DIO-PROVERBO / L'apetito esas la maxim bona kondimento.

ZODIAKO / En la zodiako-signo dil Tauro guvernata dal planeto Venero.

VETERO / Mi-sunoza vetero, cajorne, en Francilia.

KONCIZE

UNIONITA REJIO / LA SPOZINI DI ISLAMISTI DUROS HAVAR LIA SOCIALA PRESTACIONI
L'Europana Korto pri judicio kontredicis rezolvo dal Britaniana autoritatozi qui pozis kondicioni (plafono e justifiko dil spensi) a la varso dil sociala prestacioni a spozini di supozata membri di Al-Qaida o di talibani. Segun la Korto di Luxemburg, la guvernerio di London ne pruvis ke ica pekunio-quanti povas pagar terorist agi.

CHINIA / PLUSA ATAKI EN SKOLO
Viro armizita per kultelo vundis "28infanti e tri adulti", hiere, en infantal skolo di est-Chinia. Ico esas la duesma atako di ca kategorio dum periodo di 24 hori ed ol esas la triesma dum periodo di un monato. La supozata atakanti arestesis. Ica dramato 'okuris' ye la dio ipsa dil segunlega mortigo di viro kondamnita ye morto-puniso pos ocidir ok skolani un monato antee.

INDIA / LA GUVERNERIO DI NEW DEHLI PRONTESAS DISKUTAR KUN PAKISTAN
L'Indiana guvernerio deklaris, hiere, ke lu interkonsentas por ristartigar dialogo por kompleta paco kun Pakistan, lor la fino di renkontro en Bhutan inter la chefa ministri di ca amba landi. Ja historiale mala, la relati inter ca du landi domajesis pos la terorist atako di Mumbai en 2008, nome India denuncis ula responsiveso dalPakistanana sekreta servi.

Kordiala interretala saluti ad omni. JM :::-:::

Ye la 29ma di aprilo 2010

Dio di santa Katarina di Sienna.

DIO-PROVERBO / Komprebla ne esas amoro.

ZODIAKO / En la zodiako-signo dil Tauro guvernata dal planeto Venero.

VETERO / Blua e sunoza cielo kun tro varma temperaturo relate la sezono, cajorne, en Francilia.

KONCIZE

MEXIKIA / PLUSA MASAKRO EN CIUDAD JUAREZ
Ok viri ocidesis, hiere, da kombato-grupo armizita en drinkeyo di Ciudad Juarez. Ica Mexikian urbo ye 1,3 milion habitanti, jacanta an la frontiero kun la Usana Stato Texas, subisas la maxim granda nombro de mortigi di ca lando, nome esis plu kam 4000 mortinti dum la tri recente pasinta yari lor kalkul-klozi inter narkotajal federuri por la kontrolo dil narkotaj-komercacho.

ALJERIA / RAFIK KHALIFA EXTRADESAS
La Britaniana ministro por Interna Aferi, Alan Johnson, permisis hiere l'extrado dil ex-magnato Aljeriana Rafik Khalifa a lua origino-lando. L'advokato di Rafik Khalifa anuncis sua intenco apelar pro ica decido. Rafik Khalifa kondamnesis kom kontumaco dum marto 2007 en Aljeria ye karcero-puniso perpetua precipue pro fraudoza bankroto. Il refujis a London en 2003.

USA / LA KOMTIO SANTA KLARA LUKTESKAS KONTRE LA OBEZESO DIL INFANTI E PUERI
Elektita personi di ta Kaliforniana komtio, meze di la Silicon Valley sude de San Francisco, votis aranjuro interdiktanta "a la restorerii utiligar la amo dil infanti e pueri a la ludili por promocar menui kun forta kontenajo kaloriifanta, kun forta kontenajo ye graso e kun forta kontenajo ye natro". Ita interdikto vizas precipue la grupi de restorerii kun rapida repasti.

Kordiala interretala saluti ad omni. JM :::-:::

Ye la 28ma di aprilo 2010

Dio di santa Valeria.

DIO-PROVERBO / Ploranton ni evitas, ridanton ni imitas.

ZODIAKO / En la zodiako-signo dil Tauro guvernata dal planeto Venero.

VETERO / Blua e sunoza cielo, cajorne, en Francilia.

KONCIZE

BRITANIA / NICK CLEGG PRONTESAS LABORAR KUN GORDON BROWN
La chefo di la Britaniana liberala-demokrata, Nick Clegg, ne exkluzis hiere la posibleso formacar koalisuro kun la Labor-partiso di Gordon Brown, pos la rezulto dil deputital elekto eventonta ye la 6ma di mayo. Pos plura dii di hezito koncerne lua projeti kaze di Parlamento sen absoluta majoritato. Opinion-inquesto, qua publikigesis hiere kreditigas la konservemi ye 33% de la voto-intenci, avan le "Lib Dem" (29%) e la Labor-partiso (28%).

IRAN / LA OPOZANTARO RIIMPULSAS LA KONTESTADO
La chefi dil opozantaro Iranana, Mir Hossein Moussavi e Mehdi Karubi, advokis lia partisani manifestar okazione l'aniversario dil rielekto kontroversata di prezidanto Mahmud Ahmadinejad, ye la 12ma di junio. La maxim recenta probo agar enstrade evas de la pasinta 11ma di februaro. La autoritatozi lore facis polical aranjuri por evitar la asembligi.

SRI LANKA / LA DIPLASITA PERSONI RETROIRAS ADHEME
Plu kam 200.000 personi de aproxime 280.000 diplasita homi (majoritate Tamuli), livis depos pasinta agosto la kampeyi ube li grupigesis pos la intercivitana milito en la nordo di Sri Lanka, tale anuncis hiere la Supera Komisarieyo di UN/ONUpor la refujinti. La Sri Lankana guvernerio permisis itere, pasinta-semane, la diplasiti livar la kampeyi, pos haltigo dum tri semani motivi di elekto.

Kordiala interretala saluti ad omni. JM :::-:::

Ye la 27ma di aprilo 2010

Dio di santa Zita.

DIO-PROVERBO / Omna merito donas kredito.

ZODIAKO / En la zodiako-signo dil Tauro guvernata dal planeto Venero.

VETERO / Blua e sunoza cielo, cajorne, en Francilia.

KONCIZE

IRAK / SENVALIDIGO DI 52 KANDIDATI LOR LA DEPUTITAL ELEKTO
Grupo de oficisti senvaldigis, pro lia ligili kun la partiso Baas (dil anciena diktatoro Saddam Hussein), 52 kandidati qui partoprenabis la deputital elekto eventinta dum la pasinta 7ma di marto. Lor la rezulto di ca elekto, Iyad Allawi obtenabis 91 sidili, kontre 89 por la ekoficeskinta chefa ministro, Nuri Al Maliki, 70 por la Nacionala Federuro Irakana, olqua unionas du konservema shiista grupi e 43 sidili por la Kurda Federuro.

NIGERIA / DU JURNALISTI ASASINESIS
Du jurnalisti laboranta por Kristana jurnalo di Nigeria e lia vehisto mortigesis per hakileto, dum la jus pasinta semano-fino, ye la periferio di Jos, olqua esas la precipua hemo dil sektala violentaji qui sukusas ica lando depos plura monati e produktis plu kam 1500 mortinti e dekamili de vunditi.

AFGANIA / UN/ONU ESAS CIRKONSPEKTA EN KANDAHAR
La Unionita Nacioni anuncis, hiere, ke li imperis lia employati restar heme en Kandahar, quo esas la granda urbo di sud-Afgania e bersilo dil Talibani, pro ke la sekureso desamelioreskas rapide ibe. La nombro del atenti skopoplakizita konsiderinde kreskis recente en ca urbo.

Kordiala interretala saluti ad omni. JM :::-:::

Ye la 26ma di aprilo 2010.

Dio di santa Alida.

DIO-PROVERBO / Povreso ne esas vicio.

ZODIAKO / En la zodiako-signo dil Tauro guvernata dal planeto Venero.

VETERO / Blua e sunoza cielo, cajorne, en Francilia

KONCIZE

SUDAN / LA POLITIKALA TENSO KRESKAS EN SUD-SUDAN
Kombati 'okurinta' pasinta-venerdie inter l'armeo di Sud-Sudan ed Araba nomadi di Darfur en sektoro an la frontiero di ca du riskoza regioni efektigis adminime 55 mortinti ed 85 vunditi. La autoritatozi di Sud-Sudan akuzis, lia-latere, la trupi di Khartum esar la kauzo dil violentaji. Sud-Sudan esas organizonta, dum venonta januaro, plebicito pri lua sendependeso.

USA / MORTIGERA VORTICA VENTEGO EN MISSISSIPPI
Adminime dek personi, inter li du neadulta personi, mortigesis e duadeko de personi vundesis lor la paso, pasinta-saturdie, da plura tornadi* (vortica ventegi) e sturmi en Mississippi (sud-Usa), ube la serchadi por trovor eventuala posvivanti pluduras. Ica bilanco povus mem kreskar, nome la venti arachis tekti ed elektrala linei, subversis vehili ed extirpis arbori. L'alarmo-stando dekretesis en 17 komtii.

IRAK / AL-QAIDA KONFIRMAS LA MORTO DI DU DE LUA CHEFI EN ICA LANDO
Segun la Usana centro por surveyar la islamista situi*, Al-Qaida, asertite, agnoskis che la interreto la morto di du de lua precipua chefi en Irak, lor militistal operaco Usana-Irakana eventinta ye la 18ma di aprilo, norde de Baghdad. Abu Ayyub Al Masri ed Abu Hamzah Al Muhajer esis la responsivi militistal e politikal di tre diversa organizuri asociita ad Al-Qaida.

Kordiala interretala saluti ad omni. JM :::-:::

Ye la 9ma di aprilo 2010

Dio di santa Galtierus.

DIO-CITAJO / Roma esas la lumo dil nacioni. (Skriptisto Rutilius Namatianus Vma yarcento p.K.)

ZODIAKO / En la zodiako-signo dil Arieto guvernata dal planeto Marso.

VETERO / Bela blua e sunoza cielo kun milda temperaturo printempal, cajorne, en Francilia.

KONCIZE

USA / RISKI LIGITA A L'OBEZESO DIL MATRO
La mulieri obeza dum lia gravideso esas plu minacata naskigar infanteto havanta kordiika defekto, segun studiuro dil Nacional Instituto por Saneso (NIH). La naskala defekti dil kordio esas la maxim frequa kauzo dil "nasko-defekti" atinganta 8 nove-naskinti de 1000.

CHILI / LA OFICALA BILANCO DIL SISMO ESAS RIEVALUATA KUN AUGMENTO
La Chiliana guvernerio rievaluis, pasinta-merkurdie, de 452 til 486 mortinti la bilanco dil sismo e dil "Tsunami" qui frapis la mezo e la sudo di ca lando ye la 27ma di februaro. La nombro de desaparinti evaluesis ye 79 personi e la kusto dil destruktita infrastrukturi* evaluesas ye 22 miliard euri.

TAILANDO / LA ALARMO-STANDO VALORESKAS
La guvernerio di Tailando facis, hiere, la unesma aranjuro konsequanta l'establiso dil alarmo-stando per deskonektigar la televizional kanalo "LaKanalo dil populo"favoroza a la manifestanti qui postulas la departo dal chefa ministro e la organizo di anticipata elekto.

Kordiala interretala saluti ad omni. JM :::-:::

Ye la 8ma di aprilo 2010

Dio di santa Iulia.

DIO-PROVERBO / La suno brilas por omni.

ZODIAKO / En la zodiako-signo dil Arieto guvernata dal planeto Marso.

VETERO / Griza cielo ed humida aero, cajorne, en Francilia.

KONCIZE

IRAN / LA TENSO KRESKAS ANTE ASEMBLO CHE UN/ONU
La Iranana prezidanto Mahmud Ahmadinejad akuzis hiere la nova nukleala doktrino Usana, per aludar posibla respondo "frakasanta". Enkadre di lia nova doktrino dissavigita pasinta-mardie, la Usana autoritatozi promisas nulatempe utiligar la atomala armo kontre adverso qua ne posedas ol e qua egardas la reguli dil kontrato pri ne-proliferado nukleala. Iran e Nord-Korea konsideresas kom ecepti ad ica regulo.

NORD-KOREA / KONDAMNO DI USANO
Nord-Koreana tribunalo kondamnis Usano, habitanta Boston, ye ok yari de punis-laboro pro enirir nelegale en ita lando. Ico raportesis hiere dal oficala agenterio KCNA. Aijalon Mahli Gomes "agnoskis omna akuzi" lor lua prizento pasinta-mardie koram la centrala korto prikrimina. Evanta triadek yari, anciena profesoro pri la Angla en Sud-Korea, deskriptita kom fervoroza Kristano, il, supozeble, transiris la Nord-Koreana frontiero departante de Chinia ye la 25ma di januaro.

CHINIA / 31 MINISTI DURAS ESAR BLOKUSITA
La sokurseri duris serchar, hiere, 31 laboranti blokusita depos dek dii ye la fundo di mineyo en Shanxi, nord-Chinia. Pasinta-lundie, la sokurseri povabis rekuperar 115 laboranti. La plu multi de li esas en sat bona sanesala stando ma inter li 26 sufras pro respirado-problemi e kapo-dolori. Sep kadavri anke deskovresis en la mineyo. La direkteraro dil mineyo volabis ignorar la averti pri la existo di aquo-infiltruri en ita laboreyo.

Kordiala interretala saluti ad omni. JM :::-:::

Ye la 6ma di aprilo 2010

Dio di santa Marcelinus.

DIO-CITAJO / Me venis, me vidis, me vinkis (Iulius Caesar)

ZODIAKO / En la zodiako-signo dil Arieto guvernata dal planeto Marso.

VETERO / Bela blua e sunoza cielo printempal, cajorne, en Francilia.

KONCIZE

IRAK / ATENTI PRODUKTAS 30 MORTINTI EN BAGHDAD
Suocidanta teroristi impulsis ataki, pasinta-sundie, proxim plura ambasaderii en Baghdad, tale efektigante la mortigo di adminime 30 personi. Ita samtempa ataki vizis la Germana, Hispana, Siriana ed Egiptiana ambasaderii. Nula diplomacisto mortigesis ma sekureso-gardisti e pasanti atingesis.

BOLIVIA / MORALES VINKAS LOR LA REGIONALA ELEKTO
La partiso dil prezidanto Boliviana Evo Morales obtenis per elektala vinko, pasinta-sundie, kin de la non regioni di ca lando, dum ke la opozantaro plufortigas sua dominaco en tri altra regioni, segun rezultati preliminara koncernanta elekti por la provincala guberniestri. Evo Morales,qua esas la unesma Statestro Amerik-Indiana di Bolivia depos la sendependeso di ca lando, rielektesis kom prezidantoye la pasinta 6ma di decembro per 64% de la voti.

KAUKAZO / DU POLICANI MORTIGESIS EN INGUSHIA
Rusia frapesis, hiere, per nova suocid-atako produktinta la morto di du policani en Karabulak, Mez-Ingushia, qua esas nestabila republikodi Rusa Kaukazo. Nekonocatulo funcionigis lua explozili-zono ye l'instanto kande polico-veturo eniris la klozajo di edifico apartenanta a la ministrerio por Interna Aferi.

Kordiala interretala saluti ad omni. JM :::-:::

Ye la 2ma di aprilo 2010

Dio di santa Francisko de Paulo

DIO-PROVERBO / Beleso velkas, vertuo permanas.

ZODIAKO / En la zodiako-signo dil Arieto guvernata dal planeto Marso.

VETERO / Griza cielo e ventema pluvema vetero, cajorne, en Francilia.

KONCIZE

IRAN / CHINIA FAVORAS "PACA SOLVURO" KONCERNE LO NUKLEALA
La ministrerio por Exterlandala Aferi Chiniana riasertis ico, hiere, pos la deklari dal Usana ambasadistino che la Unionita Nacioni, Susan Rice, segun qua Chinia aceptas komencar "serioza negociado" che UN/ONU por punisi. La altra membri dil grupo de la sis Stati (Usa, Francia, Unionita Rejio, Rusia, Germania) suspektas ke Iran volas dotizar su per la nukleala armo.

EGIPTIA / KRITIKO PRI LA POLITIKO KONCERNE LA MIGRANTI
Segun Human Rights Watch, organizuro por defenso dil homala yuri, la frontierala gardisti konstante pafas adsur ita migranti, qui tre majoritate venas de subsahara Afrika e qui asertas ke li volas irar ad Israel por eskapar la povreso e la rasismo e por serchar laboro. Tri de li mortigesis an la frontiero kun Israel dum periodo de tri dii.

LITUANIA / PROTESTI KONTRE BELARUSA FABRIKERIO
Plu kam 20.000 Lituaniani dicis no a la previdita konstrukto di nukleala fabrikerio en Belarusia, proxim la frontiero kun Lituania, per signatar peticiono sendita a la Lituaniana prezidantino, a la chefa ministro ed a la ministrerio por l'ambiento. La signatinti desquieteskas por la sekureso di Vilnius, urbo distanta de kinadeko de kilometri dil previdita jaceyo.

Kordiala interretala saluti ad omni. JM :::-:::

Ye la 1ma di aprilo 2010.

Dio di santa Hugo.

DIO-PROVERBO / Ad omna bandito segun sua merito.

ZODIAKO / En la zodiako-signo dil Arieto guvernata dal planeto Marso.

VETERO / Sat sunoza cielo, ma kun tre koldeta vento, cajorne, en Francilia.

KONCIZE

AFGANIA / MORTIGERA ATENTO
Adminime 13 civili mortigesis, hiere, lor atento en la provinco Helmand, sud-Afgania. La explozilo, instalita sur biciklo funcionigesis defore lor disdono en rurala urbeto vicina de Lashkar Gah, chefurbo di Helmand, olqua esas bastiono dil talibani. La viktimi, qui koncerne la plu multi, esis rurani, asemblabis su por recevar gratuite fertiligita semuri.

INDIA / FINO DIL PROCESO DI LA SUPOZATA KULPINTO PRI LA ATENTI DI MUMBAI
La proceso dil Pakistanano, evanta 22 yari, Mohammed Ajmal Amir Iman, altranome "Kasab", unika supozata posvivanto dil kombato-grupo islamista responsiva pri la atenti di Mumbai produktinta 166 mortinti dum novembro 2008, finis hiere e la verdikto savigesos ye la 3ma di mayo, tale anuncis la prokuratoro. La dicita proceso komencabis dum la mi-aprilo 2009 koram specala tribunalo konstruktita meze di karcero di Mumbai.

KOLUMBIA / PABLO EMILIO MONCAYO LIBERIGESIS
La serjento Pablo Emilio Moncayo, un de la du maxim anciena gajo-homi dil Kolumbiana "guerilla"-ani le Farc, liberigesis. Evanta 32 yari, il dankis "Deo" e "lua patro", qua depos 12 yari obstinesis por ke il ne obliviesez. Le Farc savigis ke ica liberigo sen kondicioni serchis desinkombrar la voyo por "senfrista kambio" dil 21 cetera militisti e policani en la manui di le Farc po rebeli. Icon refuzas la Kolumbiana guvernerio.

Kordiala interretala saluti ad omni. JM :::-:::