IDO • Linguo Internaciona • Universala • Neutra • Facila


English Deutsch Français Plusa lingui

Novaji-Martignon-2010-Decembro


Vu esas la esma
vizitanto di ca ret-situo

Specala ofro

Ido-Situi

Kurseto por Infanti da A. Martinez (Hispania), PDF-file 2Mb

Elektronikala dicionarii

Ido-uzantogrupi

Diversa texti, literaturaji ed Idokursi

Plusa Situi

Idofonduri

Wiki interna

modifikez flanko-bendo

Impressum: / Impreso:

Inhaber der Internetpräsenz www.ido.li:
propietanto dil retsituo www.ido.li

Deutsche Ido-Gesellschaft e.V.
Germana Ido-Societo r.a.
c/o ver.di Berlin
FB 8 / AG Ido
Köpenicker Str. 30
D- 10179 Berlin

Onlinekontakt
Interreta kontaktformulario

Administrator der Internetpräsenz www.ido.li:
administranto dil ret-situo www.ido.li

Frank Kasper
Breitscheidstr. 22
D- 90459 Nürnberg

Onlinekontakt
Interreta kontaktformulario

Novaji-Martignon-2010-Decembro

Ye la 30ma di decembro 2010

Dio di santa Rojerus.

DIO-PROVERBO / Ta qua havas la forteso, ita havas la yuro.

ZODIAKO / En la zodiako-signo dil Kaprikorno guvernata dal planeto Saturno.

VETERO / Griza cielo ed humida temperaturo, cajorne, en Francilia.

KONCIZE

NORD-IRLANDO / 40.000 PERSONI PRIVACESAS DE AQUO

La desfrosto qua sequis periodo de negativa temperaturi disruptis grandanombra kanalizuri. Kom konsequo 40.000 personi privacesas de aquo depos plura dii, precipue en Belfast,ye totala habitantaro de 1,8 milion habitanti. Gratuita distributi de aquo organizesas dal municipi.

ITALIA / "DIKA PETARDI" KONTRE LA FEDERURO DIL NORDO

Du explozi eventis dum la nokto de mardio til merkurdio avan konstrukturo di la Federuro dil Nordo, en Gemonio, nord-Italia, sen efektigar viktimi. Segun l'unesma elementi dil inquesto entraprezita carelate, parolesus pri "dika petardi" qui domajis la portalo di ca partiso membro dil guverneriala koalisuro di Silvio Berlusconi. La vizita konstrukturo jacas ye cento de metri di la domo di Umberto Bossi, prezidanto di ca movado.

Umberto Bossi

GERMANIA / APLASTO DI "NIVURON-EKPULSANTA" HELIKOPTERO

Tri personi vundesis, inter li du atingesis grave - la pilotisto e la kunpilotisto -, lor la aplasto di helikoptero qua prontigis su ekpulsar la nivuro amasigita sur la tekto di komercala centro en Germania, en suburbo di Iseerstedt, proxim Iena, est-Germania. Tre abundanta nivo-falo eventis dum la recenta semani en Germania.

Kordiala interretala saluti ad omni. JM :::-:::

Ye la 29ma di decembro 2010

Dio di santa David.

DIO-PROVERBO / Tacez donante, parolez recevante.

ZODIAKO / En la zodiako-signo dil Kaprikorno guvernata dal planeto Saturno.

VETERO / Grizega cielo kun sat milda temperaturo, cajorne, en Francilia.

KONCIZE

UNIONITA REJIO / NON VIRI AKUZESAS PRI TERORISMO

Non viri qui arestesis ye la 20ma di decembro en Britania akuzesas pro komploto en la skopo produktar un o plura explozi e pro havir komplicesi por preparar "terorismo-agi", anuncis pasinta-lundie la policani. La borso di London e l'ambasaderio di Usa, same kam politikala e religiala personi esis inter la potenciala skopo-plaki, segun la informili.

CIENCO / LA NEANDERTAL-HOMO KOQUIS LUA NUTRIVI

La homo di Neandertal, qua extingesis aproxime triadek mil yari ante nun, ne nutris su nur per karno ma anke per vejetanti, e lu koquis lua manjaji, simile a lua kuzo la moderna homo, studiuro revelis pasinta-lundie. Segun preirinta explori, la Neandertalani esis precipue karnivora chasisti, ed ico acelerabus lia extingo.

Puero di Neandertal

USA / BARACK OBAMA ED HILLARY CLINTON ESAS MAXIM ADMIRATA PERSONI

L'Usana prezidanto Barack Obama e lua Statala sekretariino Hillary Clinton esas la du personi qui esis "maxim admirata" en Usa dum 2010, segun la instituto Gallup. Ye la nonesma intersequanta yaro, Hillary Clinton esas ye l'unesma rango dil maxim admirata mulieri, kun 17% avan la republikanino Sarah Palin (12%).

Kordiala interretala saluti ad omni. JM :::-:::

Ye la 28ma di decembro 2010

Dio dil ocido dil santa Inocenti.

DIO-PROVERBO / Ta qua iraceskas, ita perdas.

ZODIAKO / En la zodiako-signo dil Kaprikorno guvernata dal planeto Saturno.

VETERO / Grizega cielo kun pluveto, cajorne, en Francilia.

KONCIZE

RUSIA / MALE FAMOZA SPIONANTINO DEPARTAS AUDACOZE EN LA POLITIKO

La belino Anna Chapman, evo 28 yari, qua arestesis pasinta-somere en New Yorkdal FBI -olqua suspektas ke elu infiltris povo-reti en New York - ekpulsesis a Rusia. El kaucionizas publike nun Vladimir Putin. Lua moto esas : "Ni komencez chanjigar nia lando per chanjigar ni ipsa". Pro la minaci kontre elu, el havas korpo-guardi.

BRITANIA / LA ANGLA SALDI

Malgre la frequa striki di la Londonana subtera treno, la chera bilieti por la treno Eurostar, la senfina stacadi en serio, la Kontinentani iras sempre plu multanombraa Britania por profitar la saldi e la chipa preci dil ibea vendeyi. Nome ica vintra saldi debutis pasinta-sundie en Britania. Incidenti eventis en Birmingham ube homi mortigesis per kultelagi. Ma nulo haltigas la Britaniani e sempre plu grandanombra kontinentani iranta adibepor kurar a la chipa vendi eventanta nun en Unionita Rejio.

La saldi en Britania

ITALIA / FALSA ALARMI E BOMBA PAKI - LA PSIKOSO FRAPAS ROMA

Quar dii pos la explozo di du suspektinda paki en la ambasaderii di Suisia e di Chili, Roma esas en alarmo-stando. Nome, la Italiana informilimencionis la deskovri di suspektinda paki en la ambasaderii di Maroko e di Dania sen povar konfirmar la vereso di ca informo. Tale psikoso frapas Roma ed omna ambasaderii en Romo esas en alarmo-stando depos la explozi dil 23ma di decembro di qua la responsiveso revendikesas da Anarkiista Federuro (FAI).

Kordiala interretala saluti ad omni. JM :::-:::

Ye la 23ma di decembro 2010

Dio di santa Amantius.

DIO-PROVERBO / Ne indijesas tombo por mortinto, nek pano por vivanto.

ZODIAKO / En la zodiako-signo dil Kaprikorno guvernata dal planeto Saturno.

VETERO / Grizega cielo kun nivo-falo, cajorne, en Francilia.

KONCIZE

LONDON / LA PASEYO POR PEDIRANTI DI ABBEY ROAD CHELA KULTURALA PATRIMONIO

Ica Londonana paseyo por pediranti diveninta konocata dal decendantaro danke le Beattles e la kovrilo di la legendala albumo ABBEY ROAD, en 1969, enskribesis chela nacionala patrimoniodal kulturala autoritatozi, anuncis hiere la Britaniana guvernerio. Ita paseyo, qua de nun esas tre "protektata", jacas tre proxim la anciena establisuri di le Fab Four, "pluduras atraktar quaradek yari pose, mili de turisti singlayare. Ici laste dicita probas imitar la posturo dil grupo Beattles sur la kovrilo dil aludita albumo", taledeklaris la Britaniana Statala sekretario por la Turismo e la kulturala Patrimonio, John Penrose.

La paseyo por pediranti di Abbey Road

Dpto VAL D'OISE / POSTALA KONTORO ATAKESIS PER EXPLOZILO

Postala kontoro atakesis per explozilo, hiere ye aproxime dimezo en Garges-les-Gonesse (Dpto Val d'Oise), da du viri kagulizita, sen ke ita deliktanti sucesez kaptar la pekunio. Automobilo e la fasado di vicina vendeyo esis domajita per la suflo dil explozo. Ne esis vunditi.

LILLE / MORTIGITA DA KAMIONO KORAM LUA PATRO

Puerino evanta 12 yari, qua biciklagis, mortis hiere pos perkutesir da kamiono che la bulvardo Victor-Hugo en Lille. Ica yunineto akompanesis da elua patro e da elua fratulo, anke biciklaganta. La kamion-shoforo* asertas ke il ne vidabis la yuna viktimo. Kande la trafik-lumo divenis verda, dum ke la patro ed ilua filiulo esis ye kelka metri avane, la yunineto perkutesis dal dicita kamiono, qua ireskis addextre.

Kordiala interretala saluti ad omni. JM :::-:::

Ye la 22ma di decembro 2010

Dio di santa Franciska Xaviera.

DIO-PROVERBO / Ta qua dormas longatempe, vivas kurtatempe.

ZODIAKO / En la zodiako-signo dil Kaprikorno guvernata dal planeto Saturno.

VETERO / Griza cielo e kolda humida aero, cajorne, en Francilia.

KONCIZE

GERMANIA / PERQUIZITO EN LA MEDII DIL EXTREMISTA DEXTRANARO

La Germana policani savigis, hiere, ke li efektigabis tra ca tota lando perquiziti che la medii dil extremista dextranaro, en la skopo impedar la evento di rasista kampeyo por la dio di Santa-Silverstrus. Partoprenabus ita kampeyo pueri e yuni. L'organizuro entraprezanta ico esas filio di asociuro interdiktata depos 2009.

NORD-KOREA / RETROVENO DAL AIEA EN PYONGYANG

Nord-Korea promisis permisar la retroveno dal inspektisti dil Agenterio Internaciona por energio atomala (AIEA) sur lua teritorio, anuncis, hiere, la Usana guberniestro Bill Richardson pos vizito en Pyongyang.

Bill Richardson

JAPONIA / ALARMO-STANDO YE TSUNAMI

Sismo ye amplitudo 7,4 sur la Richter-skalo shanceligis, dum la nokto de hiere til hodie, insuleti dil Pacifika Oceano jacanta sudeste di Japonia ed alarmo-stando ye tsunami impulsesis, por priventar ondegi povanta atingar du metri.

RUSIA / RUSI NOSTALGIOZA PRI STALIN

Grupo de komunisti depozis plu kam quaramil reda dianti sur la tombo di Stalin en Moskva, pede dil murego dil Kremlin, tale celebrante la 131ma aniversario dil "patreto dil populi". Plu tarde 300 militanti, precipue retretinti, asemblis su proxim la monumento dedikata a Karl Marx, nefore de ibe, dum intonar Sovietala kanti sub la portreti di ca glorioza ma krimininta Statestro produktinta milioni de viktimi.

Iosif Stalin

On povas anke lektar artiklo pri Stalin en diversa lingui che Wikipedia :

http://fr.wikipedia.org/wiki/Joseph_Staline

Kordiala interretala saluti ad omni. JM :::-:::

Ye la 20ma di decembro 2010

Dio di santa Teofilos.

DIO-PROVERBO / Ta qua mustas, ita selektar ne povas.

ZODIAKO / Iro en la zodiako-signo dil Kaprikorno guvernata dal planeto Saturno.

VETERO / Grizega cielo kun fuzesanta nivuro, cajorne, en Francilia.

KONCIZE

BELARUSIA / KONTESTO EN ICA LANDO POS L'ELEKTO

La lasta diktatoreso di Europa vacilas. Deki de mili de opozanti manifestis en Minsk, hiere vespere, por protestar kontre la expektata vinko dal Belarusa prezidanto, Alexandros Lukashenko, qua esas ye la povo depos 1994, dum ke kandidato dil opozantaro vundesis lor afronti kun la policani. La manifestanti probis asalte kaptar la sideyo di la lokala guvernerio. Li repulsesis dal sekureso-trupi. Sioro Lukashenko supozeble obtenis inter 72,2 e 81,4% de la voti lor la prezidantal elekto.

Alexandros Lukashenko

USA / LA MILITISTI DARFOS KONFESAR LIA GEYESO

La kongreso di Usa aprobis, pos lastega voto che la Senato, per 65 voti kontre 31, l'aboliso di la kontroversata lego di 1993 interdiktanta a la soldati Usana savigar lia homeosexualeso. Ita aboliso postulesis de longa tempo da prezidanto Barack Obama. Ica laste dicita povos promulgar la aludita lego dum la venonta dii. Ma oportos vartar dum plura monati ante lua valoresko, t.e. la necesa tempo por la armizita trupi preparar su a la veno da soldati necelite homeosexuala en lia rangi.

UNIONITA REJIO / KA LA REJINO EVIKTESOS DE LA POST-MARKI

La lego-projeto vizanta la privatigo dil postala grupo Royal Mail, nun debatata che la Britaniana Parlamento, institucas nul obligo por la futura proprietanto konservar la portreto dil rejino. A multa regnati di Lua Klementa Majesto, parolesas hike pri atento kontre la Majesto. Inter la stranjera grupi interesata a la retrokompro di Royal Mail esas la Germana Deutsche Post.

Kordiala interretala saluti ad omni. JM :::-:::

Ye la 17ma di decembro 2010

Dio di santa Gael (santa patrono di Gael Richard).

DIO-PROVERBO / Stacar por ulu quale muro e turmo.

ZODIAKO / En la zodiako-signo dil Arkero guvernata dal planeto Jovo.

VETERO / Nivo-falo, cajorne, en Francilia.

KONCIZE

RUSIA / PUTIN DEKLARAS KE KHODORKORVSKI ESAS KULPINTA

La defensanti dil ex-magnato di petrolo Mikhail Khodorkovski denuncis la "nemediata intruzo" da Vladimir Putin en ica proceso. Dum ke verdikto expektesas, la Rusa chefa ministro opinionis hiere ke "la krimini" dal ex-magnato di petrolo "pruvesis" ye la fino di lua duesma proceso ed il akuzis lu plusafoye komanditir mortigi.

Mikhail Khodorkovski e Vladimir Putin

IRLANDO / KONDAMNO DAL EUROPEANA KORTO PRI HOMALA YURI LOR AFERO PRI ABORTIGO

La EKHY kondamnis hiere Irlando pro interdiktir l'abortigo a kancerikino qua timis ke lua gravideso produktez recidivo di ca morbo. La judiciisti konkluzis pri la violaco da Irlando koncerne la yuro ye privata e familiala vivo di la postulantino. Kompense la EKHY repulsis la demando da du plusa postulantini qui deziris abortar pro personala motivi.

TURKIA / KOMENCE DI PROCESO KONTRE 196 MILITISTI

La proceso di 196 Turka militisti, inter li esas altaranga gradiziti, akuzata preparir stroko di Stato por subversar la guvernerio dil chefa ministro Recep Tayyip Erdogan (venanta de l'AKP, arivinta ye la povo en 2002), komencis hiere proxim Istanbul koram la precipua akuzati. Lia proceso konstitucas la maxim direta minaco facita kontre la Turka armeani, qui esas gardisti di la laikeso.

Kordiala interretala saluti ad omni. JM :::-:::

Ye la 16ma di decembro 2010

Dio di santa Adelheid.

DIO-PROVERBO / Dil kordio spegulo esas la okulo.

ZODIAKO / En la zodiako-signo dil Arkero guvernata dal planeto Jovo.

VETERO / Griza cielo kun humide koldeta temperaturo, cajorne, en Francilia.

KONCIZE

USA / FURTISTA GANGSTERO DI LAS VEGAS FORPORTAS LAMENTINDA RAPTAJO

Pasinta-mardie, dumnokte, rapidega furto efektigita da gangstero eventis en un de la kazini maxim sekura dil planeto. Lo esas tre desfacila por vendor la kaptajo. Nome la furtisto prenis ludmarki valoranta 1,5 milion dolari, malgre la presorgi dal kazino por evitar tala katastrofo. Altralatere, pro ke la ludmarki surhavas la nomo dil hotelo Bellagio, li ne povas utiligesar altraloke nek kambiesar po pekunio. Ico esas prodajo sen konsequo.

Hotelo Bellagio en Las Vegas

FRANCIA / ON RITROVIS LA KAPO DI REJO HENRIKUS IV

Esquado de ciencisti autentikigis absolute la kapo di ca rejo di Francia, olqua deskovresis en 2008 en la domo di retretinta paro, qua konservis ol sekrete depos 1955. La inquesto plufaciligesis per la explori da Jean-Pierre Babelon, un de la maxim konocata historiisti di Henrikus IV. La kadavro di ca rejo enterigesis en la baziliko Saint-Denis quale omna reji di Francia. Ma lia tombeyo esabis profanacata en 1793.

ITALIA / ROMA EN FLAMI POS KE LA GUVERNERIO DI BERLUSCONI SALVESIS

Kordiala interretala saluti ad omni. JM :::-:::

Ye la 15ma di decembro 2010

Dio di santino Ninon.

DIO-PROVERBO / Plu valoras konkordanta ovo kam deskonkordanta bovo.

ZODIAKO / En la zodiako-signo dil Arkero guvernata dal planeto Jovo.

VETERO / Grizeta cielo kun kolda vintrala temperaturo, cajorne, en Francilia.

KONCIZE

BOLIVIA / INCENDIO SUB LA KELERI DI VILAJO

Jacanta en la departmento di Cochabamba, en mez-Bolivia, la vilajo Nueva Felicidad esas en alarmo-stando konfronte a geologial fenomeno tam rara kam impresiva. Depos tri semani, incendio furias sub la pedi di la 45 familii qui vivas ibe. Ita fairego depresigas e fendigas la sulo, qua, ye diversa loki sinkesas. Dika nubi eskapas de la subsulo. Kelkafoye mem, la vilajani perceptas flami. Por la geologiisti ita fenomeno debesus a gas-akumulo.

CHINIA / UNESMA KLUBO MEDITERANEO EN NIVOZA LOKO

La turismal Klubo Mediteraneo inauguris, hiere, en Chinia lua unesma vakanco-vilajo en la ski-staciono di Yabuli, nordest-Chinia, t.e. en un de la maxim granda skiebla domeni di ta lando. Havant acepto-kapableso de 283 chambri, ol provizesas per 18 skiebla treki. La Klubo Mediteraneo previdas kreor quar plusa vilaji en Chinia e vizas la skopo di 200.000 klienti ye la horizonto di 2015, kun l'apogo da lua Chiniana partenero Fosun, olqua ditenas preske 10% de la kapitalo di ca aluditaturismala klubo.

NEPAL / EX-PRINCO SERCHATA PRO UZO DI PAFARMO

La Nepalana polico emisis hiere aresto-dokumento kontre Paras Shah, anciena princo heredonto dil trono di Nepal, pro uzir pafarmo lor disputo pri la monarkio en turismala hotelo. Evanta 39 yari, il esas la posvivanto dil ocidado qua perdigis la vivo a dek membri di lua familio, dum junio 2001, nome li masakresis dal rejo di ta tempo en la rejala palaco.

Paras Shah

Kordiala interretala saluti ad omni. JM :::-:::

Ye la 14ma di decembro 2010

Dio di santa Odila.

DIO-PROVERBO / Labio-barbo di sinioro ma kordio di leporo.

ZODIAKO / En la zodiako-signo dil Arkero guvernata dal planeto Jovo.

VETERO / Sunozeta cielo ma kolda vintrala temperaturo, cajorne, en Francilia.

KONCIZE

ITALIA / SILVIO BERLUSCONI RESTAS YE LA POVO

La chefo dil Italiana guvernerio Silvio Berlusconi obtenis, hodie, la aprobo dal Parlamento. La "Cavaliere" konseque restas ye la povo ma en tensita kuntexto. Tri voti establisis la difero qua posibligis lua vinko che la Parlamento. Kelke plu frue che la Senato la "Cavaliere" ganabis facile la votaro per 162 voti por lu de 308 danke la apogo da lua federiti dila Federuro dil nordo.

Silvio Berlusconi

UNIONITA REJIO / JULIAN ASSANGE BALDE ESOS LIBERA

Il arestesis ye la 7ma di decembro en London pro afero pri supozata violaco en Suedia, ma Julian Assange, fondero di WikiLeaksesus balde liberigota po kauciono. Ico imperesis dal Britaniana judiciisti, nome la koncernato Julian Assange refutas la akuzi pri violaco. La Suediana autoritatozi povus cetere quik apelar pri la rezolvo dal Britaniana judiciisti.

USA / MONAKINO SUSTRAKTAS 850.000 DOLARI POR LUDAR EN KAZINO

Fratino Susie, evo sisadek-e-du yari akuzesas sustraktir 850.000 dolari (aproxime 600.000 euri) por ludar en kazino... Marie Thornton, altre nomizita "fratino Susie", arestesis ed askoltesis pasintajovdie dal federala korto di Sud-Manhattan, olqua rezolvas pri la fato dil kriminanti qui ne apartenas a la medio dil banditaro. Fratino Susie akuzesas sustraktir la aludita pekuno de la kasi dil Iona college, privata universitato di qua elu jeris la financala 'resursi'.

Kordiala interretala saluti ad omni. JM :::-:::

Ye la 13ma di decembro 2010

Dio di santa Lucia.

DIO-PROVERBO / Simio a simio plezas plu kam omno.

ZODIAKO / En la zodiako-signo dil Arkero guvernata dal planeto Jovo.

VETERO / Blua e sunoza cielo ma kolda vintrala temperaturo, cajorne, en Francilia.

KONCIZE

UNIONITA REJIO / LA PATRONO DI VIRGIN KOM AVIONAL HOSTINO

Lu perdis pario kontre la patrono di Lotus, Tony Fernandez. Rezulto : ye la venonta 21ma di februaro, la proprietanto dil automobileyo ye Formulo 1 Virgin, Richard Branson, servos kom avional hostino interne di aviono di Air Asia iranta de London til Kuala Lumpur. Fardizita e surhavanta shui ye alta talono, il mustos efektigar omna labori relatanta lua funciono, inkluzite la netigo di la latrini. La plasi por ica avional voyirado vendesos aucione profite a karitatal agi.

Richard Branson

CHINIA / CIENCALA EXPLORANTI TRAVESTIAS SU KOM PANDI

En Chinia, la ciencala exploranti dil centro jeranta la naturala rezerveyo di Wolong, agas omnamaniere por prezervar pando-infanteto. En la skopo ne alterar la percepto di lua ambiento, du ciencisti utiligas granda moyeni e travestias su...kom pandi.

GERMANIA / EXPLOZO DI DOMO

Tri kadavri extraktesis hiere de la ruini di domo devastita per flagresko di qua la origino ne konocesas, en Bruehl - Westfalen, west-Germania. La trovata kadavri esus olti di paro e di lia filiino evanta 10 yari. Vundita yunulo evanta 12 yari duktesis a la maxim proxima hospitalo.

NORVEGIA / LA RENTIRI REFLEKTAS

La autoritatozi di nord-Norvegia previdas provizar quik de ca yaro 2000 rentiri per reflektanta koliari en la skopo diminutigar la choseala acienti. La mala videbleso sur la chosei dumvintre esus la origino dil plura kolizioni kun la preferata animalo di Patro Kristnasko.

Kordiala interretala saluti ad omni. JM :::-:::

Ye la 10ma di decembro 2010

Dio di santa Romaricus.

DIO-PROVERBO / Plu kustas la sako kam la tota pako.

ZODIAKO / En la zodiako-signo dil Arkero guvernata dal planeto Jovo.

VETERO / Grizacha cielo e frostaquo sur la chosei, cajorne, en Francilia.

KONCIZE

USA / PLUSA FALIO POR LA KLOZO DI GUANTANAMO

La Chambro dil reprezentanti di Usa refuzis "de facto" hiere la klozo en 2011 dil karcero jacanta sur militistal provizerio en Kuba. Lu agis lo per adoptar la lego-projeto pri financo por 2011, di qua paragrafo interdiktas la transporto dil karcerani por lia judicio pro terorismo koram civila tribunali sur la Usana sulo.

SIRIA / VIZITO EN PARIS DI PREZIDANTO BASHAR AL ASSAD

La stabileso di Libano esis esonta la centrala punto dil diskuto lor la vizito dal Siriana prezidanto hiere e hodie, ye la tempo-proximesko di la livro dil akuzo-dokumento dal specala Tribunalo por Libano koncernanta l'asasino dil anciena chefa ministro Rafik Hariri. Bashar Al Assad havis hiere dejuno-laboro en la Elysees-palaco kun Nikolaos Sarkozius.

Bashar Al Assar

UNIONITA REJIO / MANIFESTO KONTRE LA FORTA AUGMENTO DIL UNIVERSITATAL SPENSI

Plura mili de personi manifestis hiere en London kontre la projeto di trioplesko dil enskribo-kusto che la universitato. Ita projeto diskutesis che la Parlamento. Ita manifesto, olqua esas la kinesma dum tempo-periodo de apene plu kam un monato, postulis la retreto di ca texto previdanta irigar la universitatal spensi de 3.290 ? (preske 4.000 ?) til 9.000 poundi yarale (preske 11.000 euri) en 2012.

Kordiala interretala saluti ad omni. JM :::-:::

Ye la 9ma di decembro 2010

Dio di santa Petrus Fourier.

DIO-PROVERBO / Ta qua omnon manjis dum la jorno, hungros vespere.

ZODIAKO / En la zodiako-signo dil Arkero guvernata dal planeto Jovo.

VETERO / Blua e sunoza cielo kun fuzesanta nivuro, cajorne, en Francilia.

KONCIZE

CHINIA / GAS-EXPLOZO MORTIGAS 26 MINISTI

Acidento en karbon-mineyo dil provinco Henan, meze di Chinia, mardie vespere, produktis 26 mortinti inter la ministi. La Chiniana mineyi konsideresas kom le maxim danjeroza en la mondo, pro la neglijo dil sekureso-aranjuri e pro la prioreso grantita a la produkto-necesesi. Pasinta-yare, 2.631 personi mortis en ta loki, segun la oficala bilanci.

JAPONIA / SONDILO FALIIS ENIRAR L'ORBITO DIL PLANETO VENERO

La Japoniana agenterio por kosmospacala explorado anuncis, hiere, ke la sondilo Akacuki, lansita ye la pasinta 20ma di mayo, faliis enirar l'orbito dil planeto Venero. Ita dessuceso limitizas la Japoniana kosmospacala ambicio. Plusa manovro itere probesos kanda la sondilo denove situesos ye adequata poziciono, dum la fino dil yaro 2016. La dicita sondilo esis kompletigonta la observaji di Venus Express, satelito sendita dum la fino di 2005 dal Europana Kosmospacala Agenterio.

Lanso dil sondilo Akacuki

KOSOVO / ELEKTO SURVEYATA

Plus kam 120 diplomacala esquadi dependanta de EU/UE surveyos venonta-sundie la deputital elekto ibe, olqua esas la unesma depos la sendependeso-proklamo di Kosovo en 2008 (ne-agnoskata da Serbia). Segun la ortodoxista Eklezio di Serbia, la necesa kondicioni ne realigesas por ke la Serba minoritato povez partoprenar la voto, nome granda nombro de Serba ekpulsiti ne retrovenis en Kosovo.

Kordiala interretala saluti ad omni. JM :::-:::

Ye la 6ma di decembro 2010

Dio di santa Nikolaos.

DIO-PROVERBO / Plu helpas guto de feliceso kam barelo de sajeso.

ZODIAKO / En la zodiako-signo dil Arkero guvernata dal planeto Jovo.

VETERO / Grizachega cielo pluvema kun relative milda temperaturo, cajorne, en Francilia.

KONCIZE

IRAN / LA GUVERNERIO DI TEHERAN ASERTAS DOMINACAR LA CIKLO DI NUKLEALA KOMBUSTEBLAJO

La chefo dil nukleala programo Iranana Ali Akbar Salehi savigis, hiere, ke lua lando produktabis sua unesma porciono de uranio-koncentrajo departante de erco extraktita de sua mineyi. La Iranana autoritatozi asertas kontrolar la toteso dil ciklo por produktar la nukleala kombusteblajo, dum ke internaciona diskuti pri ca kontroversata programo ristartas en Geneve.

Ali Akbar Salehi

AFGANIA / DU SOLDATI DI NATO/OTAN E DU AFGANIANA SOLDATI MORTIGESIS LOR SUOCIDA ATENTO

La dicita atako facesis, hiere, sur merkato di Gardez, sudest-Afgania. Onu ne ja savas la nombro de vunditi e la nacionaleso dil viktimi. Ita atako 'okuras' ye la morga dio dil rapidega vizito da prezidanto Obama en Kabul. 2010 esabos la maxim mortigera yaro depos non yari por la internaciona trupi en Afgania.

MALA VETERO / MILI DE PERSONI EVAKUESAS EN MEZ-EUROPA

En Albania, plu kam 11.000 personi evakuesis, hiere, e 7.500 habiteyi esis domajita en la regiono Shkodra, nord-Albania, pos la forta pluvi qui falegas sur ica lando depos un semano. Pasinta-saturdie, la autoritatozi demandis la helpo da NATO/OTAN. En Montenegro, la situeso restas suciiganta en la regiono di la sama lago cirkum la chefurbo Podgorica.

Kordiala interretala saluti ad omni. JM :::-:::

Ye la 3ma di decembro 2010

Dio di santa Xavierus.

DIO-PROVERBO / Quala la parokiestro, tala la parokianaro.

ZODIAKO / En la zodiako-signo dil Arkero guvernata dal planeto Jovo.

VETERO / Grizega cielo ed humide kolda temperaturo kun nivo, cajorne, en Francilia.

KONCIZE

AFGANIA / RANKORO KONTRE USA

La publikigo da WikiLeaks di mili de diplomacala dokumenti tre importanta povus instigar la Afganiana prezidanto Hamid Karzay "ruptar la relati" kun la NATO/OTAN-koalisuro. Tale desquieteskas la Usana ambasadisto en Kabul, segun raporto difuzata pasinta-merkurdie en Kanada. "La precipua timo (...) esas ke ita nediskretaji revelez la taktikala, politikal e strategial reflektisame kam la evalui e la privilejizita relati dal membri dil Karzay-guvernerio ed anke da altra eminenti en Afgania", tateme skribas la Kanadana ambasadisto.

Hamid Karzay

USA / HOMEOSEXUALA MARIAJO

La Parlamentani di Usana Stato Ilinois, feudo di prezidanto Barack Obama, aprobis pasinta-merkurdie la civila unioni inter homeosexuali e li transmisis ica texto a la lokala guberniestro por signatar. Nome, la civila unioni ofras a la homeosexuala pari la sama yuri kam a la mariajita pari koncerne la heredaji o la hospitalal viziti, ma oli perceptesas dal geyala komunajo kom povra parento dil geyala mariajo. Plebiciti pri la geyala mariajo organizesis en 31 de la 50 Usana Stati, ma nula aprobesis.

BRAZILIA-LANDO / LUKTO KONTRE AIDS/SIDA

UNAIDS/ONUSIDA livris, pasinta-merkurdie, premio a la Brazilia-landana prezidanto Luis Inacio Lula da Silva pro l'ago da lua guvernerio kontre la AIDS/SIDA-morbo, lor la mondala dio di lukto kontre ica morbo. Lula "esas guidanto di qua la ago koncerne AIDS/SIDA chanjigis vivi en la tota mondo. Il esas partenero dil developanta nacioni, ulu qua faligis barili e havis ferma poziciono kontre la diskriminaco*", tale deklaris Michel Sidibe, exekutanta direktisto di UN/ONU-ala agenterio.

Kordiala interretala saluti ad omni. JM :::-:::

Ye la 2ma di decembro 2010

Dio di santa Viviana.

DIO-PROVERBO / Prudenton protektas Deo.

ZODIAKO / En la zodiako-signo dil Arkero guvernata dal planeto Jovo.

VETERO / Kolda vetero kun nivuro fuzesanta e divenanta frosto-aquo, cajorne, en Francilia.

KONCIZE

KOSOVO / KOMENCO DIL KAMPANIO POR LA DEPUTITAL ELEKTO

En Kosovo komencis, pasinta-merkurdie, kampanio por la deputital elekto dil 12ma di decembro. olqua esas la unesma depos la sendependeso-proklamo dum februaro 2008. La Kosovana prezidanto provizora, Jakup Krasniqi, emisis ye la antea dio advoko a kalmeso, dum ke la tenso esas sentebla inter la du precipua politikala partisi di ca lando depos la falo dil koalisuro-guvernerio dum pasinta septembro, quan oli partoprenis.

EUROPANA UNIONO / YURO DIL VEHILO-UZANTI LOR TARDESO

La voyajanti en autobuso viktimi pro tardeso en Europa balde yurizesos obtenar rimborso ed helpo. Interkonsento, trovata hiere inter la Duadek-e-sep Europana Stati e la Europana Parlamento, previdigas kompenso por omna problemi povinte eventar dum voyajo havanta disto ye plu kam 250 km. Autobus-vehisto mustos precipue furnisar drinkaji e nutrivi kaze di tardeso ye nonadek minuti koncerne voyajo duranta dum tri hori.

BRAZILIA-LANDO / REKORDA DIMINUTO DIL SENFORESTIGO DI AMAZONIA

La Brazilia-landana guvernerio anuncis, hiere, registragesir rekorda diminuto dil senforestigo di Amazonia inter agosto 2009 e julio 2010, kun "nur" 6.451 km2 senarborigita, t.e. areo qua korespondas tamen kun Franca departmento (o du Britaniana komtii) e qua esas supera a la skopo de 5.000 km2 de senarborigo quan ol vizabis. Destrukto-somito atingesis dum 2004 per 27.000 km2 destruktita.

Senarboreyo en la Amazoniana foresto

Kordiala interretala saluti ad omni. JM :::-:::