Novaji-Martignon-2010-Februaro

Ye la 26ma di februaro 2010

Dio di santulo Leander.

DIO-PROVERBO / Nulu esas sen defekti.

ZODIAKO / En la zodiako-signo dil Fishi guvernata dal planeto Neptuno.

VETERO / Sunoza cielo ma ventoza vetero, cajorne, en Francilia.

KONCIZE

ALBANIA / LA OPOZANTARO RETROVENAS A LA PARLAMENTO
La socialista opozantaro Albaniana rezolvis retrovenar, pasinta-jovdie, a la Parlamento di qua lu boikotis la labori depos la deputital elekto dil pasinta 28ma junio pro ke lu kontestas la rezultati di ol. La internaciona komunajo savigabis lua desquietesko opoze ad ita krizo ed a la efekti quan ol povis havar pri la progreso di ca lando vers Europana Uniono.

ARJENTINIA / L'ANCIENA PREZIDANTO ARJENTINIANA FALIIGAS LA KONTROLO-KAPTO DIL SENATO DAL OPOZANTARO
Dum absenteskar lastinstante, Carlos Menem, anciena Arjentiniana prezidanto, un de la maxim mal enemiki dil prezidantino Cristina Kirchner e di elua spozulo, ne posibligis a l'opozantaro rihavar la majoritato che la Senato. Lor la deputital elekto, la partiso dil prezidantino perdabis la kontrolo di amba guverneriala chambri.

USA / L'USANA SENATO PROLONGIS DE UN YARO TRI ARANJURI DIL PATRIOT ACT
Ita legifanta rezolvi por luktar kontre la terorismo instalesabis dal Bush-guvernerio. Parolesas pri "la movebla surveyo" dil komuniki di suspektati, segun la principo qua posibligas inquestar pri persono semblanta agar por su ipsa e pri la posibleso por la autoritatozi acesar la elektronikal mesaji di suspektato.

Kordiala interretala saluti ad omni. JM :::-:::

Ye la 25ma di februraro 2010

Dio di santa Robertus d'Abrissel.DIO-PROVERBO / Ne fidez parolo sen propra kontrolo !
ZODIAKO / En la zodiako-signo dil Fishi guvernata dal planeto Neptuno.
VETERO / Grizeta cielo kun milda temperaturo, cajorne, en Francilia.

KONCIZE
IVORA RIVO / NEKOMPLETA GUVERNERIO
La nova Ivorana guvernerio posedos 28 membri. Dek-e-sis titulieri anuncesis mardie vespere, e dek-e-un ofici esas ankore "provizota". La toteso de oli antee okupesis dal opozantaro nuna en la preirinta guvernerial sekretariaro. La ministrerii atribuata esas dispartigata inter la popul-Fronto Ivorana di prezidanto Laurent Gbagbo e la ex-rebeli dil Forci Nova di la chefa ministro Guillaume Soro.

ALBANIA / UN/ONU VOLAS INQUESTAR PRI LA KOMERCACHI DI ORGANI
La guvernerio Albaniana mustas aceptar sendependa inquesto pri posibla komercacho di organi, tale deklaris pasinta-mardie en Tirana, la raportisto di UN/ONU okupante supri la temo di mortigi exterjudicia, Philip Alston. La guvernerio di Tirana refuzabis pasinta-yare requizito dal guvernerio di Beograd en la skopo efektigar inquesto en Albania koncerne komercacho di organi forprenita de Serba milit-kaptiti dum e pos la konflikto di 1998-1999 en Kosovo.

ISLANDO / PAZO VERS EUROPANA UNIONO
La Europana komisitaro rezolvis, hiere, rekomandar la komenco di negociado en la skopo posibligar la iro da Islando en Europana Uniono. La Europana Stati esas ankore aprobontaita propozo unanime. La autoritatozi di Bruxelles opinionis ke Islando esas suficante progresinta en la feldo politikala, ekonomiala e legifanta por justifikar plusa avanco.

Kordiala interretala saluti ad omni. JM :::-:::

Ye la 24ma di februaro 2010

Dio di santa Modestus.
DIO-CITAJO / "Neeviteble la kapitalismo falos kande Usa bankrotos". (J. Stalin)
ZODIAKO / En la zodiako-signo dil Fishi guvernata dal planeto Neptuno.
VETERO / Grizeta cielo kun milda temperaturo, cajorne, en Francilia.

KONCIZE

IRAN / ARESTO DI REBELA CHEFO
Abdolmalek Righi, chefo dil rebela sunnista movado Joundallah arestesis hiere. Ilu akuzesas organizir multanombra atenti, quale olta qua mortigis dum pasinta oktobro 42 personi, inter li esis oficiri dil Gardisti di la revoluciono, en la provinco Sistan-Balouchistan, este di ta lando, an la frontiero kun Afgania.

NEDERLANDO / ELEKTO YE LA 9ma DI JUNIO
Anticipata deputital elekto produktita per la falo, pasinta-saturdie,dil guvernerio Balkenende, eventos ye la venonta 9ma di junio, tale anuncis hiere la informo-servo di ca rejio. La guvernerio falabis pos la retreto de la guvernerial koalisuro dal Partiso Laboristal, olqua esas opozata ad omna manteno dil trupi Nederlandana en Afgania dum ankore un yaro, quale ico esis dezirata da NATO/OTAN.

TAILANDO / PLU KAM UN MILION ENMIGRANTI EN TAILANDO MINACESAS PER EKPULSO
La guvernerio di Bangkok demandis a la resortisanti Burmana, Kambodjana e Laosana igar su konocata da lia guvernerii ante venonta-sundie, se no li ekpulsesos. Ico esas aranjuro vizanta luktar kontre la nelegala enmigrado. Dum la fino di decembro, la guvernerio di Bangkok ekpulsis a Laos 4.500 "Hmong"-i, inter li 158 esis refujinti agnoskata da UN/ONU.

Kordiala interretala saluti ad omni. JM :::-:::

Ye la 23ma di februaro 2010

Dio di santa Lazarus.
DIO-CITAJO / Olimla Britaniani koloniigis la teritorio di Usa. Hodie la Usani koloniigas Britania. (J. Stalin)
ZODIAKO / En la zodiako-signo dil Fishi guvernata dal planeto Neptuno.
VETERO / Grizeta cielo, cajorne, en Francilia.

KONCIZE

MALI / QUAR ISLAMISTI LIBERIGESAS
Quar membri di Al-Qaida en Maghreb islamista (Aqmi) liberigesis dum la nokto de sundio til lundio. La Nord-Afrikana brancho di Al-Qaida minacabis ocidar la Franca gajo-homo Pierre Camatte, raptita dum la fino di novembro, se lua demandi ne esus kontentigata. Ultre lo, viro, prizentita kom la "precipua autoro" dil rapto di tri humanala laboranti Hispana ye la pasinta 29ma di novembro en Mauritania, arestesis dal Mauritaniana policani.

INSULI MALVINA / ARJENTINIA DESQUIETESKAS PRO BRITANIANA BORADO
Unesma borado por-petrolaBritaniana esis komencota, hiere, opoze a la insuli Malvina. Ico produktas tenso kun Arjentinia qua pluduras revendikar la suvereneso ye ta insuli. La guvernerio di Buenos Aires postulos permiso por la navi trairanta lua marala teritorio en la skopo irar a la insuli Malvina e lu volas instigar kunagar la "Grupo di Rio", olqua asemblas duadek-e-quar landi di Latinida Amerika.

HAITI / PSIKOLOGIISTI RENKONTROS PUERI ED INFANTI
Esquado de pedopsikiatriisti* e de specalisti pri la kindi* iros balde a Haiti por renkontror la adoptita infanti e pueri qui esas aceptota en Francia, tale anuncis hiere la ministrerio pri Exterlandala Aferi en Paris. Akra debato opozas asociuri de skolan-genitori deziranta acelerar la adopto-procedo e specalisti pri infanti e pueri qui avertas kontre la danjero di suplemantala traumato.

Kordiala interretala saluti ad omni. JM :::-:::

Ye la 22ma di februaro 2010

Dio di santa Izabela.
DIO-PROVERBO / Infantal inklino restas til la fino.
ZODIAKO / En la zodiako-signo dil Fishi guvernata dal planeto Neptuno.
VETERO/ Pre-printempala vetero, kelkete sunoza, cajorne, en Francilia.

KONCIZE

PORTUGAL / MORTIGERA PLUVI SUPER L'INSULO MADEIRA
Torentatra pluvi e violentoza venti produktinta inundi e tereno-gliti efektigis adminime 25 mortinti e deki de vunditi e desaparinti, pasinta-saturdie, sur la Portugalana insulo Madeira, segun informo dal guvernerio. La venti superiris 100 kilometri hore e la agitata maro produktis ultre lo importanta materiala destrukturi sur ica insulo jacanta ye 900 km de Portugal.

UKRAINA / YULIA TIMOSHENKO ABANDONAS ELUA REKURSO
La Ukrainana chefa ministrino Yulia Timoshenko renuncis, pasinta-saturdie, kontestar judiciale la vinko di lua adverso lor la recenta prezidantala elekto. Ita egerio* dil "oranjea revoluciono", qua havis 900.000 voti minuse kam lua rivalo, ne agnoskis sua desvinko, ma agis riturno por evitar la vexajo qua esabus desfavoroza judiciala decido.

IVORA RIVO / MEDITADO-PROBO POS MORTIGERA KOMBATI
La prezidanto di Burkinabe-Faso, Blaise Compaore, aceptis hiere la du guidanti dil Ivorana opozantaro, Henri Konan Bedie ed Alassane Ouattara. Kin personi mortis pasinta-venerdie en Gagnoa, olqua esas la feudo dil statestro Laurent Gbagbo, lor afronti. Anuncata kom eventonta hodie, la formaco dil sekretariaro di la chefa ministro rienduktas Guillaume Soro, chefo dil ex-rebelaro di Forces Nouvelles (FN), impedesas depos un semano.

Kordiala interretala saluti ad omni. JM :::-:::

Ye la 19ma di februaro 2010.

Dio di santa Gabinus.

DIO-PROVERBO / Bone ita sidas a qua la fato ridas.

ZODIAKO / En la zodiako-signo dil Varsero guvernata dal planeto Urano.

VETERO / Sat sunoza cielo e relative milda temperaturo, cajorne, en Francilia.

KONCIZE

IRAN / LA PLURICHIGO DIL URANIO YE ALTA NIVELO KOMENCIS
Iran impulsis ica proceso ante l'arivo dal inspektisti dil internaciona Agenterio pri atomala energio, segun raporto dal dicita agenterio. La Iranana autoritatozi anuncabis ye la 9ma di februaro la komenco dil plurichigo dil uranio ye 20% por la exploro-reaktoro di Teheran, malgre la protesti dal Ocidentala landi qui intencas organizor punisi.

GERMANIA / DOCISTO ASASINESIS DA ANCIENA DICIPULO
La supozata ocidero di docisto, lor krimino 'okurinta' hiere en profesionala gimnazio en Ludwigshafen (west-Germania) esas anciena dicipulo evanta 23 yari "iracoza pro male notizesir" da lua viktimo, tale explikis la prokuratoro komisita por la inquesto. La konjektata mortigero arestesis en la aludita edukerio. La docisto koncernata poniardagesis.

BOLIVIA / L'INQUESTO PRI LA DIKTATORESO PROGRESAS
La Bolivian armeo anuncis pasinta-merkurdie ke ol esas livronta omna postulata informi a la prokuratoro Milton Mendoza, qua inquestas pri la fato di 170 desparinta personi lor la diktatoresi de la yari 1960 til 1980. Kelka hori antee, Milton Mendoza deplorabis ke oficiro interdiktabis a lu l'aceso a raporti klasifikata kom konfidencala apartenanta al informo-servi.

Kordiala interretala saluti ad omni. JM :::-:::

Ye la 18ma di februaro 2010

Dio di santa Bernarda Soubirous.

DIO-PROVERBO / Falas mielo ne del cielo.

ZODIAKO / En la zodiako-signo dil Varsero guvernata dal planeto Urano.

VETERO / Chanjema vetero e cielo, cajorne, en Francilia.

KONCIZE

INDIA / LA RESPONSIVESO DIL ATENTO DI PUNE REVENDIKESAS DA ISLAMISTA GRUPO
Segun la diala jurnalo THE HINDU, la responsiveso dil atento facita pasinta-saturdie kontre restorerio dil Indiana urbo Pune revendikesis da islamista grupo quo deklaras esar disidento dil Pakistanana Lashkar-e-Taiba. Ita atako 'okuras' dum ke la guvernerio di New Delhi propozis ad Islamabad ristartar la paco-dialogo, interruptita konseque dil atenti di Mumbai (Bombay) eventinta dum novembro 2008.

CHEKIA / EXTREME DEXTRANA ORGANIZURO SUPRESESAS DAL SUPREGA KORTO
La Chekiana guvernerio di Jan Fischer markizis un punto en lua lukto kontre la extremismo. La Suprega Korto di Brno deklaris kom justa, plendo kontre la DS, t.e. ne-parlamentala organizuro, olqua akuzesas esir dop plura ataki kontre la Romi* (Cigani). La Korto kondamnis "shovina" e "stranjeri-odianta" konduti e rezolvis la senfrista supreso dil DS, olqua obtenabis 1,07 % de la voti lor la Europana elekto di 2009.
Jan Fischer

GRUZIA-RUSIA / RUSA MILITISTAL PROVIZERIO EN ABKHAZIA
Rusia ed Abkhazia signatis, hiere, interkonsento-kontrato permisanta a la guvernerio di Moskva instalor militistal provizerio sur la teritorio di ta separista republiko Gruziana, tale tre nocante la guvernerio di Tbilissi. Dum agosto 2008, Rusia e Gruzia afrontesabis por la kontrolo dil separista regiono Gruziana nome Sud-Osetia. Konseque la guvernerio di Moskva agnoskabis la sendependeso di ca teritorio e di Abkhazia.

Kordiala interretala saluti ad omni. JM :::-:::

Ye la 17ma di februaro 2010

Dio di santa Alexis Falconieri.

DIO-PROVERBO / A ta omni cedas, qua oron posedas.

ZODIAKO / En la zodiako-signo dil Varsero guvernata dal planeto Urano.

VETERO / Grizega cielo kun milda temperaturo, cajorne, en Francilia.

KONCIZE

ITALIA / ACIDENTO DI TURISMAL AUTOBUSO
Tri Franci, inter li esaspuerulo evanta 13 yari, mortigesis lor la acidento di turismal autobuso, survoye a Firenze. Ita acidento efektigis anke deko de vunditi, qui omna esas nun exter morto-danjero. La aludita turismal autobuso transportis 63 personi, inter li esis 56 dicipuli e 5 docisti ed akompananti dil kolegio Notre-Dame di Riberac, Dordogne, pluse esis du vehisti, departinta pasinta-lundie por skolala voyajo a Firenze.

KALIFORNIA / LA NEBULO-INDIJO MINACAS LA SEQUOYI
La nebulo klare diminutis alonge la Kaliforniala litoro dumsomere depos un yarcento, tale endanjerigante potenciale la foresti de sequoyi qui dependas de ca humideso por ne sikeskar dum la varma sezono, segun studiuro publikigita pasinta-lundie.
Sequoyo en Kalifornia

LIBIA / VISTI NE PLUS GRANTESAS A LA CIVITANI DIL SCHENGEN-SPACO
La Quai d'Orsaydeskonsilas a lua resortisanti irar a Libia, pos la rezolvo da ca lando ne plus grantar eniro-visti a la civitani dil Schengen-spaco. Jurnalo proxima a la politikala povo memorigas ke Suisia interdiktis a 188 Libiana responsivi aceso a sua teritorio qua esas parto del Schengen-spaco.

Kordiala interretala saluti ad omni. JM :::-:::

Ye la 16ma di februaro 2010

Dio dil karnaval-mardio.

DIO-PROVERBO / Tablon ne tuko ornas, ma kuko.

ZODIAKO / En la zodiako-signo dil Varsero guvernata dal planeto Urano.

VETERO / Sunoza cielo, ma kolda temperaturo, cajorne en Francilia.

KONCIZE

INDIA / DEK-E-QUAR POLICANI OCIDESIS EN LA STATO EST-BENGAL
Hiere, supozata rebeli Maoista armizita e vehanta motorizita bicikli ocidis 14 policani lor atako kontre kampeyo dil sekureso-trupi en la distrikto Midnapore. Ita rebeli-atako 'okuras' kande la sekureso-trupi impulsas atako en plura Stati por ekpulsar la rebeli de lia bastioni.

TURKIA / AFRONTI INTER KURDA MANIFESTANTI E POLICANI
Violentaji eruptis hiere inter Kurdi e Turka policani lor du manifesti vizanta markizar la 11ma aniversario dil aresto di la rebela chefo Kurda Abdullah Ocalan. En Diyarbakir, triadeko de manifestanti interpelesis. En Istanbul, plura deki de personi afrontis la sekureso-trupi, qui replikis per lakrimifanta gasi.

ITALIA / TENSI EN MILANO
"Ni devas probar evitar la koncentro di diversa etni* en la sama areo", tale asertis hiere la ministro pri Interna Aferi, Roberto Maroni, ye la dio sequanta afronti, en Milano, inter enmigrinti veninta de Nord-Afrika e enmigrinti veninta de Sud-Amerika. Lo esas la mortigo di Egiptiano evanta 19 yari, imputata a Peruani ed Equadorani, quo produktis ita violentaji.
Roberto Maroni

Kordiala interretala saluti ad omni. JM :::-:::

Ye la 15ma di februaro 2010

Dio di santa Klaudius de la Colombiere.

DIO-CITAJO / La spirito e la sabro esas la maxim importanta kozi en la vivo di la homaro e sempre la spirito vinkis la sabro. (Napoleon I-esma)

ZODIAKO / En la zodiako-signo dil Varsero guvernata dal planeto Urano.

VETERO / Grizeta cielo e kolda temperaturo, cajorne, en Francilia.

KONCIZE

INDIA / MORTIGERA ATENTO EN LA URBO PUNE
Non personi, inter li esas muliero qua povus esar exterlandanino, mortigesis e 57 plusa homi vundesis, saturdie vespere, per la explozo di bombo en la Indian urbo Pune. Ico esas la unesma importanta atento depos olti di Bombay dum novembro 2008 (166 mortinti e 600 vunditi) olqui imputesis ad islamista grupo establisita en Pakistan. Ita atento 'okuras' dum la tempo kande India e Pakistan jus aceptis ristartar la paco-dialogo interruptita pos la atenti di Bombay.

IRAN / USA INTENCAS OBTENAR PUNISI QUIK DE "ICA MONATO"
La Usana guvernerio laboras por prizentar ita punisi kontre Iran ad UN/ONU, tale deklaris hiere la konsilanto por la nacionala sekureso di prezidanto Obama, generalo James Jones. La Statala sekretariino Hillary Clinton komencis hiere turo vizanta obtenor apogi por plufortigo dil punisi kontre Iran. Kom previdita programo esas renkontro kun la Turka chefa ministro e l'emiro di Qatar.
Generalo James Jones

UKRAINA / TIMOSHENKO ESAS KONTESTONTA LA REZULTO DIL VOTO
La Ukrainana chefa ministrino Yulia Timoshenko deklaris ke el esas kontestonta judiciale prezidantal voto-rezulto "falsigita", dum asertar ke elua rivalo Viktor Yanukovich nulatempe esos legitima Statestro en Ukraina, tale el deklaris lor diskurso a la naciono pasinta-saturdie. Elu tamen pludicis ke el ne intencas organizor amasala protesti, quale olti qui markizis la oranjea revoluciono di 2004.

Kordiala interretala saluti ad omni. JM :::-:::

Ye la 12ma di februaro 2010

Dio di santa Felix.

DIO-CITAJO / Nulatempe onu tante mentias kam ante elekto, dum milito e pos chaso-partio. (Bismarck)

ZODIAKO / En la zodiako-signo dil Varsero guvernata dal planeto Urano.

VETERO / Kolda temperaturo kun nivuro e glaciigita aquo sur choseo, posdimeze kun sunoza cielo, cajorne, en Francilia.

KONCIZE

AFGANIA / SERIO DE MORTIGERA AVALANCHI
La bilanco di la serio de avalanchi en nord-Afgania, olqui ja produktis 166 mortinti, povus kreskar, tale avertis hiere responsivi dum aludar un de la maxim mala naturala katastrofi di la recenta historio di ca lando. La muri ek nivuro surprizis la automobil-vehanti kaptita en lia vehili. Multa de li enterigesis o precipitesis adinfre.

TAILANDO / CESIGO DIL PERSEQUI
La Tailandana judiciistaro cesigis la persequi kontre kin exterlandani, quar Kazakhiani ed un Belaruso, qui arestesis en Bangkok dum ke li konvoyis komerc-aviono kargita per 35 tuni de armi venanta de Nord-Korea, tale on saveskis hiere segun oficala informo-fonto. "Ita proceso ne esos avantajoza por Tailando, konseque ni rezolvis cesigar la akuzi", tale deklaris Thanapich Mulapruk, porparolanto dil kontoro di la generala prokuratoro.

URUGUAY / KONDAMNO DI DUESMA DIKTATORO
Quar monati pos Gregorio Alvarez, la Uruguayana judiciisti kondamnis, merkurdie vespere, duesma anciena diktatoro, Juan Maria Bordaberry, pro lua rolo lor la statostroko di 1973. Ita statostroko apertis la voyo a dek-e-du yari de civila-militistal rejimo en ita mikra Sud-Amerikana lando. La ex-potenta viro di ca lando, evanta 81 yari, kondamnesis ye triadek yari de karcero-puniso pro "ne-egardir la Konstituco".
Juan Maria Bordaberry

Kordiala interretala saluti ad omni. JM :::-:::

Ye la 10ma di februaro 2010

Dio di santa Skolastika.

DIO-PROVERBO / Helpas krako kontre atako.

ZODIAKO / En la zodiako-signo dil Varsero guvernata dal planeto Urano.

VETERO / Tempope nivo-tempesto, cajorne, en Francilia.

KONCIZE

SAUDIA ARABIA / YUNINETO QUA DEMANDAS DIVORCO RECEVAS HELPO DAL GUVERNERIO
La Statala Komisitaropri la homala yuri Saudiana engajis advokato por defensar la interesti di yunino evanta 12 yari e mariajita a viro evanta...80 yari !La dicita yunineto demandas divorco. Lo esas la unesma foyo kande la Saudiana autoritatozi intervenas en afero pri la koaktata mariajo di puerino, nam ita praktiko esas tre difuzita en ca rejio.

PERU / ACESO INTERDIKTATA A LA INKA-A CITADELO DI MACHU PICCHU
Motive dil malega vetero qua frapas la sudesto di ca lando, la autoritatozi agis ica rezolvo "til ke la sekureso- ed infrastrukturo*-kondicioni permisez lo". La fortreso Machu Picchu havanta 2200 vizitanti singladie meznombre, igas la regiono di Cuzco kom la precipua fonto de turismala revenui di Peru.
Vidajo di Machu Picchu

CHINIA / KOMENCO DI KAMPANIO KONTRE LA PEKUNIO-LUDI "ONLINE"
Ok guverneriala organismi komisesis por ita esforco kontre personi akuzata "entraprezir importanta pekunio-ekiro de ca lando e grave perturbir la ordino ekonomiala e social". Nome, la pekunio-ludi, interdiktata dal komunisti en 1949, nutras nelegala industrio qua profitas pro la ekonomial aperto e la plualtigo dil vivo-nivelo.

Kordiala interretala saluti ad omni. JM :::-:::

Ye la 9ma di februaro 2010

Dio di santa Apolina.

DIO-PROVERBO / Maxim bone ridas qua kom lasta ridas.

ZODIAKO / En la zodiako-signo dil Varsero guvernata dal planeto Urano.

VETERO / Grizega e nivoza cielo, cajorne, en Francilia.

KONCIZE

NORD-IRLANDO / LA MILITISTATRI DIL INLA ANUNCAS PARFINIR LIA SENARMIGO
La republikana grupo Irlandana Nacionala Liberigo-Armeo, olqua esas la maxim anciena de la disidentaro dil IRA, anuncis hiere parfinir lua senarmigo, sub la kontrolo dil Komisitaro internaciona sendependanta por la senarmigo (HCD). Ico eventas dek-e-du yari pos la paco-interkonsento fininta plura yardeki de violentaji en Ulster.

BULGARIA / REKORDO DI NIVO-FALO
Nivo-tempesti instigis la Bulgariana autoritatozi klozar chosei en la nordo di ca lando e dekretar la alarmo-stando en kin vilaji izoligita de la cetera mondo, dum ke l'aerportuo di Sofia klozesis hiere. En la regioni Rousse e Silistra, nordwest-Bulgaria, ube la nivuro-strato atingis 60 cm, quaradeko de skoli klozesis. Cirkum 160 vilaji ed urbeti ne plus havis elektro hiere.

YEMEN / AFRONTI INTER L'ARMEANI E LA REBELI
Adminime dek Yemanana soldati mortigesis e 18 plusa vundesis lor afronti inter l'armeani e la rebeli shiista en nord-Yemen. La rebeli ne ja savigis lia respondo a l'inicio dal guvernerio, olqua anuncesis pasinta-saturdie. Ita inicio establisas kalendario por obtenor milito-ceso. La afronti 'okuris' cirkum la urbo Saada, ye 240 km norde de Sanaa, qua esas la chefurbo di Yemen.

Kordiala interretala saluti ad omni. JM :::-:::

Ye la 8ma di februaro 2010

Dio di santa Hieronimus Emilianus.

DIO-PROVERBO / Facilesas obliviar, quo ad on ne esas kar.

ZODIAKO / En la zodiako-signo dil Varsero guvernata dal planeto Urano.

VETERO / Grizega cielo, cajorne, en Francilia.

KONCIZE

HAITI / DEMISIONO DAL ADVOKATO DIL ENKARCERIGITA USANI
Edwyn Coq, Haitiana advokato dil dek Usana baptisti akuzata pri kindi*-rapto ed enkarcerigita en Port-au-Prince, anuncis ke lu demisionas. La parenti di ca klienti akuzis lu probir subornar la judiciisto por obtenar lia liberigo.

LIBIA / NE-PERSEQUO POR SUISA AFERISTO
Un de du Suisa aferisti persequata da la Libiana judiciistaro pro "nelegala aktivesi ekonomial" ganis ne-persequo, un semano pos deklaresir senkulpa ye apelo dil akuzo pri "nelegala sejorno".

INDIA/ ITA LANDO PROBAS MISILO* KUN NUKLEALA KAPABLESO
India efektigis sucesoze, hiere, la probo-pafo di misilo Agni-III apta transportar nukleala kargajo ed atingar teoriale Chiniana urbi tala Shanghai.

CHAD / LIBERIGO DI FRANCA GAJO-HOMO EN CHAD
La Franco Laurent Maurice, employato dil internaciona Reda-Kruco e raptita tri monati ante nun en Chad, pose transportata a Darfur, liberigesis pasinta saturdie, nam lua rapteris aludis la "pozitiva rolo" di Francia lor la nun 'okuranta' normaligo inter Chad e vicina Sudan.

Kordiala interretala saluti ad omni. JM :::-:::

Ye la 4ma di februaro 2010

Dio di santa Veronika.

DIO-PROVERBO / Tala esas la matro, tala esas la filiino.

ZODIAKO / En la zodiako-signo dil Varsero guvernata dal planeto Urano.

VETERO / Sat sunoza cielo, cajorne, en Francilia.

KONCIZE

GREKIA / LA PREZIDANTO RIELEKTESAS
Karolos Papoulias rienduktesis, hiere, dal unchambra Greka Parlamento por duesma oficotempo kinyara che la ofico di prezidanto dil Republiko. Il advokis la Stato e la Greki implikesar por vinkar la financala krizo. Kom populara persono en omna medii, il elektesis quik de la unesmaelekto-parto lor extraordinara kunveno Parlamentala per forta majoritato de 266 voti ye 298 votanti.
Karolos Papoulias

RUSIA / EXPERTIZISTI REKOMENDAS L'IRO EN EU/UE
Centro de analizi proxima a la Kremlin-povozi publikigis, hiere, raportajo advokanta la Rusa autoritatozi komencar demokratigo e previdar membresko di NATO/OTAN e di Europana Uniono. La raportajo di Instituto por la nuntempa developado, kreita da Dmitri Medvedev, judikas ke "la direktanti di Rusia devas agar lia selekto por ne faliar historiala chanco".

HISPANIA / FUNERO POR SOLDATO
La funero di Kolumbiana soldato dil Hispana kontingento, qua mortigesis pasinta-lundie per la explozo di torpedo en Afgania, celebresis hiere en Barcelona en la prezenteso di princo Felipe, tronheredonto di Hispania. Multanombra yuna latinida Amerikani engajas su en l'armeo sub la standardo di Hispania. Li reprezentas 7% de la engajiti, ma 43% de la mortinti en misiono segun la diala jurnalo El Pais.

Kordiala interretala saluti ad omni. JM :::-:::

Ye la 1ma di februaro 2010

Dio di santa Brigita di Kildare.

DIO-PROVERBO / Plu bone poke ganar kam multe perdar.

ZODIAKO / En la zodiako-signo dil Varsero guvernata dal planeto Urano.

VETERO / Bela sunoza cielo, cajorne, en Francilia.

KONCIZE

TAIWAN / KRIZO CHINIANA-USANA PRO TAIWAN
La vendo di armi Usana en Taiwan - po plu kam 6 miliard dolari (4,3 miliard euri) - olqua iracigis Chinia, montras la volo da ca insulo mantenar povo di despersuado militistal opoze a la guvernerio di Beijing (Pekino), tale riskante minacar la nuna rikoncilio kun lua komunista vicino. Kom reprezalo, la guvernerio di Beijing cesis lua militistal kambio kun Washington e promisis efektigar punisi kontre la implikita firmi.

HISPANIA / LA NACIONALA VILDEYO "TABLAS DE DAIMIEL" RIVIVAS
Ol esis sikigita depos 2005 motive dil irigacado agrokultival e di klimato sempre plu sika ed ol konsideresis kom mortinta. Nun ica vildeyo di Kastilia-Mancha esas itere sub l'aquo danke diluviala pluvi. L'aquo kovras nun plu kam 1.200 hektari opoze a nur 67 hektari ye la 7ma di januaro. La heroni, grui e ladiversagalineli povos retrovenar adibe dum la venonta printempo.
Vildeyo "Tablas de Daimiel"

SOMALIA / PARO DE BRITANIANI ADVOKAS SOKURSO
Paul e Rachel Chandler, evo 60 e 56 yari, kaptesis ye la pasinta 23ma di oktobro en l'Indiana Oceano, interne di lia yakto, da Somaliana pirati. Li transportesis adsur la tero ed esas separate enkarcerigita. Asertite li subisas mala traktado e, segun Somaliana mediko qua darfis examenar li, li esas en mala sanesala stando e lia sanesala stando povus desamelioreskar danjeroze.

Kordiala interretala saluti ad omni. JM :::-:::