IDO • Linguo Internaciona • Universala • Neutra • Facila


English Deutsch Français Plusa lingui

Novaji-Martignon-2010-Julio


Vu esas la esma
vizitanto di ca ret-situo

Specala ofro

Ido-Situi

Kurseto por Infanti da A. Martinez (Hispania), PDF-file 2Mb

Elektronikala dicionarii

Ido-uzantogrupi

Diversa texti, literaturaji ed Idokursi

Plusa Situi

Idofonduri

Wiki interna

modifikez flanko-bendo

Impressum: / Impreso:

Inhaber der Internetpräsenz www.ido.li:
propietanto dil retsituo www.ido.li

Deutsche Ido-Gesellschaft e.V.
Germana Ido-Societo r.a.
c/o ver.di Berlin
FB 8 / AG Ido
Köpenicker Str. 30
D- 10179 Berlin

Onlinekontakt
Interreta kontaktformulario

Administrator der Internetpräsenz www.ido.li:
administranto dil ret-situo www.ido.li

Frank Kasper
Breitscheidstr. 22
D- 90459 Nürnberg

Onlinekontakt
Interreta kontaktformulario

Novaji-Martignon-2010-Julio

Ye la 30ma di julio 2010

Dio di santa Julieta.

DIO-PROVERBO / Pekunio fluas al richo, frapi al povro.

ZODIAKO / En la zodiako-signo di la Leono guvernata dal Suno.

VETERO / Sunoza cielo ed agreabla somerala temperaturo, cajorne, en Francilia.

KONCIZE

PORTUGAL / LA INCENDII FURIAS EN ITA LANDO
Depos pasinta-lundie, la nordo e la mezo di Portugal esas kaptajo di la flami. La Autoritato nacionala por la civila protektado nombrizis 416 komenci di forest- e bush-incendio lundie, 459 mardie e 419 merkurdie, tale mobilizante til 8.000 profesionani diale. Duminstante nula viktimo esas deplorata. Ye ula loki ube la pumpisti havis desfacilaji limitizar la incendii, venis la militisti por helpar li.

IRAK / ATENTO PRODUKTAS 16 MORTINTI
Dek-e-sis personi, inter li non membri dil sekureso-trupi, mortigesis e 14 plusa homi vundesis lor serio de atenti eventinta hiere en la sunnista quartero Azamiya jacanta en la nordo di Baghdad. Armizita viri unesme ocidis tri soldati facionanta apud barilo. Dek-e-tri personi pose ocidesis lor tri ataki per neprofesionala bombi proxim la loko dil pafado.

DR-KONGOLANDO / MORTIGERA NAUFRAJO EN LA WESTO DI CA LANDO
La naufrajo di navo sur fluvio dil provinco Bandundu, weste del demokratial Republiko Kongolando, produktis la morto di adminime 140 personi. La naufrajo di ca batelo, qua transportis pasajeri e vari, supozeble efektigesis dal mala vetero e da ecesanta kargajo dil dicita batelo. La naufraji esas frequa en DR-Kongolando, olqua esas lando havanta anciena chosei en mala stando, ube la fluviala transporto esas importanta.

Kordiala interretala saluti ad omni. JM :::-:::

Ye la 28ma di julio 2010

Dio di santa Samson.

DIO-PROVERBO / Troa festino esas veneno.

ZODIAKO / En la zodiako-signo di la Leono guvernata dal Suno.

VETERO / Sunoza cielo, cajorne, en Francilia.

KONCIZE

IVORA RIVO / LIBERIGO POR TRI JURNALISTI
Tri jurnalisti, inter li esas un Franco, retenita en karcero depos la 16ma di julio en Abidjan pos la publikigo dil konkluzo di judiciala inquesto pri la kakao-komercacho di Ivora Rivo, liberigesis. Komencita dum oktobro 2007 en ita lando olqua esas la unesma mondala produktero di kakao, ita inquesto abutabis a l'aresto dum junio 2008, pro konkusiono, di duadeko de responsivi dil aludita komercacho. La dato dil koncernata proceso ne ja konocesas.

INDIA / KONTROVERSATA STATALA VIZITO DAL CHEFO DIL BURMANA MILITISTAL GUVERNERIO
Generalisimo Than Shwee, chefo dil Burmana militistal guvernerio, aceptesis, hiere, kun omna honorumi, en New Delhi. Kom quaresma partenero ekonomial dil Burma, India interesesas per la gaso e la petrolo Burmala. La organizuri por defenso dil homala yuri severe kritikis ica vizito, qua esas sinonimo por li di tacata acepto dil 'totalitara' rejimo en Burma.

MALI / ITA LANDO DEZIRAS KOORDINADO DIL OPERACI KONTRE L'AQMI
Dum vizito en Sahel, la ministro di Francia por Exterlandala Aferi, Bernard Kouchner,substrekizis, hiere, ke la Maliana prezidanto Amadou Toumani Toure deziras koordinado dil militistal operaci kontre Al-Qaida en islamala Maghrebia (Aqmi). La aludita ministro rimemorigis ke existas "stabo di Al-Qaida" en Tamanrasset en sud-Aljeria, olqua kompozesas per Maliani, Aljeriani, Nigeriani e Mauritaniani.

Kordiala interretala saluti ad omni. JM :::-:::

Ye la 27ma di julio 2010

Dio di santa Natalia.

DIO-PROVERBO / Pos pluvo venas sunoza vetero.

ZODIAKO / En la zodiako-signo di la Leono guvernata dal Suno.

VETERO / Alternante sunoza e griza cielo kun varma humida temperaturo, cajorne, en Francilia.

KONCIZE

RUSIA / REKORDA TEMPERATURO
La Rusa chefurbo, qua subisas senprecedenta kanikulo depos la komenco di ca monato, haviskolmo hiere kun 37,2 gradi Celsius, t.e. rekordo dum periodo de 160 yari kande on facas listo de temperaturi. Kom rezultajo, incendii di torfeyi furias en la regiono di Moskva. La altega domi di ca chefurbo esis apene videbla ye l'auroro. Por kontrolar ica incendii desfacile extingebla, la autoritatozi rekursis a plura helikopteri ed avioni, inter li esas aquo-bombardanta aviono BE-200, olqua esas la Rusa equivalanto dil Canadair.

BRAZIL / LABORANTI KAPTITA KOM GAJO-HOMI
Triacent Amerik-Indiani okupis pasinta-sundie hidroelektrala centralo konstruktata en la Brazilana Stato Mato Grosso, west-Brazil, dum retenar kom gajo-homi cento de employati e postulanta indemnizo. Segun la Amerik-Indiani, la centralo parte konstruktesis sur indijena tombeyo, tale kreante sociala e kulturala detrimento motive dil forigo de la vildo.

YEMEN / LOKALA CHEFO DI AL-QAIDA EN LA ARABA PENINSULO(AQPA)MORTIGESIS KUN DU KOMBATANTI
Ico eventis sundie vespere pos entraprezir atako kontre petrolifanta jaceyo en la Yemenana provinco Shabwa. Ica atako produktis sis mortinti inter la soldati. Ita provinco di sud-Yemen esas la feudo dil extremista reto. Aqpa, qua instalesas en Yemen direktas la Saudiana e Yemenana branchi dil reto di Ussama Ben Laden. La dicita branchi kunfuzabis dum januaro 2008.

Kordiala interretala saluti ad omni. JM :::-:::

Ye la 26ma di julio 2010

Dio di sant Anna.

DIO-PROVERBO / La matinala oro en boko havas oro.

ZODIAKO / En la zodiako-signo di la Leono guvernata dal Suno.

VETERO / Sat sunoza cielo ma sturmema vetero, cajorne, en Francilia.

KONCIZE

GERMANIA / GERMANIA TRAURAS PRO LA "LOVE PARADE"
La "defilo dil amoro" divenachis dramato, pasinta-saturdie, en Germania. Dek-e-non personi trovesis da la morto lor shokpulsado eventinta en tunelo ye 200 metri de longeso e 30 metri de larjeso, olqua esis la unika aceso-voyo por partoprenar la "Love Parade", saturdie vespere, en Duisburg, en Nordrhein-Westfalen. Ita festo qua celebresas singlayare ye la sono dil "tekno"-a muziko atraktabis plu kam 1,4 milion partoprenanti.

IRAN / PUNISI DA EU/UE
Europana Uniono adoptos hodie senprecedenta punisi kontre Iran, olqui vizas precipue la sektoro dil gasifanta e petrolifanta industrii, en la espero instigar ica lando itere negociar pri lua kontroversata programo nukleala. La plu multa de ta aranjuri valoreskos quik de morge. Previdesas interdiktar nova koloki, teknikala helpo e la transferi di teknologio, precipue koncerne la rafinado e la liquidesko di gaso.

RUSIA / PUTIN RENKONTRAS LA SPIONINTI
La chefa ministro Rusa Vladimir Putin revelis ke lu renkontrabis la dek Rusa spionanti ekpulsata de Usa komence dil monato julio. Questionata lor vizito en Ukraina, il naracis lua recenta renkontro ed expresis minaci relate iti qui trahizabus la agenti. "Generale, la trahizeri finas male", lu dicis, tale lasante komprenar ke ta qua trahizabis ja mortigesis "irgaloke exterlande".

Kordiala interretala saluti ad omni. JM :::-:::

Ye la 23ma di julio 2010

Dio di santa Brigita.

DIO-PROVERBO / Omna desfacilajin vinkas asidua laboro. (Latina proverbo)

ZODIAKO / En la zodiako-signo di la Leono guvernata dal Suno.

VETERO / Tre chanjema vetero, cajorne, en Francilia.

KONCIZE

ARJENTINIA / PROMULGO DI LA LEGO PRI LA GEYAL MARIAJO
L'Arjentiniana prezidantino, Cristina Kirchner, promulgis pasinta-merkurdie lego permisanta la homeosexuala mariajo, olqua adoptesis pasinta-semane lor voto che la Senato, ico esas kozo eventanta unesmafoye en Latinida Amerika. Ica projeto, qua desaprobesis dal katolika Eklezio, produktabis akra polemiko, en lando di qua la habitantaro deklaras esar katolika ye 91%. Unesma mariajo di du homuli previdesas ye la 13ma di agosto.

TIBET / BRUTALA REPRESO DIL SEDICII EVENTINTA EN 2008
La NGO "Human Rights Watch" denuncis, en raporto publikigita hiere, la brutala represo dil sedicii eventinta en 2008 en Tibet, per afirmar ke la ordino-trupi Chiniana pafis adsur la manifestanti e rekursis ye la tormento. Ye la 10ma di marto 2008, pacoza manifesti en Lhassa, markizante la aniversaria dio dil sedicii kontre la tutelo dal guvernerio di Beijing en 1959, havis kom konsequo trubli qui difuzesabis aden plura regiono di Chinia ube vivas Tibetana minoritati.

YEMEN / EMBUSKO MORTIGAS KIN SOLDATI
Supozata membri di Al-Qaida insidiis embusko a patrolio dil Yemenana armeo, ocidante kin militisti en la provinco Shabwa, feudo di Al-Qaida. Ultre lo, 20 personi mortigesis dum la nokto di merkurdio lor afronti inter shiista rebeli e tribuo dil nordo di ca lando. Ita afronti efektigis plu kam 60 mortinti depos pasinta-sundie.

Kordiala interretala saluti ad omni. JM :::-:::

Ye la 22ma di julio 2010

Dio di santa Maria-Magdalena.

DIO-CITAJO / Ne importas ke kato esez blanka o nigra, lo precipua esas ke lu kaptez la musi. (Deng Hsia Ping)

ZODIAKO / En la zodiako-signo di la Leono guvernata dal Suno.

VETERO / Sunoza ma kelkete sturmema vetero, cajorne, en Francilia.

KONCIZE

NEPAL / LA PARLAMENTO SELEKTAS CHEFA MINISTRO
La Nepalana parlamento esas votonta hodie por elektar nova chefa ministro. La Maoisti, qui ditenas la maxim granda nombro de sidili, probos elektigar lia kandidato. Ma ilu havas nur poka chanci ganar nam la cetera partisi ne esas tre entuziasmoza vidar la Maoisti retrovenar a la povo tam longatempe kam li ne entraprezas desfortifikar lia militistal kampeyi.

RUMANIA / LA KADAVRI DI LE CEAUSESCU EKTERIGESIS
Plu kam duadek yari pos la mortigo dil diktatoro Nicolae Ceausescu e di lua spozino Elena, lia kadavri ekterigesis hiere de tombeyo di Bucuresti en la skopo posibligar ADN-probi verifikanta lia identeso, segun la demando da un de lia filii. Ita viro qua direktis Rumania depos 1965 fugabis la chefurbo kun lua spozino pos manifesti ye la 22ma di decembro 1989. Pos ke li arestesis, li fusilagesis.

KAUKAZO / ATENTO KONTRE HIDROELEKTRALA CENTRALO
Bombo-atento, hiere, kontre hidroelektrala centralo en Kabardino-Balkaria, t.e. un de la Mohamedista republiki dil Rusa Kaukazo, produktis la morto di du policani.. Ita regiono di sudwest-Rusia esas la kaptajo di islamista rebelaro. La rebeli minacis plurafoye destruktar strategiala instaluri di ca lando.

Kordiala interretala saluti ad omni. JM :::-:::

Ye la 21ma di julio 2010

Dio di santa Viktor.

DIO-PROVERBO / Jenerozeso a maligno ne produktas gratitudo.

ZODIAKO / En la zodiako-signo di la Leono guvernata dal Suno.

VETERO / Sturmema vetero, cajorne, en Francilia.

KONCIZE

BELGIA / NACIONALA FESTO SEN NOVA GUVERNERIO
"Te Deum"-i kantata en tri loki di ca rejio, militistal defilo, pose pirotekno en Bruxelles intersucedos, quale kustumale, dum la 21ma di julio, olqua esas la dio dil nacionala festo Belga. Ma la guvernerio nuna duros esar olta dil ekoficeskanta Yves Leterme, komisita pri la ordinara aferi. Depos la deputitala elekto anticipata dil 13ma di junio, la negociado por formacar nova koalisuro pluduras tote diskrete ma sen rezulto. Talgrade ke la edituro dil jurnalo "Le Soir" audacis questionar, hiere, kad ica celebro dil nacionala festoye la21ma di julio esos "la lasta foyo".

EST-EUROPA / BULGARIA E RUMANIA MUSTAS SERIOZE KOMBATAR LA KORUPTO
La Europana Komisitaro reprochis importanta neefektigidi la promisi dal Bulgariani e dal Rumaniani koncerne la lukto kontre la korupto e pri la judiciala reformi. Amba landi, qui esas membri di EU/UE depos 2007, esas aparte surveyata dal Europana autoritatozi, e duras esar sub la minaco di punisi. En 2008, la autoritatozi di Bruxelles blokusabis 825 milion � de la pekunio destinata a la guvernerio di Sofia motive dil suspekti pri deturno de pekunio.

CHIPRO / LA TURKI VOLAS PACO-KONTRATO
La Turka Chiprana direktanto Dervis Eroglu expresis hiere la deziropor regulado dilChiprala questiono ante la fino di ca yaro, pro ke lu opinionas ke en kontrea kazo, la chanci acesar a paco desaparos, motive dil elekto qua eventos venontayare en la Greka parto. La du Chiprana parti, Greka e Turka, implikesas depos septembro 2008, en diskuti, sen progreso notinda qua posibligus la riunigo di ca insulo.

Kordiala interretala saluti ad omni. JM :::-:::

Ye la 20ma di julio 2010

Dio di santa Marina.

DIO-PROVERBO / Se l'okaziono pasas sur la voyo, sizez ol nam ol pasas nur un foyo.

ZODIAKO / Iro en la zodiako-signo di la Leono guvernata dal Suno.

VETERO / Sunoza cielo kun somerala temperaturo, cajorne, en Francilia.

KONCIZE

INDIA / KOLIZIONO INTER DU TRENI
Segun la ministreriopor civila Protekto di west-Bengal, adminime 61 personi mortis e plu kam 165 plusa homi vundesis lor koliziono, hiere matine, inter du treni norde de Kalkutta, est-India. La koncernata ministro asertis ke ca acidento debesis a neglijo dal administrerio dil fervoyi e nule a sabotaj-ago.

MEXIKIA / DEK-E-SEP YUNI ESAS VIKTIMI DIL FEDERURI-MILITO
Mexikia subisis itere sangoza semanofino, kun preske 60 mortinti, inter li esas sis policani e dek-e-sep yunuli mortigita lor festo segun la metodi dil mortigeri apartenanta a la federuri dil narkotaji. La yaro 2010 ja markizesis per plu kam 7.000 transmondigi ligita a la "federuri-milito" inter rivala "gang"-i o kontre l'armeo e la polico.

GREKIA / JURNALISTO ASASINESAS
La Greka jurnalisto Sokratis Guiolias asasinesis hiere avan lua domo en quartero di sudest-Athina. Segun la policani, la armi qui ocidis la dicita jurnalisto utiligesis en pasinta tempo dal extremista grupo "Sekto dil revolucionani". En 2009, ita grupo, qua precipue revendikis agir la pafado kontre la fasado di la laboreyo di privata televizion-kanalo, minacabis pri morto "omna jurnalisti".

Kordiala interretala saluti ad omni. JM :::-:::

Ye la 19ma di julio 2010

Dio di santa Arsenius.

DIO-PROVERBO / Kande on buchas la bovino dil melkar lo es la fino.

ZODIAKO / En la zodiako-signo dil Kankro guvernata da la Luno.

VETERO / Blua cielo e somerala temperaturo e vetero, cajorne, en Francilia.

KONCIZE

USA / BP OPTIMISTESAS PRI LUA INSTALURO
Du dii e duimo pos komencir instalar giganta funelo sub la maro, la Britaniana petrolifero anuncis, hiere, ke la petrol-puteo, olqua esas la kauzo dil nigra mareo, duras esar klozata e ke lu povus restar tale til ke lu esez definitive obturata danke la kavigado di deviaco-puteo. Ita komplexa e nefacilaoperaco previdesas inter la fino di julio e la mezo di agosto.

NIGERIA / KRISTANA VILAJO ATAKESAS
Mohamedisti atakis saturdie Kristana vilajo di la mezo di ca lando, ibe ocidante ok personi. Sep domi ed un kirko anke incendiesis. Nigeria, olqua esas la maxim populizita lando di Afrika havanta 150 milion habitanti, dividesas preske egale inter la Kristana e Mohamedista religii. La interreligia violentaji efektigis centi de mortinti depos la komenco di ca yaro, segun l'armeani.

GREKIA / LA GUVERNERIO DI ATHINA RETENIS LA FLAMI
La violentoza forest-incendio, qua eruptabis saturdie ye la nordwesto di Athina e brulinta plu kam 800 hektari de foresto e de busharo proxim Varnava e Mikrohori dominacesis hiere matine, dum ke lu proximeskis de la habiteyi. La pumpisti duris esar, hiere, en alarmo-stando generala enAtika (regiono di Athina) e sur l'insulo Evvia, olqui pozesis en stando di oranjea alarmo dal civila protektantaro.

Kordiala interretala saluti ad omni. JM :::-:::

Ye la 16ma di julio 2010

Dio di Nia-Damo dil Monto Karmel.

DIO-PROVERBO / Ne existas muziko sen askoltanti. (Proverbo di Grekia en Antiqua Epoko)

ZODIAKO / En la zodiako-signo dil Kankro guvernata da la Luno.

VETERO / Sat sunoza cielo, ma sturmema vetero, cajorne, en Francilia.

KONCIZE

ITALIA / LA SENATANI APROBAS LA EKONOMIALA SEVERESO
La guvernerio di Silvio Berlusconi obtenis fido-voto che la Senato koncerne lua programo pri ekonomiala austereso ye 24,9 miliard euri. Ita programo esas adoptota dal Chambro dil deputiti til la fino di julio. Previdesas, por 2011-2012, blokuso dil salarii di la funcioneri, diminuto di la budjeti dil ministrerii e financala transferi a la regioni. La skopo : retroduktar la publika deficito ye 2,7% de la nacionala revenuo en 2012, opoze a 5,3% en 2009.

GERMANIA / TRENI SEN KLIMATIZILO TRANS 32 GRADI
La treni kun granda rapideso ICE di la firmo Siemens ne esas apta tolerar temperaturi ye plu kam 32�, tale agnoskis la kompanio Deutsche Bahn. Trans ita temperaturo, la bona funcionado dil klimatizilo ne plus garantiesas. Lo esis la kazo dum la pasinta semanofino en Germania,kande la klimatizo-panei produktis sanesala nebona standi ed acepti en hospitali.

RUSIA / SUD-KOREANA NAVO KOMPRESOS VICE LA FRANCA MISTRAL
La publika "holding" Rusa dil navala konstrukteyi OSK propozis a la Rusa ministrerio por Defenso kompror helikoptero-portilo Sud-Koreana, Dokdo, vice Franca navi segun la tipo Mistral. Dum pasinta marto, Rusia anuncabis lua intenco komendar a Francia quar de ita navi qui povas transportar helikopteri e kurasizita chari o shirmar hospitalo.

Kordiala interretala saluti ad omni. JM :::-:::

Ye la 15ma di julio 2010

Dio di santa Donaldus (nomo-festo dil poliglota samideano Donald(us) Gasper(o).

DIO-PROVERBO / Pacienteso e longa tempo esas plu efikiva kam forteso e furio.

ZODIAKO / En la zodiako-signo dil Kankro guvernata da la Luno.

VETERO / Bela sunoza vetero kun milda temperaturo, cajorne, en Francilia.

KONCIZE

AFGANIA / DEK-E-DU SOLDATI MORTIGESIS
Ye la predio, tri Usana soldati e quar Britaniani ja mortigesabis lor du altra ataki. Ico irigas til 367, la nombro de stranjera militisti mortigita cayare en la Afgania konflikto. 520 de li mortigesis en 2009

CHEKIA / LA NOVA GUVERNERIO ENOFICESKAS
La guvernerio mez-dextrana, direktata da Petr Necas, nominesis da prezidanto Vaclav Klaus, pasinta-mardie. Lor la deputital elekto dil 28ma e 29ma di mayo, la nova koalisuro obtenabis granda majoritato, per 118 de la 200 deputiti-sidili. Ica lando esperas diminutar lua publika deficito ye 3% delsentara nacionala produkturo en 2013, opoze a 5,9% en 2009.

NIGERIA / RELIGIAL-ETNAL* AFRONTI
Ok personi mortigesis e 40 plusa vundesis en est-Nigeria lor afronti inter Kristani e Mohamedisti, pasinta-mardie, dum ita afronti sis moskei ed un kirko incendiesis. Nigeria, lando maxim populizita di Afrika kun 150 milion habitanti, esas majoritate Mohamedana en la Nordo e Kristana en la Sudo. La violenti havanta karaktero etnala o religial esas konstanta , precipue en la Nordo di ca lando.

Kordiala interretala saluti ad omni. JM :::-:::

Ye la 13ma di julio 2010

Dio di santa Henrikus.

DIO-PROVERBO / Apertez skarse tua pordo : kun omni tu havos konkordo.

ZODIAKO / En la zodiako-signo dil Kankro guvernata da la Luno.

VETERO / Sunoza cielo, cajorne, en Francilia.

KONCIZE

SUDAN / BESHIR AKUZATA PRO GENTOCIDO
La judiciisti dil Internaciona Punisal Korto adjuntis la "gentocido" a la akuz-motivi pri "milit-krimini" e pri "krimini kontre la homaro" en Darfur ja skribita en la aresto-dokumento kontre la Sudanana prezidanto Omar El Beshir. La prokuratoro dil IPK inquestas pri Darfur -olqua esas regiono sufranta depos 2003 pro intercivitana milito -segun impero da rezolvo dil Sekureso-konsilantaro di UN/ONU.

BALI / SOMITAL INTERRENKONTRO POR SALVAR LA TIGRI
Reprezentanti dil 13 landi ube ankore vivas ne-amansita tigri (Bangladesh, Chinia, India, Rusia, edc.) kunvenas en Bali, por elaborar programo por prezervo, ante la "internaciona somito dil tigro" qua esas eventonta dum mi-septembro en Sankt-Petersburg. Ita felini, di qui la nombro esis 100.000 un yarcento ante nun, esus nun nur 3.200, pro ke li esas viktimi motive dil senforestigo e dil nigra merkato.

RUSIA / LA MUZEO SAKHAROV KONDAMNESAS YE DESAPARO
La organizeri di arto-expozo, organizita dum 2007 che la muzeo Sakharov, en Moskva, agnoskesis kom kulpinti, hiere, pro incito a la odio, ye la fino di proceso kritikata dal defenseri dil publika liberesi. Ita expozo "Interdikt Arto 2006" organizesis por prizentar verki quin la cetera muzei judikabis kom tro shokanta por montresar.

Kordiala interretala saluti ad omni. JM :::-:::

Ye la 12ma di julio 2010

Dio di santa Oliviero.

DIO-PROVERBO / Ta qua esas sempre sincero eniras omnube (mem en karcero).

ZODIAKO / En la zodiako-signo dil Kankro guvernata da la Luno.

VETERO / Sturmoza, pose sunoza vetero, cajorne, en Francilia.

KONCIZE

USA / DESFORTUNOZA AFERO
Policano, qua mortigabis yuna Nigrulo ne-armizita en 2009,che staciono di subtera treno en preurbo di San Francisco kondamnesis pro nevolita homocido dal Kaliforniana judiciisti.

RUSIA-USA / KAMBIATA SPIONANTI
La dek sekreta agenti, qui laboris depos multa yari por la Rusa servi pri extera informi ekpulsesis de Usa. La guvernerio di Moskva grantis lua konsento por liberigar quar kaptita personi "pro supozata kontakti kun la Ocidentala sekreta servi pri informi" kambie di la liberigo dil agenti kaptita en Usa depos la 27ma di junio, tale savigis la ministrerio Usana por Judiciado.

IRAN / DEFIO AD OCIDENTO
L'Iranana prezidanto, Mahmud Ahmadinejad, asertis recente en Abuja, pos somital renkontro inter ok Mohamedista Stati, ke la internaciona sancioni decidata kotre lua lando ne impedos la efektigo dil nukleala programo di ca islamista Republiko.

UNIONITA REJIO / EVOLUCIONO A KONSERVEMESO
La Anglikana Eklezio di Anglia, shanceligita per interna deskonkordi pri la ordinaco dil mulieri e dil homeosexuali, itere refuzis la kandidateso di homeosexuala pastorulo por la prelateso. Jeffrey John sondesabis por divenor la nova episkopo dil Londonala diocezo Southwark. Ma la komisitaro por nomino efacis lua nomo de la listo dil obtenanti pos agitata debati. Jeffrey John, qua esas dekano di St-Albans, paktis en 2006 civila partenereso kun altra pastorulo, quankam il asertis vivar en "celibeso"...

Kordiala interretala saluti ad omni. JM :::-:::

Ye la 8ma di julio 2010
Dio di santa Teobaldus.

DIO-PROVERBO / Ube mielo ibe abelo.

ZODIAKO / En la zodiako-signo dil Kankro guvernata da la Luno.

VETERO / Sunoza cielo ma tro varma temperaturo, cajorne, en Francilia.

KONCIZE

AFGANIA / LA BRITANIANI RETROMARCHAS
L'Usana brigado asumos til la fino di 2010 la sekureso di Sangin, sude de Afgania, vice la Britaniani. Sangin esas regiono ube la kombati esas aparte mortigiva. La Britaniana jurnalaro akuzis lua armeo febleskar opoze a lua desfortunoza situeso. Preske triimo di la 312 Britaniana soldati mortinta en Afgania depos 2001 falis en Sangin ed en lua regiono.

NORVEGIA / SEDICIANTI SUPOZEBLE INCENDIIGIS LIA ACEPTO-CENTRO
La centro di Lier, weste de Oslo, qua aceptas 141 refujinti a qui on refuzis la statuto di refujanto, brulis hiere. Nula grave vundito esas deplorenda. Segun la policani, l'incendio esus intencita e 23 personi arestesis. La preirinta nokto ja markizesis per sedicii en ita centro. La refujinti protestis kontre lia acepto-kondicioni.

GLOBO / EXTREMISTA ISLAMISTI ASERTANTE ESAR AL-QAIDANI IMPULSAS REVUO
"Inspire" esas unesma propagado-revuo en la Angla patuazo* expektata dum la venonta dii. Supervido di ol ja esas trovebla che la interreto. Nur la redaktistal artiklo, la kovrilo e la tabelo di kontenajo esas videbla, lo cetera esas celata. La unesma numero kontenas 67 pagini. Un de la artikli pritraktas la lego-projeti vizanta interdiktar la kompleta velizo.

Kordiala interretala saluti ad omni. JM :::-:::

Ye la 7ma di julio 2010

Dio di santa Raulo.

DIO-PROVERBO / Fora del okuli, fora del mento.

ZODIAKO / En la zodiako-signo dil Kankro guvernata da la Luno.

VETERO / Sunoza cielo e varma temperaturo, cajorne, en Francilia.

KONCIZE

SERBIA / UNESMA STRADO-JURNALO NASKAS EN BEOGRAD
La monatala jurnalo LiceUlice (La vizajo dil strado) vendesos da senhema kindi* en Serbia. Supozeble esas en Beograd inter 200 e 700 personi vivanta enstrade. La pueri evanta 15 yari e mem plu multe, qui exercesis por vendar ica jurnalo, venas omni de acepto-centro por abandonita kindi*. La dicita venderi konservos por su la duimo de la preco dil aludita jurnalo vendata po 100 dinari (0,96 Euri).

AFGANIA / FRANCA MILITISTO MORTIGESIS
Franca sub-oficiro dil 13ma regimento di la jenio transmondeskis hiere en Afgania konseque di lua vunduri pos l'explozo di explozilo improvizita lor operaco di teren-exploro nordeste de Kabul, tale anuncesis dal Franca prezidanterio. Ita chefa serjento di qua la nomo ne divulgesis, atingesis dum ke lu sekurigis choseo. Il esas la 45ma Franca militisto mortigita en Afgania.

SUEDIA / FEMINISTI BRULAS PEKUNIO POR PROTESTAR
Suda partiso feminista brulis hiere 100.000 kroni ek banko-bilieti (aproxime 10.000 Eu) en la skopo denuncar la salariala diskriminaci*inter homuli ed homini. "Cent mil kroni, lo esas to quo perdas la mulieri singlaminute en la nuna sistemo ube la salarii establisesas segun la sexuo", tale explikis Gudrun Schyman, chefo dil partiso hominala inicio.

Kordiala interretala saluti ad omni. JM :::-:::

Ye la 6ma di julio 2010

Dio di santa Marieta.

DIO-PROVERBO / Amoro e tusado ne povas celesar.

ZODIAKO / En la zodiako-signo dil Kankro guvernata da la Luno.

VETERO / Bela e sunoza cielo, cajorne, en Francilia.

KONCIZE

KOSOVO / SERBA DEPUTITO VUNDESIS
Un de la dek deputiti Serba che la Parlamento di Kosovo, Petar Miletic, vundesis per kugli hiere avan lua apartamento en la nordo di Kosovska Mitrovica, t.e. urbo dil nordo di ca regiono, ube la intergenta tensi esas rekurenta. La Albana autoritatozi di Kosovo proklamis di ca provinco la sendependeso de Serbia dum februaro 2008. Ita laste dicita lando obtenis ke la Internaciona Korto por Judiciado expresez opiniono pri la legaleso di ta sendependeso-proklamo.

ITALIA / RAPIDA DEMISIONO DA MINISTRO
Italiana ministro, nominita du semani ante nun e qua havabis la desfortuno esar en la mezo di polemiko, anuncis hiere lua demisiono koram la judiciala oficisti dil tribunalo di Milano. Aldo Brancher, proximo di Silvio Berlusconi e di lua federito Umberto Bossi, chef di la federuro dil Nordo, suspektesis dal opozantaro utiligir lua nomino kom ministro sen atribuo por evitar judiciesar pri gratifiko-afero.

SIRIA / DESAPARI POS SEDICIO
Plu kam 50 enkarcerigiti konsideresas kom desaparinti depos sedicio dum 2008 en la karcero di Saydnaya, norde de Dhimashq (Damasko), dum olqua adminime 17 karcerani e kin membri dil militistal polico perisabis, tale savigis pasinta-lundie Amnesty International. Segun la Siriana observatorio por la homala yuri, establisita en London, la militistal polico pafabis per reala kugli kontre karcerani.

Kordiala interretala saluti ad omni. JM :::-:::

Ye la 5ma di julio 2010

Dio di santa Antonius.

DIO-PROVERBO / Mielo en la boko, bitreso en la kordio. (Latina proverbo)

ZODIAKO / En la zodiako-signo dil Kankro guvernata da la Luno.

VETERO / Sunoza ma sturmema vetero, cajorne, en Francilia.

KONCIZE

SIRIA / MILITANTO POR LA HOMALA YURI ENKARCERIGESIS
L'advokato e militanto Siriana por la homala yuri Haytham Al Maleh, akuzata pro "publikigir mentioza informi", kondamnesis hiere ye tri yari de karcero-puniso, tale savigis organizuri por defenso dil homala yuri en Siria. Ita aktivisto evanta 79 yari ja esabis enkarcerigita de 1980 til 1986.

KOLUMBIA / LA MARCHO DI FILIO DI GAJO-HOMO
Puerulo evanta 12 yari, Johan Martinez, trairis 70 km pede en sudwest-Kolumbia, de venerdio til saturdie, por demandar la liberigo di lua patro, serjento Libio Martinez, t.e. la maxim anciena gajo-homo kaptita dal "guerilla-ani, e qua desliberigesis tri monati ante lua nasko, "Kara amata patreto, meefektigis hodie marcho por demandar a la Virgino Maria ke el helpez tu balde rienirar a nia hemo por ke nil'omna familiani esezkune", lu asertis.

RUMANIA / INUNDI PRODUKTAS 25 MORTINTI
La bilanco dil inundi, qui atingas nordest-Rumania depos la 21ma di junio, iris pasinta-saturdie til 25 mortinti. Plu kam 16.500 personi evakuesis. Pluraloke, la fluvio Danubio atingis sua maxim alta niveli historiala. La guvernerio qua evaluas la destrukturi ye 0,6% de la nacionala richeso produktita (PIB) advokis la helpo di Europana sokursi. Austria, Belgia, Estonia e Francia propozis lia helpo.

Kordiala interretala saluti ad omni. JM :::-:::

Ye la 2ma di julio 2010

Dio di santa Martinianus.

DIO-PROVERBO / La matinala horo en boko havas oro. (Germania)

ZODIAKO / En la zodiako-signo dil Kankro guvernata da la Luno.

VETERO / Sturmoza vetero, cajorne, en Francilia.

KONCIZE

FINNLANDO* / FIDO A LA NUKLEAL ENERGIO
La Finnlandana Parlamento permisis, hiere, la konstrukto di du nukleala reaktori postulata dal guvernerio por luktar kontre la klimatala chanjo. Ma ita reaktori akuzesas dal defenseri por la ambiento. Finnlando* posedas quar nukleal reaktori evanta de la 1970ma yari. Reaktoro EPR de nova generaciono esas konstruktata dal Franca firmoAreva kun la Germana firmo Siemens.

USA / RETO-STROKO KONTRE NON INTERRETAL SITUI* PIRATA
Nomizita tvshack.net od anke ninjavideo.net, ita situi akuzesas "efektigar miliardi de dolari di pekunial perdo" per difuzar "online" piratagita filmi. Sustenana dal Asociuro dil hollywoodana filmifeyi e da la sindikati dil cinematografal sektoro, la judiciisti sizigis dek-e-kin bankala konti e blokusis plura de ta situi*.

EGIPTIA / ARKEOLOGIA : SEKRETA TUNELO DESKOVRESAS EN SUPRA EGIPTIA
Depos plu kam duadek yari, Zahi Hawass, la patrono pri la Egiptiana Antiquaji, serchis sekreta paseyo en la tombo di Seti I-ma, patro di Ramses II, t.e. en la maxim granda tombo di la valo dil Reji. La arkeologiisti, ultre trovar statueti, deskovris galerio kovrata per instrucioni da arkitekti.

Kordiala interretala saluti ad omni. JM :::-:::

Ye la 1ma di julio 2010

Dio di santa Teodorikus.

DIO-PROVERBO / Ofte nubi maxim obskur havas arjentea kontour'. (Angla proverbo)

ZODIAKO / En la zodiako-signo dil Kankro guvernata da la Luno.

VETERO / Sunoza, varma e sturmema vetero, cajorne, en Francilia.

KONCIZE

NEPAL / DEMISIONO DIL CHEFA MINISTRO
Sub la preso dil Maoista opozantaro, la Nepalana chefa ministro Madhav Kumar anuncis hiere lua demisiono, dum asertar ke lu volas tale finigar la krizo politikal en qua glu-kaptesas ita Himalayala lando. Un monato ante nun, la Maoista partiso akuzabis lu pri "trahizo" pro ne egardir promiso livar lua ofico pro ke ico supozesis apertar la voyo a nova guvernerio di uniono.

AFGANIA / TALIBAN-ATAKO KONTRE MILITISTAL PROVIZERIO DI NATO/OTAN
Talibani impulsis hiere atako per bomba vehilo e per supropulsanta projektilo kontre importanta militistal provizerio di NATO/OTAN en Djalalabad, en est-Afgania, ye kelka dii ante l'arivo dal nova chefo dil internaciona trupi, generalo David Petraeus. Du membri dil sekureso-trupi vundesis negrave. Plura atakanti ocidesis.

POLONIA / KOMOROWSKI HAVAS MAXIM BONA PERSPEKTIVI LOR LA DUESMA PARTO DIL PREZIDANTAL ELEKTO
La liberala kandidato Bronislaw Komorowski mantenas avanco de 9,5% ye lua rivalo, t.e. la konservemo Jaroslaw Kaczynski, segun recenta opinion-inquesto publikigita hiere. La prezidanto dil infra Chambro dil Parlamento e Statestro interime kreditesas ye 52,1% de la voto-intenci, opoze a 41,6% por la jemela fratulo dil mortinta prezidanto Polona e chefo dil partiso Yuro e Judiciado.

Kordiala interretala saluti ad omni. JM :::-:::