IDO • Linguo Internaciona • Universala • Neutra • Facila


English Deutsch Français Plusa lingui

Novaji-Martignon-2010-Junio


Vu esas la esma
vizitanto di ca ret-situo

Specala ofro

Ido-Situi

Kurseto por Infanti da A. Martinez (Hispania), PDF-file 2Mb

Elektronikala dicionarii

Ido-uzantogrupi

Diversa texti, literaturaji ed Idokursi

Plusa Situi

Idofonduri

Wiki interna

modifikez flanko-bendo

Impressum: / Impreso:

Inhaber der Internetpräsenz www.ido.li:
propietanto dil retsituo www.ido.li

Deutsche Ido-Gesellschaft e.V.
Germana Ido-Societo r.a.
c/o ver.di Berlin
FB 8 / AG Ido
Köpenicker Str. 30
D- 10179 Berlin

Onlinekontakt
Interreta kontaktformulario

Administrator der Internetpräsenz www.ido.li:
administranto dil ret-situo www.ido.li

Frank Kasper
Breitscheidstr. 22
D- 90459 Nürnberg

Onlinekontakt
Interreta kontaktformulario

Novaji-Martignon-2010-Junio

Ye la 29 di junio 2010

Dio di santa Paulus e Petrus.

DIO-PROVERBO / Al sincero qua dicas veresi kandid, donez bona kavalo por fugo rapid. (Armeniana proverbo)

ZODIAKO / En la zodiako-signo dil Kankro guvernata da la Luno.

VETERO / Bela, sunoza e varmega vetero, cajorne, en Francilia.

KONCIZE

IRAN / MANIFESTO AVAN L'AMBASADERIO DI FRANCIA
Centi de personi manifestis hiere avan l'ambasaderio di Francia en Teheran dum klamar "Shamo ye tu, ho Sarkozius !" e "Morto ye Francia !" por protestar kontre kunveno en Paris, pasinta-saturdie, dal partisani dil opozo-partiso la Mudjahidin dil populo. Centi de policani esabis mobilizita por evitar incidenti, ma l'aceso al ambasaderio mustis klozesar.

GULFO DI MEXIKIA / LA TEMPESTO ALEX PRODUKTAS VIKTIMI
Adminime 10 personi mortis pasinta-sundie en Nikaragua, en Guatemala ed en Salvador pos la paso dil tropikala tempesto Alex, qua produktis inundi e tereno-glito. Ol esis, hiere, enironta la gulfo di Mexikia ma ne probable ne frapos direte la areo atingata per la nigra mareo.

ISRAEL / LA KOMISITARO PRI LA NAVI-GRUPO DI GAZA KUNVENAS
La komisitaro establisita dal Israelana guvernerio por examenar la judiciala aspekti dil sangoza intercepto di humanala navi-grupo ye la 31ma di mayo kunvenis hiere unesmafoye en Yerushalaim. La "publika sendependa komisitaro" kompozesas per kin membri, inter li esas du exterlandana observeri.

Kordiala interretala saluti ad omni. JM :::-:::

Ye la 28ma di junio.

Dio di santa Ireneus.

DIO-PROVERBO / Tra la mashi dil reti eskapas nur la fisheti.

ZODIAKO / En la zodiako-signo dil Kankro guvernata da la Luno.

VETERO / Sunoza ma sturmema vetero, cajorne, en Francilia.

KONCIZE

ISRAEL / MARCHO POR LA LIBERIGO DI GILAD SHALIT
La familiani e proximi di Gilad Shalit, Israelana soldato kaptito en la Gaza-areo depos quar yari, komencis hiere marchado duronta dum dek-e-du dii vers la rezideyo dil chefa ministro Benjamin Netanyahou en Yerushalaim. Departinta de la nordo dil Hebrea Stato, li expektas rajuntesor da mili de Israelani por obtenar ke la guvernerio aceptez kambio inter Shalit e Palestinani enkarcerigita en Israelana karceri.

LITUANIA / TRANSMONDESKO DI ALGIRDAS BRAZAUSKAS, HISTORIALA PERSONO DI LITUANIA
Algirdas Brazauskas, qua esas l'unesma prezidanto rezultinta de libera elekto en Lituania pos-Sovieta, mortis pasinta-saturdie ye la evo 77 yari. Il sufris pro kancero.

IRAN / ITA LANDO POSEDUS SAT MULTA URANIO POR FABRIKAR DU BOMBI
Iran disponas suficante uranio feble plurichigita "por fabrikar du armi" nukleala, tale deklaris hiere la patrono dil CIA Leon Panetta, dum adjuntar ke ita lando povus realigar mashino dum periodo de du yari se lu volus lo.

PAKISTAN / SIS REBELI MORTIGITA PER DRONO*
Adminime sis rebeli mortigesis hiere da Usana drono* qua pafis du misili* aden la tribuala areo di nordwest-Pakistan.

Kordiala interretala saluti ad omni. JM :::-:::

Ye la 25ma di junio 2010.

Dio di santa Eleonora.

DIO-PROVERBO / Pastoro esas mastro en lua prato.

ZODIAKO / En la zodiako-signo dil Kankro guvernata da la Luno.

VETERO / Blua e sunoza cielo, cajorne, en Francilia.

KONCIZE

KIRGHIZIA / RETROIRO AD-HEME
Dekamili de personi refujinta en Uzbekia konseque dil violentaji sukusinta Kirghizia dum la recenta semani suriris la voyo dil retroveno malgre situeso duranta esar nestabila e desfacilaji por recevar la helpaji qui destinesas a li. Sume, 57.359 personi retroiris a lia lando, tale deklaris a la informilaro Ismail Issakov, ilqua esas reprezentanto dil provizora guvernerio Kirghiza.

SERBIA / SKOLALA HELPO
Europana Uniono furnisos tri milion euri por promocar l'inkluzo dil Cigana pueri en la skolala sistemo en Serbia, tale anuncesis pasinta-merkurdie enkadre di konfero organizata dal delegitaro di EU/UE en Beograd e dal Serba ministrerio pri Edukado.

FRANCIA / ARABA GRAMATIKO
Libro qua esas kompleta e detaloza gramatiko dil Araba linguo redaktita en Andaluzia da Abu Ali al-Hassan al-Farisi, evanta de la yaro 514 dil Hejiro (1120 dil Kristana ero), adjudikesis po 2 milion euri, inkluzite la diversa kusti, lor vendo aucione pasinta-merkurdie che la Hotel Drouot en Paris.

SLOVAKIA / NOVA GUVERNERIO
Iveta Radicova, evo 53 yari, komisesis pasinta-merkurdie da prezidanto Ivan Gasparovic formacar la nova guvernerio di Slovakia pos la deputital elekto eventinta ye la 12ma di junio. Esante guidanto dil Uniono demokratial e Kristana Slovaka (SDKU-DS), ita sociologiistino esas sondata por divenor la unesma muliero direktar la guvernerio di ca Mez-Europana lando, sendependa depos 1993.

Kordiala interretala saluti ad omni. JM :::-:::

Ye la 24ma di junio 2010.

Dio di santa Ioannes Baptista

DIO-PROVERBO / Hastoza rapideso skarse grantas suceso.

ZODIAKO / En la zodiako-signo dil Kankro guvernata da la Luno.

VETERO / Varma e sunoza vetero, cajorne, en Francilia

KONCIZE

KONGOLANDO / TRENO-ACIDENTO
Adminime 76 personi mortigesis e centi de plusa homi vundesis lor l'acidento di supercharjita treno eventinta lundie vespere en sud-Kongolando sur la fervoyala lineo irante de Pointe Noire til Brazzaville, segun nova bilanco ankore provizora dissavigita hiere. Ica ekreliro okurinta en Yanga, ye 60 km este de Pointe-Noire, debesus a la ecesiva rapideso adoptita dal treno-konduktoro.

EUROPANA UNIONO / SIGNATO DIL KONTRATO "APERTATA CIELO"
Usa ed Europana Uniono signatos hodie lia avionala interkonsenta kontrato titulizita "apertata cielo", negociata depos plura monati, tale anuncis hiere la chefo dil Hispana guvernerio, Jose Luis Rodriguez Zapatero, "Ita kontrato reprezentas la kreo di transatlantika areo komuna por l'avioni ed olp inkluzas 60% de la mondala trafiko dil pasajeri", tale indikis J.L. Zapatero.

INDONEZIA / ADVOKO POR LIBERIGAR LA KARCERANI
L'organizuro por la Defenso dil homala yuri, Human Rights Watch (HRW) advokis hiere la Indoneziana autoritatozi liberigar "senfriste" cento de politikala enkarcerigiti, inter qui uli tormentesis. Ica karcerani havas kom origino Papuazia e la insuli Moluki ube permanas separista movadi. Segun HRW, li nur "expresis pace lia idei".

Kordiala interretala saluti ad omni. JM :::-:::

Ye la 23ma di junio 2010.

Dio di santino Audrey.

DIO-PROVERBO / Mem se la korvo chanjas plumi, lu ne chanjas sua kustumi. (Flandria)

ZODIAKO / En la zodiako-signo dil Kankro guvernata da la Luno.

VETERO / Bela e sunoza cielo, cajorne, en Francilia.

KONCIZE

INDIA / LIBER-KAMBIO KUN EUROPA
L'Indiana guvernerio esperas konkluzar cayare kontrato pri libera kambio, qua nun negociesas, kun Europana Uniono, tale deklaris pasinta-lundie en Madrid la Indiana ministro pri Komerco Anand Sharma, segua qua omna Stati dil Uniono grantis lia konsento a la Komisitaro, qua havas la tasko negociadar.

TURKIA / BOMB-ATENTO EN ISTANBUL
Tri personi mortigesis e sis plusa homi vundesis pasinta-mardie lor bombo-atento en Istanbul. La dicita atento vizis autobuso transportanta militisti e lia familii, precipue infanti e pueri. La Kurda rebeli dil Partiso di la laboristi di Kurdia (PKK, interdiktata) minacabis lor la pasinta semanofino impulsar ataki en "omna urbi di Turkia".

RUSIA-USA / PROBO HAVAR PLU BONA RELATI
La guvernerio sidanta en la Kremlin volas riimpulsar lua relati kun Washington per plufortigar la kunlaborado en la feldo dil ekonomio e dil altanivela teknologii okazione di la vizito en Usa dal prezidanto Rusa, Dmitri Medvedev, tale savigis pasinta-lundie lua diplomacala konsilanto. "Lo esas perfekte interesiva unionar la Usana potencialo en la ciencala e tekonologiala feldo e la posiblesi dil Rusa merkato por utiligar oli en projeti reciproke avantajoza, inkluzite la partopreno dal Usani en la kreo di novigo-centro en Skolkovo" en preurbo di Moskva, segun komunikajo dal Kremlin.

Kordiala interretala saluti ad omni. JM :::-:::

Ye la 21ma di junio 2010.

Dio dil somerala solstico.

DIO-PROVERBO / Ta, qua klozas ofte sua boko semblas homo saj en irga loko. (Chiniana proverbo)

ZODIAKO / En la zodiako-signo dil Kankro guvernata da la Luno.

VETERO / Griza cielo, cajorne, en Francilia.

KONCIZE

AFGANIA / KIN SOLDATI DI NATO/OTAN MORTIGESIS
Dum ke UN/ONU revelis pasinta-saturdie ke la nombro de mestierala bombi depozita dal rebeli duopleskis depos la komenco di ca yaro, li mortigesis pasinta-venerdie lor rebela ataki en sud- ed est-Afgania. Franca soldato esis sur kombato-posteno kande il atingesis da artilrio-pafado dal rebeli. Lua morto irigas til 44 la nombro de Franca soldati mortigita en Afgania depos 2002.

DARFUR / KOMBATI INTER TRIBUI ARABA EFEKTIGAS 50 MORTINTI
Afronti inter rivala tribui Araba efektigis kinadek mortinti, pasinta-venerdie, en Darfur. La regiono dil Sudanana Esto subisas riakresko di violento. A la konflikto inter Sudanana trupi e rebela movadi adjuntesas ondo de sangoza afronti inter Araba tribui e banditeso-agi, inkluzite la rapto di humanala laboranti.

IRAN / PENDO DIL CHEFO DI SUNNISTA MOVADO REBELA
Segun la oficala agenterio Irna, Abdolmalek Righi pendesis hiere en Teheran. Pos proceso ye klozita pordo, ita chefo di sunnista movado kondamnesis ye morto-puniso pro atenti ed armizita ataki kontre la ordino-trupi. Il direktis grupo de extremista rebeli, Joundallah, olqua entraprezas depos dek yari rebela ago en la sudesto di ca islamal republiko.

Kordiala interretala saluti ad omni. JM :::-:::

Ye la 17ma di junio 2010.

Dio di santa Hervagus.

DIO-PROVERBO / Ludo, mulieri e vino duktas a la ruino.

ZODIAKO / En la zodiako-signo dil Jemeli guvernata dal planeto Merkuro.

VETERO / Griza e pluvema cielo, cajorne, en Francilia.

KONCIZE

UNIONITA REJIO / "BLOODY SUNDAY"
La Britaniana chefa ministro David Cameron prizentis solena exkuzi a la familii dil katolika manifestanti, pri qua on agnoskas ke li ne esis armizita, e qui pafesis mortige da parafalo-armeani en Londonderry dum la "Bloody Sunday" 38 yari ante nun, ye la 30ma di januaro 1972, per invitar chanjar la pagino pri "un de la maxim mala tragedii" en Ulster. "To quo eventis ye la dio dil "Bloody Sunday" ne esis justifikata e ne esis justifikebla. Lo esis mala", tale deklaris David Cameron koram la membri dil Chambro di la Komoni, per anuncar la konkluzi dil publika inquesto pri la "Sangoza Sundio".

USA / DANJEROZA MAREO NIGRA
Barack Obama komparis, pasinta-mardie, la nigra mareo sordidiganta la gulfo di Mexikia a "epidemio", quan lua lando kombatos "dum multa monati e mem dum yari", e lu asertis ke ita "tragedio" montras ke "la tempo adoptar neta energii venis". Kurtatempe antee, la Usana autoritatozi rievaluiabis, per augmentar ol, la quanto de kruda mineral oleo ekvarsita singladie depos ok semani dal petrolo-shakto domajita per l'explozo dil petrolifanta platformo Deepwater Horizon. Sume, inter 300 e 500 milion litri de hidrokarbido supozeble ekfluis en l'oceano.

TURKIA / KONDAMNO
La Europana Korto pri la homala yuri kondamnis pasinta-mardie Turkia pro cesigir la publikigo di du semanala jurnali akuzata pri porterorista kampanio favore a la PKK/Kongragel (Partiso di la laboristi di Kurdia). Ico esas praktiko proxima a la censuro segun la dicita korto.

Kordiala interretala saluti ad omni. JM :::-:::

Ye la 16ma di junio 2010.

Dio di santa Ioannes-Franciskus Regis.

DIO-CITAJO / Ta qua sizas Germania, sizas Europa. (Stalin)

ZODIAKO / En la zodiako-signo dil Jemeli guvernata dal planeto Merkuro.

VETERO / Sunoza cielo ma koldeta temperaturo, cajorne, en Francilia.

KONCIZE

MEXIKIA / 43 MORTINTI LOR VIOLENTAJI
Mexikia travivis hiere plusa dio de violentaji ligita a la komercacho di narkotaji. Mortis adminime 43 personi dum tempo de min kam tri hori, inter li esis 15 policani lor embusko ed armizita afronti. Ultre lo transmondeskis 28 karcerani lor pafado en karcero. Pasinta-semane, ica violentaji produktabis 20 mortinti.

SUISIA / LA DEPUTITI VOTAS POR LA TRANSPARENTESO
La deputiti Suisa dil nacionala Konsilantaro aprobis, hiere, la transmiso ad Usa de 4450 bankala donataji di klienti dil UBS banko, qui akuzesas pro fiskala eskapo, ma li mantenis lia decido aprobigar ica texto per fakultativa plebicito. Konseque la dicita texto itere iras, hodie, a la Konsilantaro dil Stati qua esas riexpresonta lua opiniono pri la questiono dil plebicito.

TAILANDO / GUIDANTI DI LA REDA KAMIZI DURAS ESAR EN KARCERO
Tribunalo di Bangkok refuzis, hiere, la liberigo po kauciono di dek-e-un responsivi di la reda kamizi, qui persequesis pro "terorismo" pos organizir l'okupado dum du monati dil mezo di la Tailandana chefurbo. La aludita dek-e-un militanti livrabis su pos l'asalto dil Tailandana armeo kontre lia kampeyo. Li mem povas minacesar per la morto-puniso.

Kordiala interretala saluti ad omni. JM :::-:::

Ye la 15ma di junio 2010.

Dio di santa Germana.

DIO-PROVERBO / Por omna ago venas tempo di pago.

ZODIAKO / En la zodiako-signo dil Jemeli guvernata dal planeto Merkuro.

VETERO / Sat sunoza cielo, cajorne, en Francilia.

KONCIZE

DR-KONGOLANDO / KONDAMNO YE MORTO-PUNISO
Du Norvegiana ex-soldati kondamnita ye morto-puniso ye la 10ma di junio da militistal tribunalo dil nordesto di la Demokratial Republiko Kongolando pro l'ocido dil vehisto di lia veturo, same kam pro spionado ed asociuro di deliktanti. Ica soldati rezolvis ne apelar, anuncis hiere un de lia advokati. La guvernerio di Oslo asertis ke lu esas "pronta negociar" la transfero di lua du resortisanti a lia origino-lando.

CHINIA / RIKONSTRUKTO POS LA SISMO EN QINGHAI
La Chiniana guvernerio evaluas ke bezonesos 32 miliard "yuan"-i (3,86 miliard euri) por rikonstruktar dum periodo de tri yari la regioni di Qinghai, nordwest-Chinia, sukusita dum la mezo dil monato aprilo per potenta sismo qua efektigis adminime 2698 mortinti. Ita pekunio-quanto esus adportota dal centrala guvernerio, specala kapitalo furnisesus dal provincala autoritatozi ma anke donaci expektesas dal entraprezeyi e dal privati.

HISPANIA / GENERALA STRIKO
La du precipua sindikati Hispana impulsas hodie advoko a generala striko por protestar kontre la reformo-projeto pri la laboro-merkato anuncita pasinta-venerdie dal socialista guvernerio. Li esas decidonta pri la dato dil striko kontre ca projeto olqua devas plufaciligar la rekurso a la ekonomial konjedi en lando ube la chomado-procento superiras le 20%.

Kordiala interretala saluti ad omni. JM :::-:::

Ye la 14ma di junio 2010.

Dio di santa Eliseo.

DIO-PROVERBO / Qua selektas sen fino, mariajas porkino.

ZODIAKO / En la zodiako-signo dil Jemeli guvernata dal planeto Merkuro.

VETERO / Sunozeta cielo kun milda temperaturo, cajorne, en Francilia.

KONCIZE

INFORMO-FULGURI / A - KIRGIZIA ESAS PROXIMA AD INTERCIVITANA MILITO.
B - LA SENDEPENDISTA PARTISO FLANDRIANA VINKAS LOR ELEKTO EN BELGIA.

PALESTINANA TERITORII / VIZITO DAL GENERALA SEKRETARIO DIL ARABA FEDERURO
Lor lua vizito en Gaza ube il arivis tra la frontiero kun Egiptia, la generala sekretario dil Araba Federuro, Amr Mussa, postulis hiere la cesigo dil blokuso impozata depos quar yari da Israel a la Gaza-areo. Il anke advokiis ad inter-Palestinana rikoncilio. Lo esas la unesma foyo kande chefo dil Araba Federuro iras a la Gaza-areo.

CHINIA / INQUESTO PRI LA SUOCIDI CHE LA FABRIKERIO FOXCONN
La rezulti di inquesto pri serio de suocidi en Taiwanana fabrikerio instalita en Chinia, olqui produktis vivaca debato pri la fato dil Chiniana laboranti, dissavigesos publike, tale asertis informili hiere. Dum periodo de kin monati, dek-e-un employati di Foxconn en Chinia suocidis, inter li dek esis en Shenzhen. Tri plusa employati probis finigar lia vivo.

SENEGAL / REMPLASIGO DIL AMBASADISTO DI FRANCIA
La libri-autoro e diplomacisto Jean-Christophe Rufin anuncis, pasinta-venerdie, ke lu livos, ye la fino dil monato junio, lua ofico kom ambasadisto di Francia en Senegal ube il travivis, depos tri yari, periodi de tenso kun prezidanto Abdoulaye Wade qua deziris lua departo. Ilua sucedanto, Nicolas Normand, esas balde ironta a Dakar.

Kordiala interretala saluti ad omni. JM :::-:::

Ye la 11ma di junio 2010.

Dio di santulo Barnabas.

DIO-CITAJO / Kompare a la populi di Proxima-Oriento Machiavel esis korista puero naivega. (Winston Churchill)

ZODIAKO / En la zodiako-signo dil Jemeli guvernata dal planeto Merkuro.

VETERO / Blua e sunoza cielo, cajorne, en Francilia.

KUWAIT / MANIFESTI POR LA LIBERIGO DI JURNALISTO
Centi de personi, deputiti, anciena parlamentani e milititanti por la homala yuri advokis por la liberigo di Mohammad Abdelqader Al Jassem, dum akuzar la guvernerio volar represar la liberesi. Ico eventis lor kunveno merkurdie vespere avan la domo dil opozanta deputito Mussallam Al Barrak. Pasinta-lundie, la korto pri kriminal aferi prolongabis la enkarcerigo di Jassem til la 21ma di junio, t.e. la dato dil venonta audienco.

LIBIA / STRATEGIALA LABORO KUN GREKIA
Libia e Grekia signatis, hiere, letro kun intenco por apertar la voyo a "strategiala kunlaboro" inter amba landi, okazione la vizito en Tripoli dal Greka chefa ministro Georgios Papandreou. Ica kunlaboro efektigesos en la domeni dil koloko, dil energio, dil turismo, dil agrokultival e nutrival industrio, dil financi e di la rinovigebla energii. La guvernerio di Tripoli deklarabis dum mayo ke lu esas pronta helpar Grekia ekirar la financala krizo.

MEXIKIA / ARESTO DI CHEFO DIL NARKOTAJ-FEDERURO
La Mexikiana policani arestis pasinta-merkurdie Hector Luna Luna, un de la chefi dil narkotaj-federuro di "Los Zetas" en Monterrey. Il esas la supozata responsivo di atento dum oktobro 2008 kontre la Usana konsuleyo en Monterrey, t.e. una de la tri maxim grand urbi di ca lando, nefore de la frontiero an Texas.

Kordiala interretala saluti ad omni. JM :::-:::

Ye la 10ma di junio 2010.

Dio di santulo Leander.

DIO-CITAJO / Koncerne me, la patriotismo haltas ye la nivelo dil stomako. (Bismarck)

ZODIAKO / En la zodiako-signo dil Jemeli guvernata dal planeto Merkuro.

VETERO / Griza e sturmema cielo, cajorne, en Francilia.

KONCIZE

TURKIA / RISKOZA PROBO
Turkia probis, pasinta-mardie, kondamnigar Israel pro lua mortigera inkurso kontre marala konvoyo irante a Gaza. Dum l'aludita inkurso non Turki mortigesis. Ica kondamno-probo eventis lor regionala somito pri la sekureso havanta loko en Istanbul. "La konsequi di ta agi, facita kun odio- e venjo-sentimenti, esos evidenta", tale asertis la Turka prezidanto Abdullah Gull, lor ita somito qua asembligis la direktanti di plura landi.

EGIPTIA / MINACANTA PORNOGRAFIO MEZEPOKAL
La Egiptiana judiciisti rezolvis ne egardar plendo facita dum pasinta mayo por interdiktigar la rakonti dil Mil Nokti e Un Nokto. La plendanti demandis la konfisko di ca verko e l'enkarcerigo dil editisti, per alegar la fakto ke la referi a la sexualeso kontenata en ita rakonti "kurajigas la vicio e la peko" e konstitucas "insultego a la publika etiko".

HISPANIA / SKANDALOZA E NEYUSTA REZOLVO
La organizeri dil "Gay Pride" di Madrid interdiktis la partopreno da grupo de Israelana homeosexuali qui esis defilonta por reprezentar la municipo di Tel-Aviv, pro ke la dicita municipo ne kondamnis l'asalto per abordo di Palestinana navi.

FRANCIA / RETROVENO DI LETRO DA DESCARTES
Letro dal filozofo Rene Descartes, furtita en Paris dum la yarcento XIX, restitucesis pasinta-mardie a la Instituto di Francia dal Usana universitato di Haverford en Pennsylvannia lor oficala ceremonio, tale markizante la fino di longatempe duranta periplo di ca desaparinta epistolo. Kom manuskripto de quar paginedi, ita letro datizita ye la 27ma di mayo 1641, skribesis e sendesis de la kastelo di Endegeest, proxim Leyde en Nederlando. Lua destinario, Patro Mersenne, okupis su pri la publikigo dil "Metafizikal Meditadi".

Kordiala interretala saluti ad omni. JM :::-:::

Ye la 9ma di junio 2010.

Dio di santa Diana.

DIO-CITAJO / Me venis, me vidis, me vinkis. (Iulius Caesar)

ZODIAKO / En la zodiako-signo dil Jemeli guvernata dal planeto Merkuro.

VETERO / Griza e pluvema cielo, cajorne, en Francilia.

KONCIZE

CHINIA / OFICALA PROGRAMO PRI L'INTERRETO
Chinia qua disponas la maxim granda nombro de interretala naviganti en la tota mondo (400 milion), defensis hiere lua yuro censurar la Interreto ye la nomo dil sekureso di la Stato e lu advokis la exterlandani respektar lua "granda murego" informatikal. La Chiniana guvernerio publikigis hiere oficala programo substrekizante ke "la suvereneso di Chinia koncerne l'interreto esas respektota e protektota".

RUSIA / FURTO DE VIKTIMO DIL POLONA AVIONO
La Rusa judiciisti agnoskis, hiere, ke quar konskriptiti esas objekti di judiciala persequi pro la furto di bankala karti de un viktimo dil acidento di la aviono dil Polona prezidanto. Ico esas jenanta afero por la guvernerio di Moskva di qua la konduto pos ita dramato judikesabis kom exemplatra. La dicita konskriptiti esis ye la 10ma di aprilo interne dil sekureso-kordono cirkondanta la acidento-loko.

DR KONGOLANDO / NEDERLANDANA EXPERTIZISTI PARTOPRENOS L'INQUESTO PRI L'ASASINO DI FLORIBERT CHEBEYA
La Demokrata Republiko Kongolando aceptis ke expertizisti Nederlandana, inter li esas un legista mediko, asistez l'autopsio dil prezidanto di la organizuro "la Voco di le senvoca". Il asasinesis en Kinshasa pos irir a polico-kontrolo.

Kordiala interretala saluti ad omni. JM :::-:::

Ye la 7ma di junio 2010

Dio di santa Gilbertus.

DIO-CITAJO / La Reiki esas la maxim apta tekniko en la feldo dil cienco pri energii. (Hawaya TAKATA)

ZODIAKO / En la zodiako-signo dil Jemeli guvernata dal planeto Merkuro.

VETERO / Blua e sunoza cielo, cajorne en Francila.

KONCIZE

SUDAN / OMAR EL BESHIR NE BONVENESAS YE LA SOMITO DIL AFRIKANA UNIONO
La Ugandana prezidanterio anuncis ke la Sudanana prezidanto, Omar el Beshir, vizata per oficala aresto-dokumento internaciona pro "milit-krimini" e "krimini kontre la homaro en Darfur", ne invitesos che la venonta interrenkontro somitala dil AU en Kampala. Ita rezolvo atestas la kreskanta importo dil internaciona punisala Korto en Afrika, tale joyis hiere Human Rights Watch (HRW).

YEMEN / ARESTI LOR LA LUKTO KONTRE AL-QAIDA
La Yemenana autoritatozi arestis dum la pasinta du recenta monati plu kam 30 exterlandani, inter li esas Mohamedisti lojanta en Ocidento, enkadre di lia lukto kontre Al-Qaida, tale savigis hiere informo-fonto interne dil sekureso-servi. Ita exterlandani venabis, asertite, lernar la Araba en Yemen, tale imitante la Nigeriano facero dil faliinta atento kontre Usana aviono en 2009.

TAILANDO / MENTALA APERTATESO DIL CHEFA MINISTRO
Abhisit Vejjajiva konicigis, hiere, lua volo ke le "reda" reprezentesez en esquado komisita inquestar pri la mortigera violentaji qui produktis 89 mortinti e preske 1900 vunditi depos la mezo dil monato marto. Il expresabis l'ideo ke sendependa inquesto esas necesa pos la sangoza represo ye la 19ma di mayo di la "reda kamizi".

Kordiala interretala saluti ad omni. JM :::-:::

Ye la 3ma di junio 2010

Dio di santulo Kevin

DIO-PROVERBO / Pekunio sola ne igas felica.

ZODIAKO / En la zodiako-signo dil Jemeli guvernata dal planeto Merkuro.

VETERO / Bela vetero e sunoza cielo, cajorne, en Francilia.

KONCIZE

TAILANDO / PROPOZO PRI CENSURO REFUZESAS
La Tailandana chefa ministro, Abhisit Vejjajiva, vinkis hiere vespere propozo pri censuro dal basa chambro dil Parlamento. L'opozantaro reprochis a lu la represo dil manifesti kontre-guverneria produktinta 89 mortinti e 1900 vunditi dum la du jus pasinta monati. La aludita voto buntizesis per disputo inter du partisi dil majoritato. Ico devus havar kom konsequo modifiko dil guvernerio.

LIBIA / DEK-E-OK MORTIGI SEGUN JUDICIO
"Amnesty International" denuncis la mortigo segun judicio, pasinta-sundie, di 18 personi en Tripoli e Benghazi. Segun la jurnalo "online" QURINA, la kondamniti ye morto-puniso, inter li esis resortisanti di Chad, Egiptia e Nigeria, mortigesis per kugli pos agnoskesir kom kulpozi pri mortigo. Segun "Amnesty", grandanombra exterlandani judiciesas en Libia sen judiciala helpo nek konsulal helpo.

KUBA / UNESMA LOJEYO-CHANJI DI KARCERANI
La Kubana guvernerio procedis, pasinta-mardie, a la lojeyo-chanjo di sis politikala karcerani vers karceri jacanta proxim lia familii. Ita unesma afabla konduto efektigesis pos mediaco dal katolika Eklezio. Ye la 19ma di mayo, prezidanto Raul Castrorenkontrabis dum quar hori kardinalo Jaime Ortega, arkiepiskopo di La Havana, e Sinioro Dionisio Garcia, prezidanto dil episkopala Konfero.

Kordiala interretala saluti ad omni. JM :::-:::

Ye la 2ma di junio 2010

Dio di santa Blandina

DIO-PROVERBO / Evozeso ne protektas kontre foleso.

ZODIAKO / En la zodiako-signo dil Jemeli guvernata dal planeto Merkuro.

VETERO / Sat sunoza cielo, cajorne, en Francilia.

KONCIZE

AUSTRALIA / JAPONIA AKUZESAS
La guvernerio di Australia plendis hiere a la Internaciona Korto pri judicio kontre Japonia, judikante ke ita lando violacas lua "internaciona devi" per praktikar la pesko por kaptar baleni. La Japoniani peskas singlayare plura centi de baleni ye la nomo dil "ciencala explorado". La Australiana autoritatozi opinionas ke la Japoniana programo pri explori fakte celas pesko kun komercala skopo.

HISPANIA / REKURSO KONTRE LA VIG
La dextrana opozantaro prizentis rekurso, hiere, che la Konstitucala Tribunalo kontre la nova Hispana lego legaligante la voluntala interupto di gravideso (VIG), tale anuncis la Popul-partiso (PP, dextrana). La PP judikas ke ca nova texto qua permisas la mulieri abortigar til 14 semani de gravideso, esas kontrea a l'artiklo 15 dil Hispana Konstituco qua agnoskas la "yuro al vivo".

CHINIA / TRI JUDICIISTI MORTIGESAS
Viro ocidis, hiere, tri judiciisti per mitralioso-pafi e vundis tri plusa judiciisti en tribunalo di mez-Chinia ante suocidar. Zhu Jun, evo 46 yari, employato di banko, arivis a la tribunalo dil urbo Yongzhou ed esis armizita. Il pafeskis adsur la judiciisti. Il kontestis rezolvo judiciala pri la dispartigo dil posedaji ditenita komune kun ilua spozino. La dicita rezolvo judicial efektigesis okazione di ilua divorco da altra tribunalo.

Kordiala interretala saluti ad omni. JM :::-:::

Ye la 1ma di junio 2010

Dio di santa Iustinus.

DIO-PROVERBO / Omnu tale manjas, quale lu aranjas.

ZODIAKO / En la zodiako-signo dil Jemeli guvernata dal planeto Merkuro.

VETERO / Griza e pluvema cielo, cajorne, en Francilia.

KONCIZE

GRUZIA / FRAUDO LOR LA MUNICIPALA ELEKTO
La partiso dil Gruziana prezidanto por-Ocidenta Mikheil Saakashvili ganis avantajoze la municipala elekto eventinta pasinta-sundie, olqua esis probo por la rejimo ye la povo. Olu markizesis, segun l'Organizuro por la sekureso e la kooperado en Europa, per "importanta kulpi" koncerne la 'okurintaji' dum la voto e per "neegala" kondicioni por la kandidati favorizanta la partiso ye la povo.

TURKIA / ATAKO DAL KURDA REBELI EN LA SUDO DI CA LANDO
Sis Turka soldati ocidesis dum la nokto de sundio til hiere lor atako per supropulsanta projektilo da kurda rebeli kontre la navala provizerio militistal di Iskenderun, en sudest-Turkia. Ita atento 'okuras' pos ke la chefo dil terorista organizuro separista dil Partiso di la laboristi di Kurdia (PKK) anuncis ke lu renuncas dialogar kun la guvernerio.

USA / L'ARMEANI KOMENCAS LA DEBATO PRI LA HOMEOSEXUALI
Debato impulsesos interne dil armeo por preparar l'abrogo di la lego di 1993 interdiktante a la soldati revelar lia homeosexualeso sub la minaco revokesar.Casemane, la Chambro dil reprezentanti e la Senato aprobis texto previdanta l'abrogo di ta lego. Ma olua aboliso esos fakta erste pos evaluo dal Pentagono e konsento dal prezidanto.

Kordiala interretala saluti ad omni. JM :::-:::