IDO • Linguo Internaciona • Universala • Neutra • Facila


English Deutsch Français Plusa lingui

Novaji-Martignon-2010-Marto


Vu esas la esma
vizitanto di ca ret-situo

Specala ofro

Ido-Situi

Kurseto por Infanti da A. Martinez (Hispania), PDF-file 2Mb

Elektronikala dicionarii

Ido-uzantogrupi

Diversa texti, literaturaji ed Idokursi

Plusa Situi

Idofonduri

Wiki interna

modifikez flanko-bendo

Impressum: / Impreso:

Inhaber der Internetpräsenz www.ido.li:
propietanto dil retsituo www.ido.li

Deutsche Ido-Gesellschaft e.V.
Germana Ido-Societo r.a.
c/o ver.di Berlin
FB 8 / AG Ido
Köpenicker Str. 30
D- 10179 Berlin

Onlinekontakt
Interreta kontaktformulario

Administrator der Internetpräsenz www.ido.li:
administranto dil ret-situo www.ido.li

Frank Kasper
Breitscheidstr. 22
D- 90459 Nürnberg

Onlinekontakt
Interreta kontaktformulario

Novaji-Martignon-2010-Marto

Ye la 30ma di marto 2010

Dio di sant Amadeus;

DIO-PROVERBO / Povreso ne esas vicio.

ZODIAKO / En la zodiako-signo dil Arieto guvernata dal planeto Marso.

VETERO / Chanjema vetero kustumala dum la monato marto, cajorne, en Francilia.

KONCIZE

BURMA / LA PARTISO DI AUNG SAN SUU KYI BOIKOTAS LA ELEKTO
La nacionala ligo por la demokratio (NLD) dil Burmana opozantino Aung San Suu Kyi rezolvis, hiere, ne partoprenar la venonta deputital elekto, olqua esas la unesma depos duadek yari. Ico eventas konforme a la instrucioni da ca muliero qua esas Nobelpremiizita por paco. La militistal guvernerio di ca lando promulgabis ye la komenco di marto legi por cirkumar la voto. Konseque di ta texti, la NLD havis la selektebleso inter partoprenar la elekto pos exkluzir Aung San Yuu Kyi de lua eminentaro, o minacesar esar interdiktata dal militistal guvernerio di Burma.

JAPONIA / PLU KAM DUAMIL VIKTIMI DI MINIMATA INDEMNIZESAS
Mi-yarcento pos la maxim grava poluto industriala irgatempe registragita en Japonia, 2000 personi atingata per la venenago ye merkurio di la bayo di Minimata, sudwest-Japonia, recevos balde pekunio. La interkonsento povus aplikesar a plu kam 30.000 plusa viktimi qui ne agnoskesis oficale til nun. La forjeti di merkurio eventabis de 1956 til 1968.

MONGOLIA / ADVOKO A DONACAJI POR LA BRUTAR-EDUKISTI
La Reda-Kruco volas rekoltar aproxime un milion dolari en la skopo helpar dekamili de brutar-edukisti di Mongolia. Populizita per 2,7 milion habitanti, ica lando mustas afrontar, ye la duesma yaro intersequanta, la "dzud", t.e. severa vintro preirata per sika somero, olqua, kun forejo-indijo ed extrema koldeso, produktis la morto di 4,5 milion bestii reprezentanta 10% de la nacionala bestio-trupo.

Kordiala interretala saluti ad omni. JM :::-:::

Ye la 29ma di marto 2010

Dio di santino Gwladys.

DIO-PROVERBO / On bezonas ofte la helpo da min povoza persono kam su ipsa.

ZODIAKO / En la zodiako-signo dil Arieto guvernata dal planeto Marso.

VETERO / Grizeta cielo, cajorne, en Francilia.

KONCIZE

EGIPTIA / PREZIDANTO MUBARAK RETROVENAS EN LUA LANDO
Hosni Mubarak, evo 81 yari,retrovenis pasinta-saturdie ad Egiptia ube il esas pludurigonta sua konvaleco tri semani pos kirurgiala operaco en Germania. Ica operaco riimpulsis la supozo-diskuti pri ilua sucedo. La Egiptiana prezidanto, ye la povo depos duadek-e-non yari, ne ja savigis kad lu intencas prizentar su por lua propra sucedo lor la prezidantala elekto di 2011.

BURMA / FRANCA MISIONO POR LA HOMALA YURI
Francia sendis diplomacisto a Burma ed a Tailando por pridiskutar inter altri, en Rangoon la restrikti ye la homala yuri, ed en Bangkok, la komercachi pri sklava pueri. Ita misiono dil Franca ambasadisto por la homala yuri, Francois Zimmeray, eventos de la 28ma di marto til la 2ma di aprilo.

UNIONITA REJIO / POPULARA DIALA JURNALO APOGAS DAVID CAMERON
La NEWS OF THE WORLD, unesma sundiala jurnalo dil Britaniana jurnalaro, opinionis hiere per redaktistala artiklo ke oportas "donar lia chanco a David Cameron ed a la Tory-partiso por guvernar nia lando" lor la deputital elekto eventonta ye la 9ma di mayo. Ica jurnalo apogis la Labour-partiso depos 1997. THE SUN, maxim bone vendata jurnalo, apogas anke David Cameron, ilqua esas la preferato dil opinion-inquesti.

Kordiala interretala saluti ad omni. JM :::-:::

Ye la 26ma di marto 2010

Dio di santa Ludgerus.

DIO-PROVERBO / Kontre doloro helpas humuro.

ZODIAKO / En la zodiako-signo dil Arieto guvernata dal planeto Marso.

VETERO / Chanjema vetero tipala dil monato marto, cajorne, en Francilia.

KONCIZE

USA / BEN LADEN MINACAS ITERE
La chefo di Al-Qaida, Ussama Ben Laden, minacis mortigar omna Usani kaptita da lua reto se Khaled Sheik Muhammad, la precipua organizero dil atenti facita ye la 11ma di septembro 2001, e lua kompanuli mortigesus pro judiciala rezolvo. "Ye la dio kande laUsana autoritatoziagos ica rezolvo, li rezolvabos mortigar omna Usani quin ni kaptos", lu deklaris per "audio"-mesajo difuzita hiere che la kanalo televizional Al-Jazira.

NEDERLANDO / PLUHARDIGO DI LA LUKTO KONTRE LA NARKOTAJI
La proprietero dil maxim granda "coffee shop" di Nederlando, ilqua aceptis 2000 til 3000 klienti diale, precipue Belgi e Franci, kondamnesis hiere pro desobedio a la legaro pri la narkotaji, en Middelburg, sudwest-Nederlando. "La proprietero dil Checkpoint kondamnesas retrodonar a la Stato mikra pekunio-quanto de 10 milion euri venanta de la pekunio nelegale ganita", tale savigis la tribunalo di Middelburg.

HISPANIA / NOVA MOBILIZO KONTRE LE CORRIDA
Asociuro por defenso dil animali impulsis, hiere, en Madrid, kampanio vizante obtenor 50 000 signaturi por ke la regionala Parlamento aceptez debatar pri l'interdikto di le "corrida" en ica regiono. La dicita asociuro nomata El Refugio inspiresas per simila inicio impulsita en Katalunia, olqua produktabis acerba debato che la regionala Parlamento Kataluna. La dicita Parlamento ne ja agis irga rezolvo.

Kordiala interretala saluti ad omni. JM :::-:::

Ye la 25ma di marto 2010

Dio dil Anunco-festo.

DIO-PROVERBO / Quale on volas, tale on povas.

ZODIAKO / En la zodiako-signo dil Arieto guvernata dal planeto Marso.

VETERO / Tre chanjema printempal vetero, cajorne, en Francilia.

KONCIZE

LIBIA / LIBERIGO DI ISLAMISTI
La Libiana autoritatozi liberigis, pasinta-mardie, 214 islamisti. Inter li esas tri direktanti dil Grupo islamal di la Libiana kombatanti (GILK), tale anuncis Seif Al Islam, filiulo di Kadhafi. La GILK, movado islamista extremista, qua anuncabis en 2007 lua ralio a la partisanaro di Ussama Ben Laden, segun semblo ruptis omna ligili kun Al-Qaida.

RUMANIA / SENATANO ARESTESIS
La Rumaniana Senato grantis, hiere, lua konsento por l'aresto di senatano, Catalin Voicu, ilqua akuzesas pro suborno. Parolesas pri unesma kazo en ita lando, kritikata dal autoritatozi di Bruxelles pro la neexisto di rezulti en la lukto kontre la plago dil korupto. Sepadek senatani votis por lua aresto e quaradek kontre. On reprochas a lu intervenir po rekompenso che la judiciisti favore a du aferisti.

IRAK / MANIFESTI POS ELEKTO
Centi de partisani dil ekoficeskanta chefa ministro Nuri Al Maliki manifestis, hiere, en sud-Irak por postular plusa konto di la oficala paperi dil deputita elekto 'okurinta' ye la 7ma di marto. Lua listo havas preske la sama nombro de votanti kam olta dil anciena chefa ministri laika Iyad Allawi. Ica laste dicita akuzesas en Shiista sud-Irak esar la simbolo dil retroveno dal Baas, t.e. la partiso ye la povo lor la tempo di Saddam Hussain.

Kordiala interretala saluti ad omni. JM :::-:::

Ye la 23ma di marto 2010

Dio di santa Viktorianus.

DIO-PROVERBO / Griza barbo sajeson ne atestas.

ZODIAKO / En la zodiako-signo dil Arieto guvernata dal planeto Marso.

VETERO / Bela e sunoza printempala vetero, cajorne, en Francilia.

KONCIZE

NORD-KOREA / PROCESO DI USANO EN ICA LANDO
Civitano di Usa, evanta 30 yari, arestita pro enirir nelegale Nord-Korea, judiciesos dal agenti di la lokala rejimo, tale anuncis hiere la oficala informo-agenterio KCNA. Altra Usano, Robert Park, misionero de Koreana origino, liberigesis komence di februaro pos enkarcerigesir dum du monati, ankorefoye pro enirir sen permiso ica lando.

GREKIA / DESKOVRO DI MURO EVANTA 23.000 YARI
Paleontologiisti Greka deskovris la maxim anciena petra muro di ca lando, olqua desfaciligas l'eniro di kaverno en Thesalia, mez-Grekia. Ol probable konstruktesis dahomala grupiesanta chasisti e koliisti ed habitanta ita groto por protektar su kontre la koldeso. "Lo esas probable un de la maxim anciena restaji dil mondo", tale opinionas la Greka autoritatozi.

ISLANDO / VOLKANALA ERUPTO PLUFORTIGESAS
La volkanala erupto en sud-Islando, ye aproxime 150 kilometri de la chefurbo Reykjavik, qua esis la kauzo dil evakuo di 600 personi pasinta-sundie, evidente divenas plu intensa. La fenduro de 800 metri produktita per la erupto extensesas ye la direciono dil glaciero di Myrdalsjokull, qua kronizas la potenta volkano Katl.

Kordiala interretala saluti ad omni. JM :::-:::

Ye la 22ma di marto 2010

Dio di santa Lea.

DIO-PROVERBO / Ta qua manjas peceto del papo mortas pro ico. (Politikal proverbo Mezepokal)

ZODIAKO / En la zodiako-signo dil Arieto guvernata dal planeto Marso.

VETERO / Blua e sunoza cielo printempala kun milda temperaturo, cajorne, en Francilia.

KONCIZE

USA / HISTORIALA REFORMO DIL USANA PRISANESA SISTEMO
L'adopto ye la sundio 21ma di marto che la Kongreso di historiala reformo dil prisanesa sistemo, asekurante protekto a la preska toteso del Usani, pruvas ke Usa restas apta por "granda kozi", tale gratulis su prezidanto Barack Obama. Kelka minuti antee, 219 reprezentanti dil demokrata partiso ofrabis a lu la maxim granda vinko legifala di lua prezidanteso.

VATIKANO / LA PAPO PRIZENTAS EXKUZI PRO LA PEDOFILA* SACERDOTI
Pastorala letro da Benediktus XVI sendita a la Irlandana religiani pos la aferi pri sexuala ecesi en ita lando publikigesis ye la saturdio 20ma di marto dal Santa-Sidilo. Parolesas pri reprimando generala, signatita dal papo "kom pastoro dil Universala Eklezio". Konseque lo esas la tota Eklezio qua koncernesas, e nule nur Irlando. La episkopi Germana, Suisa, Austriana, omna qui recente koncernesis per la pedofila*tempesto, mustos atencar la paroli dal papo, nam denun la lego dil tacado ne plus esas aceptata. La laboro kun la judiciala autoritatozi esas devo.

EUROPANA UNIONO / EUROPA PRONTESAS HELPAR GREKIA SE NECESA
La ministri pri financo dil euro-zono precizigis la teknikal modalaji di projeto por financal helpo quan nur la Stat- e guverneriestri povus realigar. Nome financala helpo a Grekia ne esas duminstante neceseso, ma omna prontesas se la bezono realeskas. La efektigo dal Greka guvernerio di Papandreou di ekonomial aranjuri esas strete surveyata, substrekizas diplomacala informo-fonto.

Kordiala interretala saluti ad omni. JM :::-:::

Ye la 18ma di marto 2010

Dio di santa Kirilos.

DIO-CITAJO / La fakti ne cesas existar pro ke on ignoras oli.(Aldous Huxley)

ZODIAKO /En la zodiako-signo dil Fishi guvernata dal planeto Neptuno.

VETERO / Sat sunoza cielo e milda vetero, cajorne, en Francilia.

KONCIZE

CHINIA / INDIJO DE DRINKEBLA AQUO EN SUDWEST-CHINIA
Milioni de habitanti di sudwest-Chinia mustas afrontar indijo de drinkebla aquo motive di eceptala sikeso, tale raportis hiere la Chiniana jurnalo GLOBAL TIMES. La provinci Guizhou, Yunnan e Sichuan, same kam la regiono Guangxi e la urbego Chongqing, esas atingata per ica sikeso, nomeibe lapluvi esasinfra ye 60% kompare a la normala pluvo-nivelo, segun la dicita diala jurnalo. La vetero-previdisti ne predicas amelioro en perspektivo di kurta periodo.

FIDJI / DESTRUKTI POS CIKLONO
La ciklono Tomas qua frapis la insuli Fidji pasinta-lundie e - mardie supozeble destruktis preske la duimo de la domi e konstrukturi en la insuli Lau, en la esto di ca insularo, tale deklaris hiere kunordinanto dil sokurso-operaci. Avioni veninta de Australia, Nova-Zelando e Francia komencis superflugar la regioni balayita per la ciklono por evaluar la destrukturi e disdonar sokursaji.

BOLIVIA / NOVA DEVIZO POR L'ARMEANI E LA POLICANI
"La patrio o la morto" : segun demando da prezidanto Evo Morales, la polico e l'armeo adoptis ica slogano inspirita da Kuba. Ita devizo produktas restrikti che la armeani, e retretinta militisti denuncas "ofenso", nam ica slogano atribuesas ad Ernesto Guevara, mortigita en Bolivia en 1967 dum ke il esis la chefo di "guerilla"-ani.

Kordiala interretala saluti ad omni. JM :::-:::

Ye la 17ma di marto 2010

Dio di santa Patricius.

DIO-PROVERBO / Plu bona vertuo sen oro kam oro sen honoro.

ZODIAKO / En la zodiako-signo dil Fishi guvernata dal planeto Neptuno.

VETERO / Sat sunoza cielo kun tre milda temperaturo printempala, cajorne, en Francilia.

KONCIZE

FRANCIA / POLICISTO OCIDITA DA "ETA"-ANI EN URBONEFORA DE PARIS
Kaporalo di polico ocidesis per kugli, hiere vespere, lor atako da banditi en Dammarie-les-Lys, urbo proxim Paris. Ita funcionero evis 53 yari. Segun informo-fonto proxima a la policala inquesto, grupo de tri o quar personi furtis un o plura automobili en garajo. Patrolio de policani esis nefora de ca loko e probis kontrolar la malfacanti. Quik kande li probis intervenar la policani divenis skopo-plako da un o plura paferi. Un de li , grave vundita, mortis un horo plu tarde. Segun politikal informo-fonto, la malfaceri esis membri dil Baska terorista organizuro ETA, e un de li kaptesis.

ISRAEL-YERUSHALAIM / KA BALDE TRIESMA INTIFADA ?
Dum ke la Usana specala sendito George Mitchell plutardigis lua vizito en Proxima-Oriento, la Palestinani manifestis, hiere, por "la defenso di Al-Quds (Araba nomo di Yerushalaim)". Li protestis kontre la projeto por konstrukto di nova habiteyi e kontre l'inauguro di la historiala sinagogo la Hurva, olqua perceptesas kom plusa Israelana provoko. Rikonstruktita en la Yuda* quartero dil anciena parto del urbo Yerushalaim, ita sinagogo qua esas un de le maxim anciena di Israel, destruktesabis en 1948 dal Araba armeani.

FRANCIA / GREENPEACE EXKLUZESAS
La ekologiala organizuro "Greenpeace" fine renuncis, hiere, irigar la navo ESPERANZA en la portuo di Dieppe. La chefa navo di ca organizuro blokusesis depos pasinta-lundie da peskista maristi iracigita per la retoriko dal "Greenpeace"-ani kontre lia profesiono. Li do rezolvabis instalar deko de navi transverse en la kanaleto skope impedar l' ESPERANZA penetrar adibe. La aludita ekologiala organizuro tandem rezolvis deviacigar ica navo vers Rouen. La "Greenpeace"-ani asertis ke li nule esas enmika a la mestieristala pesko e ke lia eskalo en Dieppe vizis nur denuncar la projeto di nukleala reaktoro EPR en proxima loko.

Kordiala interretala saluti ad omni. JM :::-:::

Ye la 16ma di marto 2010

Dio di santa Benedikta.

DIO-PROVERBO / Vivez mizere, ma vivez libere !

ZODIAKO / En la zodiako-signo dil Fishi guvernata dal planeto Neptuno.

VETERO / Blua cielo sunoza e quaze printempala temperaturo, cajorne, en Francilia.

KONCIZE

KOLUMBIA / LA DEXTRANI PREPONDERAS LOR LA DEPUTITAL ELEKTO
La rezulto dil elekto di pasinta sundio esas ankore partala, ma la lekto di 80% de la votaji indikis, hiere, nova suceso por la dextrani, precipue por la sociala Partiso di nacionala uniono di prezidanto Uribe. Se on povas dicar kela "guerilla"-ani ne sucesis perturbar la elekto, la observeri raportas pri grandaquanta kompri di voti, tote aparte en la regioni kun forta militistatra prezenteso.

ISRAEL / PLUDURIGO DIL KONSTRUKTI EN EST-YERUSHALAIM
La chefa ministro Benyamin Netanyahou asertis hiere, ke "la konstrukto pluduros en Yerushalaim, quale dum ica 42 recente pasintayari". Ita deklaro 'okuras' dum periodo di krizo kun Washington - "la maxim mala depos 1975", segun l'ambasadisto di Israel en Usa. La dicita krizo eruptis lor l'anunco di nova projeto di koloniigo en Est-Yerushalaim dum la vizito dal vice-prezidanto Usana, Joe Biden.

TAILANDO / DU SOLDATI VUNDESIS LOR MANIFESTI
Du soldati vundesis en Bangkok, hiere, lor l'explozo di grenadi dum ke la "reda kamizi", movado enemika a la guvernerio, manifestis por postular lua falo. L'armeani efektigis aresti. La autoritatozi, qui timas ecesi e saboti, instaligis 50.000 membri dil ordino-trupi en-e-cirkum la Tailandana chefurbo.

Kordiala interretala saluti ad omni. JM :::-:::

Ye la 15ma di marto 2010

Dio di santa Luiza de Marillac.

DIO-PROVERBO / Facilesas kritikar, desfacil plubonigar.

ZODIAKO / En la zodiako-signo dil Fishi guvernata dal planeto Neptuno.

VETERO / Bela sunoza cielo kun preske printempala temperaturo, cajorne, en Francilia.

KONCIZE

PAKISTAN / SUOCIDA ATENTO
Adminime 10 personi mortigesis e 37 plusa homi vundesis, pasinta-saturdie, lor suocida atento en la valo di Swat, nordwest-Pakistan, loko ube la armeani ekpulsis la talibani du yari ante nun. La talibani di TTP federita ad Al-Qaida, qui revendikas facir ica atento, anuncas ke li efektigos plusa atenti tam longatempe kam la Pakistanana armeo pluduros olu operaci en la tribuala arei. Ita atako 'okuris' kurtatempe pos serio de tre mortigera atenti (72 mortinti) en Lahore, est-Pakistan.

TAILANDO / MANIFESTO KONTRE-GUVERNERIA
Dekamili de "reda kamizi" kunvenabis, hiere, en Bangkok, lor la maxim importanta manifesto depos un yaro dal partisani dil ex chefa ministro exilita, Thaksin Shinawatra. Ita personi postulas la falo dil nuna guvernerio ed anticipata elekto. La organizeri asertis ke plu kam 100.000 personi venabis por denuncar la konfisko dil povo dal eminentaro di Bangkok. La polico parolis pri 80.000 manifestanti.

MEXIKIA / MORTIGERA VENJI
Duadek-e-sis personi, inter li quar esis senkapigita, trovesis kom mortinti pasinta-saturdie en la Stato Guerrero, sude di Mexikia, konseque di venji asociata a la komercacho di narkotaji, tale anuncis la autoritatozi. La Stato Guerrero di qua Acapulco esas la turismala afisho havanta mondala famo, esas la feudo di "la Familia" ("la Familio"), t.e. narkotaj-federuro, qua divenas sempre plu potenta en Mexikia.

Kordiala interretala saluti ad omni. JM :::-:::

Ye la 12ma di marto 2010

Dio di santa Paulus di Leon.

DIO-PROVERBO / Ajornita ne esas perdita.

ZODIAKO / En la zodiako-signo dil Fishi guvernata dal planeto Neptuno.

VETERO / Grizeta cielo, ma plu milda temperaturo, cajorne, en Francilia.

KONCIZE

NIGERIA / MILI DE MULIERI SURHAVANTA NIGRA VESTI MANIFESTAS KONTRE LA MASAKRI
Mili de mulieri surhavanta nigra vesti kunvenis, hiere, en la stradi di Jos, Mez-Nigeria, por protestar kontre la masakri qui sangomakulizis ica regiono, pasinta-sundie, tale efektigante inter 109 e 500 mortinti, majoritate Kristani, segun diversa bilanci. Eli agitis mangieri-branchi kom signo di paco, dum brandisar bibli e ligna kruci, ed iranta a la sideyo di la lokala guvernerio dil Stato di la Platajo. Eli postulis la departo dal armeani, ilqui akuzesas ne efektigir lia misiono pro ne sucesirimpedar l'ataki.

UKRAINA / MYKOLA AZAROV DIVENAS CHEFA MINISTRO
Parlamentala koalisuro favoroza a la nova prezidanto Viktor Yanukovich formacesis hiere che la Ukrainana Parlamento e lupropozis nominar por l'ofico di chefa ministro Mykola Azarov. Ita nova federuro kontenas 235 deputiti. Mykola Azarov esas anciena ministro pri Financi edipsa esas membro dil sama partiso kam Viktor Yanukovich. Il havas, same kam ilu, kom origino la urbo Doneck. Ica nova koalisuro povis formacesar danke la apogo da parto del deputiti di la partiso di Viktor Yushchenko, l'anciena prezidanto.

ISRAEL / LA PALESTINANI POSTULAS LA NIHILIGO DI LA MAXIM RECENTA ENPLANTACI DE KOLONIIGANTI
"Omna decidi koncernanta la kolonii en Cisjordania ed en Est-Yerushalaim esas nihiligota. Ico ne esas questiono pri kalendario, pro ke la kolonii, omnamaniere, esas nelegala", tale deklaris, hiere, la negociero Palestinana, Saeb Erakat. Ilu reaktis a l'anunco dal Israelana autoritatozi pri la konstrukto di 1.600 nova lojeyi en Est-Yerushalaim anexita e a la regreti expresita dal Israelana chefa ministro, Benyamin Netanyahu, a la Usana vice-prezidanto Joe Biden "pro lane-oportuna instanto" dil dicita anunco.

Kordiala interretala saluti ad omni. JM :::-:::

Ye la 11ma di marto 2010

Dio di santa Eulogius.

DIO-PROVERBO / Plu bon poke ganar kam multe perdar.

ZODIAKO / En la zodiako-signo dil Fishi guvernata dal planeto Neptuno.

VETERO / Sunoza cielo kun mildeskanta temperaturo, cajorne, en Francilia.

KONCIZE

CHINIA / JURNALISTO PUNISATA
Zhang Hong, chefa redaktero adyunta dil EKONOMIAL OBSERVERO, havanta sideyo en Beijing (Pekino), savigis ke ilesabis punisatapro organizir komuna advoko da 13 informili oficala per postular la supreso dil rezido-permiso, la tale nomizita HUKOU, qua genitas ne-egalaji por la migranta laboranti. Ita dokumento vizis depos la yari 1950 evitar la rurala exodo a la urbi. Plu kam 200 milion rurani laboras tamen hodie en la urbi.

EUROPA / VISTO POR USA
La Europana Komisitaro salutis, hiere, la dispenso pri visti grantita da Usa por la resortisanti Greka. Lu demandis a la guvernerio di Washington rapide profitigar de ol la civitani dil quar lasta Stati membra di EU/UE qui ankore submisesas ad ita devo, nome Chipro, Bulgaria, Polonia e Rumania. La visto-dispenso grantesis a Grekia pos du yari de negociado.

HAITI / LE "GI" LIVOS BALDE ICA LANDO
La Usana kontigento preparas su departar pokope de Haiti, tale produktante desquieteso che la posvivanti dil potenta sismo eventinta ye la 12ma di januaro, olqua efektigis 200.000 mortinti. Dum ke la esforci koncernas nunadie precipue la rikonstrukto, plu kam quarimo de la 11.000 Usana soldati ankore prezenta esasdepartonta lor la venonta proxima dii. Komence ita militisti esis 20.000.

Kordiala interretala saluti ad omni. JM :::-:::

Ye la 10ma di marto 2010

Dio di santa Vivianus.

DIO-PROVERBO / Ad omna bandito segun sua merito.

ZODIAKO / En la zodiako-signo dil Fishi guvernata dal planeto Neptuno.

VETERO / Sunoza cielo e kolda venteto, cajorne, en Francilia.

KONCIZE

TOGOLANDO / L'AFRIKANA UNIONO KONFIRMAS LA RIELEKTO DI FAURE GNASSINGBE
L'Afrikana Uniono konfirmis, hiere, la rielekto dil ekoficeskanta prezidanto di Togolando, Faure Gnassingbe, advokante a la kalmeso la opozantaro qua kontestas ica rezultato. Cirkum 400 personi partoprenis, hiere matine, en Lome a manifesto dal opozantaro kun la klami : "Ni volas chanjo, ni volas nova prezidanto", ante dispersesar dal ordino-trupi.

NORD-IRLANDO / HISTORIALA VOTO POR KONFIRMAR LA PACO
La regionala asemblo Nord-Irlandana, qua asemblas la katolika republikani e la protestanta royalisti, olim enemika, esis signatonta, hiere, interkonsenta kontrato pri la transfero dil povi di polico e di judiciado de London a Belfast. Ica transfero qua valideskos ye la 12ma di aprilo, tale supresas la lasta obstaklo a l'apliko dil paco-proceso. qua finis triadek yari de interkomunaja violentaji en Ulster.

IRAN / LA REPRESO PLUDURAS EN TEHERAN
Onu ne plus havas informi pri Jafar Panahi, evo 49 yari, qua esas un de la filmifisti di la "nova cinemo" Iranana. Il arestesis un semano ante nun dal sekureso-trupi en Teheran. Il preparis filmo pri la pos-elekta manifesti en Iran. Samatempe, reformera jurnalisto, Bahman Ahmadi Amui, kondamnesis ye kin yari de karcero-puniso, dum ke la poetino Simin Behbahani, evo 82 yari, impedesis prehiere livar ica lando. El esis pronunconta, che la urbodomo di Paris, diskurso pri la feminismo okazione dil 8ma di marto, t.e. ye la internaciona dio dil mulieri.

Kordiala interretala saluti ad omni. JM :::-:::

Ye la 9ma di marto 2010

Dio di santa Franciska Romana.

DIO-CITAJO / Ta qua vivas pace kun su ipsa esas en paco kun la tota universo. (Marcus Aurelius, Romana Imperiestro)

ZODIAKO / En la zodiako-signo dil Fishi guvernata dal planeto Neptuno.

VETERO / Kruela blua e sunoza cielo kun vento ye polala koldeso, cajorne, en Francilia.

KONCIZE

PAKISTAN / SUOCIDA ATENTO EN LAHORE
La Pakistanana talibani federita ad Al-Qaida revendikis suocida atento per bomba vehilo kontre edifico dil polico. Ita atento efektigis adminime 13 mortinti, hiere, en Lahore, est-Pakistan. "Ni pluduros entraprezar ita tipo de ataki future", tale deklaris la porparolanto dil Movado dil talibani di Pakistan, t.e. la precipua movado di islamista rebeli, olqua deklaris sua vasaleso ad Al-Qaida quik de lua kreo, ye la fino di 2007.

AUSTRIA / POLEMIKO PRI KONTRE-NAZISTA LEGO
Extreme dextrana kandidatino por la prezidantal elekto en Austria kontestas la interdikto-legokoncerne lanazista partiso, votita en 1947. Barbara Rosenkranz, evo 51 yari, matro di dek filii, direktantino dil populista partiso extreme dextrana FPO, esos la unika kandidatino opozita ye la 25ma di aprilo a la ekoficeskanta Statestro Heinz Fischer, di qua la rolo esas precipue honorizanta ed etikal.

SUD-KOREA / MILITISTAL MANOVRI
La guvernerio di Sud-Korea ed olta di Usa impulsis, hiere, importanta manovri militistal kune. Oli esas duronta til la 18ma di marto, tale mobilizante preske 40.000 soldati malgre la minaci dal guvernerio di Pyongyang. La guvernerio di Nord-Korea rezolvis cesigar la diskuti pri la sen-nukleigo (ja interruptita depos aprilo 2009) kom retroturno ad ita exerci quin lu judikas esar premici di invado di lua teritorio.

Kordiala interretala saluti ad omni. JM :::-:::

Ye la 08ma di marto 2010

Dio di santa Ioannes di Deo.

DIO-CITAJO / "La framasonaro, ya, ne esas sekreta societo, ma lu havas sekretaji" (televizional polic-inspektisto Thomas Barnaby)

ZODIAKO / En la zodiako-signo dil Fishi guvernata dal planeto Neptuno.

VETERO / Blua e sunoza cielo ma tre kolda vento vintrala, cajorne, en Francilia.

KONCIZE

HISPANIA / MANIFESTO KONTRE-ABORTIGO
Plura mili de opozanti al abortigo defilis, hiere, en Madrid kun lamoto "Yes a la vivo, no al abortigo". Li postulis l'abrogo di la nova lego legaligante l'abortigo til 14 semani di gravideso. Delegitaro dil Franca asociuro "Le droit de naître" (La yuro naskar) partoprenis ica defilo, organizita per plu kam 200 asociuri en Hispania.

YEMEN / MEMBRO DI AL-QAIDA OCIDAS ILUA GARDISTI
Kaptito di Al-Qaida aceptita en hospitalo en Sanaa ocidis du de lua gardisti lor eskapo-probo hiere. Transportita exter lua karcero por medikala flegi, ica viro di qua la nomo ne revelesis, sucesis senarmigar ed ocidar du de la kin policani komisita por lua gardo, ante livrar su. Pasinta-jovdie, la Yemenana autoritatozi arestabis 11 supozata membri dil islamista reto en Sanaa.

SAUDIA ARABIA / ARESTO DI MILITANTI POR LA HOMALA YURI
La Saudiana asociuro por la civitala e politikal yuri protestis, hiere, kontre l'interpelo di kinadeko de personi en la provinco Qassim. Inter li esas, Thamer Al-Kather, studento qua militas por reformi en ita rejio. Segun la aludita NGO, ilu atakadesis dal policani, same kam lua patro, Abdelkarim Al-Kather, profesoro pri teologio.

Kordiala interretala saluti ad omni. JM :::-:::

Ye la 5ma di marto 2010

Dio di santa Olivia.

DIO-PROVERBO / Plu bone uunfoye vidar kam dekfoye audar.

ZODIAKO / En la zodiako-signo dil Fishi guvernata dal planeto Neptuno.

VETERO / Sat sunoza cielo, ma kun kolda temperaturo, cajorne, en Francilia.

KONCIZE

USA / CESIGO DIL KOMERCO PRI RED ATUNO
La Usana autoritatozi savigis hiere ke li postulos interdikto dil internaciona komerco pri reda atuno por protektar ica speco lor kunveno, previdita dum ica monato en Qatar. Ico esas ago tote ne aprobata da Japonia, t.e. lando ube ica fisho esas tre prizata. La Europana Komisitaro propozis recente tala interdikto, olqua esas aprobota da EU/UE pose ratifikata da la Cites, organizuro de 175 membri admisata che UN/ONU e komisita por la protekto dil endanjerigita speci.

CHINIA / LA DEFENSO-BUDJETO KELKE AUGMENTAS
La budjeto por defenso Chiniana montras en 2010 lua maxim febla augmento depos plu kam dek yari, per 57 miliard euri, t.e. plualtigo de 7,5% kompare a la reala spensi en 2009. La autoritatozi duras asertar la pure defensiva naturo di lia armeo (2,3 milion viri). Kompare a la interna revenui di Chinia, ita spensi reprezentis cirkum 1,4% dum la recenta yari, opoze a plu kam 4% en Usa , 2% en Francia ed en Unionita Rejio.

INDONEZIA/ ARESTO DI ISLAMISTI DIL JEMAAH ISLAMIYAH
La Indoneziana policani interpelis dum la recenta dii 14 personi suspektata preparar atenti e ligesar al terorista reto islamal Jemaah Islamaiyah, tale li dissavigis hiere. Ita personi arestesis depos la 22ma di februaro en la provincio Aceh, en nord-Sumatra, ube la policani asertas deskovrir exerco-kampeyo en izolita regiono.

Kordiala interretala saluti ad omni. JM :::-:::

Ye la 4ma di marto 2010

Dio di santa Kasimir.

DIO-PROVERBO / Kande du personi interamoras, nulatempe esas nokto. (Afrikana proverbo)

ZODIAKO / En la zodiako-signo dil Fishi guvernata dal planeto Neptuno.

VETERO / Sunoza cielo ma sat forta koldeta vento, cajorne, en Francilia.

KONCIZE

EUROPANA UNIONO / LA STATUTO DI REFUJINTO POVAS FORPRENESAR
Refujinto povas perdar sua statuto kande "la cirkonstanci justifikinta lua timo persekutesar cesis existar en lua origino-lando", tale asertis la Europana Korto por judiciado. La aludita korto deklaris kom justa la decido da Germana tribunali qui forprenesabis ita statuto de Irakani fuginta la rejimo di Saddam Hussain.

NEDERLANDO / MUNICIPAL ELEKTO
Dek-e-du milion Nederlandani vokesis a la urni elektala , hiere, por rinovigar 393 municipala konsilantari okazione di probo-voto, tri monati ante deputital elekto anticipata, ye la 9ma di junio. Pro ke lu esis viktimodi lua deskonkordi pri Afgania, la koalisuro-guvernerio direktita da Jan Peter Balkenende falis ye la 20ma di februraro.

RUSIA / DEMISIONO POS LA DESSUCESO DIL RUSI EN VANCOUVER
La chefo dil Olimpiala Komitato Rusa, Leonid Tiagachev, demisionis hiere konseque dil deceptanta rezulti di la Rusa atleti lor la Olimpiala Ludi di Vancouver. Rusia qua esos organizero di le vintrala OL en Sochi dum 2014, falis de la 4ma til la 11ma rango kompare a la preirinta Olimpiala Ludi. La Rusa publiko e la autoritatozi di ca lando deceptesis per la sportala prodaji di lia lando.

Kordiala interretala saluti ad omni. JM :::-:::

Ye la 3ma di marto 2010

Dio di santa Katarina Drexel.

DIO-PROVERBO / Jemez e plorez, ma sempre laborez !

ZODIAKO / En la zodiako-signo dil Fishi guvernata dal planeto Neptuno.

VETERO / Sunoza cielo ma koldeta temperaturo, cajorne, en Francilia.

KONCIZE

ISRAEL / PROJETO MINACANTA LA PALESTINANA DOMI REFUZESAS
La municipo di Yerushalaim rezolvis, hiere, refuzar, segun demando dal Israelana chefa ministro, l'exameno di arkeologiala projeto kontroversata, olqua esis konstruktota en la Araba quartero di Silwan, en Est-Yerushalaim, e qua minacas quaradeko de domi.

UGANDA / MORTIGERA TERENO-GLITO
Adminime 55 personi mortigesis e plu kam 350 plusa homi konsideresas kom desaparinta konseque di tereno-glito, qua enterigis hiere plura vilaji en l'esto di ta lando. L'armeani advokesis por rinforco en la distrikto Bududa, ye 40 km del urbo Mbale, proxima a la frontiero an Kenia.

FRANCIA / VIZITO DAL RUSA PREZIDANTO EN NIA-DAMO DI PARIS
Per selektar, hiere, veneracar la Santa Krono de dorni en la katedralo di Paris, Dmitri Medvedev konfirmis sua volo egardar la religii en la politiko dil Rusa Stato. Ita etapo, altagrade religial, en la agendo ja tre kargita dil Rusa prezidanto atestas en la realeso pri la plupromixigo inter la Patriarkeyo di Moskva e la Rusa Stato. La vizito da Medvedev en Francia bone 'okuris' e la Franci vendos ad il la dezirata militistal navi.

Kordiala interretal saluti ad omni. JM :::-:::

Ye la 2ma di marto 2010

Dio di santa Henrikus Suso.

DIO-PROVERBO / Stomako hungroza ne oreloza.

ZODIAKO / En la zodiako-signo dil Fishi guvernata dal planeto Neptuno.

VETERO / Bela e sunoza vetero, cajorne, en Francilia.

KONCIZE

MALI / ITALIANA GAJO-HOMO ADVOKAS SOKURSO
Sergio Cicala , evo 65 yari, kaptita kom gajo-homo depos pasinta decembro kun ilua spozino Philomene Kaboure, evo 39 yari, da Al-Qaida en islamal Maghrebia (Aqmi), advokis ilua guvernerio facar "koncesaji" por obtenar lua liberigo ed olta di lua spozino. Segun negociero, la fato di ca paro esas "suciiganta". E la afero koncernanta tri Hispana gajo-homi anke kaptita da Aqmi, esas, lualatere, "ne progresanta".

USA / BARACK OBAMA PREPARAS "SENSACIONALA DIMINUTO" DIL NUKLEALA ARMI DI USA
L'Usana prezidanto preparas, segun importanta informo-fonto anonima, dokumento qua esas prizentota a la kongreso ye klozita pordo e qua "vizos grantar plu importanta rolo por la konvencionala armien la skopodespersuadar repliko" e lu renuncos la kontre-bunkera* armi atomala volita dal preirinta guvernerio di George Walker Bush.

LIBIA / VIZITO DA HANNIBAL KADHAFI A LA ENKARCERIGITA SUISO
La filiulo di la Libiana Statestro, di qua l'aresto en Geneve produktabis krizo inter la guvernerii di Tripoli e Bern, esis hiere en la karcero di Al-Jadaida en Tripoli, ube il vizitis la Suisa aferisto Max Goeldi, kaptita depos 19 monati en Libia konseque di ta incidento. Lua samlandano Rashid Hamdani, qua lu anke esis karcerano dum 19 monati, povis livar Libia ye la 23ma di februaro.

Kordiala interretala saluti ad omni. JM :::-:::

Ye la 1ma di marto 2010

Dio di santa Albinus.

DIO-PROVERBO / Qua havas oro havas anke honoro.

ZODIAKO / En la zodiako-signo dil Fishi guvernata dal planeto Neptuno.

VETERO / Griza cielo, cajorne, en Francilia.

KONCIZE

IVORA RIVO / INTERKONSENTO DAL PREZIDANTO E DAL OPOZANTARO
La Ivorana opozo partoprenos la guvernerio, qua duris esar en periodo di formaco hiere. Pasinta-venerdie, interkonsento trovesis koncerne la elektala Komisitaro sendependa, olqua prezidesos dal anciena ministro Yussuf Bakayoko, membro dil demokratia partiso di Ivora Rivo, t.e. un de la precipua formaci dil opozantaro. Ita laste dicita nihiligis sua manifesto-impero.

POLONIA / LA MISILI* PATRIOT INSTALESOS DUM APRILO
La unesma misili* Patriot instalesos en Polonia dum venonta aprilo, tale anuncis saturdie la Poloniana ministrerio por Defenso. Usana soldati instalos ica misili* sur militistal provizerio jacanta ye 60 km de la Rusa inkluzajo Kaliningrad. La Usana autoritatozi abandonis ye la 17ma di septembro lia projeto instalor en Mez-Europa shildo kontre la misili* ye atingo-povo por longa disti.

SUISIA / KONDAMNO POS LA MILIT-ADVOKO DA KADHAFI
Suisia recevis grandanombra susteni pos l'advoko a "djihad" (santa milito) impulsata pasinta-jovdie da Muammar Kadhafi kontre Suisia qualifikata kom "miskredanta ed apostata" motive dil interdikto di la konstrukto di minareti. La relati inter la guvernerii di Bern e Tripoli desamelioreskis depos l'interpelo, dum julio 2008 en Geneve, di un de la filii di ca Libiana diktatoro.

Kordiala interretala saluti ad omni. JM :::-:::