IDO • Linguo Internaciona • Universala • Neutra • Facila


English Deutsch Français Plusa lingui

Novaji-Martignon-2010-Novembro


Vu esas la esma
vizitanto di ca ret-situo

Specala ofro

Ido-Situi

Kurseto por Infanti da A. Martinez (Hispania), PDF-file 2Mb

Elektronikala dicionarii

Ido-uzantogrupi

Diversa texti, literaturaji ed Idokursi

Plusa Situi

Idofonduri

Wiki interna

modifikez flanko-bendo

Impressum: / Impreso:

Inhaber der Internetpräsenz www.ido.li:
propietanto dil retsituo www.ido.li

Deutsche Ido-Gesellschaft e.V.
Germana Ido-Societo r.a.
c/o ver.di Berlin
FB 8 / AG Ido
Köpenicker Str. 30
D- 10179 Berlin

Onlinekontakt
Interreta kontaktformulario

Administrator der Internetpräsenz www.ido.li:
administranto dil ret-situo www.ido.li

Frank Kasper
Breitscheidstr. 22
D- 90459 Nürnberg

Onlinekontakt
Interreta kontaktformulario

Novaji-Martignon-2010-Novembro

Ye la 30ma di novembro 2010

Dio di santa Andreas.

DIO-PROVERBO / En hungranta familio mankas harmonio.

ZODIAKO / En la zodiako-signo dil Arkero guvernata dal planeto Jovo.

VETERO / Grizeta cielo kun kolda temperaturo e vento, e nivuro sur la tekti, cajorne, en Francilia.

KONCIZE

EUROPA-AFRIKA / ANIMOZA DISKUTI PRI LA ENMIGRADO LOR LA SOMITALA INTERRENKONTRO EUROPANA UNIONO-AFRIKA

La Libiana guidanto Mwammar Kadhafi postulis itere "adminime kin miliard euri" yarale de Europa Uniono por haltigar la nelegala enmigrado lor la komenco dil somitala interrenkontro Europa-Afrika hiere en Tripoli. EU/UE ja judikis ita demando kom "exajerita". Kaze di refuzo Kadhafi avertis "Libia ne plus esos la litoro-gardanto di Europa".

BRAZILIA-LANDO / LULA VIZITOS LE FAVELA RIKAPTITA DAL POLICANI

La Brazilia-landana prezidanto Luiz Inacio Lula da Silva asertis hiere ke la Brazilia-landana Stato ganos "la milito" kontre la narkotaj-komercistachi e lu anuncis ke il vizitos le favela di l'Alemao norde di Rio, di qui la policani rikaptis la kontrolo pasinta-sundie. Lula ne establisis la dato di lua vizito ma lu precizigis ke il "entraprezos ol kun multa plezuro".

Luiz Inacio Lula da Silva

BULGARIA / LA FURTI DI RELI MULTOPLESKAS

La furti di metali, treno-reli, elektrala o telefonial kabli, kreskis cayare en Bulgaria por augmento dil preci di la metali. 1634 furti di metalal objekti apartenanta a la 'infrastrukturi', inter li esas 900 furti di reli, kontesis inter januaro e septembro di 2010, t.e. triople plu kam pasinta-yare.

Kordiala interretala saluti ad omni. JM :::-:::

Ye la 29ma di novembro 2010

Dio di santa Saturninus.

Santa Saturninus e lua kompanuli

DIO-PROVERBO / En la dio di la santa Nulatempo.

ZODIAKO / En la zodiako-signo dil Arkero guvernata dal planeto Jovo.

VETERO / Grizeta cielo kun kelka nivo ed humide kolda temperaturo, cajorne, en Francilia.

KONCIZE

ITALIA / SILVIO BERLUSCONI HAVAS PROBLEMI

Studenti manifestas en Italia depos plura dii por protestar kontre la reformo dil supera docajaro. Ilualatere, Silvio Berlusconi advokis, pasinta-saturdie, lua partisani por ke li partoprenez "granda manifesto" por sustenar lu ye la 11ma e 12ma di decembro, ante la voto, ye la 14ma che la Parlamento pri propozo por censuro dil guvernerio.

USA / BARACK OBAMA VUNDESIS LOR BASKET-PARTIO

La prezidanto di Usa mustis subisar 12 suturo-punti che lua labio, pasinta-venerdie, pos recevir kudo-frapo lor partio di lua preferata sporto. La "match" di "basket" kunvenigis amiki e membri dil familio di la prezidanto en Fort McNair, militistal provizerio en suburbo di Washington, ye la morga dio dil festo di Dankon-donanta dio (Thanksgiving day).

Barack Obama e lua vunduro

GLOBO / PRESKE NULA MODIFIKO PRI LA PERMISITA QUANTI POR LA PESKADO PRI REDA ATUNO

La 48 Stati peskanta reda atuno rezolvis, pasinta-saturdie, mikra diminuto pri la permisita quanti koncerne la yaro 2011. Ita quanti, esos ye 12.900 tuni opoze a 13.500 tuni dum 2010. Le ekologiala NGO, qui pledis por diminuto dil permisita quanti til 6.000 tuni, timas la desaparo, en perspektivo di sat longa tempo, di ca speco.

Tuni

Kordiala interretala saluti ad omni. JM :::-:::

Ye la 25ma di novembro 2010

Dio di santa Katarina.

DIO-PROVERBO / Ta qua mustas, ita selektar ne povas.

ZODIAKO / En la zodiako-signo dil Arkero guvernata dal planeto Jovo.

VETERO / Komence grizacha cielo, pose diveninta sunoza ma kun tre humide koldeta temperaturo, cajorne, en Francilia.

KONCIZE

GERMANIA / LA AMBASADERII DESNAZISTIGAS LIA PORTRETI-GALERII

La ministro pri Exterlandana Aferi postulas ke esez nun nur"expozata la portreti dil ambasadisti nominita depos la rikonstituco dil ministrerio pri Exterlandana Aferi dil Germana Federala Republiko en 1951". La portreti dil enofica diplomacisti pose, ma di qui la ligili kun la Hitlerana rejimo pruvesis mustos akompanesar "per texto mencionanta ico explicite".

BRITANIA / PLURA MILI DE STUDENTI MANIFESTAS ENSTRADE KONTRE LA PLUCHERESKO DIL ENSKRIBO-YURI

Pos mobilizo ye la 10ma di novembro, olqua produktabis violentaji, nova manifesti organizesis hiere. La ibea guvernerio previdis augmentar forte la enskribo-kusti por la Universitato, irante de 3.867 ? po studento yarale til 7.000 ?, e, en "eceptala cirkonstanci", ye plu kam 10.000 ?.

BALKANIA / LA SERBA PREZIDANTO BORIS TADIC TURAS KROATIA

Tri semani pos lua historiala voyajo a Vukovar, ube lu prizentis exkuzi pro la milit-krimini facita en ita urbo dal Serbi, Boris Tadic arivis hiere en Zagreb. La diplomacala pluproximesko inter amba landi aceleresis depos la tempo kande la Kroata prezidanto Josipovic enoficeskis, komence di 2010, ed expresis ferme lua volo pri rikoncilio.

Boris Tadic

Kordiala interretala saluti ad omni. JM :::-:::

Ye la 23ma di novembro 2010

Dio di santa Klementius.

DIO-PROVERBO / Ta qua pri omno senflekte parolas, audos to quon lu ne volas audar.

ZODIAKO / En la zodiako-signo dil Arkero guvernata dal planeto Jovo.

VETERO / Griza cielo e sempre plu koldeta temperaturo, cajorne, en Francilia.

KONCIZE

AFGANIA / GENERALO PETRAEUS OFICALE ASKOLTATA EN PARIS

La chefa komandanto dil internaciona trupi en Afgania, David Petraeus, esis askoltota oficale ye klozita pordo, hiere, che la Franca Nacionala Asemblo dal komisitaro por Exterlandana Aferi. Ita Usana generalo pose esis parolonta kun la Franca ministro pri Defenso, Alain Jupp?. Aproxime 4.000 Franci esas nun halte restanta en Afgania.

Generalo Petraeus

SERBIA / DU SERBI KONDAMNESAS PRO MILIT-KRIMINI

Anciena lokala guidanto Serba, Branko Grujic, e Branko Popovic, Serbo di Bosnia, kondamnesis ye rispektiva punisi de sis e dek-e-kin yari de karcero-puniso, hiere en Beograd, pro milit-krimini perdiginta la vivo a 700 Mohamedani di Bosnia. La Serba Statala advokataro anuncis ke lu apelos pri co.

POLONIA / LA LIBERALI VINKAS LOR LA LOKALA ELEKTI

La liberala partiso dil chefa ministro, Donald Tusk, obtenis pasinta-sundie la vinko lor la unesma parto del municipala e regionala elekti. Segun opinion-inquesto quik pos la voto, la liberala formaco (civitanala Platformo) obtenas 33,8% de la sidili che la regionala konsilantari avan la konservema partiso di Jaroslaw Kaczynski, havanta 27% del sidili. Ita vinko plufortigas la poziciono di la liberali jus un yaro ante la deputital elekto.

Kordiala interretala saluti ad omni. JM :::-:::

Ye la 19ma di novembro 2010

Dio di santa Tangui.

DIO-PROVERBO / Forte sidas, ta qua Deon fidas.

ZODIAKO / En la zodiako-signo dil Skorpiono guvernata dal planeto Plutono.

VETERO / Grizacha cielo, cajorne, en Francilia.

KONCIZE

BURKINA FASO / PREZIDANTAL ELEKTO VENONTA-SUNDIE

Plu kam tri milion Burkinani advokesas votor venonta-sundie por elekto di qua la ekoficeskanta prezidanto, Blaise Compaore, esas la granda preferato. Ica voto povus havar kom rezulto konstitucala emendo posibligante a lu riprizentesar senfine. Blaise Compaor?, evo 59 yari, arivis ye la povo en 1987kom rezulto di Statala stroko qua perdigis la vivo al "patro dil revoluciono", Thomas Sankara.

Blaise Compaore

HONG KONG / NOVA HOMALA KAZO DI UCELO-GRIPO

La sanesala autoritatozi di Hong Kong (urbego ube habitas samideano Donald Gasper) probis quietigar hiere la lokala habitantaro pos konfirmir la existo dil unesma kazo di ucelo-gripo depos sep yari sur ica teritorio. Ol detektesis che muliero evanta 59 yari lor lua retroveno de kontinentala Chinia. La alarmo-stando plualtigesis a "grava nivelo" e la pultruni-kontroli divenis plu minucioza.

MAROKO / TRANSMONDESKO DI ABRAHAM SERFATY

L'anciena opozanto Marokana a la rejimo di rejo Hassan II, Abraham Serfaty, ekiris la vivo, hiere, en Marrakech, ye la evo 84 yari, tale deklaris hiere lua spozino Christine-Daure Serfaty. Il esis anciena membro dil komunista Partiso Marokana ed il enkarcerigesis de 1974 til 1991 en Maroko. "Il enterigesos saturdie che la Hebrea tombeyo di Casablanca, apud lua genitori", lua spozino dicis.

Kordiala interretala saluti ad omni. JM :::-:::

Ye la 18ma di novembro 2010

Dio di santa Alda.

DIO-PROVERBO / Ta qua shamas pri nulo, ne timas Deo.

ZODIAKO / En la zodiako-signo dil Skorpiono guvernata dal planeto Plutono.

VETERO / Grizega cielo ed humide kolda temperaturo, cajorne, en Francilia.

KONCIZE

ITALIA / SILVIO BERLUSCONI DEMANDOS KE LA PARLAMENTO GRANTEZ FIDO A LU YE LA 14MA DI DECEMBRO

La Italiana prezidanto dil Konsilantaro, di qua la populareso-koto itere falis dum la monato novembro, havis espero hiere koncerne la rezulto di importanta voto ye la 14ma di decembro che la Parlamento, pri censuro-propozo kontre lua guvernerio. Nome lua manteno ye la povo minacesas per necelita sedicieto da lua anciena koalisuro-partenero dil meza dextranaro, Gianfranco Fini.

Gianfranco Fini

KAMERUN / MORTIGERA ATAKO KONTRE PLATFORMO

Sis personi mortigesis dum la nokto de mardio til merkurdio lor l'atako di petrolifanta platformo opoze a la litoro di Bakassi, sudwest-Kamerun. Tri Kamerunana soldati, du civili ed un pirato mortigesabus lor ita asalto, di qua la responsiveso revendikesas dal Africa marine commando (AMC), t.e. rebela grupo implikita en homo-rapti dum pasinta marto e septembro.

MAROKO / UN/ONU DEPLORAS LA VIOLENTO

Per deklaro adoptita prehiere, la sekureso-Konsilantaro dil Unionita Nacioni "deploris la violento" dil asalto ye la 8ma di novembro dal sekureso-trupi Marokana kontre la Saharana kampeyo di Gdim Izik, sude de Laayoune, en westala Sahara (teritorio anexita da Maroko). Ita atako produktis multanombra viktimi. La sekureso-Konsilantaro advokis Maroko e la Fronto Polisario "pruvar plu multa politikala volo por trovor solvo".

Kordiala interretala saluti ad omni. JM :::-:::

Ye la 17ma di novembro 2010

Dio di santa Elisabeth.

DIO-PROVERBO / Siniorin imitar, oron balde perdar.

ZODIAKO / En la zodiako-signo dil Skorpiono guvernata dal planeto Plutono.

VETERO / Griza cielo ed humide kolda temperaturo, cajorne, en Francilia.

KONCIZE

KUBA / PREMIO POR LA DISIDENTINO YOANI SANCHEZ

La Cepios-premio pri libereso grantesis, hiere, a la Kubanino Yoani Sanchez, evo 35 yari, pro "lua postulo por expreso-libereso", tale anuncas ita sendependa organizuro Daniana. El minacesas per karcero-puniso pro lua blogo Generacion Y.

EGIPTIA / MOHAMEDISTI BRULAS DOMI DI KOPTO (EGIPTIANA KRISTANO)

Ica incidento eventis en la vilajo al-Nawahid, en la provinco Qena, ye 450 km sude de Al Qahira (Kairo), konseque di rumori segun qui la Kristano, qua esas proprietanto dil aludita domi, havabus amoral relato kun Mohamedistino. La policani efektigis plura aresti. Ita regiono ja subisis violentaji inter religiala komunaji.

SENEGAL / LA JURNALISTO ABDOU LATIF COULIBALY KONDAMNESIS

La direktisto dil jurnaloLA GAZETTE kondamnesis, hiere, ye un monato de karcero-puniso kun ajorno pro "difamo" a konsilanto di prezidanto Wade. Il denuncabis la korupto che eminenta personi dil Stato lor la vendo di telefon-permiso a la grupo Sudatel.

Abdou Latif Coulibaly

Kordiala interretala saluti ad omni. JM :::-:::

Ye la 16ma di novembro 2010

Dio di santa Margarita.

DIO-PROVERBO / Ta qua pekunion prenas, ita katenifas.

ZODIAKO / En la zodiako-signo dil Skorpiono guvernata dal planeto Plutono.

VETERO / Sunoza cielo, cajorne, en Francilia.

KONCIZE

INDONEZIA / LA VOLKANO MERAPI KALMESKAS

Dekamili de personi qui fugis de la penti dil volkano Merapi komencis hiere retrovenar a lia hemo, dum ke l'eruptala aktiveso di ca volkano diminutis ye intenseso. "L'intenseso forte plufebleskis ma l'eruptala ciklo ne ja finis", tale explikis volkanologiisto. Depos la pasinta 26ma di oktobro, ica volkano produktis la morto di 259 personi, dum ke 400.000 plusa homi evakuigesis.

Volkano Merapi

CHINIA / ADMINIME 42 MORTINTI LOR INCENDIO EN SHANGHAI

Adminime 42 personi ekiris la vivo hiere e 90 plusa homi vundesis kande incendio konstatesis en rezideyala turmo ye 28 etaji di Shangai, tale produktante fairego spektaklatra en la mezo di ta metropolo. La koncernata imoblo shirmis 156 familii e jacas en la dense populizita quartero Jingan. La kauzi di ca incendio ne savesas precize.

HISPANIA / PLENDO PRO "KRIMINO KONTRE LA HOMARO" KONTRE MAROKO

La Hispana federuro por la homala yuri esis depozonta hodie plendo che la maxim altaranga punisala instanco Hispana, pri violentaji kontre la Saharani en westala Sahara. La Hispano judiciistaro darfas inquestar pri krimini facita exterlande kande Hispani esas inter la viktimi.

Kordiala interretala saluti ad omni. JM :::-:::

Ye la 15ma di novembro 2010

Dio di santa Albertus.

DIO-PROVERBO / En landi transmara esas ora foresti.

ZODIAKO / En la zodiako-signo dil Skorpiono guvernata dal planeto Plutono.

VETERO / Grizeta cielo kun sunoza epizodi, cajorne, en Francilia.

KONCIZE

IRAN / ARESTO DI KIN ADVOKATI

L'Iranana autoritatozi arestis kin advokati, inter li esas tri mulieri. Nome, li suspektesas minacir la sekureso di ca lando, la prokuratoro di Teheran, Abbas Jafari Dolatabadi anuncis tale, sen furnisar lia identeso nek altra detali. Antee, la reformista jurnali ARMAN e SHARGH raportabis l'aresto di tri advokatini : Sara Sabaghian, Maryam Kianersi e Maryam Karbasi.

HAITI / LA BILANCO DIL KOLERO EVALUESAS YE 917 VIKTIMI

La nova bilanco dil viktimi di la kolero-epidemio qua plagas Haiti depos la mezo dil monato oktobro atingis 917 vivo-ekiri, t.e. 121 plusa mortinti kam pasinta-venerdie, segun cifri publikigita hiere dal ministrerio pri saneso di Haiti. La autoritatozi nombrizas anke 14.642 acepti en hospitalo ma atencigas ke la plu multa maladi, t.e. 14.083 personi, povis livar la hospitalo.

LIBANO / ARESTO DI ANCIENA EMINENTULO DI "LONDONISTAN"

Omar Bakri, extremista predikero islamista, kondamnita ye perpetua karcero-puniso da militistal tribunalo Libanana pro instigo a mortigo, arestesis hiere en lua domo en Tripoli, nord-Liban. Veninta de Siria ma ditenanto di Libanana pasporto, il vivabis e predikabis dum duadeko de yari en Britania, til lua sejorno-interdikto ibe en 2005.

Omar Bakri

Kordiala interretala saluti ad omni. JM :::-:::

Ye la 12ma di novembro 2010

Dio di santa Kristianus.

DIO-PROVERBO / Ta qua che la voyo konstruktas, itan omni instruktas.

ZODIAKO / En la zodiako-signo dil Skorpiono guvernata dal planeto Plutono.

VETERO / Grizeta cielo e tre ventoza vetero, cajorne, en Francilia.

KONCIZE

MEXIKIA / UN/ONU POSTULAS INQUESTO

Ico koncernas la masakro di 72 nelegala enmigranti facita dum la fino dil monato agosto en Mexikia, "ni postulas klara e nemediata inquesto, qua duktigos la kulpinti koram la judiciisti", deklaris hiere Navanethem Pillay, supera-komisario dil Unionita Nacioni pri la homala yuri. Elu parolis tale ye la komenco dil quaresma mondala Forumo pri la migrado e la developado, en Puerto Vallarta, Mexikia.

Navanethem Pillay

NORD-KOREA / LA USANA PREZIDANTOPOSTULAS "SERIOZESO"

Barack Obama avertis hiere la autoritatozi di Nord-Korea, ke li devas pruvar lia "seriozeso" ante omna posibla ristarto dil negociado pri la nukleala programo di ta lando. La negociado ye sis parteneri, implikanta Chinia, amba Korea-i, Japonia, Rusia ed Usa vizas renuncigar da ta lando lua nukleala ambicio, kambie di energiala helpo. La guvernerio di Pyongyang ne egardis lia propozo pos efektigir duesma nukleala probo dum mayo 2009.

RUSIA / SEP POLICANI E QUAR SUPOZATA REBELI MORTIGESIS EN DAGESTAN

Segun la Rusa informili, li mortigesis hiere lor afronti en Makhachakala, chefurbo di Dagestan, olqua esas republiko di Rusa Kaukazo sufranta pro islamista revolto. Pos la unesma milito di Chechenia (1994-1996) inter Rusa trupi ed sendependisti, la revolto pokope islamisteskis ed exterfluis exter la Checheniana frontieri por divenar dum la yari 200 islamista movado armizita.

Kordiala interretala saluti ad omni. JM :::-:::

Ye la 10ma di novembro 2010

Dio di santa Leo.

DIO-PROVERBO / Sonjo terorindesas, sonjo forkuras.

ZODIAKO / En la zodiako-signo dil Skorpiono guvernata dal planeto Plutono.

VETERO / Sat sunoza cielo ma kolda temperaturo, cajorne, en Francilia.

KONCIZE

AFGANIA / MINACO POR LE KARITATALA "NGO"

La autoritatozi imperis 150 humanala organizuri, inter li quar esas stranjera, cesar senfriste lia aktivesi pro ke li ne livris raporti pri lia pekuniizo-maniero e lia projeti, Afgana responsivo guverneriala savigis hiere. Aproxime 1.300 NGO-i, inter li esas 360 stranjera organizuri, esas aktiva en Afgania. Li employas cirkum 45.000 personi.

KUBA / KUNVOKO DIL VIma KONGRESO DIL KOMUNISTA PARTISO DUM APRILO 2011

La Kubana prezidanto Raul Castro kunvokis kongreso,e lu esasla unesma depos 13 yari, qua konsakresos a "l'aktualigo dil ekonomiala modelo" dil Stato, olqua supozesas supresar tillore 500.000 labor-plasi en la publika sektoro. Ita kongreso esis sencese ajornata depos 2002. La unesma sekretario dil PCC restas oficiale la patro dil Kubana revoluciono, Fidel Castro, evanta 84 yari, quakam il cedis en 2006 la prezidanteso dil Stato a lua fratulo Raul evanta 79 yari.

SLOVAKIA / ASASINO DIL ANCIENA PREZIDANTO DIL KONSTITUCALA KORTO

L'eminenta Slovaka advokato Ernest Valko, evo 57 yari, ocidesis per kugli pasinta-lundie da nekonocati en lua domo di Bratislava. Kom anciena deputito, Ernest Valko direktis la konstitucala Korto di Chekoslovakia en 1992, ante la partigo segun amikala maniero dil anciena federuro, e la kreo di Slovakia e di Chekia, sendependa ye la 1ma di januaro 1993. La policani konjektas ke il esis viktimo dal Chekiana "mafia".

Ernest Valko

Kordiala interretala saluti ad omni. JM :::-:::

Ye la 9ma di novembro 2010

Dio di santa Theodoros.

DIO-PROVERBO / A la vinko yuro venas, se olun forteso sustenas.

ZODIAKO / En la zodiako-signo dil Skorpiono guvernata dal planeto Plutono.

VETERO / Grizacha e pluvoza cielacho, cajorne, en Francilia.

KONCIZE

GREKIA / GEORGIOS PAPANDREOU PLUFORTIGITA PER LA LOKALA ELEKTI

La socialista chefa ministro Greka Georgios Papandreou renuncis senvalidigar la Parlamento pos recevir susteno "pro ke ne esis posibla agar diferante" lor la unesma parto de la regionala e municipala elekti, pasinta-sundie. Ico posibligas a lu pludurar lua politiko pri budjetala austereso. Malgre forta sinko, la kandidati di lua partiso, la Pasok, arivis kom le unesma avan lia konservema rivali en sep regioni de dek-e-tri.

CIENCO / NOVA MANIERO OBTENAR SANGALA CELULI

Kanadana ciencala exploranti sucesis, unesmafoye, fabrikar nemediate homala celuli sangala departante de celuli dil pelo. "In vitro", li realigis riprogramizo genala, sen koaktesar retroirar til la etapo di originala celulo (adulta). Nome, pro ke la celuli venas de la kuracato ipsa, ica metodo esas supozeble posibligonta til dek yari pos nun flegar sango-kanceri per la moyeno di sugrefto di ostala medulo.

LIBIA / DUADEK JURNALISTI DI INFORMILI PROXIMI DI FILIULO DI KADHAFI ARESTESIS

La Libiana autoritatozi arestis 20 jurnalisti di informili dil agenterio Al-Ghad apartenanta a Seif Al Islam, filiulo di la Libiana numero un nome Mwammar Kadhafi. Ita aresti esus en relato kun tensi inter reformemi (proximi di Seif Al Islam) e konservemi.

Seif Al Islam

Kordiala interretala saluti ad omni. JM :::-:::

Ye la 8ma di novembro 2010

Dio di santa Gelfridus.

DIO-PROVERBO / Al enemiki en kuro facez ponto kun plezuro.

ZODIAKO / En la zodiako-signo dil Skorpiono guvernata dal planeto Plutono.

VETERO / Grizega e pluvoza veteracho, cajorne, en Francilia.

KONCIZE

AUSTRIA / KAMPANIO KONTRE L'EKPULSO DA AZIL-DEMANDANTI

Omna politikala partisi di Karintia (sud-Austria), inkluzite la extremista dextranaro guvernanta ita provinco, agis kampanio por impedar l'ekpulso di familio di azil-demandanti Mongoliana. Depos kelka semani la ekpulsi di stranjera familii "modelatra", bone integracita* en la socio, sukusis la publika opiniono en Austria.

IRAN / TURKIA KONSENTAS POR ACEPTAR NEGOCIADO KUN IRAN

La guvernerio di Teheran solicitis lua federito, Turkia, por ke ristartez en ita lando la negociado pri la nukleanajiIranana qua cesabis depos un yaro kun la grupo dicita "5+1" (la permananta membri dil sekureso-Konsilantaro di UN/ONU : Usa, Rusia, Chinia, Britania e Francia, plus Germania). Ma la loko, la dato e la preciza jorn-ordino di tala interrenkontro esas establisota.

IRAK / LA CHEFA MINISTRO KONSERVOS SUA OFICO

Segun la texto di interkonsento facita pasinta-saturdie inter l'Irakana partisi politikal pri la repartiso dil povo pos la deputital elekto eventinta ye la pasinta 7ma di marto, Nuri Al Maliki mantenesos kom guverniestro. Ica politikal interkonsento previdas anke ke Jalal Talabani duros esar la Statestro e ke la konkurencanta partiso di Maliki, la bloko Iraqiya, d'Iyad Allawi, selektos lua kandidato por l'ofico di Parlament-prezidanto.

Nuri Al Maliki

Kordiala interretala saluti ad omni. JM :::-:::

Ye la 5ma di novembro 2010

Dio di santa Virginia.

DIO-PROVERBO / Nokte mem monstro esas belo.

ZODIAKO / En la zodiako-signo dil Skorpiono guvernata dal planeto Plutono.

VETERO / Grizeta cielo, cajorne, en Francilia.

KONCIZE

GREKIA / KONTROLO-OBLIGO POR YUNI PRO BOMBA PAKO

Inquestanta judiciisto rezolvis subisigar kontrolo-obligo hiere a du yuna Greki akuzata esir portanti di bomba paki adresizita por prezidanto Nikolaos Sarkozius e por la internaciona tribunalo di Den Haag. Depos pasinta lundio, dek-e-quar bomba paki sendesis preske samatempe ad exterlandana ambasaderii en Athina. La 14ma interceptita pako adresizesis por la ambasaderio di Francia en Athina.

La deliktanta yuna teroristi Greka

KENIA / LA AUTORITATOZI EKPULSAS SOMALIANA REFUJINTI

La Supera Komisarieyo di UN/ONU por la refujinti (SKU) adovkis urjante la autoritatozi di Kenia cesigar la retrosendo dil Somaliana refujinti qui fugas la kombati opozanta depos la mezo di oktobro milico federita kun la Somaliana guvernerio kontre "shebab"-a rebeli. La autoritatozi di Nairobi imperis la Somaliana civili retroirar adheme. Plura centi de li ja obediis.

EUROPA / LA AUTORITATOZI DI BRUXELLES PROPOZAS INTERDIKTAR LA MIXO DI FOSFATI EN LA LESIVO-PRODUKTURI

La Europana Komisitaro propozis, hiere, interdiktar l'utiligo di fosfati en la lesivo-produkturi dil habitanti di Europana Uniono skope plubonigar la qualeso dil aquo. Ma la detersanta produkturi por vazaro-lavili ed olti uzata da profesionani esus dispensota de ca aranjuro. Suedia e plura Stati di Usa ja interdiktis la uzado dil fosfati por la detersanta produkturi di la vazaro-lavili.

Kordiala interretala saluti ad omni. JM :::-:::

Ye la 4ma di novembro 2010

Dio di santa Karolus.

DIO-PROVERBO / La luno ne askoltas, kande olun hundo insultas.

ZODIAKO / En la zodiako-signo dil Skorpiono guvernata dal planeto Plutono.

VETERO / Grizeta cielo, cajorne, en Francilia.

KONCIZE

KROATIA / KARCERO-PUNISO SEN AJORNO POR LA MORTIGERI DI JURNALISTO

Tribunalo di Zagreb kondamnis, hiere, sis personi ye karcero-punisi irante de 15 til 40 yari pro l'asasino dum oktobro 2008 di Kroata jurnalisto, Ivo Pukanic, fondero dil semanala jurnalo NACIONAL, lor bomba atento.

Ivo Pukanic

GERMANIA / INKURSO KONTRE NOV-NAZISTI

La Germana policani entraprezis, hiere, serio de perquiziti vizanta interretala radiofoneyo* di extremista dextrani, Radiofono* Rezisto, akuzata propagar nazista idei. Cirkum 270 policani perquizitis 22 habiteyi en 10 regionala Stati (Laender) e li arestis 21 personi de 23 serchata homi.

PORTUGAL / EXTREMA SEVERESO

La Portugalana Parlamento adoptis hiere budjeto havanta senprecedenta severeso por 2011. La dicita budjeto kontenas totajo de nepopulara aranjuri qui frapos harde la simpla civitani, en la skopo retroduktar ica lando sur la voyo dil budjetala equilibro. Same kam Grekia, Portugal promisis agar lo che la autoritatozi di Bruxelles.

Kordiala interretala saluti ad omni. JM :::-:::

Ye la 3ma di novembro 2010

Dio di santa Hubertus.

DIO-PROVERBO / A la papero ne mankas tolero.

ZODIAKO / En la zodiako-signo dil Skorpiono guvernata dal planeto Plutono.

VETERO / Grizeta cielo, cajorne, en Francilia.

KONCIZE

IRAN / LA DEFENSERI DI SAKINEH TIMAS MORTIGO SEGUN JUDICIO

Sakineh Mohammadi-Ashtiani, Irananino kondamnita ye morto-puniso pro adultero, quan la internaciona komunajo probas salvar, povus mortigesar segun judicio hodie, Mina Ahadi timas, elqua esas prezidantino dil internaciona Komitato kontre la stonocido. La dicita Komitato esas instalita en Germania. S-ino Mina Ahadi citis hiere letro da tribunalo sendita a la karcero di Tabriz.

Sakineh Mohammadi-Ashtiani

YEMEN / SABOTO DI PETROLO-DUKTILO

La petrolo-duktilo juntanta la petrolifanta agro di Aqla en Shubeyka esis en flami hiere, segun informo da responsivo dil sekureso-servi. Ilta opinionas ke impliko da Al-Qaida esas posibla. Al-Qaida en Yemen revendikis facir plura atenti kontre la petrolifanta instaluri en sua dominacata areo, nome la regiono di Marib ye 100 km este de Sanaa, ed en la sudesto di ca lando.

SUDALA AFRIKA / MUTONI E KAPRINI MINACESAS DA VIRUSO

La pesto dil mikra ruminanti (PMR) minacas per morto plu kam 50 milion mutoni e kaprini en 15 landi ed endanjerigas lia proprietanti , avertis hiere la FAO, qua esas l'organizuro di UN/ONU por la nutrivi e l'agrokultivo, instalata en Roma. Ita virusala morbo qua ne afektas la homo, aparis en Tanzania komence di ca yaro.

Kordiala interretala saluti ad omni. JM :::-:::

Ye la 2ma di novembro 2010

Dio dil mortinti.

DIO-PROVERBO / Taco esas konsento.

ZODIAKO / En la zodiako-signo dil Skorpiono guvernata dal planeto Plutono.

VETERO / Grizeta cielo, cajorne, en Francilia.

KONCIZE

NORD-AMERIKA / YUNA MOHAMEDISTO SENDESOS A KANADA

Arestita kande il evis 15 yari en Afgania, Omar Khadr, kondamnesis pasinta-sundie ye quaradek yari dekarcero-puniso da militistal tribunalo eceptala en Guantanamo, ma lua konsento por pledar kom kulpinto previdigas impozara lunur ok de oli, ultre la ok yari ja pasinta en karcero. Il mustos ankore restar dum un yaro en Guantanamo, ante povar demandar lua ridukto en Kanada. Kande il esos sur Kanadana sulo, il povos prizentar demando a la komisitaro pri la kondicionala liberigi.

ITALIA / LA EKLEZIO INDIGNAS PRI LA AVENTURACHI DI SILVIO BERLUSCONI

L'AVVENIRE, diala jurnalo dil Italiana episkopi, demandis "personala sobreso e respekto dil deco" a laItaliana prezidanto dilKonsilantaro, ilqua akuzesasvokir personale la policani por liberigar Marokana minorino, akuzata pri furto e qua esabus pagata por partoprenar un de ilua festi. L'arkiepiskopo di Chieti-Vasto, Bruno Forte, opinionis ke parolesus, eventuale, pri "profunda violaco dil homala digneso ye la detrimento di febla enmigrintino".

Bruno Forte

TURKIA / ATENTO PRODUKTAS 32 VUNDITI EN ISTANBUL

Triadek-e-du personivundesis, hiere, lor suocida atento meze di Istanbul,sur la placo Taksim. La suocidanta teroristo, mortigata quik, segun semblo vizis policani. La PKK (Partiso di la Laboristi di Kurdistan) dementiis ye la sama dio irgamaniere implikesar en ita atento, dum anuncar ke kontree lu volas pludurigar,til la deputital elekto di venonta junio, lua milito-ceso decidita dum pasinta agosto.

Kordiala interretala saluti ad omni. JM :::-:::