IDO • Linguo Internaciona • Universala • Neutra • Facila


English Deutsch Français Plusa lingui

Novaji-Martignon-2010-Oktobro


Vu esas la esma
vizitanto di ca ret-situo

Specala ofro

Ido-Situi

Kurseto por Infanti da A. Martinez (Hispania), PDF-file 2Mb

Interretala dicionarii

Ido-uzantogrupi

Diversa texti, literaturaji, Idokursi ed Idofilmi

Plusa Situi

Idofonduri

Wiki interna

modifikez flanko-bendo

Impressum: / Impresumo:

Inhaber der Internetpräsenz www.ido.li:
propietanto dil retsituo www.ido.li

Deutsche Ido-Gesellschaft e.V.
Germana Ido-Societo r.a.
c/o ver.di Berlin
FB 8 / AG Ido
Köpenicker Str. 30
D- 10179 Berlin

Novaji-Martignon-2010-Oktobro

Ye la 29ma di oktobro 2010

Dio di santa Narcissus.

DIO-PROVERBO / Muso la katon sempre ofensis.

ZODIAKO / En la zodiako-signo dil Skorpiono guvernata dal planeto Plutono.

VETERO / Grizeta cielo, cajorne, en Francilia.

KONCIZE

HAITI / LA KOLERO-EPIDEMIO NE JA ATINGIS LUA KOLMO

La WHO/OMS konsilas a la autoritatozi preparar su "a la maxim mala cenaro", nome l'epidemio qua ja produktis preske 300 mortinti povus atingar la chefurbo di ca lando : Port-au-Prince. La psikoso, segun semblo, instalesis en ca insulo. Plura centi de manifestanti opozesis violentoze a l'aperto di centro por Mediki sen frontieri en l'urbo Saint-Marc, nam li timas ke la adfluo da maladi propagez la aludita epidemio.

CHINE / LA REVUO FORBES KONTAS 128 CHINIANA MILIARDIERI

La nombro de richega Chiniani augmentis ye 49 plusa personidum tempo-periodo de un yaro. Nur Usa sucesas plu bone per havar 400 miliardieri. Ye la evo 65 yari, Zong Qinghou, fabrikanto por ne-alkoolizita drinkaji e por laktaji Wahaha, qua cesigis pasinta-yare lua konfliktala partenereso kun Danone, vidis lua richeso kreskar ye 8 miliard dolari (5,7 miliard euri) dum periodo de un yaro. Il sequesas da Robin Li, kunfondero dil Chiniana exploro-motoro Baidu.

NORD-KOREA / LA MALA NUTRADO SUFRIGAS PLU KAM TRIIMO DE LA NE-ADULTI

Josette Sheeran, direktistino pri la mondala programo nutrival, dekaris ke el esas tre desquieta, hiere, per evaluar ke en kelka regioni di ca lando, "inter 35 e 40% de la ne-adulti ne recevas la vitamini e la nutrivala elementi quin li bezonas". La internaciona helpo forte diminutis pro la militistal e nukleal programi dil guvernerio di Pyongyang, elu savigis.

Josette Sheeran

Kordiala interretala saluti ad omni. JM :::-:::

Ye la 28ma di oktobro 2010

Dio di santa Simone santa Judo.

Kirko di santa Simon e santa Judo en Metz

DIO-PROVERBO / En desfacila kloko mem centimo esas valoro.

ZODIAKO / En la zodiako-signo dil Skorpiono guvernata dal planeto Plutono.

VETERO / Alternante sunoza e griza cielo, cajorne, en Francilia.

KONCIZE

AFGANIA / PLU KAM 65 MULIERI E NE-ADULTI PERISAS LOR LA KRULO DI DOMO

Ica dramato 'okuris' dum mariajo en vilajeto dil distrikto di Jalga, en la provinco Baghlan. Homuli ed homini separesas dum la mariaji en Afgania, to quo povas explikar ke la majoritato del viktimi esas mulieri e ne-adulti qui povus aplastesar per la krulo dil etajo okupata supre dal viri.

VIETNAM / SIS KATOLIKI KONDAMNESIS

Sis Vietnamani, inter li esas du mulieri, kondamnesis ye punisi iranta de non monati karcero-puniso kun ajorno til un yaro sen ajorno pro afero ligita a la diplaso di tombeyo, dum la monato mayo. Ita katoliki dil parokio Con Dau, proxim Danang, akuzesis pri "perturbi ye la publika ordino", segun la spozino di un de la kondamniti. La autoritatozi dementiabis itaepoke ke esabez vunditi lor ica incidento. Li aludis disputo pro tereno, sen irga relato kun la religio.

ARJENTINIA / NESTOR KIRCHNER MORTIS

Nestor Kirchner, anciena prezidanto Arjentiniana (2003-2007), spozulo dil nuna Statestro Cristina Kirchner, mortis ye la evo 60 yari pro kordiika krizo. Il esabis deputito, prezidanto dil Peronista partiso ye la povo e generala sekretario dil Uniono dil nacioni di Sud-Amerika (Unasur). Il subisabis dum pasinta septembro operaco por desstopar lua arterii. Ita recenta kirurgiala interveno dubigabis pri la eventualeso di lua kandidateso por la prezidantal elekto di 2011.

Nestor Kirchner

Kordiala interretala saluti ad omni. JM :::-:::

Ye la 27ma di oktobro 2010

Dio di santa Emelina.

DIO-PROVERBO / Tro rapida laboro, tro mikra valoro.

ZODIAKO / En la zodiako signo dil Skorpiono guvernata dal planeto Plutono.

VETERO / Sunoza cielo, cajorne, en Francilia.

KONCIZE

GREKIA / GEORGIOS PAPANDREOU NE EXKLUZAS LA POSIBLESOPRI GENERALA ELEKTO ANTICIPATA

Se la rezulto di la lokala elekti di la 7ma e 14ma di novembro esus frenagonta la reformi e la salubrigo dil publika financo entraprezata da lua guvernerio, la Greka chefa ministro ne exkluzas la posibleso rekursar ad anticipata elekto. Segun la opinion-inquesti, la guvernerio povus punisesar per la urni-elektala prola nepopulareso dil programo pri drastika e severa aranjuri ekonomial e social quan il impulsis por diminutar la debizeso di ca lando e satisfacar la demandi di lua kreditanti.

ITALIA / PRESKE 5 MILION ENMIGRINTI EN REGULAL SITUESO

Dum prizentar lua statistikal raporto yarala pri la enmigrado, la katolika humanala organizuro Caritas denuncis hiere "la negativa reakti, la fenomeni pri klozeso o pavoro". La enmigrinti qui esis aproxime duima milion en 1990, segun la oficala cifri, esas duadek yari pose dekople plu nombroza e reprezentas cirkum 7% de la Italiana habitantaro.

BOSNIA / NOVA RESTAJI DI MILIT-VIKTIMI TROVESIS

Expertizista legisti Bosniana e Serbiana opinionas trovir restaji apartenanta a plu kam cent viktimi dil Bosnia-milito (1992-1995), tre probable Mohamedista, lor ekterigi facita recente sur la jaceyo di sikigita lago alonge-irante la frontiero inter Bosnia e Serbia. La Bosnia-milito efektigis cirkum 100.000 mortinti. Aproxime 10.000 viktimi di ta konflikto til nun registragesas kom desaparinti.

Kordiala interretala saluti ad omni. JM :::-:::

Ye la 25ma di oktobro 2010

Dio di santa Ingelrannus.

DIO-PROVERBO / Al porko kornin ne donas Deo.

ZODIAKO / En la zodiako-signo dil Skorpiono guvernata dal planeto Plutono.

VETERO / Blua e sunoza cielo ma ventoza vetero kun koldeta temperaturo, cajorne, en Francilia.

KONCIZE

BENIN / 680.000 PERSONI AFLIKTESAS PER INUNDI

La Suprega Komisarieyo di UN/ONU por la refujinti esas impulsonta aerala ponto por disdonar sokurso, aparte tendi. La inundi qui komencis ye la debuto dil monato oktobro plugravesis per la manifesto di aquo-acensidi la fluvii Niger, Ouemene e di lia enfluanti. Entote, ita veterala domaji ja efektigis 1,5 milion sufranti en ica regiono, precipue en Nigeria, en Guinea, en Mali, en Chad, ed en Togolando, segun UN/ONU , qua intencas emisar humanala advoko por Benin.

Inundi en Benin

IRAK / LA SUPREGA KORTO IMPERAS A LA PARLAMENTO NOMINAR RAPIDEGE LA MAXIM ALTARANGA RESPONSIVI STATALA

La dicita Korto ja aceptabis plendi, dum pasinta agosto, da dek-e-du Irakana organizuri dil civila socio. Oli akuzis la rezolvo agita dum junio dal deputiti transirar la konstitucala fristo qua grantesas a li por elektar la prezidanto dil Parlamento. Preske ok monati pos la elekto deputital, ita elekto esas nekareebla etapo ante la nomino dil Statestro e dil chefa ministro.

BAHRAIN / LA SHIISTA OPOZANTARO PLUFORTIGAS SUA ASISTO CHE LA DEPUTITI-CHAMBRO

L'Asociuro dil nacionala konkordo islamala, o Al-Wefaq en Bahrain, obtenis, pasinta-saturdie, 18 de la 40 sidili segun la rezultati anuncata hiere. En ita Gulfo-lando havanta shiista majoritato, la ofico di chefa ministro e la klefa ministrerii okupesas da membri dil sunnista dinastio di le Al-Khalifa ye la povo depos 1783.

Kordiala interretala saluti ad omni. JM :::-:::

Ye la 22ma di oktobro 2010

Dio di santa Elodia.

DIO-PROVERBO / Plu sorgas un matro pri dek fili kam dek filii pri un matro.

ZODIAKO / En la zodiako-signo dil Skorpiono guvernata dal planeto Plutono.

VETERO / Komence griza cielo, pose sunoza e blua kun milda temperaturo, cajorne, en Francilia.

KONCIZE

EUROPA / LA EUROPANA PARLAMENTO HONORUMIZAS KUBANA DISIDENTO

La Europana Parlamento grantis hiere lua premio Sakharov a Kubana disidento, Guillermo Farinas, qua senfriste vokis a la fino dil "diktatoreso" en ica komunista insulo.

Guillermo Farinas

HAITI / KOLERO-EPIDEMIO ATINGAS HAITI

Kolero-epidemio mortigis 135 personi dum la recenta dii en nord-Haiti e 1.500 plusa kazi kontesis, tale anuncis hiere la medikala Asociuro Haitiana.

MAROKO / LA FRANCA GUVERNERIO ESAS SUCIOZA PRI LA KAZO DI KOLONELO TERHZAZ

La diplomacala ministrerio "Quai d'Orsay" informis ke lu esas "sucioza" pri la fato dil kolonelo mayoro Franca-Marokana Kaddur Terhzaz , evo 72 yari, anciena numero du dil avional armeo Marokana, ilqua esas enkarcerigita depos du yari en Maroko pro "domajir la extera sekureso di la Stato". La advokati di cakarcerano demandis aceptesar da Nikolaos Sarkozius (Nicolas Sarkozy).

CISJORDANIA : 600 KONSTRUKTEYI EN LA KOLONII

Plu kam 600 lojeyi komencis konstruktesar dum periodo de min kam un monato en la Israelana kolonii di okupata Cisjordania. Ita ritmo esas quarople supera ad olta existinta ante la fino dil "moratorium" ye la 26ma di septembro.

Kordiala interretala saluti ad omni. JM :::-:::

Ye la 21ma di oktobro 2010

Dio di santa Celina.

DIO-PROVERBO / Pekunio odoron ne havas, sua originon ne dicas.

ZODIAKO / En la zodiako-signo dil Skorpiono guvernata dal planeto Plutono.

VETERO / Bluega cielo kun milda temperaturo, cajorne, en Francilia.

KONCIZE

CHEKIA / TIL DUADEK-E-DU YARI DE KARCERO-PUNISO POR QUAR ATAKANTI DI CIGANI

Tribunalo di Ostrava (nordest-Chekia) kondamnis hiere ye punisi de duadek til duadek-e-du yari de karcero-sejorno quar nov-nazisti Chekiana, qui agnoskesis kom kulpinti pri rasista mortigo-probo kontre familio di Cigani. La dicita atako facita dum aprilo 2009, produktabis tri vunditi, inter li yunineto evanta du yari, tre grave brulita. La advokati dil quar viri quik apelis pri ca verdikto.

SOMALIA / BRITANIANA GAJO-HOMO LIBERIGESIS DA LUA RAPTANTI

Frans Barnard, Britaniana-Zimbaweana resortisanto, konsultisto pri sekureso por la Britaniana NGO Save the Children-UK, qua raptesis pasinta-jovdieda armizita viri en meza Somalia, liberigesis hiere. Plura negocianti savigis ke ca raptanti, venanta de un de la precipua pirati-klani Somaliana , recevabis ransono de 100.000 dolari (72.000?).

MEXIKIA / STUDENTINO NOMINESAS KOM POLICESTRO DI GUADALUPE

Marisol Valles Garcia, evo 20 yari, nominesis kom policestro di Guadalupe, urbo de 100.000 habitanti devastata per la violento dil organizita kriminanti, an la frontiero kun Usa. Ica yunino, qua "esis la unika persono aceptar ica ofico", segun la municipo, studias la kriminologio, en Ciudad Juarez, urbo qua esas la maxim danjeroza di ca lando, jacanta ye sisadeko de kilometri de Guadalupe.

Marisol Valles Garcia

Kordiala interretala saluti ad omni. JM :::-:::

Ye la 20ma di oktobro 2010

Dio di santa Adelina.

DIO-PROVERBO / En la nomo dil cielo, ma pro lo bona dil felo.

ZODIAKO / Iro en la zodiako-signo dil Skorpiono guvernanta dal planeto Plutono.

VETERO / Sunoza cielo ma kun kolda temperaturo, cajorne, en Francilia.

KONCIZE

GUINEA / TUMULTI EN CONAKRY

Adminime sis partisani de un de la du kandidati lor la duesma parto del prezidantal elekto, previdita venonta-sundie en Guinea, nome Cellou Dalein Diallo, vundesis hiere en Conakry dal ordino-trupi qui pafis per reala kugli. La partiso di Cellou Diallo minacabis pasinta-lundie paralizigar ica lando ed impedar la 'okuro' dil voto se la prezidanto dil nacionala Komisitaro elektala (Ceni), ne remplasesus ante la venonta sundio. Li akuzas ilu esar proximulo di Alpha Conde, qua esas la altra kandidato.

MAROKO / MANIFESTI DA SAHRAWI

Plura mili de personi stacigis kampeyo proxim Laayun, en westala Sahara, dum la nokto di hiere, por protestar kontre "la plumaligo" di lia vivo-kondicioni e postular "employi e lojeyi". Sendato di UN/ONU, Christopher Ross, turas ita regiono por ristartigar la negociado pri westala Sahara kun Maroko.

Christopher Ross

NATO/OTAN / LA RUSA PREZIDANTO IROS A LA SOMITO DI LISBOA

Dmitri Medvedev asistos la somito di NATO/OTAN en Lisboa dum la mezo dil monato novembro, tale lu anuncis hiere en Deauville. La generala sekretario di NATO/OTAN, Anders Fogh Rasmussen, esis felica pri co, pro ke il konsideras ke ico esas "importanta okaziono" pluprofundigar la dialogo kun Rusiapor reciproka interesto.

Kordiala interretala saluti ad omni. JM :::-:::

Ye la 19ma di oktobro 2010

Dio di santa Renatus.

DIO-PROVERBO / Monto gravideskis, muso naskis.

ZODIAKO / En la zodiako-signo dil Balanco guvernata dal planeto Venero.

VETERO / Grizeta cielo ma sat milda temperaturo, cajorne, en Francilia.

KONCIZE

GREKIA / LA GREKI REZISTAS KONTRE L'INTERDIKTO FUMAR

Grekia ditenas l'Europana rekordo dil tabak-fumado. Per yarala konsumado meznombra de 2.954 sigareti ye singla persono e 40% de fumanti, ica lando qua esas la duesma tabako-produktero en Europa ne sucesas impozar l'interdikto fumar en publika loki. Nova lego valideskis recente ma : "Nulakaze me intencas karear mem un kliento, nam nulatempe antee me tante bezonis lua pekunio !", Iannis Tsakos klamas, ilqua esas generala sekretario dil Asociuro dil Greka restorerii e drinkeyi.

CHECHENIA / LA CHECHENIANA PARLAMENTO ATAKESAS DA REBELI : OK MORTINTI

La konstrukturo dil Checheniana Parlamento atakesis da quar rebeli, qui ocidis membri dil sekureso-trupi e kaptis gajo-homi, tale savigis hodie 19ma di oktobro porparolanto dil ministrerio por Interna Aferi en Grozny, Checheniana chefurbo. La atakanti renkontris la morto lor l'operaco dal reguloza trupi.

RUSIA / L'EKLEZIO E LA MUZEI INTERDISPUTAS POR LA RELIGIALA PATRIMONIO RUSA

La Duma examenas lego vizanta granda transfero dil patrimonio di la Stato a la Eklezio, ye la detrimento dil muzeo-konservisti. "Duadek yari por la falo dil komunismo preske nulo retrodonesis a la Eklezio..." Quale altra personi en la ortodoxista hierarkio, Patro Vsevolod Chaplin, qua esas l'influoza arkisacerdoto Moskvana nepacienteskas ed esperas ke nova lego rapide aceptesos. Ico semblas bone preparesar. Ma la muzeo-konservisti desquieteskas, nam li timas ke la Eklezio ne havos la financala moyeni por bone flegar la anciena artala verki.

Patro Vsevolod Chaplin

Kordiala interretala saluti ad omni. JM :::-:::

Ye la 18ma di oktobro 2010

Dio di santa Lukas.

DIO-PROVERBO / Chefo ne hungras.

ZODIAKO / En la zodiako-signo dil Balanco guvernata dal planeto Venero.

VETERO / Sunoza cielo kun kolda temperaturo, cajorne, en Francilia.

KONCIZE

NEDERLANDO / ABSOLVO REQUIZITESAS POR GEERT WILDERS

La Nederlandana Statala advokataro requizitis, pasinta-venerdie, l'absolvo dil deputito Geert Wilders, guidanto dil extreme dextrana partiso PVV, qua judiciesis pro instigo a rasala odio. "Wilder efektigis lua deklari kom politikala viro. Ni opinionas ke la fakto ke lu pronuncis oli enkadre dil publika debato igas oli nepunisebla", tale defensis ilu la prokuratorino Birgit van Roessel. La judicio esas konocota ye la venonta 5ma di novembro.

PROXIMA ORIENTO /AJORNO DIL TRIPARTISALA SOMITO DIL 21ma DI OKTOBRO EN PARIS

La Palestinana prezidanti Mahmud Abbas ed Egiptana Hosni Mubarak, same kam la chefo dil Israelana guvernerio, Benjamin Netanyahou, interkonsentis pri ajorno di kunveno inter protagonisti dil paco-negociado en Proxima-Oriento, olqua previdesabis en Paris. Ica ajorno sequas la haltigo dil nemediata negocio inter Israelani e Palestinani.

ARMENIA / INAUGURO DIL MAXIM LONGA TELEFERIKO* DIL MONDO

Teleferiko* ye 5,7 kilometri iranta a la Mezepokal monakeyo di Tatev, proxim la frontiero an Iran, inauguresis pasinta-saturdie. La maxim altaranga oficisto dil Armeniana Eklezio, Karekine II, partoprenis la unesma oficala voyajo. Ita voyajo esos gratuita por la habitanti di ca regiono. La aludita projeto kustis 13 milion euri, qui furnisesis da privata kapitali.

Monakeyo di Tatev

Kordiala interretala saluti ad omni. JM :::-:::

Ye la 15ma di oktobro 2010

Dio di santa Teresa di Avila.

DIO-PROVERBO / Amaso di pekunio e titulo di barono.

ZODIAKO / En la zodiako-signo dil Balanco guvernata dal planeto Venero.

VETERO / Grizeta cielo, cajorne, en Francilia.

KONCIZE

USA / INSULTANTA AFISHO KONTRE BARACK OBAMA

Giganta afisho sur qua desegnesas quar karikaturi pri Barack Obama sub la traiti di islamista suocidema teroristo, di homeosexualo, di Mexikiana bandito e di "mafia"-ano, glutinesis en Grand Junction (Colorado). Ol surhavas la slogano"Vote democRAT" (Votez demokRATO) e produktis ondo de kritiki en Usadumperiodo proximeskantaal elekto di prezidantal mi-ofica tempo ye la venonta 2ma di novembro.

GERMANIA / LA IBEA GUVERNERIO APOGOS LA PROFESIONAL EDUKADO DI "IMAM"-I

La guvernerio di Berlin spensos 4 milion euri sendata a la universitati di TUEBINGEN (ube eventis la recenta Ido-renkontro) e di Muenster/Osnabrueck, komisita pri programo por teologiala docado dil islamo, skope havar "imam"-i tote edukata en Germania prefere kam exterlande, tale anuncis hiere la ministrino pri edukado. La vizata skopo esas plu bona integraco* dil quar milion Mohamedisti habitanta Germania-lande.

BOSNIA / INTERDIKTESAS AD ANJELINA JOLIE FILMIFAR EN SARAJEVO

Gavrilo Grahovac, la ministro pri Kulturo dil Federuro Kroata Mohamedista, un de la du Statala enti di Bosnia, nihiligis filmifo-permiso por la unesma filmo da Anjelina Jolie kom realigisto. La dicita Usana aktorino volis filmifar amor-historio inter Mohamdista muliero violacita dum la milito (1992-1995) e lua Serba atakanto. Ita cenaro produktis la indigno da asociuri di mulieri viktimi dil milito.

Anjelina Jolie

Kordiala interretala saluti ad omni. JM :::-:::

Ye la 14ma di oktobro 2010

Dio di santa Justus.

DIO-PROVERBO / Ta qua shamas pri nulo, ne timas Deo.

ZODIAKO / En la zodiako-signo dil Balanco guvernata dal planeto Venero.

VETERO / Bela s sunoza cielo ma kun tre koldeta temperaturo, cajorne, en Francilia.

KONCIZE

YEMEN / FRANCI RIDUKTATA ADHEME

La mariajiti kun filii di ekpatri-irinti vivanta en Yemen advokesas livar ica lando motive di la plumaligo dil sekuresal situeso, tale anuncis hiere la Franca ministrerio pri Exterlandala Aferi. 840 resortisanti Franca kontesas en Yemen. Un Franco, Jacques Spagnolo, mortigesis ye la 6ma di oktobro en Sanaa da sekureso-gardisto.

USA / JUDICIO PRI LA HOMEOSEXUALA MILITISTI

La Usana judiciistaro interdiktis a la administrerio aplikar la lego "Don't ask, don't tell" (Ne questionez, ne dicez), qua koaktas depos 1993 la homeosexuala militisti celar lia sexuala orientizo, kun puniso per exkluzo. Segun la judiciisto Virginia Phillips, dil federala Tribunalo di Los Angeles, la dicita lego konsputas la 1ma e 5ma emendi dil Usana Konstituco.

Virginia Phillips

INDIA / DIALOGO EN KASHMIR

Tri expertizisti nominesis dal Indiana guvernerio por startigar dialogo pos monati de violentoza manifesti en ita regiono majoritate Mohamedista, subisanta revolto depos 1989. Segun opinion-inquesto publikigita dum pasinta septembro, du triimi del Indiana Kashmirani volas la sendependeso di lia regiono. L'altra parto de Kashmir administresas da Pakistan.

Kordiala interretala saluti ad omni. JM :::-:::

Ye la 12ma di oktobro 2010

Dio di santa Wilfried.

DIO-PROVERBO / En la propra domo sua singlu esas granda homo.

ZODIAKO / En la zodiako-signo dil Balanco guvernata dal planeto Venero.

VETERO / Blua e sunoza cielo ma tre koldeta temperaturo, cajorne, en Francilia.

KONCIZE

GREKIA / DUMVIVA KARCERO POR LA POLICANO QUA MORTIGABIS KOLEGIANO EN 2008

La policano qua mortigabis Alexis Grigoropoulos, evo 15 yari, dum decembro 2008 en Athina, tale eruptigante un monato de violentaji, kondamnesis hiere ye perpetua karcero-puniso. La kriminala tribunalo di Amfissa agnoskis Epaminondas Korkoneas, evo 38 yari, kom kulpinto pro "homocido kun intenco mortigar". Lua kunesquadano kondamnesis ye dek yari de karcero-puniso.

AFGANIA / INQUESTO PRI LA MORTO DIL BRITANIANA GAJO-HOMO

Generalo Petraeus, chefo dil internaciona trupi en Afgania, imperis hiere inquesto pri la morto dil Britaniana gajo-homo Linda Norgrove, dum substrekizar, ke ne ja posiblesas saveskar qua mortigabis elu lor salvo-operaco dal Usana trupi. El povus esir viktimo di grenado lansita dal specala trupi, qui probis liberigar elu.

Linda Norgrove

IRAN / DU GERMANA JURNALISTI ARESTESIS

La filiulo di Sakineh Mohammadi-Ashtiani, Irananino kondamnita ye morto-puniso pro adultero, same kam lua advokato Hutan Kian e du jurnalistiGermana asertite arestesis pasinta-sundie. La generala prokuratoro Iranana konfirmis hiere l'aresto dil du Germani ed afirmis ke li enirabis Iran kun turismala visti.

Kordiala interretala saluti ad omni. JM :::-:::

Ye la 11ma di oktobro 2010

Dio di santa Firminus.

DIO-PROVERBO / En mizero mem sajulo esas nesaja.

ZODIAKO / En la zodiako-signo dil Balanco guvernata dal planeto Venero.

VETERO / Admirinde blua e sunoza cielo, cajorne, en Francila.

KONCIZE

NEDERLANDO / SURVOYE A NOVA GUVERNERIO

La liberalo Mark Rutt komencis pasinta-venerdie negociado en la skopo formacar la venonta guvernerio. Ol esos minoritatal koalisuro qua apogos su sur frajila Parlamentala majoritato obtenita kun la susteno dal kontre-islama partiso di Geert Wilders. La futura chefa ministro, chefo di la liberala partiso (VVD), aceptis kom unesma kunparolanto Maxim Verhagen, chefo dil Partiso Kristana-demokrata (CDA), olqua tre dividesas koncerne eventuala laboro kun la partiso di Geert Wilders.

Geert Wilders

NORD-KOREA / UNESMA APARO PUBLIKE POR KIM JONG-UN

Giganta parado militistal, la maxim impresanta depos multa yari, esis l'okaziono hiere prizentar a la populo ed a la mondo, tra televizional imaji, la futura direktisto supozata di ca lando, nome la filiulo dil nuna guidanto. Hwang Jang-yop, t.e. la maxim altaranga persono oficala dil rejimo lokala transirinta a l'adverso, trovesis kom mortinto pro kordiika krizo hiere en lua surveyata rezideyo en Seoul, Sud-Korea.

AFGANIA / UN GAJO-HOMINO MORTIGESIS

Britaniana humanale laborantino raptita en la westo di ta lando, mortigesis da lua raptanti lor operaco di liberigo duktata dal Usana trupi e qua male finis. Ico anuncesis, pasinta-saturdie, da NATO/OTAN. Linda Norgrove, evo 36 yari, employesis dal NGO Dai. El raptesabis ye la 26ma di septembro. La autoritatozi di NATO/OTAN explikis rezolvir la dicita asalto, nam la gajo-homo esis transportota a Pakistan.

Kordiala interretala saluti ad omni. JM :::-:::

Ye la 7ma di oktobro 2010

Dio di santa Sergius.

DIO-PROVERBO / Sklavo kun forta manuo esas maxim granda tirano.

ZODIAKO / En la zodiako-signo dil Balanco guvernata dal planeto Venero.

VETERO / Sunoza cielo di Indiana Somero, cajorne, en Francilia.

KONCIZE

PAKISTAN / QUAR SUPOZATA ISLAMISTI MORTIGESIS

Adminime quar islamista rebeli mortigesis hiere per la misili* di Usana drono*, lor la 25ma atako di ca speco en apene plu kam un monato en la tribuala arei di nordwest-Pakistan. Ultre lo, la talibani acendis hiere 10 cisterna kamioni por riprovizado destinita a la trupi di NATO/OTAN en Afgania en la preurbo di Quetta.

CHINIA-JAPONIA / LA CHINIANA GUVERNERIO RETRETIGAS PATROLIO-NAVI

Chinia retretigis, hiere, du patrolio-navi qui krozis cirkum insuleti litijala produktinta diplomacala krizo kun Japonia. La Chiniana guvernerio sendabis ica navi ye la 23ma di septembro, por protektar la Chiniana peskisti laboranta proxim ica mar-insuleti di estala Chinia, olqui kontrolesas dal guvernerio di Tokio ma qui anke revendikesas da Chinia e Taiwan.

VENEZUELA / LA EXPROPRII RISTARTAS

Prezidanto Hugo Chavez anuncis la "rekuperado" di 250.000 hektari de sulo judikata kom "neproduktiva" dum oktobro e l'exproprio dil societo Agroislena, importanta pilastro dil agrokultivala sektoro, pro ke lu akuzesas augmentar la preco dil dungo. Depos lua arivo a la povo en 1999, la Stato prenis la kontrolo di aproxime 3 milion hektari, t.e. un dekimo de la kultivebla suli di ca lando.

Hugo Chavez

Kordiala interretala saluti ad omni. JM :::-:::

Ye la 6ma di oktobro 2010

Dio di santa Bruno.

DIO-PROVERBO / Nova balayilo bone balayas.

ZODIAKO / En la zodiako-signo dil Balanco guvernata dal planeto Venero.

VETERO / Griza cielo, cajorne, en Francilia.

KONCIZE

CHINIA / MIKRA DESTENSO KUN JAPONIA

La Japoniana chefa ministro Naoto Kan e lua Chiniana kolego Wen Jiabao finigis, pasinta-lundie, la diplomacala krizo inter lia amba landi lor diskuto en la marjino di somito Azia-Europa en Bruxelles. Ye la 7ma di septembro, la kapto di Chiniana pesko-navo dal Japoniana autoritatozi opoze a la litoro dimar-insuleti en estala Chinia, olqui revendikesas da amba landi, kreskigis la diplomacala tenso.

GERMANIA / GERMANA ISLAMISTI EN PAKISTAN

La Germana ministrerio pri Exterlandala Aferi asertis, hiere, ke lu havas nul informi koncernante islamisti Germana, qui supozeble mortigesis en Pakistan per Usana drono*. Segun responsivi dil Pakistanana sekureso-trupi e dil informo-servi, "kin Germana rebeli de Turka origino e tri Pakistanani" mortigesis per misili* pafitaper Usana drono*, en la tribuala arei.

RUSIA / LA CIRKUMANTI DI LUJKOV VIZESAS

La Rusa judiciisti anuncis, hiere, l'akuzo pro korupto di Alexandros Riabinine, adyunto komisita pri koloki e kontrati, precipue koncerne la imoblala aferi, apude l'anciena komonestro di Moskva Yuri Lujkov, revokata dal Kremlinana autoritatozi lor la fino di akra konflikto. Ita rezolvo povus augurar de persequi kontre ica importanta politikisto e lua miliardiera spozino.

Yuri Lujkov

Kordiala interretala saluti ad omni. JM :::-:::

Ye la 5ma di oktobro 2010

Dio di santa Flora.

DIO-PROVERBO / Infanto ne krias, matro ne savas.

ZODIAKO / En la zodiako-signo dil Balanco guvernata dal planeto Venero.

VETERO / Pluvema vetero e grizacha cielo, cajorne, en Francilia.

KONCIZE

RUSIA / LA SIGARETI MINACESAS

La guvernerio Rusa volas diminutar de quarimo la nombre de fumeri per interdiktar omna reklamo por la sigareti quik de 2011 e la tabako en la publika loki til 2015. "Inter 350.000 e 500.000 civitani mortas singlayare en la Federuro Rusia pro la konsequi dil tabako-konsumado", substrekizas la guvernerio, segun qua, en certena regioni di ca lando, "inter 53% e 80% de la viri ed inter 13% e 47% de la mulieri" fumas.

ISRAEL / MOSKEO DI CISJORDANIA INCENDIESIS

Sis koloniisti acendis, hiere, moskeo en la vilajo Beit Fajjar, proxim Bethleem. Li apartenas ad extremista movado qua praktikas la politiko dicita dil "pagenda preco" e qua konsistas en atakar Palestinana skopo-plaki singlafoye kande Israel facas aranjuri quin li opinionas esar nociva a la koloniigo.

HUNGARIA / VIKTOR ORBAN PLUFORTIGITA

La Federuro dil yuna demokrati (Fidesz) dicakonservema chefa ministro ganis pasinta-sundie kun aproxime 65% de la voti la municipala elekto, per prenar de la opozantaro la urbodomo di la chefurbo, Budapest. Lor la deputital elekto dum aprilo, lu obtenabis la majoritato de la du triimi che la Parlamento kun lua demokrata-Kristana federiti. La extremista dextrana partiso Jobbik regresis kompare a la monato aprilo per obtenar 15% de la voti opoze a 17% lore.

Viktor Orban

Kordiala interretala saluti ad omni. JM :::-:::

Ye la 4ma di oktobro 2010

Dio di santa Franciskus di Assisi.

DIO-PROVERBO / Hemala dometo esas quale matreto.

ZODIAKO / En la zodiako-signo dil Balanco guvernata dal planeto Venero.

VETERO / Griza e pluvema cielo, cajorne, en Francilia.

KONCIZE

NEDERLANDO / LA KRISTANA DEMOKRATI FEDERESAS KUN LA EXTREMISTA DEXTRANI

La Kristana-demokrata partiso (CDA) votis pasinta-saturdie interkonsenta kontrato guvernerial kun la liberali, qui arivis en unesmaranga poziciono lor la deputital elekto di pasinta junio. La dicita partiso sustenesas dal Partiso por la libereso (PVV), olqua esas extremista dextrana partiso. Ita futura guvernerio havos mikra majoritato che la basa chambro dil Parlamento.

NIGERIA / LA FESTI DIL SENDEPENDESO TRAURIGESAS PER ATENTO

Du bombi explozis pasinta-venerdie lor la militistal defileo por la 50ma aniversario dil sendependeso di Nigeria, koram prezidanto Goodluck Jonathan. Dek-e-du personi mortigesis. La Movado por la emancipo dil delta di Niger (Mend) revendikis agir ica atako.

Goodluck Jonathan

MEXIKIA / PAFADO E RAPTO

Pafado inter la homi dil federuro di "Sinaloa" e ti dil federuro di "Juarez" produktis 14 mortinti, pasinta-saturdie,, en la Stato Durango. Duadek personi altralatere mortigesis en la Stato Chihuahua pasinta-saturdie. Ultre lo, armizita kombato-grupo raptis pasinta-jovdie adminime 20 Mexikana turisti en la balnala staciono Acapulco.

Kordiala interretala saluti ad omni. JM :::-:::

Ye la 1ma di oktobro 2010

Dio di santa Teresa a Iesu infante.

DIO-PROVERBO / Prudenton Deo gardas.

ZODIAKO / En la zodiako-signo dil Balanco guvernata dal planeto Venero.

VETERO / Griza e pluvema vetero, cajorne, en Francilia.

KONCIZE

UNIONITA REJIO / DAVID MILIBAND ANUNCIS LUA DESASISTO DE LA DIREKTO DIL LABOR-PARTISO

L'anciena Britaniana ministro pri Exterlandala Aferi David Miliband, evo 45 yari, deklaris pasinta-merkurdie che la BBC lua desasisto de la direktantaro di la Labor-partiso. Lua juniora fratulo , Ed, evo 40 yari, vinkis lu pasinta-saturdie per mikra vinko por divenor chefo di la Labor-partiso. Ed Miliband qualifikis la decido di lua senioro kom "digna e sencoza".

David Miliband

ITALIA / SILVIO BERLUSCONI SALVESAS

La chefo dil Italiana guvernerio, qua afrontas disidenti interne di lua dextrana majoritato, salvis lua ofico, ma ekiris plu febla per fido-voto dal deputiti. Il obtenis 342 voti, t.e. 33 voti plusa kam la absoluta majoritato. La kompletigo dal 34 partisani di Gianfranco Fini unionita interne di Futuro e libereso por Italia (FLI) evidenteskis kom nekareebla. La komenteri ne exkluzas la posibleso di anticipata deputital elekto dum la venonta printempo.

PAKISTAN / TENSI KUN NATO/OTAN POS LA MORTO DI DU SOLDATI

La Pakistanan armeo reprochis a la trupo di NATO/OTAN en Afgania ocidir du frontier-gardisti hiere. La NATO/OTAN-ani asertis replikir a pafado dum ke du de lia helikopteri eniris "kurtatempe" la Pakistanan aerala spaco. La Pakistanana autoritatozi blokusis provizorean la frontiero la riprovizado-konvoyi di NATO/OTAN.

Kordiala interretala saluti ad omni. JM :::-:::