Novaji-Martignon-2010-Septembro

Ye la 30ma di septembro 2010

Dio di santa Hieronimus.

DIO-PROVERBO / A promiso onu ne kredez - kredez nur ta qua posedas.

ZODIAKO / En la zodiako-signo dil Balanco guvernata dal planeto Venero.

VETERO / Grizeta cielo, cajorne, en Francilia.

KONCIZE / VACINSERO KONTRE LA MALARIO SEMBLAS DIVENAR POSIBLA
Efikiva vacinsero kontre la malario povus esar disponebla en Afrika quik de 2015, tale anuncis un de lua inventeri, Joe Cohen. La fazo III dil klinikal probi di la vacinsero RTS,S kontre la PLASMODIUM FALCIPARUM, qua esas la maxim mortigera de la parazitiproduktanta la malario, realigesas en sep landi di Afrika ed ico eventas "tre bone", savigis Joe Cohen, qua laboras che la Britaniana laboratorio GlaxoSmithKline (GSK).

NORD-KOREA / FULGURANTA PROMOCO
Kim Jong-un, la maxim yuna filiulo dil Nord-Koreana guvernisto Kim Jong-il, ilqua preparas lua sucedo motive di lua mala sanesala stando, nominesis hiere ye altaranga funcioni interne di la komunista partiso, la oficala jurnalaro savigis, tale konfirmante lua probabla statuto di statestro-sucedanto. Kim Jong-un tale divenis membro dil centrala komitato dil unika partiso ye la povo ed il anke divenis vice-prezidanto di la militistala komisitaro centrala.

RUSIA / JAPONIA CHAGRENESAS PRI LA INSULI KURILI
La Rusa prezidanto Dmitri Medvedev promisis, hiere, efektigar vizito a la insuli Kurili, olqui esas la objekto di teritoriala disputo kun Japonia depos 1945. La guvernerio di Tokio quik demandis a la Rusa prezidanto renuncar ico. La anciena prezidanto Rusa nun chefa ministro Vladimir Putin propozabis dum februaro 2008 restitucar sub kondicioni a Japonia du de la quar kontestata insuli, ma la guvernerio di Tokio judikabis la dicita propozo kom neaceptebla.

Kordiala interretala saluti ad omni. JM :::-:::

Ye la 29ma di septembro 2010

Dio dil santa Arkianjeli Mikhael, Gabriel e Rafael.

DIO-PROVERBO / Mikra esas la flamo, tamen ne indijesas la fumuro.

ZODIAKO / En la zodiako-signo dil Balanco guvernata dal planeto Venero.

VETERO / Grizeta cielo, cajorne, en Francilia.

KONCIZE

HISPANIA / GENERALA STRIKO
La chefo dil socialista guvernerio Jose Luis Rodriguez Zapatero, qua grantis granda importo a la bona konkordo kun la sindikati, afrontas hodie lua unesma generala striko, dum ke ca lando ne ekiras la krizo e ke un aktiva persono de kin esas chomanta. Employo, salarii, retreti (la legala evo esas legaligota de 65 til 67 yari) esas parto de la revendiki. Depos triadek-e-kin yari, esis nur kin generala striki en Hispania.

NORVEGIA / ATENTO KONTRE DANIA VANIGITA
Irakana Kurdo, provizore enkarcerigita en Norvegia pro ke lu suspektesas preparir atento kun du plusa suspektati, konfesis ke lu projetabis atako vizanta la Daniana jurnalo JYLLANDS-POSTEN, olqua esas la skopo-plako dil islamista minaci depos la publikigo dil karikaturi dil profeto Muhammad en 2005. Instalita en Norvegia depos 1999, ita viro, evanta 37 yari, arestesabis ye la 8ma di julio en Germania.

PERU / LIMA POSTULAS LA RETRODONO DA USA DIL TREZORI DI MACHU PICCHU
La Peruana prezidanto, Alan Garcia postulis lundie, okazione dil centesma aniversario dil deskovro di Machu Picchu, olqua esas la turismala juvelo di ca lando, ke la prestijoza Usana universitato Yale retrodonez a lu, til julio 2011, la arkeologiala trezori di ca "Inka"-a citadelo. La arkeologialpeci di Machu Picchu forportesis inter 1911 e 1916 dal Usano Hiram Bingham.

Kordiala interretala saluti ad omni. JM :::-:::

Ye la 27ma di septembro 2010

Dio di santa Vincentus de Paul.

DIO-PROVERBO / Per lango flatas, per manuo frapas.

ZODIAKO / En la zodiako-signo dil Balanco guvernata dal planeto Venero.

VETERO / Griza e pluvema vetero, cajorne, en Francilia.

KONCIZE

GERMANIA / MORTIGERA ACIDENTO
Polona autobuso turismal irante a Polonia perkutis hiere pilastro sur automobilal choseo humidigita per pluvo sude di Berlin. Dek-e-du personi perisis e triadeko plusa vundesis, inter li sis vundesis tre grave. Segun la Germana informili, ica turismala autobuso transportis quaradeko de yuni qui retrovenis de sejorno en Hispania.

BOLIVIA / DESAPARO DI DU FRANCI
La familii di Franca paro arivis en La Paz, pasinta-saturdie, esperante renkontrar la autoritatozi e "savar pluse" pri la fato di lia filii. Jeremie Bellanger, evo 25 yari, e Fannie Blancho, evo 23 yari, veninta de la Franca departmento Loire-Atlantique (departmento di samideano Loic Landais), desaparis dum la nokto de la 28ma til la 29ma di agosto proxim Guayaramerin, urbo dil regiono Est-Amazonia di Bolivia, an la frontiero kun Brazilia-lando.

BURMA / AUNG SAN SUU KYI DARFOS VOTAR
Ica Burmana disidentino, asignata a rezideyo ed itaque* exkluzita de kandidateso lor la venonta deputital elekto dil 7ma di novembro, permisesos votar, tale savigis pasinta-venerdie Burmana responsivi, quar dii pos anuncir la kontreajo. La Usana autoritatozi judikis kom nesuficanta ita rezolvo, e li advokis la militisti ye la povo liberigar elu.

Kordiala interretala saluti ad omni. JM :::-:::

Ye la 23ma di septembro 2010

Dio dil autono-equinoxo.

DIO-CITAJO / Se Hitler havabus la islamo ye lua servo, il divenabus la mastro dil mondo. Se la islamo havus ula Hitler ye lua servo,lu divenus la mastro dil mondo. (Privata konverso da rejo Abdallah di Saudia Arabia)

ZODIAKO / En la zodiako-signo dil Balanco guvernata dal planeto Venero.

VETERO / Grizeta cielo, cajorne, en Francilia.

KONCIZE

RWANDA / RIAPERTO DIL FRANCA SKOLO DI KIGALI
Pos quar yari di klozeso konseque di la rupto dil diplomacala relati inter Rwanda e Francia, ye la fino dil yaro 2006, la skolo Antoine de Saint-Exup�ry di Kigali "riapertesis pasinta-mardie kun 219 dicipuli, de la matrala kurso til la kolegio-nivelo", tale savigis lua direktisto, Jean Nepomuscene Rushayigi. La docado di la Angla esos ibe obligala nam, depos 2008, la Angla esas la oficala linguo di Rwanda.

UNIONITA REJIO / LIBRO REVELAS LA SEKRETAJI DI M16
La Britaniana sekreta servi permisis unesmafoye la publikigo di libro extraktita de lia arkivi. La historiisto Keith Jeffrey obtenis la exkluziva aceso a la arkivi departante de la kreo di ca servo en 1909 til la komenco dil kolda milito en 1949. Per M16, editita che Bloomsbury, il produktis 800 pasioniganta paginedi, richa ye personi qui inspiris la aventuri di James Bond.

KUBA / QUAR KUBANA EX-KARCERANI VARTESAS EN MADRID
Pro ke li liberigesis, pasinta-venerdie, dal komunista rejimo di La Havana, Nelson Molinet Espino (qua efektigis karcero-puniso di 20 yari) Hector Raul Valle Fernandez (12 yari), Miguel Galvan Gutierrez (26 yari) e Jose Miguel Martinez Hernandez (13 yari), arivos en Hispania "probable" dum ica semando, segun la Hispana ministrerio pri Exterlandala Aferi.

Kordiala interretala saluti ad omni. JM :::-:::

Ye la 21ma di septembro 2010

Dio di santa Mateus.

DIO-PROVERBO / Amikeso aparte, afero aparte.

ZODIAKO / En la zodiako signo dil Balanco guvernata dal planeto Venero.

VETERO / Blua e sunoza cielo, cajorne, en Francilia.

KONCIZE

PAKISTAN / BAN KI-MOON DEMANDAS "URJANTA RESPONDO"
La generala sekretario dil Unionita Nacioni, Ban Ki-moon, demandis pasinta-sundie, "urjanta respondo" da la internaciona komunajo por Pakistan, lor internaciona kunveno en New York pri la helpo a Pakistan, olqua devastesis dum la pasinta somero per katastrofala inundi. UN/ONU lansis pasinta-venerdie advoko por rekorda helpo de 1,5 miliard euri en la skopo helpar la 10 milion personi qui restas sen shirmeyo en Pakistan.

GERMANIA / QUAR MORTINTI LOR FAMILIALA DRAMATO
Quar personi mortis pasinta-sundie lor ocidado en Loerrach, sudwest-Germania. Muliero evanta 41 yari asertite pafis a lua ex-kompanulo e lia filio, ante livar l'apartamento flamoza por irar a la vicina hospitalo, ube el ocidis flego-helpanto e grave vundis policano. Survoye, el anke pafis a du pasanti, di qui la vivo ne endanjerigesas. La ordino-trupi tandem mortigis elu.

EUROPA / UN MILIARD EURO YE LA NOMO DI EUROPANA UNIONO
Lo esas to quon Jose Manuel Barroso, prezidanto dil Europana Komisitaro, propozos ye la nomo di Europana Uniono lor somitala interrenkontro di UN/ONU. Ita pekunio-quanto pekuniizos la Skopi dil yarmilo por la developo en la landi maxim implikata por la bona jerado dil pekuniala resursi*, e la maxim povra landi. La pekunio cherpesos de la resursi ne ja grantita dil Europana kapitalo por la developo. La Stati povos adjuntar bilatera kontributajo.

Kordiala interretala saluti ad omni. JM :::-:::

Ye la 17ma di septembro 2010

Dio di santa Renaldus.

DIO-CITAJO / La manuo qua donas semper esas super la manua qua recevas. (Napoleon)

ZODIAKO / En la zodiako-signo dil Virgino guvernata dal planeto Merkuro.

VETERO / Sat sunoza cielo ma koldeta temperaturo, cajorne, en Francilia.

KONCIZE

CHINIA / MORTO-PUNISO POR LA VIOLACI KONTRE LA NUTRIVALA SEKURESO
Ita decido eventas pos serio de skandali qui tre shokis la publiko,e qui nocis la reputeso dil produkturi "made in China". La recidivanta kriminanti, iti qui minacas la sanesala stando dil homi, la chefi di reti e ti qui multe pluricheskis per vendar produkturi nevalida por konsumado esas punisota severe, tale la Chiniana guvernerio anuncas.

KIRGHIZSTAN / DEFENSERO DIL HOMALA YURI ENKARCERIGESIS
Azimjan Askarov, Uzbeka direktisto di NGO pro defenso dil homala yuri en Bazar-Kurgan, kondamnesis pasinta-merkurdie ye karcero-puniso perpetue, pro partoprenir etnala* violentaji dum pasinta junio en la sudo di Kirghizstan. Nula Kirghizstanano, duminstante, persequesis pro ita eventi efektiginta plura centi de mortinti.

USA / INTERDIKTO FUMAR EN LA GARDENI DI NEW YORK
Ica interdikto qua ja valoras en la drinkeyi e la restorerii di ca maxim grand urbo di Usa, extensesos a la gardeni ed a la plaji di New York : lua servi evaluas ke 7.500 New Yorkani mortas singlayare pro la tabako-fumado, tale reprezentante un evitebla mortinto de tri. La pasiva tabako-fumado, koncerne lu, produktas supozeble plu multa vivo-ekiri pro kancero kam la asbesto, benzeno, l'arseno e la insekt-ocidanta produkturi kune.

Kordiala interretala saluti ad omni. JM :::-:::

Ye la 16ma di septembro 2010

Dio di santa Edith.

DIO-PROVERBO / Al sklavo pekunio ne esas salveso - lu sempre restas sklavo.

ZODIAKO / En la zodiako-signo dil Virgino guvernata dal planeto Merkuro.

VETERO / Grizeta cielo, cajorne, en Francilia.

KONCIZE

IRAN / LA SUBVENCIONI POR LA KOMPRO DI GAZOLINO MANTENESAS
L'Iranana guvernerio plutardigis de adminime un monato la augmento dil preco di la gazolino, olqua esas la unesma aranjuro pri programo por pokope supresar la subvencioni. Ica programo esas valoronta ye la septembro-fino ed ol povus havar devastiganta efekto sociala. Iran, asertite subiseskas la efekti dil ekonomiala punisi organizita dal Ocidentala landi.

NORD-KOREA / LA KONGRESO PRI LA SUCEDO DI KIM JONG-IL AJORNESAS
Eceptala kunveno dil Partiso di la laboristi ajornesis til ne savigata dato, konseque di violentoza veterala domaji, tale informis hiere la Sud-Koreana agenterio Yonhap. Unesma fristo atribuesabis pasinta-lundie a plumalesko di sanesala stando di ca Nord-Koreana guidisto. La aludita konfero, olqua esas la unesma depos 1966, previdesis por la komenco di septembro.

RWANDA / INDIGNO POS LA REFUZO DAL FRANCA AUTORITATOZI EXTRADAR MEDIKO
La guvernerio di Kigali "expresas lua profunda indigno konseque di la liberigo di Eugene Rwamucuyo, qua esas supozata gentocidero", malgre "la serioza promisi da la maxim alta autoritatozi dil Franca Stato". Ita rezolvo facesis dal chambropor inquesto dil apelo-korto di Versailles. Eugene Rwamucuyo interpelesabis dum pasinta mayo pro la efiko di aresto-dokumento internaciona livrita dal Rwandana autoritatozi en 2007.

Kordiala interretala saluti ad omni. JM :::-:::

Ye la 15ma di septembro 2010

Dio di santa Orlando.

DIO-PROVERBO / Altrin lu guidas ed ipsa ne mem vidas.

ZODIAKO / En la zodiako-signo dil Virgino guvernata dal planeto Merkuro.

VETERO / Alternante griza e sunoza vetero, cajorne, en Francilia.

KONCIZE

PROXIMA-ORIENTO / LA USANI JUDIKAS KOM "SERIOZA" LA DISKUTI POR PACO
La Israelana chefa ministro Benyamin Netanyahu, e la Palestinana prezidanto, Mahmud Abbas, ristartigis lianemediata diskuti hiere en Egiptia, koram la Usana Statala sekretariino, Hillary Clinton. Ica diskuti, qui esas pludurigota hodie en Yerushalaim, qualifikesis kom "serioza" dal Usani.

USA / LA TROPIKALA TEMPESTO JULIA PLUFORTIGESAS La tropikala tempesto Julia plufortigesis hiere super la Atlantika oceano, segun la Usana centro pri la uragani. Hiere matine, Julia ankore rangizesis en la kategorio 1 de la uragani, t.e. la maxim basa, sur skalo qua kontenas kin de oli. Ol esas anke fora de la tero. La sezono dil uragani en l'Atlantika areo duras dum sis monati, de junio til novembro, ed ol havas sua maxim aktiva periodo dum septembro ed oktobro.

UKRAINA / MINISTRO KOMANDITIS LA MORTIGO DI JURNALISTO L'Ukrainana Statala advokataro denuncis hiere la ex-ministro pri Interna Aferi, Yuri Kravchenko kom la komanditanto dil mortigo di la jurnalisto Georgi Gongadze , asasinata dum septembro 2000 en Kiev. Yuri Kravchenko, qua suocidis dum 2005, denuncesis kom la komanditanto dal precipua facero dil aludita mortigo, t.e. generalo dil polico hodie lojanta en karcero.

Kordiala interretala saluti ad omni. JM :::-:::

Ye la 14 ma di septembro 2010

Festo dil Glorioza Kruco.

DIO-PROVERBO / A la granda siniori granda honorumi.

ZODIAKO / En la zodiako-signo dil Virgino guvernata dal planeto Merkuro.

VETERO / Sunoza cielo kun somerala vetero, cajorne, en Francilia.

KONCIZE

INDIA / VIOLENTOZA MANIFESTI EN KASHMIR
L'Indiana sekureso-trupi luktas depos tri monati por impedar la kresko dil violentaji produktita per la morto di studento evanta 17 yari ilqua mortigesis dal policani ye la pasinta 11ma di junio lor separista manifesto. La Indiana sekureso-trupi probis hodie aplikigar strikta ekiro-interdikto en Kashmir konseque di protesto-movado, dum pasinta junio, en ita regionohavanta Mohamedista majoritato.

RUSIA / CHECHENIA ISLAMISTESKAS POKOPE
Pos du sangoza milito, Grozny esas itere kalma urbo danke la severa guvernado da lua prezidanto, ilqua impozas islamigo di ca republiko Kaukazana, dum ke la guvernerio di Moskva preferas ignorar ica evoluciono. Per la tre energioza diktatoreso di lua yuna guidanto Ramzan Kadyrov, CHECHENIA divenis fakte islamista republiko. La unesma viktimi di la "retroveno a la tradicioni" esas la mulieri.

PROXIMA-ORIENTO / KA KOMUNA STATO POR PALESTINANI ED ISRAELANI ?
La negociado por paco inter Israelani e la Palestinana Autoritatozi ristartas hodie. Lia skopo en perspektivo di longa periodo restas la kreo di Palestinana Stato. Ma kelka personi pledas denun favore ad unika Stato qua unionos amba populi.

Kordiala interretala saluti ad omni. JM :::-:::

Ye la 10ma di septembro 2010

Dio di santa Ines Takeya. (Japoniana martirino)

DIO-PROVERBO / Por ebriulo ne existas danjero.

ZODIAKO / En la zodiako-signo dil Virgino guvernata dal planeto Merkuro.

VETERO / Sat sunoza cielo ma koldeta temperaturo, cajorne, en Francilia.

KONCIZE

RUSIA / ATENTO EN NORD-OSETIA
Suocida atento produktis 15 mortinti e cento de vunditi hiere che merkato di Vladikavkaz, chefurbo di sud-Kaukazo Rusa. Ico esas la maxim mortigera atako depos olta qua frapabis la subtera treno di Moskva dum pasinta marto. Ita atento produktabis la vivo-ekiro di 40 personi.

CHIPRO / KLOZO DI KLINIKO SUSPEKTATA PRI KOMERCACHO
Petra House, olqua esas kliniko dil portuo Zygi, sude de Nikosia, klozesis dum pasinta mayo. Specaligita pri la fekundigo "in vitro" efektigata kun ovuli venanta de yuna Slava mulieri, la dicita kliniko suspektesas komprir ovuli, to quon interdiktas la Chiprana lego.

SOMALIA / ATENTO CHE L'AERPORTUO
Adminime kin personi, inter li du soldati dil paco-trupo di Afrikana Uniono (Amisom), mortigesis hiere lor suocida atako kontre l'aerportuo di Mogadiscio, lor la vizito dal specala senditi di UN/ONU e di Afrikana Uniono por Somalia. Iti laste dicita esas nedomajita.

Kordiala interretala saluti ad omni. JM :::-:::

Ye la 9ma di septembro 2010

Dio di santa Alanus.

DIO-PROVERBO / Falinton omni atakas.

ZODIAKO / En la zodiako-signo dil Virgino guvernata dal planeto Merkuro.

VETERO / Alternante sunoza e pluvema vetero, cajorne, en Francilia.

KONCIZE

BELGIA / LA HEBREA KOMUNAJO ATAKAS LA EUROPANA KOMISARIO BELGA
La komitato por koordino dil Hebrea organizuri di Belgia postulis la "quika konjedo" di Karel de Gucht, Europana komisario pri komerco, pos lua dicaji pasinta-jovdie pri la Hebrei e la importo dil por-Israela "lobby" en Washington. La Europana kongreso Hebrea anke atakabis la aludita deklari.

GERMANIA / LA STATUI DI MARX ED ENGELS ORIENTIZESAS VERS LA WESTO
Oli esis emblemi di anciena Est-Berlin, nun la statui di Engels e Marx diplasesis por posibligar plulongigar un lineo di subtera treno. Amba statui de nun regardas la Brandenburg-pordego en la Westo. La Berlinana admnistrerio por transporti asertas ke ica provizora orientizo havas nula politikal signifiko.

UNIONITA REJIO / TRANSMONDESKO DIL PATRO DI LA BRITANIANA CHEFA MINISTRO EN FRANCIA
Ian Cameron, evo 77 yari, patro di David Cameron, ekiris la vivo hiere posdimeze en Francia poka tempo pos la arivo dil chefo dil Britaniana guvernerio che la hospitalo di Toulon, ube lua patro aceptesabis urjante. Ian Cameron, qua vakancis en Francia, esis viktimo di cerebrala konjestiono sequata per kordiika komplikuri.

Kordiala interretala saluti ad omni. JM :::-:::

Ye la 7ma di septembro 2010

Dio di santa Rejina.

DIO-PROVERBO / La asno qua iras ad Idia restas asno. (Adapto di Latina proverbo)

ZODIAKO / En la zodiako-signo dil Virgino guvernata dal planeto Merkuro.

VETERO / Alternante sunoza e pluvema cielo, cajorne, en Francilia.

KONCIZE

ITALIA / ASASINO DI KOMONESTRO ENSTRADE
Angelo Vassallo, ekologiista komonestro di Pollica, turismala vilajo proxima a Salerna, sud-Italia, asasinesis interne di lua automobilo, sundie vespere. Segun testi citata dal policani, ica komonestro evanta 57 yari, qua precipue opozesis a la nelegala konstrukti, mortigesis da un o plura personi qui atingis lu ye la kapo, ye la kolo e ye la kordio. Ita embusko similesas olti da la ibea "mafia", nome la Camorra, segun deklaro dal autoritatozi.

UNIONITA REJIO / ANTONIUS BLERO (TONY BLAIR) TRE KONTESTATA LOR LUA DEDIKI
Ica anciena chefa ministro savigis hiere, ke lu intencas supresar dediko-kunsido di lua memorialo, olqua previdesis por eventor morge en granda libro-vendeyo Londonana, pos recevir lanso di ovi e shui pasinta-sundie en Dublin, Irlando.

NORD-KOREA / LIBERGIO DI SUD-KOREANA PESKISTI
Nord-Korea balde liberigos pesko-navo Sud-Koreana kaptita, kun sep maristi interne di olu, ye la komenco di agostosur la maro di Japonia en politikala klimato di forta tensi, segun savigo hiere da la Nord-Koreana agenterio KCNA. Nord-Korea tale respondis demando dal Sud-Koreana Reda-Kruco por kalmigar la situeso, dum ke la negociado pri lonukleala di Nord-Korea povus ristartar.

Kordiala interretala saluti ad omni. JM :::-:::

Ye la 6ma di septembro 2010

Dio di santa Bertrandus.

DIO-PROVERBO / Per la frukto onu konocas l'arboro. (Latina proverbo)

ZODIAKO / En la zodiako-signo dil Virgino guvernata dal planeto Venero.

VETERO / Griza e pluvema cielo, cajorne, en Francilia.

KONCIZE

NOVA ZELANDO / SISMO
La iterata sukusi dil sismo eventinta pasinta-saturdie e la venti dil tempesto anuncata produktos plusa destrukturi. La aludita sismo, ye amplitudo 7 (opoze 7 til 7,3 en Haiti) produktis nula mortinto. La mikra quanto de viktimi explikesas segun injeniori, per la efektigo di severa konstrukto-kriterii. Ita lando situesas sur la fairo-zono an la frontiero dil Australiana e Pacifika plaki.

GUATEMALA / MORTIGERA PLUVI
Duadek personi adminime mortis pasinta-saturdie lor tereno-gliti produktita per forta pluvi en Guatemala, ube prezidanto Alvaro Colom dekretis la urjanteso-stando sur la tota teritorio di ca lando. "Ni ne havas pekunio por rezistar kontre altra katastrofo simila ad olta di Agatha", lu asertis, tale aludante la tropikala tempesto qua frapis ica lando dum mayo 2010. Ita katastrofo produktabis la vivo-ekiro de adminime 165 personi e destrukturi evaluita ye un miliard dolari.

RUSA KAUKAZO / SUOCIDA ATENTO
Atento vizis trupo dum la nokto de saturdio til sundio proxim Makhachkala, chefurbo di Dagestania. Ita republiko dil Federuro Rusia, vicina de Chechenia, subisas l'agi da armizita rebelaro islamista qua subdestruktas la tota Rusa Kaukazo. La violentaji ibe eventas singladie, nam la rebela kombatanti vizas aparte la reprezentanti dil autoritatozi e la ordino-trupi. La Rusa autoritatozi volas tamen quietigar la lokala habitantaro.

Kordiala interretala saluti. JM :::-:::

Ye la 3ma di septembro 2010

Dio di santa Gregorius.

DIO-PROVERBO / Se on volas avancigar la charioto, oportas lubrifikar la roti. (Latina proverbo)

ZODIAKO / En la zodiako-signo dil Virgino guvernata dal planeto Merkuro.

VETERO / Sunoza cielo kun varma somerala temperaturo, cajorne, en Francilia

KONCIZE

ITALIA - LIBIA / LA DEMOGRAFIALA MINACO DI AFRIKA
L'Italiana ministro pri Exterlandala Aferi, Franco Frattini, avertis hiere vespere kontre "la demografiala bombo an la frontieri di la Mediteraneo" olqua reprezentas la demografial developo en Afrika. Il respondis a la diskurso dal Libiana guidanto Mwammar Kadhafi pasinta-lundie en Roma, qua postulabis 5 miliard euri yarale por helpar impedar la nelegala enmigrado tra lua lando.

CHINIA / SEVERA BILANCO DIL INUNDI
Tereno-glito en la provinco Yunnan, sudwest-Chinia, produktis ok mortinti e 40 desaparinti pasinta-merkurdie, segun bilanco publikigita dal agenterio nova Chinia. Depos la komenco di ca yaro, la inundi - olqui esas le maxim grava depos un yardeko - efektigis plu kam 4.200 mortinti o desaparinti. Icasomere, Chinia afektesis da grava inundi e tereno-gliti sur granda parto di lua teritorio.

IRAN / LA DOMICILO DI OPOZANTO ATAKESIS
Ita atako vizis timidigar, Mehdi Karubi, qua esas un de la importanta personi dil opozantaro kontre prezidanto Ahmadinejad. La skopo esis impedar lu partoprenar manifesti por susteno a la Palestinana populo en Teheran, olqui previdesis por eventar cadie. La opozantaro utiligabis ica dio, pasinta-yare, por manifestar kontre la guvernerio. La manifesti esabis represata dal Iranana rejimo.Kordiala interretala saluti ad omni. JM :::-:::

Ye la 2ma di septembro 2010

Dio di santa Ingrid (nomo-festo di nia samideanino Ingrid Suprayan).

DIO-PROVERBO / La mondonguvernas pekunio.

ZODIAKO / En la zodiako-signo dil Virgino guvernata dal planeto Merkuro.

VETERO / Bela e sunoza vetero, cajorne, en Francilia.

KONCIZE

INDIA / BALDA RIEXAMENO DIL PUNISI POR LA RESPONSIVI DIL ACIDENTO DI BHOPAL
La asociuri por helpo a la posvivanti dil acidento dum 1984 en Bhopal esis tre kontenta pri la decido dil Suprega Korto aplikor eventuale plu severa kondamni. Lu anuncis pasinta-mardie la riexameno dil punisi di du yari de karcero-puniso di anciena responsivi dil fabrikerio Union Carbide de-ube eskapabis nubo de toxika gaso.

CHINIA / TELEFONILO KONTRE IDENTESO-DOKUMENTO
La Chiniana guvernerio establisis hiere la obligo prizentar identeso-dokumento por komprar numero di poshtelefonilo, e provizore lu interdiktas lia vendo dal kiosko-jeranti, segun la lokala jurnalaro. Chinia kontenis supozeble dum la fino di julio 814 milion uzanti di poshtelefonili, inter li 320 milion personi ne esis identigebla per lia numero segun responsivo dil koncernata ministrerio.

SUPERA-KARABAGH / AFRONTI INTER AZERBAIDJANANI ED ARMENIANI
Amba landi imputis reciproke a la altra la responsivo di afronti proxim Supera-Karabagh. Ita incidenti efektigis plura mortinti che amba lateri. Anexita ad Azerbaidjan dum la sovietala periodo, ita regiono havanta Armeniana majoritato proklamis sua sendependeso, qua ne agnoskesis dal internaciona komunajo, pos milito produktinta 30.000 mortinti e plura centi demili refujinti inter 1988 e 1994.

Kordiala interretala saluti ad omni. JM :::-:::

Ye la 1ma di septembro 2010

Dio di santa Egidius.

DIO-PROVERBO / Pensi iras trans frontieri sen pago nek timo.

ZODIAKO / En la zodiako-signo dil Virgino guvernata dal planeto Merkuro.

VETERO / Sunoza vetero ma koldeta temperaturo, cajorne, en Francilia.

KONCIZE

ANTILI / L'URAGANO EARL FACAS GRANDA DESTRUKTURI
Rupto di elektro, domajita chosei : l'uragano Earl pasis pasinta-lundie proxim Saint-Martin e Saint-Barthelemy per produktar importanta destrukturi, e lua venti suflanta ye 200 km/h minacas de nun Porto Rico. En Guadelupa, EDF kontis, lundie matine, 4000 abonanti qui privacesis de elektro. Earl plufortigesis plusafoye hiere por irar a la kategorio 4 sur la skalo di Saffir-Simpson olqua havas kin kategorii.

SUEDIA / LA PATRONO DI WIKILEAKS QUESTIONESIS DAL POLICANI
Julian Assange, fondero dil ret-situo Wikileaks, qua publikigis mili de dokumenti pri Afgania, questionesis dal policani en Suedia ube il akuzesas pri sexuala ataki, tale anuncis hiere lua advokato, qua expektas la renunco di omna judiciala persequi. Julian Assange sempre negis ita akuzi e denuncas "kalumnioza kampanio".

IRAN / LA UNESMA NUKLEALA CENTRALO IRANANA HAVAS TARDESO
La "tre forta varmesi" havis kom konsequo tardeso (ye du semani) koncerne la transporto dil stangi de kombusteblajo furnisata da Rusia a la reaktoro di Bouchehr. La kargado dil reaktoro esus parfinota ye la 22ma di oktobro. La kooperado kun Rusia posibligis a Bouchehr eskapar la internaciona embargo kontre omna transfero di nukleala teknologii ad Iran.

Kordiala interretala saluti ad omni. JM :::-:::