Ye la 31ma di agosto 2009
Dio di santulo Aristides.
DIO-PROVERBO / Duktas laboro ad honoro ed oro.
ZODIAKO / En la zodiako-signo dil Virgino guvernata dal planeto Merkuro.
VETERO / Blua e sunoza cielo, cajorne, en Francilia.
KONCIZE
CHINIA / LA PLU MULTA GREFTITA ORGANI VENAS DE KARCERANI
Plu kam 65% de la greftita organi en Chinia venis, til nun, de kondamniti ye morto-puniso pos lia mortigo, segun revelo, pasinta-semane, da oficala diala jurnalo, tale ruptante sekretajo qua tillore bone tacesis pri la mortigi di morto-kondamniti en Chinia. La Chiniana Societo di la Reda-Kruco impulsis nova sistemo nacionala por donaci di organi vizante finar ita situeso.
POLONIA / BELARUSA AVIONO APLASTESAS LOR DEMONSTRADO
Chas-aviono Belarusa SU-27 aplastesis, hiere, lor demonstrado di avionala akrobataji en Radom, mez-Polonia. Lua du pilotisti mortis, segun raporto dal informo-televiziono kontinua TVN24, olqua montris la imaji dil fumuro acensanta de la sulo ye cento de metri de l'aeroportuo di Radom. La porparolanto dil Polona armeo refuzis komentar ica acidento.
ARABIA / TERORISTO VANIGAS LA KONTROLI CHE L'AEROPORTUI
La suocidera teroristo qua probis asasinar, pasinta-jovdie, Saudiana princo responsiva pri la kontre-terorista lukto, pasabis la kontroli di du aeroportui di ca lando, sen ke la explozili quin lu portis esez 'detektata', tale revelis, hiere, la Centro Usana pri surveyo dil islamista situi* (SITE) dum citar komunikajo da Al-Qaida. Nur la suocidera teroristo mortis lor ica atako qua eventis en Djeddah.
Kordiala interretala saluti ad omni. JM :::-:::
Ye la 28ma di agosto 2009.
Dio di santa Augustinus.
DIO-CITAJO / La armi remplasesez per la togi. (Cicero)
ZODIAKO / En la zodiako-signo dil Virgino guvernata dal planeto Merkuro.
VETERO / Blua cielo sunoza ma kun ofte koldeta temperaturo, cajorne, en Francilia.
KONCIZE
MALAYIA / MULIERO PUNISESAS PER BASTONO-FRAPI
La kondamno di Malaya modo-prizentantino, Kartika Sari Dewi Shukarno, evo 32 yari, ye sis bastono-frapi pro drinkir biro, produktas granda timo ke la islamista lego minacez la laika tradiciono di Malayia. Ica muliero arestesis, pasinta-monate, en la nokto-klubo di hotelo, en la mezo di ca lando, pro konsumir alkoholajo, t.e. ulo qua interdiktesas dal islamo.
PAKISTAN / USANA BOMBARDO MORTIGAS QUAR ISLAMISTI
Adminime quar islamista kombatanti mortigesis, hiere, da Usana misili* en nordwest-Pakistan, ube la CIA e l'Usana armeo vizas konstante Al-Qaida e la talibani. Ita bombardo vizis mashinaro uzata da talibani en la vilajo Kaniguram, en la distrikto tribual Waziristan, segun aserto da altaranga responsivo pri la Pakistanana sekureso-servi.
ISRAEL / NETANAYAHU RECEVAS LA MAPO DI AUSCHWITZ
La Israelana chefa ministro Benyamin Netanayahu, lor vizito en Berlin, recevis originala desegnuro-projeto dil extermino-kampeyo di Auschwitz, trovita hazarde en apartamento en Berlin dum 2008. Il dankis la editerio Axel Springer pro "ofrir ad Israel ica donaco di la vereso". La dicita mapo destinesas a la memorialo di Yad Vashem en Ierusalem.
Kordiala interretala saluti ad omni. JM :::-:::
Ye la 27ma di agosto 2009
Dio di santa Monika.
DIO-CITAJO / Di la legi servanti ni esas por povar esar libera. (Cicero)
ZODIAKO / En la zodiako-signo dil Virgino guvernatan dal planeto Merkuro.
VETERO / Sunoza vetero kun humide varma temperaturo, cajorne, en Francilia.
KONCIZE
AFGANIA / MORTIGERA ATENTO EN KANDAHAR
Bomba veturo explozis, mardie vespere, en la mezo dil urbo Kandahar, olqua esas bastiono dil rebelanta talibani en Afgania. On kontas adminime 43 mortinti e 65 vunditi. NATO/OTAN, malgre lia dementii, akuzas la talibani pri ca atako, olqua esas la maxim mortigera depos julio 2008.
HUNGARIA / LA SLOVAKA AMBASADERIO VIZESIS DA EXPLOZILI
Molotov-"cocktail"-i lansesis, hiere, kontre la ambasaderio di Slovakia en Budapest sen tamen produktar destrukturi. Ita atento eventas dum ke la relati inter amba landi plumaleskis, depos ke Slovakia interdiktis la veno dal Hungariana prezidanto, pasinta-venerdie, dum ke il esis renkontronta membri dil Hungariana minoritato en Slovakia.
SUD-KOREA / LA SATELITO LOKIZITA SUR NEJUSTA ORBITO DESTRUKTESIS
L'instituto pri aerospacala explorado Sud-Koreana anuncis, hiere, kela satelito lokizita, pasinta-mardie, sur nejusta orbito per la unesma Sud-Koreana fuzeo falis advers la tero e kombustesis en l'atmosfero. La dicita instituto opinionas tamen ke ca satelito-lanso esas "mi-sucesoza", nam la lansilo dil fuzeo bone funcionabis.
Kordiala interretala saluti ad omni. JM :::-:::
Ye la 25ma di agosto 2009
Dio di santa Ludovikus.
DIO-PROVERBO / Plu bone poke ganar kam multe perdar.
ZODIAKO / En la zodiako-signo dil Virgino guvernata dal planeto Merkuro.
VETERO / Sturmema vetero kun sunoza epizodi, cajorne, en Francilia.
KONCIZE
ITALIA / MAFIANO ARESTESIS
Importanta supozata chefo di la "Camorra" (Napoliana mafia), trovesanta sur listo de la 100 suspektati maxim serchata di Italia, arestesis hiere en Napoli. Giuseppe Bastone, evo 28 yari,vivis celita en chambro de tri metri ye tri, di qua l'aceso esis posibla per trapo sub eskalero. Ita celeyo relatis kun la exterajo per tunelo ye 200 metri ube on povas avancar nur per marchar per quar pedi.
JAPONIA / PROTESTI KONTRE USANA AVION-PORTILO
Kelka deki de habitanti dil Japoniana portuo di Yokosuka, sude de Tokio, manifestis, hiere, kontre l'eskalo dil Usan avion-portilo havanta nukleala propulso USS Nimitz. Lua abordo en ica marala militistal provizerio Usana en Japonia minacas, asertite, la sekureso di la vicina habitanti, segun la manifestanti.
CHINIA / STARTO DIL PROCESO DI LA SEDICIANTI DI XINJIANG
Quik de ca semano, plu kam 200 personi judiciesos en Chinia pro lia partopreno supozata a la mortigera trubli dil komenco dil monato julio en l'autonoma regiono Xinjiang, en nordwest-Chinia. La proceso eventos en la chefurbo di ca regiono, nome Urumqi, ube 197 personi mortis lor la afronti dil pasinta monato.
Kordiala interretala saluti ad omni. JM :::-:::
Ye la 24ma di agosto 2009
Dio di santa Bartolomeus.
DIO-PROVERBO / Qua havas nulo, ta esas nulo.
ZODIAKO / En la zodiako-signo dil Virgino guvernata dal planeto Merkuro.
VETERO / Sturmema vetero, cajorne, en Francilia.
KONCIZE
SOMALIA / LA VIOLENTAJI PRODUKTAS SIS MORTINTI
Adminime sis civili mortigesis, lor nova afronti en Mogadiscio inter rebeli islamista Somaliana e guverneriala trupi apogata da trupi dil paco-armeo di Afrikana Uniono (AU). Ita kombati debutis pasinta-saturdie ye la jorno-fino, en Hodan ed Holwadag, t.e. du sudala quarteri dil Somaliana chefurbo. Dek-e-sis personi ja mortigesis posinta-jovdie e -merkurdie.
RUSIA / ADMINIME 69 MORTINTI LOR LA ACIDENTO DI CENTRALO EN SIBERIA
La homala bilanco, pos la partala destrukto dil hidroelektrala centralo di Saiano Shushenskaia, en Khakasia, ye 4000 km este de Moskva, atingas nun 69 mortinti. Sis personi konsideresas kom desaparinti depos l'inundo neexplikatadi la mashini-chambro ye la 17ma di agosto. Duamil sokursanti ed inquestanti duras exkavar la eskombri.
CHINIA / LIBERIGO DI ADVOKATO
Xu Zhiyong, Chiniana advokato qua esas famoza pro lua aktiveso kom defensero dil homala yuri, liberigesis, hiere, t.e. plu kam tri semani pos lua interpelo dal policani. Il arestesis ye la pasinta 29ma di julio pro fiskala eskapo interne dil asociuro di advokati ed exploranti quan il kun-fondis. Ita asociuro nomizesas Gongmen e militas pro la respekto a la lego. Xu Zhiyong, nihilominus* duras persequesar pro fiskala eskapo.
Kordiala interretala saluti ad omni. JM :::-:::
Ye la 21ma di agosto 2009.
Dio di santa Kristofo.
DIO-PROVERBO / La homo projetas, Deo disponas.
ZODIAKO / En la zodiako-signo dil Virgino guvernata dal planeto Merkuro.
VETERO / Sunoza vetero, cajorne, en Francilia.
KONCIZE
ISRAEL / FRANCIA HELPAS LA NGO "KORDIO POR LA PACO"
Cent-e-okadek-e-ok infanteti Palestinana sufranta pro grava kordiika misformacuri operacesis e salvesis depos 2005 danke "Kordio por la paco", t.e. Franca-Israelana NGO qua recevis, hiere, financala helpo dal ambasaderio di Francia en Israel. Ita NGO, qua pagas til parto de 50% dil operaci, dum ke la Israelana hospitalo di Hadassah pagas la altra duimo dil kusti, obtenis 18000 € (euri).
CHAD / GUKUNI WEDDEI RETROVENAS A SUA LANDO
L'anciena prezidanto Chadana Gukuni Weddei (1979-1982) qua vivis en Aljeria depos ke il esabis viktimo di stato-stroko, retrovenis, hiere, a N'Djamena. "Me rezolvis retrovenar por instalar me definitive en Chad en la skopo esar utila a mea lando", lu dicis ye la fino di diskuto durinta dum du hori kun prezidanto Idriss Deby.
GERMANIA / ANGELA MERKEL RESTAS "LA MAXIM POTENTA MULIERO EN LA MONDO"
La Germana kancelerino esas ye la unesma plaso dil klasifiko 2009 pri la povoza mulieri establisita dal revuo FORBES. La non cetera mulieri sequanta esas omna entraprezeyestrini, inter eli esis la Francino Anne Lauvergeon, prezidanto di Areva, e l'Usanino Irene Rosenfeld, prezidanto di Kraft Foods.
Kordiala interretala saluti ad omni. JM :::-:::
Ye la 20ma di agosto 2009
Dio di santa Bernardus.
DIO-PROVERBO / Tale esas, tale restas.
ZODIAKO / Iro en la zodiako-signo dil Virgino guvernata dal planeto Merkuro.
VETERO / Sat sunoza cielo kun tre humide varma temperaturo, cajorne, en Francilia.
KONCIZE
GEORGIA / LA GUVERNERIO DI TBILISSI RETRETAS DE LA KSS
Georgia oficale retretis, pasinta-mardie, de la Komunajo dil Sendependa Stati (KSS). La retreto-proceso duris dum un yaro. La KSS konstitucita en 1991, kontenas omna anciena sovietala republiki, ecepte la Balta landi. Prezidanto Mikhail Saakashvili anuncabis dum agosto 2008, dum la milito inter Georgia e Rusia, ke Georgia livos la KSS.
UNIONITA REJIO / LA USANI KONTRE LA LIBERIGO DI TERORISTO
La lojanti dil Blanka-Domo asertis, pasinta-mardie, ke Abdelbaset Ali Mohamed Al Megrahi, t.e. la Libiano kondamnita pro l'atento di Lockerbie e atingata per kancero ye la lasta etapo di lua evoluciono, mustus restar enkarcere en Skotia, dum ke la Skotiana autoritatozi questionas su pri lua fato. La Skotiana ministro pri judicio pensas organizor sive lua transfero a Libiana karceo, sive lua liberigo.
HONDURAS / TENSI KUN ARJENTINIA
La "de facto" guvernerio di Honduras, instalita depos la Stato-stroko dil pasinta 28ma di junio, ruptis lua diplomacala relati kun Arjentinia. Ita rezolvo agesas segun la principo di "strikta reciprokeso", tale savigis la ministrerio pri Exterlandala Aferi. L'Arjentiniana autoritatozi sumnabis, pasinta-jovdie, la ambasadistino di Honduras livar lua oficeyo en Buenos Aires,motive dil apogo quan el agabis por la Stato-stroko en elua lando.
Kordiala interretala saluti ad omni. JM :::-:::
Ye la 19ma di agosto 2009
Dio di santulo Ioannes-Eudes.
DIO-PROVERBO / Beleso velkas, vertuo permanas.
ZODIAKO / En la zodiako-signo di la Leono guvernata dal Suno.
VETERO / Sunoza cielo e varmega temperaturo, cajorne, en Francilia.
KONCIZE
IRAN / LA GUVERNERIO PRIZENTESAS CADIE
L'Iranana prezidanto Mahmud Ahmadinejad, di qua la kontestata rielekto produktis la maxim grava krizo depos triadek yari, prizentas cadie che la Parlamento lua nova guvernerio, unesmafoye apertata a mulieri. Ilu ja livris kelka nomi, inter li esas olta di un de lua fidela partisani, Heydar Moslehi, qua esus obtenonta la grava ofico pri la informi.
SUD-KOREA / TRANSMONDESKO DIL ANCIENA PREZIDANTO
Nobel-premiizito pri paco, Kim Dae-jung mortis, hiere, ye l'evo 83 yari, pro pulmonito. Ica ex-prezidanto (1998-2003), aginta por apertiteso-politiko a Nord-Korea, esis la unesma Statestro Sud-Koreanairinta a Pyongyang ube ilu signatis, ye la 15ma di junio 2000 kun lua Nord-Koreana kolego Kim Jong-il, deklaro komunaqua markizis la pluvarmigo di la relati inter amba landi.
RUSIA / OK PIRATI DIL "ARTIC SEA" ESAS ENMANUE DIL AUTORITATOZI
Multa neklara punti permanas pri la cirkonstanci dil desaparo, dum plura dii, dil komerco-navo ARCTIC SEA. Ica navo qua trovesis, pasinta-sundie, opoze a la Kaboverdo, deviacigesis ye la 24ma di julio en teritoriala maral areo di Suedia da ok pirati (du Rusi, du Latviani, e quar Estoniani) qui interpelesis. Icon deklaris hiere la Rusa ministro pri Defenso, Anatoli Serdiukov.
Kordiala interretala saluti ad omni. JM :::-:::
Ye la 18ma di agosto 2009
Dio di santa Helena.
DIO-PROVERBO / Plu bona esas envidiesar kam instigar a kompato.
ZODIAKO / En la zodiako-signo di la Leono guvernata dal Suno.
VETERO / Sunoza vetero, cajorne, en Francilia.
KONCIZE
RUSIA / GRAV ACIDENTO EN CENTRALO EN SIBERIA
Sisadek-e-ok personi konsideresas kom desaparinta pos acidento, hiere, en un de la maxim granda hidroelektrala centrali dil mondo, en Siberia. La dicita acidento produktis adminime ok mortinti. Plafono krulis en la chambro dil mashini di la centralo di Saiano Shushenskaia, en la regiono di Khakasia. "Posiblesas ke homi esez ankore en galerii", nam kelka de li inundesas, tale savigis la ministrerio pri urjanta situesi.
MARO / L'ARCTIC SEA TROVESIS
La komerco-navo desaparinta opoze a la Franca litoro depos la fino di julio trovesis dum la pasinta nokto, ye min kam 500 km de la Kaboverdo. Lua Rusa akompananta esquado, transferesis "sana e sekura" sur navo dil Rusa defenso, tale savigis la guvernerio di Moskva. La atesti dil maristiesus posibligonta fine explikar la misterio ARCTIC SEA. Interkontredicanta informi - pirateso, eskroko, komercacho de armi o de nukleala materialo - interesequis pri ca vaporeskinta navo.
MAURITANIA / L'USANA VOLONTARII DIL PEACE CORPS RETRETAS
Li anuncis, hiere, en Nuakshott la ceso di lia programo en Mauritania pro motivi "sekuresal", pos plu kam 40 yari de aktiveso en ca lando, olqua subisis depos 2007 serio de terorista agi. Ye la pasinta 23ma di junio, Usani ocidesis per kuglo en Nuakshott. La responsiveso di ca atento revendikesis da Al-Qaida. Ye la pasinta 8ma di agosto, Mauritaniana suocidanta teroristoexplozigis su en Nuakshott lor la paso di du Franca jendarmi proxim l'ambasaderio di Francia.
Kordiala saluti ad omni. JM :::-:::
Ye la 17ma di agosto 2009
Dio di santa Hyakinthus.
DIO-PROVERBO / Hastez lente, agez paciente !
ZODIAKO / En la zodiako-signo di la Leono guvernata dal Suno.
VETERO / Sunoza cielo e varma temperaturo, cajorne, en Francilia.
KONCIZE
KOLUMBIA / MILITISTAL KOOPERO KUN USA
Kontratoparredaktesis por permisor ad Usa utiligar la militistal provizerii Kolumbiana koncerne la lukto kontre lakomercacho de narkotaji e la terorismo. Ita texto, qua ne ja signatesis, desquietigas plura vicinaStati. En Venezuela, prezidanto Hugo Chavez opinionas ke la "milito-vento" sufleskas.
GERMANIA / ANGELA MERKEL ESAS EN HUNGARIA POR LA ANIVERSARIO DIL UNESMA BRECHO EN LA BERLINAL MUREGO
La Germana kancelerino iros merkurdiea Sopron, proxim la Austriana frontiero, por dankar Hungaria apertir lua frontieri, duadek yari ante nun, a mili de Est-Germani, tale permisante a li transirar a West-Germania. Ita evento ja prereprezentis la 'kolapso' dil murego.
GREKIA / LA POLICANI SOKURSAS 10 NELEGALA ENMIGRANTI
Ok Pakistanani, un Siriano ed un Somaliano mantenesis en kaptiteyo e male traktesis de un monato en Athina da lia transiriganti. Ita transiriganti postulis de li la pago di granda pekunio-quanti. La policani trovis la nelegala arivinti amasigita en kontenuyo aranjita taskope. Un de la transiriganti arestesis e kin komplici lua duras esar serchata.
Kordiala interretala saluti ad omni. JM :::-:::
Ye la 14ma di agosto 2009
Dio di santa Marcelus.
DIO-CITAJO /Potenteso preiras yuro. (Bismarck)
ZODIAKO / En la zodiako-signo di la Leono guvernata dal Suno
VETERO / Sunoza e varma vetero, cajorne, en Francilia.
KONCIZE
AFGANIA / UN ELEKTO-KONTORO DE DEK POVUS NE APERTESOR
Plu kam 10% de la elekto-kontori povus esar klozata ye la 20ma di agosto, t.e. ye la dio dil prezidantala e provincala elekto en Afgania motive di minaci e violentaji, tale anuncis, hiere, la sendependa elektala Komisitaro Afganiana. Povus esor nur 6200 voto-kontori apertata en ica lando vice le 7000 qui komence previdesis.
NORD-KOREA / LIBERIGO DI SUD-KOREANO
La Nord-Koreana autoritatoziliberigis, hiere, Sud-Koreana employato di Hyundai quan li retenis en karcero depos pasinta marto. Ico esas unesma koncilio-ago a Sud-Korea depos la enoficesko dil konservema guvernerio di Seoul dum februaro 2008. Yu Seong-jin, injenioro che Hyundai Asan, livresis a la direktanti di lua entraprezeyo veninta por querar lu. Il akuzesis instigir Nord-Koreano livar sua lando.
BURMA / USANA VIZITO
La demokrata senatano Usana Jim Webb, proximulo di prezidanto Barack Obama, esas renkontronto dum ca venonta semano-fino la numero un Burmana, nome generalisimo Than Shwe. La Burmana rejimo militistala esassubla pafadodi kritiki pro kondamnigir la opozantino Aung San Suu Kyi ye 18 monati suplementala di koaktata rezideyo, e l'Usana resortisanto John Yettaw ye sep yari de karcero-puniso e de koaktata laboro.
Kordiala interretala saluti ad omni. JM :::-:::
Ye la 13ma di agosto 2009
Dio di santa Hipolitus.
DIO-PROVERBO / Ni vartez e drinkez teo.
ZODIAKO / En la zodiako-signo di la Leono guvernata dal Suno.
VETERO / Nuboza cielo kun humide varma temperaturo, cajorne, en Francilia.
KONCIZE
SOMALIA / KIN PAKISTANANI MORTIGESIS
Kin Pakistanana regulieruli Mohamedista asasinesis, hiere, en Somalia da armizita nekonocati en Galkayo, mez-Pakistan, segun savigo da policala informo-fonti. Ita viri surprizesis en moskeo da lia atakanti, qui ocidis li extere di ca edifico. La prezidanto Somaliana, sustenata dal internaciona komunajo, konfrontesas ad atako da islamista rebeli.
RUSIA / PUTIN IRAS AD ABKHAZIA
La chefa ministro Rusa Vladimir Putin komencis, hiere, vizito en Abkhazia, t.e. la unesma depos ke la guvernerio di Moskva agnoskis la sendependeso di ca separistaex-regionoGeorgiana preske un yaro ante nun. Ica forta e potenta viro di Rusia komencis lua vizito per depozar flori a la monumento dedikata a la viktimi dil milito inter Abkhazia e laatakinta politikala povo Georgiana.
TAIWAN / MORAKOT PRODUKTIS PLUS KAM CENT MORTINTI
La Taiwana sokursi, komencis, hiere, evakuar preske milo de personi izolita en vilaji devastita da fluaji de fango. Ica personi sucesabis refujar sur altaji, dum ke multi kredis ke li esis mortinta. La bilanco dil ciklono sur ca insulo tamen augmentis, hiere, til 103 mortinti. Parolesas pri la maxim mortigera ciklono depos kinadek yari en Taiwan.
Kordiala interretala saluti ad omni. JM :::-:::
Ye la 12ma di agosto 2009
Dio di santa Ioanna-Franciska de Chantal.
DIO-CITAJO / Se ni sequus la generalo naturo, ni nulatempe erorus. (Cicero)
ZODIAKO / En la zodiako-signo di la Leono guvernata dal Suno.
VETERO / Blua e sunoza cielo, cajorne, en Francilia.
KONCIZE
GERMANIA / KONDAMNO DI ANCIENA NAZISTO
Germana kriminala tribunalo kondamnis hiere ye perpetua karcero-puniso, pro masakro qua produktabis 14 mortinti en 1944 en Italia, Josef Scheungraber, anciena oficiro nazista qua depos ita tempo pasis paca vivo en Bavaria. Ica nonadekyarulo agnoskesis kom kulpoza pri la morto di dek de li. Dum la proceso il refuzis la akuzi per asertar nur transmisir la civili a la militistala judiciisti.
SUDAN / INTERDIKTO LIVAR LA NACIONALA TERITORIO POR JURNALISTINO SURHAVANTA PANTALONO
La Sudanana autoritatozi impedis la jurnalistino Lubna Ahmed Al Hussein, kondamnebla ye 40 flogilo-frapi pro surhavir pantalono, irar ad exterlando. La proceso di ca yunino, qua redaktas artikli por Sudanana diala jurnalo e laboras por la komunikado-departmento di la misiono di UN/ONU en Sudan, esas komenconta ye la venonta 7ma di septembro.
SLOVAKIA / NACIONALA TRAURO POS MINEYALA KATASTROFO
La Slovaka ministro pri ekonomio, Lubomir Jahnatek, deklaris hiere ke ne plus esis espero pri posvivo por la ministi deklarita kom desaparinti pos explozo eventinta ye la pre-dio en lignito-mineyo en Handlova, mez-Slovakia. Sis de li trovesis kom mortinti e 14 plusa konsideresas kom desaparinti pos la explozo sequata per explozo en la mineyo di Handlova. Nacionala trauro dekretesis.
Kordiala interretala saluti ad omni. JM :::-:::
Ye la 11ma di agosto 2009
Dio di santa Klara.
DIO-PROVERBO / Omna bona kozi esas tri.
ZODIAKO / En la zodiako-signo di la Leono guvernata dal Suno.
VETERO / Grizeta cielo kun humide varma temperaturo, cajorne, en Francilia.
KONCIZE
IRAK / ONDO DE ATENTI EN BAGHDAD E MOSSUL
La serio de atenti qui sangizas Irak depos plura dii pluduris, hiere, produktante kinadek mortinti e preske triacent vunditi. Du bomba kamioni, garita ye kelka centi de metri l'una de l'altra, devastis ye un minuto de tempo-disto, fruamatine, la vilajo Khaznah, jacanta ye 20 km este de Mossul, tale efektigante 28 mortinti e 155 vunditi. Kelka hori plu tarde, armizita viri ocidis per kugli du policani en Mossul. Fine, Baghdad frapesis per quar atenti.
AFRIKA / DEK-E-SIS MARISTI LIBERIGESIS DAL SOMALIANA PIRATI
Dek maristi Italiana, kin Rumaniani ed un Kroatiano liberigesis dal Somaliana pirati pos subisir quar monati de kaptiteso. Ye la pasinta 11ma di aprilo, Somaliana pirati operacante en la Aden-gulfo sizabis la BUCCANEER, qua esis Usana remorkero subflago Italiana. La guvernerio di Roma asertis ke nula ransono pagesis.
AMERIKA / KOMENCO DIL SOMITALA INTERRENKONTRO MEXIKIA-KANADA-USA
La interrenkontro somitala dal guvernisti di Usa, Kanada e Mexikia komencis, hiere, en Guadalajara, Mexikia, per jorn-ordino dominacata per l'ekonomio, la komercacho pri narkotaji e la porko-gripo, same kam pri la persistanta politikala krizo en Honduras.
Kordiala interretala saluti ad omni. JM :::-:::
Ye la 10ma di agosto 2009
Dio di santa Laurentius.
DIO-PROVERBO / Vievez, progresez, lernar vu ne cesez !
ZODIAKO / En la zodiako-signo di la Leono guvernata dal Suno.
VETERO / Sunoza cielo, cajorne, en Francilia.
KONCIZE
CHINIA / LA LITORO MINACESAS PER CIKLONO
Preske un milion personi evakuesis en est-Chinia, pro prevido dil arivo, hiere vespere, dal ciklono Morakot. En la provinco Zheijiang, 35.000 navi retrovokesis aden la portui, pro timopri forta pluvi e priventi proximanta le 180 km/h. En Taiwan, tri personi mortis ed adminime 31 homi konsideresas kom desaparinta, sur la voyirado di ca ciklono. Ultre lo, on esas sen informi pri plura pesko-navi.
JAPONIA / FORTA SISMO
Sismode7,1 ye amplitudo frapis, hiere, est-Japonia, segun la geologiala Instituto Usana, nome la sukusi sentesis til la nordo e la centro di ca lando, precipue en Tokio. La dicita tertremo eventabus ye tre granda profundeso (303 km). Plura imobli ondifis sub l'efekto dil sukusi en la Japoniana chefurbo, ma nula destrukturo signalesabis hiere vespere.
HISPANIA / NOV ATAKO DAL ETA
La Baska separista organizuro revendikis, hiere, la responsiveso pri l'asasino di tri Hispana policani. Inspektisto ocidesabis per bombo dum junio e, ye la 30ma di julio, du civila guardani perisabis lor la explozo di lia vehilo sur la Baleari. Hiere, bombo explozis en restorerio di Palma de Mallorca, sur la insuli Baleari, pos ke audesis telefon-advoko dal ETA tateme.
Kordiala interretala saluti ad omni. JM :::-:::
Ye la 7ma di agosto 2009
Dio di santa Sextus.
DIO-PROVERBO / Ne fidez ulu qua evas plu kam triadek yari.
ZODIAKO / En la zodiako-signo di la Leono guvernata dal Suno.
VETERO / Grizeta cielo kun humide varma temperaturo, cajorne, en Francilia.
KONCIZE
ARJENTINIA / LA EKLEZIO KLAMAS ALARMO
Quaradek procent de la Arjentiniana habitantaro vivas en la povreso, ed un neadulta persono de dek tala personi sufras pro hungro. Icon deploras la prezidanto dil sociala komisitaro di la Konfero dil episkopi di Arjentinia, Sinioro Jorge Casaretto, surbaze di studiuro dal ciencisti dil katolika Universitato di Buenos Aires. Ilu demandas insiste a la guvernerio adoptar sociala politiko favoroza a la yuna generacioni.
JAPONIA / ANIVERSARIO DI HIROSHIMA
La komonestro di Hiroshima advokis por la totala aboliso dil nukleala armi til 2020, okazione dil 64ma aniversario di la unesma atomala atako di nia konocata historio. 50.000 personi, inter li esis kelka posvivanti di la bombo lansita dal Usana militisti, asemblesis hiere an la memorialo dedikata a la viktimi, asistis ico la chefa ministro Taro Aso e reprezentanti di sisadeko de landi.
VATIKANO / NOVA AMBASADERIO USANA
La nomino dil teologio-profesoro, Miguel Diaz, kom ambasadisto di Usa che la Santa-Sidilo konfirmesis dal Usana Senato ye la 4ma di agosto. Lu esos la unesma Usano de Hispanala origino posedanta ica ofico. Miguel Diaz, evo 45 yari, mariajita e patro di quar filii, esis membro dil kampanio-esquado di Barack Obama.
Kordiala interretala saluti ad omni. JM :::-:::
Ye la 6ma di agosto 2009
Dio dil Transfigureso di Nia Sinioro.
DIO-PROVERBO / Plu valoras domacho propra kam palaco lokacita.
ZODIAKO / En la zodiako-signo di la Leono guvernata dal Suno.
VETERO / Bluega e sunoza cielo kun varmega somerala temperaturo, cajorne, en Francilia.
KONCIZE
PAKISTAN / MORTO DI SPOZINO DIL TALIBANI-CHEFO
La duesma spozino dil Pakistanana talibani-chefo Baitullah Mehsud mortigesis per misilo*-pafo Usala, hiere matine, en la tribuala arei di nordwest-Pakistan. Segun la Pakistanana autoritatozi, ita atako vizis nemediate la talibana chefo ma ilta esus sendomaja, segun ilua familio. La guvernerio di Washington ofras rekompenso de 5 milion dolari por kapturar lu, sive mortinta sive vivanta.
AFGANIA / VIZITO DAL NOVA CHEFO DI NATO/OTAN
Du dii pro lua enoficesko, la Daniano Anders Fogh Rasmussen, nova generala sekretario di NATO/OTAN, efektigis, hiere, lua unesma vizito en Afgania. Lundie, lu pledabis por forta impliko dil Federuro en ita lando por evitar ke "lu divenez turno-tablo dil internaciona terorismo", dum ke la violentaji atingas ibe antee nekonocata nivelo ye du semani ante l'elekto.
USA / MORTIGERA PAFADO EN SPORTEYO
Quar personi mortigesis ed adminime dek altra homi vundesis, pasinta-mardie, kande viro pafis en gimnastikalacentro en Pennsylvania, est-Usa. La lokala autoritatozi, qui savigis ica dramato erste hiere, konocigas ke tri mulieri mortis e ke la quaresma viktimo esas probable la pafero, ilqua uzabis sua armo kontre su ipsa ante ke la policani povez arestar ilu.
Kordiala interretala saluti ad omni. JM :::-:::
Ye la 5ma di agosto 2009
Dio di santulo Abel.
DIO-PROVERBO / Homo fidas, fortuno decidas.
ZODIAKO / En la zodiako-signo di la Leono guvernata dal Suno.
VETERO / Sunoza cielo kun varma somerala temperaturo, cajorne, en Francilia.
KONCIZE
SUDANO / LA PROCESO PRI LA SURHAVO DI PANTALONO DA MULIERO PLUSAFOYE AJORNESAS
Judiciisto di Khartum ajornis, hiere, la proceso di Lubna Al Hussein, qua minacesas per 40 bastono-frapi pro "nedecanta vestizuro". Arestita pro ke el surhavis pantalono, la dicitaSudanana jurnalistino povus profitar imuneso kom employato di UN/ONU, tale konsideris ica judiciisto, quankam la koncernata yunino renuncabis ita protekto. Cento de mulieri asemblesis por sustenar elu opoze a la tribunalo.
NORD-KOREA / BILL CLINTON DEMANDAS LA LIBERIGO DI JURNALISTI
Dum vizito en Pyongyang, l'anciena prezidanto Usana renkontris, hiere, la numero un dil Nord-Koreana rejimo, t.e. Kim Jong-il, por demandar a lu liberigar du Usana jurnalisti, kondamnita ye dek-e-du yari de koaktata laboro pro transirir la frontiero sen permiso, pro "difamo" dil rejimo, e pro "grava krimino". Ita renkontro eventas pos tri monati de tensi pri la nukleala questiono.
GLOBO / AL-QAIDA MINACAS FRANCIA
Segun la numero du di ca terorista reto, Ayman Al Zawahiri, "Francia expiacos pro lua omna krimini". Per interviuvo trovebla sur la interreto, signalita dal Usana centro surveyanta la islamista situi*, ica responsivo di Al-Qaida reprochas a Francia "havar la kordio plena de odio a la Mohamedisti" koncerne la debato pri la "burqa".
Kordiala interretala saluti ad omni. JM :::-:::
Ye la 4ma di agosto 2009
Dio di santa Ioannes-Maria Vianney.
DIO-PROVERBO/ Omnu tale manjas, quale lu aranjas.
ZODIAKO / En la zodiako-signo di la Leono guvernata dal Suno.
VETERO / Blua e sunoza cielo kun varma temperaturo, cajorne, en Francilia.
KONCIZE
RUSIA / RUSA MANOVRI EN SUD-OSETIA
L'armeo Rusa efektigos preventiva sekureso-exerci en Sud-Osetia, olim rebela Georgiana teritorio, qua esis la kerno di milito inter Rusia e Georgia un yaro ante nun, tale anuncis la Sud-Osetiana prezidanto Edward Kokoity. Pasinta-sundie, Georgia akuzabis la Rusa militisti enirir Georgiana vilajo kun la intenco "diplasigar la frontiero" kun Sud-Osetia.
USA / URJANTA TERVENO DI AVIONO IRANTA DE RIO-HOUSTON A MIAMI
Aviono di la Continental Airlines qua efektigis la junto inter Rio de Janeiro (Brazil*) e Houston (Texas) tervenis urjante hiere en Miami , Florida, pos forta aerala perturbi qui vundis 35 voyajanti, segun la avional kompanio posedanta ca mashino. Segun la autoritatozi, l'aviono mustis chanjar sua voyirado dum la nokto por arivar sur l'aerportuo di Miami. Segun la diala jurnalo MIAMI HERALD, quar de la 35 vunditi esas en grava sanesala stando.
GREKIA / LA OPOZANTARO SOCIALISTA POSTULAS ELEKTO
La chefo dil socialista partiso Greka (Pasok), Yorgos Papandreou, demandis ke anticipata deputital elekto 'okurez' samatempe ke la voto por la prezidantal elekto di 2010. Lua-judike, la ekonomiala krizo e la granda publika debajo necesigas "profunda chanji sociala" opoze a "problemi qui duras de longa tempo e presas sur la civitano Greka".
Kordiala interretala saluti ad omni. JM :::-:::
Ye la 3ma di agosto 2009
Dio di santa Lidia.
DIO-CITAJO / Expektez de la altri to quon tu facis a la altri (Latina sentenco).
ZODIAKO / En la zodiako-signo di la Leono guvernata dal Suno.
VETERO / Chanjema cielo lore griza lore sunoza, cajorne, en Francilia.
KONCIZE
USA / BARACK OBAMA PACIGAS RASALA DISPUTO PER BIRO
L'Usana prezidanto kunvenigis a la Blanka-Domo, jovdie vespere, la nigra universitatano Henry Louis Gates e la blanka policano qua arestabis lu ye la 16ma di julio, James Crowley. "Me sempre kredis ke to quo unionigas ni esas plu forta kam to quo dividas ni", Barack Obama dicis pos diskuto quan il qualifikas kom "amikala ed inteligenta".
CHINIA / ARESTI EN XINJIANG
La policani arestis 1.600 personi relatanta kun la violentaji qui produktis adminime 197 mortinti en la provinco Xinjiang komence dil monato julio. Ito raportesis dal oficala informili, hiere. La policani di Urumqi, chefurbo di ca provinco e centro di la trubli, arestis 319 personi, segun l'agenterio Chinia Nova.
MAROKO / DU JURNALI CENSURESIS
TELQUEL e NICHANE sizesis pro publikigir opinion-inquesto pri la bilanco dil regno di Mohammed VI. La rezulti esis favoroza a la rejo ma "la monarkio en Maroko (...) ne povas esar l'objekto di debato mem per la medio di opinion-inquesto", tale explikis la ministro pri Komunikado.
Kordiala interretala saluti ad omni. JM :::-:::
| 
English
Deutsch
Français
Plusa lingui
