Novajeti da Sro Martignon Julio 2009

Ye la 31ma di julio 2009

Dio di santa Ignatius.

DIO-PROVERBO / Maxim bone ridas qua kom lasta ridas.

ZODIAKO / En la zodiako-signo di la Leono guvernata dal Suno.

VETERO / Bela e sunoza vetero, cajorne, en Francilia.

KONCIZE

CHINIA / ADMINIME 13 MILION ABORTIGI YARALE
Ico esas granda nombro debata a la indijo de informi pri la sexuo e la kontre-gravidesko segun exploranti citita, hiere, dal CHINA DAILY. Preske 50% de mulieri subisanta abortigo uzas nula metodo por kontre-gravidesko e segun studiuro en Shangai, min kam 30% de la homi savas quale evitar gravidesko e nur 17% esis informita pri la sexuale transmisebla morbi.

PORTUGAL / ICA LANDO RIENDUKTAS LA IBERALA LINCO
Hispania donacos a Portugal 16 maskula e 6 femina linci, t.e. un de la felini maxim minacata en la mondo en la skopo rienduktar lu per la moyeno di programo pri genitado en kaptiteso. Lua validigo komencos tri yari pos nun. La 100.000 linci vivanta en la Iberala peninsulo komence dil XXma yarcento decimacesis per la chasado e per morbo transmisata da la kunikli.

ZIMBABWE / FINO DIL KOLERO-EPIDEMIO
La Zimbabweana ministrerio pri saneso anuncis, hiere, ke la kolero-epidemio finesis. Dum periodo de un yaro, ol kontaminabus preske 100.000 personi ed efektigita 4000 mortinti, oficale. Parolesas nun, por la teritoriala kolektivaji,pri organizar su en prevido di nova epidemii, nome la risko duras esar forta, se on egardas la sanesala stando di ca lando.

Kordiala interretala saluti ad omni. JM :::-:::

Ye la 30ma di julio 2009

Dio di santa Julieta.

DIO-PROVERBO / Quale on volas, tale on povas.

ZODIAKO / En la zodiako-signo di la Leono guvernata dal Suno.

VETERO / Sunoza cielo ma kun varma humideso, cajorne, en Francilia.

KONCIZE

USA / SONIA SOTOMAYOR TRANSIRAS NOVA ETAPEYO
La judiciistino Sonia Sotomayor, selektita da prezidanto Barack Obama por sidar che la suprega Korto di Usa, jus transiris nova etapeyo vers lua nomino per recevar hiere la pozitiva voto dal komisitaro pri judiciala aferi dil Senato. Oportas nur vartar la voto dal Senato ipsa ante la parlamentala vakanco dil 7ma di agosto. Sonia Sotomayor esos la unesma Hispanala muliero exercanta tala funciono.

IRAK / AFRONTI EN LA IRAKANAKAMPEYO DIL "MUDJAHIDIN"-I DIL POPULO
Pos asalte kaptir, pasinta-mardie, la kampeyo Ashraf dil "Mudjahidin"-i dil populo, grupo de opozanti a la Iranana rejimo refujinta en Irak, la sekureso-trupi Irakana durive shokesis a lia rezisto, hiere. La por-parolanto dil kampeyo, Shariar Kia, mencionis sep mortinti inter la habitanti (dil kampeyo) e 385 vunditi, dum ke la Irakani aludas du mortigita policani e 110 vunditi.

UNIONITA REJIO / KONDAMNITA MUNICIPO
La Alta Korto di London agnoskis la responsiveso dil municipo di Corby koncerne la misformacuri korpala konstatita lor la nasko che dek-e-kino de infanti inter 1989 e 1999, motive dil forjeto en l'atmosfero de toxika produkturi lor la desfortifiko di instaluro por fero- e stal-industrio. Ita judiciala rezolvo esas la unesma tala en Unionita Rejio.

Kordiala interretala saluti ad omni. JM :::-:::

Ye la 29ma di julio 2009.

Dio di santa Marta.

DIO-PROVERBO / Urson al mielo on ne tiras per orelo.

ZODIAKO / En la zodiako-signo di la Leono guvernata dal Suno.

VETERO / Sunoza ma humide varma e sturmema, cajorne, en Francilia.

KONCIZE

NIGERIA / LA VIOLENTAJI KRESKAS EN AMPLESO EN LA NORDO DI CA LANDO
La afronti inter la Nigeriana sekureso-trupi e la extremista islamisti en Maiduguri (nordest-Nigeria) efektigis cento de mortinti. Depos pasinta sundio, la islamista militanti dil sekto di Boko Haram, o "talibani" multopligis lia ataki en la quar Stati di nord-Nigeria : Bauchi, Borno, Kano e Yobe. Prezidanto Umaru Yar'Adua imperis lundie a la sekureso-servi esar en "totala alarmo". La urbo Maiduguri subisas ekiro-interdikto dumnokte. En nord-Nigeria, dek-e-du Stati instalis, depos la yaro 2000, la sharia, t.e. la islamista legaro.

BURMA / LA VERDIKTO KONTRE AUNG SAN SUU KYI EXPEKTESAS DUM VENONTA VENERDIO
La korto esas savigonta lua verdikto pos-morge koncerne la proceso organizita da la Burmana militistal guvernerio, ye la 18ma di mayo, kontre Aung San Suu Kyi, Nobel-premiizita pri paco e porparolanto di la nacionala Federuro por la demokratio, precipua opozanta partiso. El akuzesas pri vanajo. Ita arbitriala proceso posibligos a la militistal guvernerio prolongar la duro dil enkarcerigo di ca tre populara opozantino, dum ke la elekto di 2010 proximeskas. La defenseri expektas desfavoroza verdikto.

CHINIA / POLITIKALA PROCESO KONTRE UIGURANA KRISTANO
Kristana Uigurano judiciesis, hiere, pro "revelir Statala sekretaji", en Kashgar, en extrema westo dil Chiniana regiono Xinjiang, ma la tribunalo ne savigis lua judicio, tale savigis lua advokato. La Kristana organizuro Usana "China Aid", qua observas sorgoze ita afero, lua-latere denuncis kazo di religiala persekuto.

Kordiala interretala saluti ad omni. JM :::-:::

Ye la 28ma di julio 2009.

Dio di santulo Samson.

DIO-CITAJO / Unesme vivar, pose filozofiar. (Latina sentenco)

ZODIAKO / En la zodiako-signo di la Leono guvernata dal Suno.

VETERO / Bela blua e sunoza cielo kun agreabla milda somerala temperaturo, cajorne, en Francilia.

KONCIZE

SUD-AFRIKA / STRIKO DAL MUNICIPALA EMPLOYATI
Dum reklamar 15% de salariala augmento, 150.000 municipala employati advokesis audigar lia revendiki enstrade, hiere. La manifesti esus duronta til morge, ma la striki, ipse, ne havas limiti. Jacob Zuma, nova prezidanto di ca lando, intencas luktar prioresale kontre la ne-egalaji.

GEORGIA / MISIONO DI EU/UE PROLONGESAS
La ministri pri Exterlandala Aferi di EU/UE prolongis ye un yari lia observo-misiono en Georgia, qua instalesis surloke pos la milito di 2008 inter Moskva e Tbilissi. La ofico-tempo di la nuna misiono, qua kontenas preske 300 policani e jendarmi komisita egardigar la interkonsento pri milito-ceso, finos dum la mezo dil monato septembro.

ISLANDO / ADHERO-KANDIDATESO AD EU/UE
La 27 Europana ministri pri Exterlandala Aferi aceptis, hiere, transmisar a la Komisitaro la adhero-kandidateso ad Europana Uniono di Islando. Parolesas nun, por la Europana Komisitaro, examenar ica dokumentaro, anter impulsar adhero-negociado.

Kordiala interretala saluti ad omni. JM :::-:::

Ye la 27ma di julio 2009.

Dio di santa Natalia.

DIO-PROVERBO / Por omna ago venas tempo di pago.

ZODIAKO / En la zodiako-signo di la Leono guvernata dal Suno.

VETERO / Alternante griza e sturmema vetero kun sunoza epizodi, cajorne, en Francilia.

KONCIZE

USA / FORTA DEPENSO-SUPRESI EN LA BUDJETO DI KALIFORNIA
La kongreso di Kalifornia aprobis, pasinta-semane, severa programo pri diminuto dil spensi di ca Stato, olqua esas la maxim populizita e richa di Usa e tamen minacesas per bankroto kun budjetala deficito ye 18,2 miliard euri. La aludita texto previdas sparajo ye 10,5 miliard euri ek spensi quale olti di la saneso, la edukado e la salario dil funcioneri.

INDIA / UNESMA NUKLEALA SUBMARA NAVO INDIANA
India lansis, hiere, lua unesma nukleala submara navo nukleala konstruktigata per lua industriisti. Ita submersebla navo irigas ica giganta lando di Sud-Azia en la klozata klubo di la landi realiginta lia propra mashino, nome Chinia, Usa, Francia, Unionita Rejio e Rusia. Til nun, India lokacis nukleala submara navi Rusa e komprabis en 2005 sis Franca-Hispana navi.

UKRAINA / AKUZO DI ANCIENA GENERALO DIL UKRAINANA POLICO
Olexy Pukach, anciena generalo dil Ukrainana polico, akuzesis pri l'asasino dil jurnalisto Gueorgui Gongadze, en 2000. La morto di ca fondero di la diala jurnalo "online" UKRAINSKA PRAVDA, tre kritikema a la guvernerio di ta epoko, produktabis grandega skandalo en ica lando. L'opozantaro akuzis la lora prezidanto, Leonid Kuchma, komanditir la dicita mortigo.

Kordiala saluti ad omni. JM :::-:::

Ye la 24ma di julio 2009.

Dio di santa Kristina.

DIO-PROVERBO / Homo fidas, fortuno decidas.

ZODIAKO / En la zodiako-signo di la Leono guvernata dal Suno.

VETERO / Alternante sunoza e griza cielo kun pluvoza epizodi, cajorne, en Francilia.

KONCIZE

SOMALIA / MORTAL KOMBATI EN LA CHEFURBO DI CA LANDO
Adminime 15 civili mortigesis e 55 plusa personi vundesis dum la nokto de merkurdio til jovdio en Mogadiscio, lor kombati kun bombardili inter islamista rebeli e la guverneriala trupi Somaliana apogata da la paco-trupo di Afrikana Uniono (Amisom). La rebeli entraprezas de preske tri monati grand atako kontre la enofica prezidanto, ed anke kontre la prezenteso dil Amisom.

MONGOLIA / SENDO DI 150 SOLDATI AD AFGANIA
Mongolia sendos, dumseptembre, e por tempo-periodo de sis monati, aproxime 150 soldati ad Afgania enkadre dil internaciona operaci entraprezata en ita lando, tale anuncis hiere la Mongoliana ministrerio por Defenso. Mongolia ja sendabis mikra grupi ad Afgania, ma li kontenis nur 20 til 25 personi admaxime. Mongolia havas kelka relati historiala kun ita lando, olqua invadesis ye la komenco dil yarcento XIII dal trupi dil Mongola konquestero Gengis Khan.

NORD-KOREA / L'USANA GUVERNERIO EXPRESAS LUA DESQUIETESO
L'Usana Statala sekretariino Hillary Clinton akuzis, hiere, en Tailando, lor forumo pri la sekureso (ARF) dil Asociuro dil nacioni di Sudest-Azia (Asean), la rezisto "desquietiganta" di Nord-Korea sennuklealesar, dum ke la guvernerio di Pyongyang refuzas omna negociado tam longatempe kam la guvernerio di Washington ne finos lua "enemika" politiko.

Kordiala interretala saluti ad omni. JM :::-:::

Ye la 23ma di julio 2009.

Dio di santa Brigita.

DIO-CITAJO / Me pardonas sempre ad altri, nulatempe a me (Seneca).

ZODIAKO / En la zodiako-signo di la Leono guvernata dal Suno.

VETERO / Pluvema ed humidege varma, cajorne, en Francilia.

KONCIZE

RUSIA / MISILI*-PROGRAMO HAVAS PROBLEMI
Yuri Solomonov, teknikala responsivo pri la projeto di interkontinenta misilo* Rusa, demisionis konseque di la dessuceso di lanso-probo dum la mezo dil monato julio, tale savigesis hiere. Havante atingo-povo ye 8000 km, ita mashino supozesas divenor la florono dil Rusa strategiala trupi, ma la renkontrata desfacilaji plutardigas la mencionita programo.

KOLUMBIA / VINKESO POR PREZIDANTO URIBE
La perspektivo di triesma ofico-tempo por la Kolumbiana prezidanto Alvaro Uribe desproximeskis, pasinta-mardie, per la elekto por la prezidantesi dil Senato e dil elektiti-Chambro, qui ne esas vasaligita da lu. Ita rikompozo povus desfaciligar l'aprobo di projeto pri plebicito permisanta lua kandidateso en 2010.

IRAN / LA VICE-PREZIDANTO DEMENTIAS LUA DEMISIONO
La unesma vice-prezidanto Iranana, Esfandiar Rahim Mashaie, bofiliulo di prezidanto Ahmadinejad, asertis pasinta-mardie ke il rezolvis mantenar su en sua ofico, malgre la kritiki di qui il esas l'objekto.

Kordiala interretala saluti ad omni. JM :::-:::

Ye la 21ma di julio 2009.

Dio di santa Viktor.

DIO-PROVERBO / L'eceso omnarelate esas defekto.

ZODIAKO / En la zodiako-signo di la Leono guvernata dal Suno.

VETERO / Sunoza cielo ma humide varma temperaturo, cajorne, en Francilia.

KONCIZE

MAURITANIA / NUL ANOMALAJO LOR LA PREZIDANTAL ELEKTO SEGUN LA FRANCA AUTORITATOZI
"Segun la unesma informi furnisita da sendependa observeri (...) ne konstatesis importanta anomalajo", tale opinionis, hiere, la Franca ministro pri Exterlandal Aferi, Bernard Kouchner. Depos la pasinta saturdio, la opozantaro kontestas la vinko, quik de la unesma elekto-parto, di generalo Mohamed Uld Abdel Aziz, guidanto dil statala stroko eventinta ye la 6ma di agosto 2008.

UNIONITA REJIO / DIMINUTO DIL ALARMO-NIVELO PRI LA TERORISMO
La dicita nivelo iras de "danjeroza" ad "importanta", segun dissavigo dal ministrerio pri Interna Aferi. La nivelo "importanta", olqua esas la triesma del 5 alarmo-gradi, signikas ke atento duras esar tre posibla, ye quar yari pos la ataki dil 7ma di julio 2005 kontre la publika transporti di London. 56 personi, inter li la quar suocidanta teroristi, mortigesis. La nivelo "danjeroza" indikas ke atento esas extreme posibla.

INDONEZIA / SUSPEKTATO ESUS IDENTIGITA KONCERNE LA DUOPLA ATENTO DI DJAKARTA
L'Indoneziana policani inquestas pri la duopla suocida atento eventinta pasinta-venerdie e durigis, hiere, lia explori en la extremista islamista grupi por identigar la du suocidanta teroristi. Un de li esus anciena dicipulo di koranala skolo dil mezo dil insulo Java. Lu aparas sur la filmo di kontrolo-kamero dil hotelo Marriott jus ante l'explozo.

Kordiala interretala saluti ad omni. JM :::-:::

Ye la 20ma di julio 2009.

Dio di santa Marina.

DIO-PROVERBO / Extrema judicio esas extrema neyustajo. (Latina proverbo)

ZODIAKO / Iro en la zodiako-signo di la Leono guvernata dal Suno.

VETERO / Sunoza cielo, cajorne, en Francilia.

KONCIZE

ISRAEL / MANIFESTO DA PIA JUDAI*
Centi de pia Judai* manifestis, saturdie vespere, en Ierusalem, ye la quaresma intersequanta semano, kontre l'aperto di "parking" dum la "shabbat". Nula violentajo facesis, kontree a pasinta jovdio kande nombroza policani vundesis.

TURKIA / ANCIENA GENERALI HAVAS PROCESO
Kinadek-e-sis nova akuzati prizentos su, hodie, lor la proceso dil supozata puchista* reto Ergenekon, inter li esas anciena chefo dil jendarmaro, generalo Sener Eruygur, e du plusa anciensa generali, denuncata dal akuzantaro kom la guidanti dil komploto. Depos pasinta oktobro, la tribunalo ja judicias 86 akuzati.

EQUADOR / PREZIDANTO CORREA DEMENTIAS HAVAR KOLUZIONO KUN LE FARC
La Equadorana prezidanto Rafael Correa dementiis, pasinta-saturdie, havir relati kun la Armizita Trupi Revolucionera di Kolumbia, pos la difuzado en Kolumbia di "video" ube la militistal chefo di ca "guerilla"-ani, Jorge Briceno, asertas ke la "guerilla"-ani kontributis pekuniizar ilua elektala kampanio en 2006.

Kordiala interretala saluti ad omni. JM :::-:::

Ye la 17ma di julio 2009.

Dio di santa Karola.

DIO-PROVERBO / Ta qua skribas lektas dufoye.

ZODIAKO / En la zodiako-signo dil Kankro guvernata da la Luno.

VETERO / Alternante sunoza e pluvioza cielo, cajorne, en Francilia.

KONCIZE

JAPONIA / SUPER-KOMPUTERO POR SIMULI DI NUKLEALA FUZO
L'Agenterio pri atomal energio Japoniana balde aquiros che Fujitsu super-kalkulilo, qua, lor lua uzesko en 2010, esos la maxim potenta ye servo en Japonia. Ol utiligesos por simuli di nukleala fuzo en la skopo developar novaspeca centrali, enkadre dil internaciona projeto ITER por experimentala reaktoro kun termonukleala fuzo.

USA / NIGRULO ESAS CHEFO DIL NASA
La Senato konfirmis, prehiere vespere, la nomino di Charles Bolden, evo 62 yari, ex-astronaviganto e retretinta generalo kom chefo dil Nasa. Il esas la unesma nigrulo Usana obtenar ica ofico e la dek-e-duesma direktero di ca Usana spacala agenterio depos 1958. Charles Bolden efektigis quar misioni en la kosmala spaco.

UKRAINA / LA MONDALA BANKO ESAS PESIMISTA
Pro ke ol esas aparte atingata per la ekonomiala krizo, Ukraina esus registragonta por 2009, diminuto di lua kuntara interna produkto ye 15%, segun deklaro, hiere, da Ruslan Piontkivcki, ekonomikisto por la mondala banko. Mikra amelioro tamen esperesas por 2010 (+1%). La situeso esas aparte mala por la publika financo, nome la recevaji deskreskis sen ke la spensi diminutesez.

Kordiala interretala saluti ad omni. JM :::-:::

Ye la 15ma di julio 2009.

Dio di santa Donaldus (festo-dio di samideano Donald(us) Gasper(o)).

DIO-CITAJO / La homo naskis por du kozi, nome por intelektar e por agar. (Cicero)

ZODIAKO / En la zodiako-signo di la Kankro guvernata da la Luno.

VETERO / Sunoza vetero, cajorne, en Francilia.

KONCIZE

NORD-IRLANDO / VIOLENTAJI EVENTAS LOR MARCHO DAL ORANGISTI
La violentaji eventinta pasinta-lundie lor la protestanta marchi en la quartero di Ardoyne en Belfast ed en plur urbi di Nord-Irlando "instrumentizesis da minoritato, qua volas deturnar ni de la ja realigita progresi", tale la adyunta chefo dil Nord-Irlandana polico, hiere, akuzis ica fakti. Lundie en Belfast, la policani uzabis aquo-kanoni e kugli ek plastika materiajo por dispersar 200 yuna manifestanti lansanta "molotov-cocktail"-i. La yarala defilei dal orangisti esas ofte okaziono di shoki kun la katolika komunajo e la ordino-trupi.

ITALIA / HAVAJI DIL NAPOLIANA "MAFIA" SIZESIS
La "Camorra" perdis, hiere, 50 milion euri ek imoblala havaji, societi e bankala pekunio-posedaji, qui sizesis dal Italiana judiciisti. La maxim vizata klano esas olta di le Casalesi, konocata pro lua violentaji. Kin ja enkarcerigita viri e triadek nomo-prestanti di ta klano koncernesas per ita sizi. La dicita enkarcerigiti akuzesas pri nombroza homocidi, inter altri ta di sis Afrikana laboranti dum pasinta septembro.

RWANDA / KONDAMNO YE PERPETUA KARCERO-PUNISO POR L'ANCIENA PREFEKTO DI KIGALI
Kolonelo Tharcisse Renzaho, anciena prefekto di Kigali, akuzata pri milito-krimini e pri krimini kontre la homaro, agnoskesis kom kulpinto, hiere, pri gentocido, asasini e sexuala violaci dum la Rwandana gentocido eventinta en 1994, dal Internaciona Punisala Tribunalo aganta en Rwanda. Ica tribunalo kondamnis ilu ye perpetua karcero-puniso.

Kordiala interretala saluti ad omni. JM :::-:::

Ye la 14ma di julio 2009.

Dio di santa Bonaventuro.

DIO-PROVERBO / Kontre doloro helpas humuro.

ZODIAKO / En la zodiako-signo dil Kankro guvernata da la Luno.

VETERO / Sunoza cielo, cajorne, en Francilia

KONCIZE

SOMALIA / DU FRANCI RAPTESIS EN ITA LANDO
Du Franca konsilanti raptesis, cadie, en Mogadiscio, tale anuncis la ministrerio pri Exterlandal Aferi di Francia. "La dicita sioruli esis en oficala misiono por helpo apud la Somaliana guvernerio", savigis la ministrerio pri Exterlandal Aferi per komunikajo. Li adportis helpo koncerne la sekureso a la federural provizora guvernerio di prezidanto Sheikh Sharif. Altaranga responsivo Somaliana informabis, kelke plu frue, ke la du raptiti esis Franci laboranta por la informo-servi. Ica afero esas tre misterioza. Notinda, tamen, ke ofte la Exterlandani sejornanta en Somalia raptesas ed esas liberigata kontre granda ransono.

ISRAEL / EN IERUSALEM, PALESTINANI INSTALAS SU EN LA JUDAA* KOLONII
Pro ke li atraktesas per la chipa preci, deki de Palestinana familii instalas en la nova quarteri qui esas Judaa* kolonii por populizo. Ica fenomeno koncernas ja nur kelka centi de Palestinana familii, ma ica tendenco pluforteskas.

AFRIKA / GERMANIA PROMOCAS GRANDEGA PROJETO PRI SUNAL ENERGIO EN ITA KONTINENTO
L'industrio e la financo Germana impulsas Desertec, olqua esas la maxim granda projeto di sunal energio en la mondo. Giganti dil energio-industrio e dil financo Germana, inter li Siemens, E,ON e RWE okupesas pri la projeto Desertec. Parolesas pri instaligar en la dezerti e sur la Afrikana litoro reto de sunala paneli e centrali, qua furnisus 15% de la necesa energio ad Europa.

Kordiala interretala saluti ad omni. JM :::-:::

Ye la 13ma di julio 2009.

Dio di santa Henrikus.

DIO-PROVERBO / L'unesma atesto esas la vesto.

ZODIAKO / En la zodiako-signo dil Kankro guvernata da la Luno.

VETERO / Grizeta cielo, cajorne, en Francilia.

KONCIZE

AFGANIA / GRAVA PERDI YE HOMALA VIVI BRITANIANA
La Britaniana chefa ministro, Gordonus Bruno (Gordon Brown) predicis "tre harda somero" por lua trupi en Afgania, ube ok Britaniana soldati mortigesis lor le pasinta jovdio e venerdio. Ico irigas til dek-e-kin la nombro de soldati mortigita depos la komenco di ca monato en la provinco Helmand, sud-Afgania. Ultre lo, quar soldati Usana renkontris la morto lor atenti, hiere.

GERMANIA / HOMAJO AD ASASINATA EGIPTIANINO
Plura mili de habitanti stranjera e Germana di Dresden rekolecis, pasinta-saturdie, memore a Marwa El Sherbini. Ita Egiptianino evanta 31 yari e gravida ye tri monati, poniarde ocidesis, ye la 1ma di julio, da Germano evanta 28 yari, necelite stranjeri-odianta, en tribunalo di ca urbo ube el venabis atestar pos incidento qua opozigis elu a la ja dicita viro.

INDIA / MORTIGERA EMBUSKI DAL MAOISTI
Adminime triadek policani ocidesis da Maoista rebeli en est-India, asertis hiere policana responsivo. L'amba ataki havis loko ye 90 kilometri de Raipur, regionala chefurbo dil Stato Chhattisgarh. Adminime 15 de la 29 Stati di India konfrontesas a arei di Maoista revolto, olqui kontenas 10.000 til 20.000 "guerillero"-i di extrema sinistranaro.

Kordiala interretala saluti ad omni. JM :::-:::

Ye la 10ma di julio 2009.

Dio di santa Ulrikus.

DIO-PROVERBO / Tempo havas valoro quale la oro.

ZODIAKO / En la zodiako-signo dil Kankro guvernata da la Luno.

VETERO / Grizema cielo kun sunoza epizodi, cajorne, en Francilia.

KONCIZE

RWANDA / PARTOPRENANTO DI LA GENTOCIDO KONDAMNESAS YE PERPETUA KARCERO-PUNISO
Augustin Hategeka, anciena prefekto di la regiono di Gitarama ed anciena komonestro di Muhanga, loko jacanta en la mezo di ta lando, kondamnesis, hiere, ye perpetua karcero-puniso da "gacaca", t.e. popul-tribunalo, pro lua partopreno dil Rwandana gentocido eventinta en 1994. Ico anuncesis da "Radio Rwanda". Le "gacaca", esas specala tribunali komisita aparigar la faceri di masakri. Li ja judiciis 1,5 milion personi.

EUROPANA UNIONO / DIMINUTO DI LA NELEGALA ENMIGRADO
Segun l'Europana agenterio dil frontieri, Frontex, la uniono dil ekonomiala krizo e dil kooperi inter membra Stati di EU/UE ed origino-landi dil enmigranti, precipue inter Italia e Libia, havabus kom konsequo, dum la unesma trimestro 2009, diminuto ye 16% dil nombro de nelegala enmigranti.

SRI LANKA / LA CICR KOAKTESAS DIMINUTAR LA NOMBRO DE LUA OPERACI
Motive dil oficala fino di la kombati inter la legala guvernerio di Colombo e la separatista rebeli Tigri di liberigo dil Eelam Tamul, oficale vinkita, la Internaciona Komitato di la Reda-Kruco (CICR) recevis, hiere, l'impero dal autoritatozi "diminutar la nombro de lua operaci en ica lando."

Kordiala interretala saluti ad omni. JM :::-:::

Ye la 9ma di julio 2009.

Dio di santa Amandina.

DIO-PROVERBO / A ta omni cedas, qua oron posedas.

ZODIAKO / En la zodiako-signo dil Kankro guvernata da la Luno.

VETERO / Alternante sunoza e griza cielo kun koldeta temperaturo relate la sezono, cajorne, en Francilia.

KONCIZE

INDONEZIA / PREZIDANTO YUDHOYONO RIELEKTESAS QUIK DE LA UNESMA ELEKTO-PARTO
Il esas Statestro depos 2005, Susilo Bambang Yudhoyono, ed il rielektesis, hiere, kun preske 60% de la expresata voti. Il gratulesis da lua opozanto, vice-prezidanto Jusuf Kalla, qua obtenis nur 12% til 15% de la voti. La Statestro saciesis per advokar "a la kalmeso" dum vartar la rezulti oficala dum la venonta dii. Nome il devas ne nur obtenar la majoritato ye la nacionala nivelo ma anke plu kam 20% de la voti en la duimo de la provincaro.

IRLANDO / NOVA PLEBICITO PRI LA KONTRATO DI LISBOA YE LA 2ma DI OKTOBRO
La duesma plebicito pri la Europana kontrato di Lisboa organizesos en Irlando ye la 2ma di oktobro venonta, segun anunco, hiere, dal chefa ministro, Brian Cowen. Il parolis kurtatempe ante la komenco di debato che la Parlamento pri modifiko di la lego posibligante la organizado di ta popul-voto. Ye la pasinta 19ma di junio, en Bruxelles, la Europana Konsilantaro grantabis a la Irlandani la "protokolo" quan li postulis ante organizor duesma plebicito.

LATVIA / LA DIABLO APARAS EN LA LOKALA FINANCO
La kredito-societo Kantora shokis la Eklezii per demandar a sua klienti promisar lia anmi kom garantiajo kaze ke li ne povus pagar. Kantora propozas prestaji ye sumo di 70 til 700 € por 90 dii, kun yarala procento de 365%. "Esas nur un kondiciono : la pruntanto mustas promisar a ni lua anmo" tale savigas la aludita societo che lua interretala situo*. "Ni atencas ita kazo tre serioze", deklaris, hiere, a l'AFP kardinalo Janis Pujats, arkiepiskopo di Riga. Asociita kun la responsivi di la Luterana ed ortodoxista Eklezii, lu demandis la komenco di inquesto.

Kordiala interretala saluti ad omni. JM :::-:::

Ye la 6ma di julio 2009.

Dio di santa Maria Goretti.

DIO-PROVERBO / Quale on volas tale on povas.

ZODIAKO / En la zodiako-signo dil Kankro guvernata da la Luno.

VETERO / Sat sunoza cielo kun plu koldeta temperaturo, cajorne, en Francilia.

KONCIZE

FILIPINI / MORTIGERA ATENTO AVAN KIRKO
Adminime kin personi mortigesis e 34 plusa homi vundesis, hiere, per la explozo di bombo avan la katedralo di Cotabato sur la insulo Mindanao en sud-Filipini. Ita mashino explozis dum ke la religiani ekiris la kirko pos la oficio. Ica atako di qua la responsiveso ne revendikesis, imputesas a Mohamedista rebeli. Papo Benediktus XVI qualifikis ica ago kom "desnoblacha", hiere, en Roma.

IRAN / SHIISTA KLERIKI KONTESTAS LA REZULTO DIL PREZIDANTALA ELEKTO
L'asociuro dil teologiisti di la skolo di Qom, t.e. influoza grupo dil reformera shiismo, denuncis la "neregulozaji" dil elekto di Mahmud Ahmadinejad, per kontestar a lu lua "legitimeso". La dicita kleriki regretis ke on "respondis per la violento a la pacema voco dil populo demandante yusteso". Ultre lo, la policani anuncas liberigir du triimi de la milo de arestita manifestanti.

UGANDA / LEGO KONTRE LA EKTRANCHO
Prezidanto Yoweri Museveni anuncis ke Uganda balde votigos lego interdiktante la genitala mutili a la mulieri, olqui esas tote kustumale facita che la pastorala tribui dil estala regiono di ca lando. UN/ONU evaluas ke inter 100 e 140 milion mulieri subisis ica praktiko.

Kordiala interretala saluti ad omni. JM :::-:::

Ye la 2ma di julio 2009.

Dio di santa Martinius.

DIO-PROVERBO / Esas okulo dil kordio spegulo.

ZODIAKO / En la zodiako-signo dil Kankro guvernata da la Luno.

VETERO / Sunoza cielo e varma temperaturo, cajorne, en Francilia.

KONCIZE

KOLUMBIA / DEKI DE GAJO-HOMI DURAS ESAR ENMANUE DI LE "FARC"
Un yaro pos elua liberigo e ruptanta monati de tacado, Ingrid Betancourt memorigas ke deki de gajo-homi di le "Farc" duras stagnachar en la Kolumbiana junglo. En mesajo elu dankas la homi qui helpis por lua liberigo ed el anke advokas a "chanjar la timinda fato di ti qui esas ankore kaptita". Fakte, certa esas ke 22 gajo-homi, militisti e policani, konsideresas da le "Farc" kom politikala kaptiti kun forta kambio-valoro.

FRANCIA / BAHIA BAKARI LA SALVINTINO DIL AVIONO A310 DI LA KOMPANIO YEMENIA ARIVIS EN FRANCIA
Bahia Bakari, la yuna adolecantino salvinta de la aplasto dil aviono Airbus A310 di la kompanio Yemenia opoze a la Komoriana litoro, arivis ye la jovdio 2ma di julio en Paris. Lor lua arivo, elua patro e plura membri di elua familio esis prezenta lor lua aviono-ekiro. El esas la unika posvivanto de la 153 personi voyajinta en l'Airbus posedata dal nacionala kompanio Yemeniana.

GEORGIA / LA GEORGIANI ESAS FATIGATA PRI LA POLITIKAL DISPUTI
Dek-e-un monati pos la atako dizastroza di ca lando kontre Rusia, nombroza Georgiani plendas pri l'ago da prezidanto Saakachvili, ma la opozantaro ne konvinkas li plu multe. Tamen multa Georgiani havas rankoro kontre Saakachvili e la perdo di sud-Osetia ed Abkhazia. Ma la guidanti dil opozantaro konsideresas kom oportunisti sen vera programo.

Kordiala interretala saluti ad omni. JM :::-:::

Ye la 1ma di julio 2009.

Dio di santa Rombaldus.

DIO-PROVERBO / Ube profito, ibe anke merito.

ZODIAKO / En la zodiako-signo dil Kankro guvernata da la Luno.

VETERO / Sunoza vetero kun varma somerala temperaturo, cajorne, en Francilia.

KONCIZE

ITALIA / DEK-E-DU MORTINTI POS LA EXPLOZO DI VAGONO
La ekreligo e pose la explozo di cisterno-vagono de gaso liquidigita (GPL) devastis, lundie vespere, la quartero dil fervoyala staciono di Viareggio, en nordwest-Italia, tale efektigante adminime 12 mortinti, 16 grave vunditi e quar desaparinti, segun provizora bilanco, hiere ye dimezo. Tri violentoza explozi sequata per incendio, destruktis du mikra habitebla imobli.

IRAN / AHMADINEJAD CHE LA SOMITALA INTERRENKONTRO DI AFRIKAN UNIONO
Mahmud Ahmadinejad vartesas cadie en Libia por la komenco dil somitala interrenkontro dil statestri di Afrikan Uniono, qua esos en Syrte, sub la prezidanteso di Muammar Kadhafi. La Iranana prezidanto, rielektita ye la 12ma di junio, ja partoprenabis somitala interrenkontro di Afrikan Uniono en Gambia dum julio 2006.

HISPANIA / UNESMA VIKTIMO DIL A-VIRUSO (H1N1)
Marokanino, evanta 20 yari, gravida ye infanteto sep-monata, transmondeskis hiere pro respirado-morbo produktita dal A-viruso (H1N1). Lo esas la unesma viktimo en Hispania, da itaspeca gripo aparinta en Mexikia dum aprilo. Lundie, la mediki praktikabis cesar-operaco por salvar la infanteto di qua la sanesala stando restas debila.

Kordiala interretala saluti ad omni. JM :::-:::