Novaji-Martignon-2009-Junio

Ye la 30ma di junio 2009.

Dio di santulo Martial.

DIO-PROVERBO / Granda fishi manjas le mikra.

ZODIAKO / En la zodiako-signo dil Kankro guvernata da la Luno.

VETERO / Sunoza cielo kun varmega temperaturo, cajorne, en Francilia.

KONCIZE

KOSMO / SALOZ AQUO SUR SATELITO DI SATURNO
Ciencisti dil asociita misiono Nasa/Esa Cassini 'detektis' unesmafoye, sali di natro en la glaciala partikuli e la vaporo-penachi aquala emisita da Encelade, olqua esas satelito di Saturno. La 'detekto' di saloza glacio indikas ke ica mikra luno shirmas rezervuyo de liquida aquo - forsan mem oceano - sub lua surfaco. La ciencala exploranti ja esante trovinta organika molekuli e fonto de energio, on proximeskas a traci di vivo.

RUSIA-CHINIA / MILITISTAL MANOVRI ASOCIITA DUM JULIO
Ostentante pri lia volo plustretigar lia ligili, ica amba landi esas organizonta, pos tri renkontri (politikala-militistal konsulti, decidi-faco por entraprezor kontre-terorista operaco e la asociita agi), manovri nomizita "Misiono paciganta 2009" sur lia amba teritorii, de la 22ma til la 26ma di julio, segun altaranga responsivo Rusa citita dal agenterio ITAR-TASS.

CHEKIA / ISRAELIDA TOMBEYO PROFANACITA
Vandali eniris Judaa* tombeyo en Uhersky Ostroh, en l'esto di ca lando, dum la nokto de saturdio til sundio. Li ruptis od abatis 63 tombo-petri. La kusto di ca domaji esus de adminime 500.000 kroni (19.200 €). L'aludita profanaco eventis dum ke internaciona konfero pri la fato dil posedaji dil viktimi dil Holokausto esas en Praha ed en Terezin.

Kordiala interretala saluti ad omni. JM :::-:::

Ye la 29ma di junio 2009.

Dio di santra Petrus e Paulus.

DIO-PROVERBO / Ne judikez pri afero segun olua extero.

ZODIAKO / En la zodiako-signo dil Kankro guvernata da la Luno.

VETERO / Blua e sunoza cielo kun tre varma temperaturo, cajorne, en Francilia.

KONCIZE

HONDURAS / MILITISTI ARESTIS PREZIDANTO MANUEL ZELAYA
La chefo dil Hondurasala Stati rezolvabis organizar, hiere, populkonsulto, malgre l'opozado dal armeo, dal Parlamento e da la Suprega Korto, qui judikis ke ica voto esas nelegala. Manuel Zelaya, qua elektesis en 2006 por nerinovigebla ofico-tempo de quar yari, kunvokabis la elekteri por posibligar revizo dil Konstituco en la skopo darfar solicitar duesma ofico-tempo, ye la 29ma di novembro. Quar kombato-grupi de cirkum 200 soldati iris, hiere matine, a lua rezideyo por interpelar lu. Europana Uniono kondamnis, hiere, ica "aresto".

EUROPA / LA OSCE VOLAS DURIGAR REFLEXO PRI LA EUROPANA SEKURESO
La ministri pri Exterlandala Aferi di OSCE (qua inkluzas 56 landi di Europa, Usa e Kanada) rezolvis, kiere, en Korkira, Grekia, durigar la dialogo pri l'evoluciono dil Europana sekureso. Kelka ministri Europana tamen expresis lia skeptikeso opoze a la Rusa propozi pri nova sekureso-organo 'pan'-Europana (de Vladivostok til Vancouver). La ministri di EU/UE cetere intencas koordonar la respondo da lia ambasadisti en Teheran, precipue pri la granto di visti a la Iranana opozanti.

USA / LA REPREZENTANTI ADOPTAS AMBICIOZA LEGO PRI LA KLIMATO
La Chambro dil reprezentanti, kun demokrata majoritato, adoptis la "American Clean Energy and Sekurity Act", qua previdas diminuto dil emisi di CO2 ye 17% til 2020 kompare a la nivelo di 2005, same kam la establiso di merkato por emisi-yuri. "La Kongreso entraprezis la unesma pazi vers vera energiala revoluciono", joyis granda organizuro ambientala Usana, dum ke la aferisti-medii avertis kontre la riski di profito-diminuti e perdo di labor-plasi. Ita lego-projeto examenesos dum la venonta autuno dal Senato.

Kordiala interretala saluti ad omni. JM :::-:::

Ye la 26ma di junio 2009.

Dio di santa Anthelmus.

DIO-PROVERBO / Plu bona flexar kam ruptar.

ZODIAKO / En la zodiako-signo dil Kankro guvernata da la Luno.

VETERO / Sat sunoza ma sturmema vetero, cajorne, en Francilia.

RUSIA / LA POLITKOVSKAIA-PROCESO RIIMPULSESAS
La Suprega Korto Rusa nihiligis, hiere, la absolvo-verdikto di tri suspektati pri la mortigo di la jurnalistino Anna Politkovskaia ed imperis organizor nova proceso. La judiciala oficisti tale grantis vinko a la generala Statala advokataro qua requizitis la nihiligo di ca verdikto ed insistis pri la neceseso di informo-komplemento per alegar proceduro-defekti lor la unesma proceso.

BURMA / VIZITO DAL SPECALA SENDITO DI UN/ONU
La militistala rejimo Burmana konfirmis, hiere, ke la specala sendito dil Unionita Nacioni, Ibrahim Gambari, vartesas cadie en Burma por preparar eventuala vizito dal generala sekretario di UN/ONU, Ban Ki-moon. UN/ONU ne cesis postular la liberigo dil politikala enkarcerigiti en Burma, inkluzite di Aung San Suu Kyi, same kam demokratigo dil politikala sistemo.

GERMANIA / DESKOVRO DI FLUTO EVANTA DE PLU KAM 35000 YARI
Oli skultesis en osto di vulturo, dek-e-du fluto-fragmenti trovesis en la groto di Hohle Fels jacanta en Baden-Wuerttemberg dal esquado dil arkeologiisto Nicholas Conard dil universitato di Tuebingen. Ita fluto esas la maxim anciena muzik-instrumento irgatempe trovata en la mondo. Dum la pasinta septembro, fragmenti di muliero-statueto, anke la maxim anciena en la mondo, ja trovesis en la sama groto.

Kordiala interretala saluti ad omni. JM :::-:::

Ye la 25ma di junio 2009.

Dio di santulo Prosper.

DIO-PROVERBO / Rostita kolombeto ne flugas al boketo.

ZODIAKO / En la zodiako-signo dil Kankro guvernata da la Luno.

VETERO / Sunoz e varma vetero, cajorne, en Francilia.

KONCIZE

CHINIA / LIU XIAOBO ARESTESIS
Lu esas libri-autoro, anciena profesoro, nefatigebla militanto di demokratigo en Chinia depos 1989, la disidento Liu Xiaobo oficale arestesis, hiere, pro subversiva aktivesi, pos plu kam sis monati de enkarcerigo denuncata dal internaciona komunajo e dal defenseri dil homala yuri. Amnesty International quik akuzis akre "ataki asociata a la Statala sekureso por punisar militanti qui nur expresis lia vidpunto".

PAKISTAN / USANA BOMBARDI EN LA NORDO DI CA LANDO
En nestabila areo tribuala di nordwest-Pakistan, la pafi ocidis inter 20 e 30 personi, tale savigis, hiere, porparolanto dil Pakistanana armeo. Usana drono* unesme vizabis refujeyo dil talibana chefo Baitullah Mehsud, tale mortigante sis personi segun Pakistanana sekureso-responsivi. Dum la posdimezo, plusa drono*pafi frapis l'areo, ube eventis la funero dil personi mortigita dum la matino.

INGUSHIA / CHECHENIANA INTERFERADO
La prezidanto di Chechenia, Ramzan Kadyrov, asertis, hiere, ke lu komisesis dal chefo dil Rusa Stato, Dmitri Medvedev, direktar la kombati kontre la rebeli en vicin Ingushia, olqua nun subisas ondo de violentaji, pos la dessucesoza atento kontre la prezidanto di Ingushia, pasinta-lundie. La Ingushiana autoritatozi dementiis ica deklaro ed asertis ke li dominacas la existanta situeso.

Kordiala interretala saluti ad omni. JM :::-:::

Ye la 24ma di junio 2009.

Dio di santa Ioannes Baptisto.

DIO-PROVERBO / L'unesma atesto esas la vesto.

ZODIAKO / En la zodiako-signo dil Kankro guvernata da la Luno.

VETERO / Blua e sunoza cielo kun preske somerala temperaturo, cajorne, en Francilia.

KONCIZE

UKRAINA / LA PREZIDANTALA ELEKTO ESTABLISESIS YE LA 17ma DI JANUARO 2010
L'Ukrainana Parlamento establisis, hiere, ye la 17ma di januaro 2010, la venonta elekto prezidantala. La du chefi dil nuna guvernerio, t.e. la chefa ministro Yulia Timoshenko e la prezidanto Viktor Yushchenko intencas tote aparte esas kandidati. La Parlamento unesme imperis organizor la voti dum oktobro, ma ica dato refuzesis da prezidanto Yushchenko ed anke desaprobesis dal konstitucala Korto.

HISPANIA / NOVA INTERPELO DI ETA-MEMBRI
Supozata aktivisti dil Baska separista organizuro interpelesis lundie vespere en la Hispana Baska lando. Li posedis "plu kam 75 kg de exploziva substanci". Parolesas pri la triesma kombato-grupo supozata dil aludita organizuro terorista qua arestesas dum periodo de kelka monati en Baska lando. La interpelita aktivisti esas un viro e du mulieri.

ISRAEL / TRI YARI DE KAPTITESO POR LA SOLDATO SHALIT
Cento de Israelani blokusis, hiere, la paseyi inter Israel e la Gaza-areo por markizar la tri yari de kaptiteso dil Franca-Israelana soldato Gilad Shalit en ita teritorio sub kontrolo dal Palestinana movado islamista Hamas. Li postulas ristarto dil negociado pri lua fato e demandas ke la Reda-Kruco havez la permiso vizitar lu.

Kordiala interretala saluti ad omni. JM :::-:::

Ye la 23ma di Junio 2009.

Dio di santa Josef Cafasso.

DIO-PROVERBO / Tua filiulo ne esas tua filiulo ma la filiulo di sua tempo. (Konfucius)

ZODIAKO / En la zodiako-signo dil Kankro guvernata da la Luno.

VETERO / Sunoza cielo kun tre milda temperaturo, cajorne, en Francilia.

KONCIZE

SOMALIA / LA PREZIDANTO PROKLAMAS LA ALARMO-STANDO
La Somaliana prezidanto sheikh Sharif Ahmed proklamis, hiere, la alarmo-stando opoze a la pluintensigo dil ataki dal islamista revoltanti qui endanjerigas la existo di lua guvernerio, tale lu anuncis en Mogadiscio. Ita prezidantala dekreto esas ankore aprobota dal Somaliana Parlamento por valoreskar. La extremista revoltanti islamista impulsis depos la 7ma di mayo violentoza atako kontre la moderata prezidanto islamista elektita dum la fino di pasinta januaro.

RUSIA / RUSIA KOMPRAS DEK-E-DU DRONI* DE ISRAEL
Moskva kompris 12 senpilotista avioni de Israel po sumo de 38 milion euri. Ita komprajo posibligos a Rusia cesigar lua tardeso koncerne la fako di aerala exploro, olqua revelesis per la milito en Georgia dum pasinta agosto. Duminstante, la mashini quin la Rusa armeo posedas evas de plu kam triadek yari. Parolesas pri la unesma militistal kontrato inter Israel e Rusia.

HAITI / UN/ONU ESAS KONTENTA PRI LA ELEKTO
La duesma parto de la senatala elekto partala eventis pasinta-sundie. La Konsilantaro elektala di Haiti (CEP) asertis esar kontenta pri la suteno dil elekto , malgre kelka violentoza agi qui produktis adminime un mortinto e plura vunditi. La komisitaro dil Unionita Nacioni por la stabiligo di Haiti (Minustah) anke salutis la bona suteno dil elekto dum tamen remarkar kelka perturbo-probi.

Kordiala interretala saluti ad omni. JM :::-:::

Ye la 22ma di junio 2009.

Dio di santulo Albans.

DIO-PROVERBO / Ta qua fidas Deo ne konstruktis sur la sablo.

ZODIAKO / En la zodiako-signo dil Kankro guvernata da la Luno.

VETERO / Sat sunoza cielo ma kun tre koldeta temperaturo, cajorne, en Francilia.

KONCIZE

RUSIA / LA PREZIDANTO DI INGUSHIA ESIS VIKTIMO DI ATENTO
La prezidanto dil Rusa republiko Ingushia (Kaukazo), Yunus-Bek Evkurov esis viktimo di asasino-probo lundie matine. Lua sanesala stando konsideresas kom grava. Tri de lua korpo-gardisti mortigesis ed adminime tri plusa personi vundesis. Ica prezidanto atingesis per l'explozo di mashino lor lua paso en Nazran, precipua urbo di Ingushia, bombo kun forta potenteso lokizesis en veturo garita an la choseo-bordo.

NIGERIA / PETROLO-DUKTILI DIL FIRMO SHELL ATAKESIS
Ye la 7ma di junio La Movado dil Niger-Delto (Mend) deklarabis la "petrolo-milito". Pasinta-sundie, ica armizita grupo qua plagas la petrolifanta sud-Nigeria revendikis la responsiveso dil ataki kontre la petrolo-duktili di Shell, jacanta en la Stato Rivers. Du de ca ataki konfirmesis da ta Angla-Nederlandana kompanio, ma lu tamen asertas ke lua produkto ne tro nocesas.

IRAK / ATENTO PER BOMBA KAMIONO PRODUKTIS 72 MORTINTI
Apene dek dii ante la retreto dal Usana trupi de la urbi di ca lando, kamiono plenigita per plu kam un tuno de explozili produktis trauro proxim moskeo en Turke-parolanta urbeto shiista di nord-Irak. La maxim recenta bilanco savigas ke esas 72 mortinti e plu kam 200 vunditi. Parolesas pri la maxim sangoza atento facita depos periodo de dek-e-kin monati.

Kordiala interretala saluti ad omni. JM :::-:::

Ye la 19ma di junio 2009.

Dio di santa Romualdus.

DIO-PROVERBO / Yuneso ne prizas oldeso.

ZODIAKO / En la zodiako-signo dil Jemeli guvernata dal planeto Merkuro.

VETERO / Sunoza ma koldeta vetero, cajorne, en Francilia.

KONCIZE

IRAN / "AYATOLLAH" KHAMENEI "NE CEDOS A LA STRADANI"
Lor prediko che l'universitato di Teheran, "ayatollah" Ali Khamenei negas omna eventualeso pri fraudo por la prezidantala elekto, e lu postulis la fino dil manifesti. Il anke qualifikis la manifesti di "grosiera ago facita da uli qui opinionas avide ke Iran esas Georgia" Ica "ayatollah" pluse asertis ferme lua susteno a la rielektita prezidanto.

BENGLADESH / ICA LANDO AVANCIGAS LA HORLOJI YE UN HORO
Pasinta-nokte, la autoritatozi di Bengladesh avancigis la horloji di lia lando ye un horo, tale "chanjante la kloki" quale dicas nia Britaniana amiki. Ica transirado a la somerala tempo duros til la unesma di oktobro. Per ico, la guvernerio di Bengladesh esperas sparar energio e pekunio tre utila dum nia nuna tempo di krizo. La Indiana vicini di Bengladesh egardas kun intereso ita experimento por, eventuale, adoptar anke la sistemo dil somerala tempo.

BRITANIA / LA SALARIATI DI BRITISH AIRWAYS INVITESAS RENUNCAR UN MONATO DE SALARIO
Por trovar solvuro a lua ekonomiala desfacilaji, ica Britaniana kompanio serchas inter lua employati, volontarii qui esus pronta renuncar, dum limizita tempo, lia rekompenso. Ica tempo durus dum du semani til un monato. Pro lua tre mala situeso financala British Airways luktas por lua permano.

Kordiala interretala saluti ad omni. JM :::-:::

Ye la 18ma di junio 2009.

Dio di santa Gregorius.

DIO-PROVERBO / Qui amoretas, intervexetas.

ZODIAKO / En la zodiako-signo dil Jemeli guvernata dal planeto Merkuro.

VETERO / Grizeta e pluvema cielo, cajorne, en Francilia.

KONCIZE

TURKIA / FERMA VOLO
Turkia vizas "kompleta adhero" ad Europana Uniono, tale riasertis la chefo dil Turka diplomacistaro Ahmet Davutoglu, pasinta-mardie, en Berlin. "Ita proceso duras de aproxime 50 yari e ni fine arivis ad ita punto" negociar adhero ad EU/UE, e "Turkis reflektas pri nula alternativo", dicis pluse s-ro Davutoglu lor lua unesma vizito en Germania.

MALI / KOMBATO KONTRE REBELI
La Maliana armeani atakis pasinta-mardie "militistal provizerio" di Al-Qaida en islamala Maghreb en la nordo di ca lando, proxim Aljeria, tale produktante "plura mortinti" en la kampeyo dil islamista kombatanti.

LITUANIA / MANTENO DIL BONA MORI
La parlamento di Lituania adoptis, pasinta-mardie, lego pri la "protekto dil minori", aparte interdiktante facar en ita lando omna "reklamo" por la homeosexuala e poligama relati. 77 deputiti votis por ica lego, 3 opozesis ad ol e 4 abstenis.

Kordiala interretala saluti ad omni. JM

Ye la 17ma di junio 2009.

Dio di santulo Maria-Joseph.

DIO-PROVERBO / Plu bona flexar kam ruptar.

ZODIAKO / En la zodiako-signo dil Jemini guvernata dal planeto Merkuro.

VETERO / Sunoza cielo e varma temperaturo, cajorne, en Francilia.

KONCIZE

ITALIA / ITALIA ACEPTAS RECEVAR TRI KARCERANI DI GUANTANAMO
Pos parolado kun la chefo dil Italiana guvernerio, Silvio Berlusconi, Barack Obama dankis ica chefa ministro pro ilua susteno a lua "klozo-politiko di Guantanamo". Sen indikar l'identeso dil karcerani, lu adjuntis ke tri de li transferesos ad Italia. La dicita transfer-proceso aceleresis, pasinta-semane, per la departo da non de li ad Irak, Chad e Bermudi.

JAPONIA / JAPONIA IMPOZAS KOMPLETA EMBARGO KOMERCALA A NORD-KOREA
La guvernerio di Tokio agis ica rezolvo, hiere, kelka dii pos la rezolvo 1874 votita dal sekureso-Konsilantaro di UN/ONU, qua plufortigis l'embargo pri la armi ed igas plu pezanta la financala puniso kontre la guvernerio di Pyongyang. Tamen, ica embargo havos nemulta konsequi por la guvernerio di Pyongyang, nam Japonia ne plus exportacis multa kozi a Nord-Korea depos la preirinta komercala punisi adoptita en 2006. Fakte, Chinia esas la precipua ekonomiala partenero di Nord-Korea.

CHINIA / MORTIGO PER INJEKTO DIL FUTURA KONDAMNITI A MORTO-PUNISO
Quik de la fino dil yaro 2009, la kondamniti a morto-puniso mortigesos per injekto e ne plus esos fusil-agita, tale rezolvis la Chiniana autoritatozi. Kom unesma lando en la mondo por la nombro de legala mortigi, Chinia deziras generaligar ica metodo "plu humana", segun la raporto, hiere, dal jurnalo CHINA DAILY. Amnesty International asertas ke plu kam 1700 personi mortigesis en Chinia en 2008 kompare a totajo de 2400 en la tota mondo.

Kordiala interretala saluti ad omni. JM :::-:::

Ye la 16ma di junio 2009.

Dio di santa Ferjus e santa Ferreol.

DIO-PROVERBO / Maxim bone ridas qua kom lasta ridas.

ZODIAKO / En la zodiako-signo dil Jemini guvernata dal planeto Merkuro.

VETERO / Sat sunoza vetero, cajorne, en Francilia.

KONCIZE

KANADA / 120 SOLDATI KANADANA SOLDATI MORTIGESIS EN AFGANIA
Kaporalo Martin Dube transmondeskis pasinta-sundie sude di Kandahar, kande un de la du explozili quin lu probis senarmigar explozis. Lo esas la duesma morto di ta semano en la sama regiono, tale irigante til 120 la Kanadana militistal perdaji. Aproxime 2800 soldati Kanadana instalesas en l'areo ube produktesis la mortinti. La komiso di Kanada en Afgania komencis efektigesar en 2002 ed esas finota en 2001.

LIBANO / DESFORTIFIKO DI CELULO DI AL-QAIDA
Libano desfortifikis importanta celulo dil reto Al-Qaida qua projetis atenti en plur Araba landi, segun raporto, hiere, da Kuwaitana jurnalo, citanta la komandanto di la Libanana armeo, Ioannes Kahwaji. La dicita reto komplotis por "desstabiligar Libano, Siria, Irak e la Gulfo-landi, inkluzite Kuwait", ilu adjuntis lor acepto en l'ambasaderio di Libano en Kuwait.

PERU / VIZITO DAL CHEFA MINISTRO EN LA NORDO DI CA LANDO
Yehude Simon iris, hiere, a la nordo di Peru, por entraprezar dialogo kun la Amerik-Indiana komunaji di Amazonia, qui protestas kontre la dekreta legi judikata kom tro komplezanta egarde a l'industrio pri minala extrakto. Afronti produktis triadeko de mortinti komence di ca monato.

Kordiala interretala saluti ad omni. JM :::-:::

Ye la 15ma di junio 2009.

Dio di santa Germana.

DIO-PROVERBO / Sen penoza laboro ne esas profito.

ZODIAKO / En la zodiako-signo dil Jemeli guvernata dal planeto Merkuro.

VETERO / Pluvoza veteracho, cajorne, en Francilia.

KONCIZE

YEMEN / NON HUMANALA LABORANTI RAPTESIS
Li raptesis en montala areo di nord-Yemen. La ministrerio pri Defenso imputas ica rapto a grupo de shiista rebeli, quankam la dicita grupo negas omna responsivesi carelate. La raptiti esas sep Germani - paro, tri filii e du flegistini - un Britaniana injenioro ed un Sud-Koreana docistino. Ita personi esas membri di internaciona organizuro aganta de triadek-e-kin yari en la hospitalo di Saada.

ITALIA / ALARMO PRI KALORIFO-LIGNO RADIOAKTIVA
La Italiana judiciisti imperis la retrosendo de plu kam 10.000 tuni ek mikra ligna cilindri, uzata kom neta kombusteblaji, venanta de Lituania. Konstatesis ke kelka de ta ligna cilindri, kande li analizesis, kontenas cesiumo* 137, t.e. tre toxika substanco povanta produktesar lor nukleala explozo o per kombusto en nukleala reaktoro, di qua la cindri e la fumuri esas danjeroza.

UNIONITA REJIO / LA REJINO HAVOS LEGUM- E FRUKT-GARDENO EN BUCKINGHAM PALACE
Elizabeth II permisis la kultivado, unesmafoye depos la Duesma Mondo-milito, di legum- e frukt-gardeno en la klozajo dil palaco di Buckingham. La aludita gardeno kultivesos sen kemiaji e destinesas helpar por la konservado dil minacata semini. Dum la monato marto, la unesma Damo di Usa, Mikhaela Obama, fosabis la unesma sulko ekologiala di la Blanka-Domo.

Kordiala interretala saluti ad omni. JM :::-:::

Ye la 12ma di junio 2009.

Dio di santa Guido.

DIO-PROVERBO / Saja hundo pos la vundo.

ZODIAKO / En la zodiako-signo dil Jemeli guvernata dal planeto Merkuro.

VETERO / Grizeta cielo kun milda temperaturo, cajorne, en Francilia.

KONCIZE

CHINIA / LA KOMONESTRO DI SHENZEN REVOKESAS PRO SUBORNO
Xu Zongheng, evo 53 yari, komonestro di ta frontieral urbo (11 milion habitanti), olqua esas kun Hong Kong vetrino dil politiko di la ekonomiala reformi, revokesis pro "grava violaci di diciplino", tale dissavigis hiere la oficala agenterio NOVA CHINIA. Olu ne precizigis la motivo di ta revoko, ma l'akuzo di "grava violaco di la diciplino dil Partiso (komunista)" referas ofte a kazi di suborno.

UNIONITA REJIO / STRIKO CHE LA LONDONANA SUBTERA TRENO
Dum ke striko dil employati dil "London underground" pluduras depos pasinta-mardie, la komonestro di London demandis pardono a la uzanti. "Me prizentas mea exkuzi pro to quo reprezentis, multakaze, fonto de importanta desagreablaji a la homi irante a lia laboreyo", tale deklaris Boris Johnson. Ita striko esas la unesma di tala ampleso che la subtera treno di London depos 2004.

USA / PAFADO EN MUZEO
L'Usana prezidanto asertis esar "shokata ed afliktata" pro la pafado eventinta pasinta-merkurdie en la muzeo di la Holokausto di Washington, ye aproxime 500 metri dil Blanka-Domo. Ita pafado produktis la morto di sekureso-agento : "Me shokesas ed afliktesas per la pafado di cadie en la memor-muzeo di la Holokausto. Ita desnobla ago memorigas da ni ke ni devas esar vigilanta opoze a l'antisemidismo ed a la prejudiki sub lia omna aspekti". Segun la Usana informili la atakanto esas okadekyarulo partisano di la superioreso di la blanka raso.

Kordiala interretala saluti ad omni. JM :::-:::

Ye la 11ma di junio 2009.

Dio di santulo Barnabas.

DIO-PROVERBO / Homo fidas, fortuno decidas.

ZODIAKO / En la zodiako-signo dil Jemini guvernata dal planeto Merkuro.

VETERO / Alternante sunoza e grizeta cielo, cajorne, en Francilia.

KONCIZE

SUDAN / DEBUTO DI SENARMIGO EN LA SUDO DI CA LANDO
La senarmigo di ex-kombatanti implikata en la intercivitana milito inter nord- e sud-Sudan komencis, hiere, en sud-Sudan. Ita milito qua esas l'origino di du milion mortinti e quar milion personi ekpulsita dum periodo de du yardeki finis en 2005. E 180.000 kombatanti mustas subisar programo di "senarmigo, desmobilizo e rimembresko di la civila vivo".

UKRAINA / MORTIGERA ACIDENTO EN MINEYO
Adminime non ministi mortigesis e quar plusa konsideresis kom desaparinta, hiere, pos acidento en karbonmineyo en Doneck, est-Ukraina, segun la maxim recenta bilanco transmisita dal autoritatozi. La viktimi asfixiesis od aplastesis lor la krulo dil miney-galerii. Pro ke oli recevas tre poka pekunio ed esas ofte oldacha, la Ukrainala mineyi esas konstante la ceneyo di mortigera acidenti.

IRAK / ATENTO PER BOMBA VEHILO
Adminime 28 personi ocidesis, hiere, lor atento per bomba vehilo che merkato, en regiono qua havas la reputeso esar kalma en sud-Irak, proxim Nassiriya, ye tri semani ante la retreto dal Usana trupi de la diversa loki di ca lando. Ita interimala periodo qua lasos a la Irakana sekureso-trupi la tasko asumar la necesa laboro en 15 de la 18 provinci di ca lando, timigas rikresko dil violentaji.

Kordiala interretala saluti ad omni. JM :::

Ye la 9ma di junio 2009.

Dio di santa Efrem.

DIO-PROVERBO / Vivez mizere, ma vivez libere !

ZODIAKO / En la zodiako-signo dil Jemini guvernata dal planeto Merkuro.

VETERO / Pluvoza vetero, cajorne, en Francilia.

KONCIZE

CHINIA / LA CHINIANA GUVERNERIO OPOZESAS A LA TITULO DI "HONOR-CIVITANO" GRANTITA DA PARIS A LA DALAI-LAMA
Chinia ferme kondamnis, hiere, la ripozo di ca titulo dal urbo Paris a la spiritala chefo dil Tibetani. "Lo esas grava intruzo en la Chiniana-Franca relati", tale substrekizis la Chiniana ministrerio pri Exterlandala Aferi en Beijing (Pekino) per opinionar ke ico "povos nur nocar la relati di Paris kun la Chiniana municipi".

KOSOVO / POSIBLE ON DIMINUTOS BALDE LA NOMBRO DE NATO/OTAN-TRUPI EN KOSOVO
La chefa komandanto dil organizuro dil kontrato di Nord-Atlantika en Europa rekomendis diminuto de triimo de la 160.000 soldati di NATO/OTAN en Kosovo, segun altaranga responsivo Usana. La ministri pri Defenso di NATO/OTAN rezolvos pri ico lor kunveno en Bruxelles ye la 11ma e 12ma di junio. La NATO-OTAN-trupo, la Kfor, halte-restadas en Kosovo depos 1999.

UKRAINA / ACIDENTO EN KARBON-MINEYO
Dek ministi duris konsideresar kom desaparinti, hiere, konseque di metano*-forjeto eventinta ye 1300 metri de profundeso, en karbon-mineyo en Doneck, est-Ukraina. Sume, 51 ministi laboris en ita areo. Inter li, 39 povis riacensar surface, de li un esis vundita. Du senviva korpi anke deskovresis. La fato dil cetera dek laboranti duris esar necerta, hiere posdimeze.

Kordiala interretala saluti ad omni. JM :::-:::

Ye la 8ma di junio 2009.

Dio di santa Maximianus.

DIO-PROVERBO / Bone ita sidas, a qua la fato ridas.

ZODIAKO / En la zodiako-signo dil Jemeli guvernata dal planeto Merkuro.

VETERO / Griza e pluvoza cielo kun koldeta temperaturo, cajorne, en Francilia.

KONCIZE

NORD-KOREA / SUCEDO POR LA JUNIORA FILIULO DI KIM JONG-IL
La seniora filiulo dil Nord-Koreana politikala direktanto Kim Jong-il konfirmis, hiere, ke lua juniora fratulo, evanta 26 yari, esas sucedonta a lia patro kom chefo dil komunista rejimo, lor interviuvo grantita en Macao a Japoniana kanalo televizional. La Sud-Koreana jurnalaro, citante deputito, savigis pasinta-mardie ke Kim Jong-il, di qua la sanesala stando esas objekto di rumori, prenominis lua triesma filiulo Kim Jong-un por sucedar ad ilu.

UKRAINA / NOVA KOALISURO MINACESAS
La chefo dil Partiso dil regioni, Viktor Ianukovich, refuzis, hiere, klefa kondiciono (Konstituco-chanjo por elektigor future la prezidanto dal Parlamento) por federar su a la parlamentala grupo dil chefa ministro, Iulia Timochenko, tale igante plu fora la perspektivo di nova guverneriala koalisuro. Prezidantala elekto previdesas komence dil venonta yaro en Ukraina.

RUSIA / NOVAIA GAZETA PREMIIZESAS
La Rusa jurnalo di opozantaro NOVAIA GAZETA, qua employis la Rusa jurnalistino asasinata Anna Politkovskaia, recevis hiere en Helsinki la premio "Free Media Pioneer Award" olqua atribuesas singlayare da Instituto internaciona por la jurnalaro.

Kordiala interretala saluti ad omni. JM :::-:::

Ye la 5ma di junio 2009.

Dio di santa Bonifatius.

DIO-PROVERBO / Se du su amoras, li ridas e ploras.

ZODIAKO / En la zodiako-signo dil Jemini guvernata dal planeto Merkuro

VETERO / Sunoza cielo kun koldeta temperaturo, cajorne, en Francilia.

KONCIZE

LIBANO / DEPUTITAL ELEKTO VENONTA-SUNDIE
Kelke plu kam 3,2 milion Libanani advokesas votar dum la venonta sundio por rinovigar la Parlamento. Li devos elektar 128 deputiti repartisita egale inter Kristani e Mohamedisti por ofico-tempo de kin yari.

UNIONITA REJIO / DUMVIVA KARCERO-PUNISO POR LA MORTIGERI DI DU FRANCA STUDENTI
La du Britaniani akuzita ocidir sovaje la Franca studenti Laurent Bonomo e Gabriel Ferez, en 2008 en London, agnoskesis kom kulpanti pri omna akuzi mantenata kontre li : mortigi, sequestri, domfurto e volata incendio. Ita verdikto havas infalible kom konsequo dumviva karcero-puniso, a qua adjuntesis sekureso-punisi ye triadek-e- kin yari e quaradek yari.

SRI LANKA / NAVO PRI HUMANALA HELPO HALTIGESIS
La navala trupi di Sri Lanka haltigis e sizis navo veninta de Britania, olqua kargesis per kozi de humanala helpo e qua fretesis dal Tamula "diaspora". La dicita navo probis enirar nelegale la marala teritorio apartenanta a ca insulo. Sri Lanka proklamis ye la mezo dil monato mayo lua militala vinko kontre la separista rebeli Tigri di liberigo di Eelam Tamula, per ico lu finis triadek-e-sep yari de milito.

Kordiala interretala saluti ad omni. JM :::-:::

Ye la 4ma di junio 2009.

Dio di santa Klotilda.

DIO-PROVERBO / Qua bona esas, anke amesas.

ZODIAKO / En la zodiako-signo dil Jemeli guvernata dal planeto Merkuro.

VETERO / Blua e sunoza cielo kun koldeta temperaturo, cajorne, en Francilia.

KONCIZE

ALJERIA / ATENTO PRODUKTIS DEK MORTINTI
Ok Aljeriana policani e du docisti mortigesis mardie dum la posdimezo lor atento per bombo vizanta konvoyo de vehili en Timezrit proxim Boumerdes (ye 50 km este de Aljer) tale savigis plura jurnali inter qui LIBERTE ed EL WATAN (France-parolanta e privata jurnali). Ica atento, di qua nulu revendikis la responsiveso, esas la maxim mortigiva en Aljeria pos olta qua, ye la 23ma di februaro, produktabis non mortinti en la regiono di Jijel (ye 360 km este de Aljer).

MOLDAVIA / SUPRESO DIL PARLAMENTO
La Parlamento di Moldavia, dominacata dal komunista Partiso, ne sucesis, hiere, elektar la nova prezidanto di ca lando por sucedar Vladimir Voronine, to quo segun la Konstituco devus duktar al supreso dil asemblo. La tri partisi dil opozantaro reprezentata en la Parlamento boikotis la voto, dum ke kune li disponas blokusanta minoritato de 41 deputiti ye 101.

FRANCIA / SARKOZIUS RECEVAS LA CHEFO DIL IRANANA DIPLOMACISTARO
Nikolaos Sarkozius (Nicolas Sarkozy) recevis, hiere posdimeze, la Iranana ministro pri Exterlandala Aferi, Manusher Mottaki, por diskutar pri la riimpulso dil dialogo inter Iran e la granda povoza landi koncerne lua nukleala programo. Lo esis la unesma vizito da Iranana responsivo altaranga che la palaco di Elysees depos la Franca prezidantala elekto di mayo 2007.

Kordiala interretala saluti ad omni. JM :::-:::

Ye la 2ma di junio 2009.

Dio di santa Marcelinus e Petrus.

DIO-PROVERBO / Se nur la yuni savus e la oldi povus !

ZODIAKO / En la zodiako-signo dil Jemeli guvernata dal planeto Merkuro.

VETERO / Blua e sunoza cielo, cajorne, en Francilia.

KONCIZE

HISPANIA / NULA NELEGALA ENMIGRANTO EN LA INSULI KANARII DE DU MONATI
Nula batelo de nelegala enmigranti abordis la Hispana arkipelago Kanarii depos la pasinta 30ma di marto. La guvernerio di Madridi opinionis, hiere, ke ico esas parte la rezulto di kontrati facita kun plura Afrikana landi qui esas la origino- o transito-loki dil nelegala enmigranti, inter li esas Senegal, Maroko, Mauritania o Mali.

AUSTRALIA / PLU KAM 400 KAZI DE GRIPO A H1N1
La nombro de kazi di Mexikana gripo superiris 400, hiere, en Australia, olqua tale divenas la maxim atingata lando di ca parto dil mondo. Ed ol esas la quaresma maxim atingata lando en la mondo, dop Usa, Mexikia e Kanada. La dicita viruso kontaminis 15.510 personi en 53 landi e produktis 99 mortinti, segun la bilanco publikigita, pasinta-venerdie, dal Mondala Organizuro pri Saneso.

INDIA / JUDICIALA REZOLVO FAVORE A LA MULIERI
La Suprega Korto judikis, hiere, ke omna viri qui agnoskesas kom kulpoza pri la mortigo di lia spozini pro ke elu ne adportis sua doto meritas kondamnesar ye morto-puniso, tale judiciante la rekurso da Mahender Kumar Gulati, viro kondamnita pro ocidir ilua spozino. "Ico esas ago kontrea a la civilizo. Quale on povas facar lo ? Ni havos nul indulgo egardante vu", la judiciisti substrekizis.

Kordiala interretala saluti ad omni. JM :::-:::