IDO • Linguo Internaciona • Universala • Neutra • Facila


English Deutsch Français Plusa lingui

Novajeti da Sro Martignon


Vu esas la esma
vizitanto di ca ret-situo

Specala ofro

Ido-Situi

Kurseto por Infanti da A. Martinez (Hispania), PDF-file 2Mb

Elektronikala dicionarii

Ido-uzantogrupi

Diversa texti, literaturaji ed Idokursi

Plusa Situi

Idofonduri

Wiki interna

modifikez flanko-bendo

Impressum: / Impreso:

Inhaber der Internetpräsenz www.ido.li:
propietanto dil retsituo www.ido.li

Deutsche Ido-Gesellschaft e.V.
Germana Ido-Societo r.a.
c/o ver.di Berlin
FB 8 / AG Ido
Köpenicker Str. 30
D- 10179 Berlin

Onlinekontakt
Interreta kontaktformulario

Administrator der Internetpräsenz www.ido.li:
administranto dil ret-situo www.ido.li

Frank Kasper
Breitscheidstr. 22
D- 90459 Nürnberg

Onlinekontakt
Interreta kontaktformulario

Novajeti da Sro Martignon

Ye la 30ma di novembro 2009

Dio di santa Andreas.

DIO-PROVERBO / Ta qua laudas mal ago, asumas ipse la responso pri ca ago. (Araba proverbo)

ZODIAKO / En la zodiako-signo dil Arkero guvernata dal planeto Jovo.

VETERO / Griza cielo e koldete humida temperaturo, cajorne, en Francilia.

KONCIZE

BENGLADESH / LA KULBUTO DI PAROMO EFEKTIGAS ADMINIME 50 MORTINTI
La sokurseri duris, hiere, forprenar kadavri de paromo quo kulbutis, pasinta-venerdie, en Bangladesh, tale irigante la provizora bilanco di ca katastrofo til 51 mortinti, segun indiko da la lokala policani. Ita acidento, quo esas la temo di inquesto, 'okuris' dum ke la MVCoco-4, olqua esas un de la maxim granda navi por fluviala vehado di ca lando, arivis en la insulo Bhola, sud-Bengladesh, dum transportar milo de personi.

GERMANIA / KOMENCO DIL PRECESO DI DEMJANJUK QUA PARTOPRENIS LA HOLOKAUSTO
John Demjanjuk, evo 89 yari, judiciesas quik de cadie en Muenchen pro partoprenir la mortigo di 27.900 Yudi*. Ita viro de Ukrainana origino minacesas per la enkarcerigo dum perpetueso se la kriminala tribunalo decidas ke il esis vere gardisto, en 1943, en la extermino-kampeyo di Sobibor, jacanta nunadie en Polonia. Il ekpulsesis dum pasinta mayo de Usa, ube lu vivis depos 1952, kom konsequo di longatempe durinta judiciala batalio.

SAUDIA ARABIA / IRACO DIL SAUDIANI KONTRE LA AUTORITATOZI PRO LA INUNDI
Saudiana advokato anuncis, pasinta-saturdie, lua intenco persequar judiciale la provinco Jeddah dum ke mili de Saudiani expresis sur "Facebook" lia iraco kontre la autoritatozi pos la inundi qui efektigis plu kam 100 mortinti casemane. Torentatra pluvo falis, pasinta-merkurdie, adsur Jeddah, portuala urbo dil Reda Maro, tale inundante stradi e kaptante multanombra personi en lia vehili.

Kordiala interretala saluti ad omni. JM :::-:::

Ye la 24ma di novembro 2009

Dio di santa Flora.

DIO-PROVERBO / Plu bona esas spozigar sagaca muliero kam richa muliero.

ZODIAKO / En la zodiako-signo dil Arkero guvernata dal planeto Jovo.

VETERO / Grizacha cielo ma milda temperaturo, cajorne, en Francilia.

KONCIZE

ALJERIA / DU EX-KARCERANI DI GUANTANAMO ABSOLVESAS EN ALJER
Li esis enkarcerigita dum sep yari sen judicio en la militistal Usana karcero diGuantanamo pro ke li arestesis en Pakistan, Faghul Abdelli e Mohamed Terara. Ita amba viri akuzesis pri aparteno a terorista grupo e li livresis dum agosto 2008 al Aljeriana autoritatozi. Nun, li esas definitive libera. La generalaprokuratoro dil tribunalo di Aljer requizitis kontre lipuniso ye 20 yari de karcero.

CHINIA / TRI YARI DE KARCERO-PUNISO POR LA DISIDENTO HUANG QI
Huang Qi, qua arestesis pasinta-yare, pos lua kritiki kontre la autoritatozi seque di la tertremi en Sichuan, kondamnesis hiere pro "nelegala posedo di Statala sekretaji". Lua advokato, Mo Shaoping, denuncis ica kondamno, asertante ke la imputata dokumenti esas trovebla che la interreto, dum refuzar dicar plu multe pri lia kontenajo.

IRAN / SUD-AMERIKANA TURO POR MAHMUD AHMADINEJAD
L'Iranana prezidanto arivis hiere en Brazilia-lando por kontroversata vizito dominacata per la questiono pri lo nukleala e la plufortigo dil ekonomiala relati. Mahmud Ahmadinejad serchas susteni che Latinid-Amerikana guvernisti sinistrana : pos Brazilia-lando, il esus ironta a Venezuela ed a Bolivia.

Kordiala interretala saluti ad omni. JM :::-:::

Ye la 23ma di novembro 2009

Dio di santa Klemens.

DIO-PROVERBO / Omni ne povas omno (latina proverbo).

ZODIAKO / En la zodiako-signo dil Arkero guvernata dal planeto Jovo.

VETERO / Griza e pluvema cielo, cajorne, en Francilia.

KONCIZE

INDONEZIA / NAUFRAJO DI PAROMO
Adminime 26 personi mortis e plu kam 200 plusa homi sokursesis sur la maro pos la naufrajo, hiere, di Indoneziana paromo, viktimo dal mala vetero inter Singapour e l'insulo Sumatra. La bilanco dil viktimi povus mem augmentarmotive di la necerteso pri la nombro de personi enirinta ica paromo havanta kapaceso ye 273 pasajeri ed efektiganta la junto inter Indoneziana insuli.

GERMANIA / FRAUDOZA PARII
La Germana policani finis, pasinta-jovdie, la maxim grand afero de fraudoza parii irgatempe deskovrita en Europa. Ol atingis plu kam 200 futbalo-"match"-i en non landi. La 300 policani laboranta pri ica afero realigis l'arestodi 15 personi en Germania ed en Suisia. Kinadeki de perquiziti agesis e plu kam un milion euri sizesis.

HISPANIA / FRANCO-ISTA KUNVENO
Plura centi de Hispana ed Europana dextrani, havanta la nostalgio dil rejimo di Francisco Franco, kunvenis en Madrid, hiere, okazione dil 34ma aniversario di la morto di ca Hispana diktatoro. Ita tradicionala kunveno, organizita segun advoko dal falangisti e da asociuro di anciena kombatanti Franco-ista, 'okuris' en kalmeso e kun tre diskreta policana prezenteso.

Kordiala interretala saluti ad omni. JM :::-:::

Ye la 20ma di novembro 2009

Dio di santa Edmundo.

DIO-PROVERBO / Omna pordin apertas pekunio.

ZODIAKO / En la zodiako-signo dil Skorpiono guvernata dal planeto Plutono.

VETERO / Grizacha cielo, cajorne, en Francilia.

KONCIZE

TUNIZIA / LA PROCESO DI TAWFIK BEN BRIK KOMENCIS HIERE EN TUNIS
Pos du hori de pledi, la judiciisto ajornis la verdikto ye la 26ma di novembro. Ica Tuniziana jurnalisto, qua dum plura yari esis korespondanto di la Franca diala jurnalo LA CROIX, minacesas per kin yari de karcero-puniso pro "atako". "Lo esas falsa atako, organizita por trompar", Tawfik Ben Brik deklaris lor la proceso per substrekizar ke il punisesis pro lua redaktita texti kontre prezidanto Ben Ali.

INDIA / REVOLTO DAL PRODUKTERI DI KANO-SUKRO
Mili de li manifestis, hiere, en New Delhi. La rurani, majoritate veninta per autobuso de la vicina Stato Uttar Pradesh, olqua esas la maxim importanta Stato produktera di kano-sukro, postulis augmento dil preci nun establisista dal guvernerio ye 129,84 "rupi"-i (1,86€) po 100 kg. La Parlamentani mustis supresar la unesma jorno dil vintro-sesiono. La iraco dil sukro-produkteri povus difuzesar a la frumento- ed oleifanti-produkteri.

Kordiala interretala saluti ad omni. JM :::-:::

Ye la 19ma di novembro 2009

Dio di santulo Eudes.

DIO-PROVERBO / Nulo nova sub la suno.

ZODIAKO / En la zodiako-signo dil Skorpiono guvernata dal planeto Plutono.

VETERO / Nebulo dum la matino e pose klara e sunoza blua cielo, cajorne, en Francilia.

KONCIZE

SAUDIA ARABIA / DISKUTO INTER NIKOLAOS SARKOZIUS E REJO ABDALLAH
L'aludita diskuto eventisen la "ranch" dil Saudiana suvereno en Jenadriya, proxim Riyad, ube la prezidanto di Francia pasis la nokto. Amba viri "agnoskis ke oportas havar rapide inicii por riimpulsar la paco-proceso", segun la informi dal Elysee-palaco. Posibla kontrati anke esis ye la jorn-ordino dil diskuti precipue la konstrukto di TGV (Treno kun Granda Rapideso).

SOMALIA / LA KAPITANO DI KOMERCO-NAVO MORTIGESIS
La kapitano di komerco-navo kaptita pasinta-lundie da Somaliana pirati proxim la insuli Seychelles mortis pro la konsequi di vunduri per kugli, segun deklaro da porparolanto dil pirati. Theresa VIII, transportanta kemiaji , vidigante la flago dil insuli Virgini ed apartenanta ad armatoro di Singapour, kaptesis per asalto da pirati opoze a la litoro dil insuli Seychelles, ol kontenis en lua internajo 28 Nord-Koreana maristi.

GERMANIA / LA CHEFI DI RWANDANA REBELI ENKARCERIGESIS
La chefo dil demokrata Trupi di liberigo di Rwanda, Ignace Murwanashyaka, e lua adyunto Straton Musoni, arestita mardie en Germania pro milit-krimini kontre la humaneso, enkarcerigesis. Li akuzesas organizir kriminala agi facita dal kombatanti dil FDLR, rebeli kun Hutua majoritato instalita este dil demokrata Republiko di Kongolando, frontieral an Rwanda.

Kordiala interretala saluti ad omni. JM :::-:::

Ye la 18ma di novembro 2009

Dio di santa Alda.

DIO-PROVERBO / Per la kapo putras la fisho.

ZODIAKO / En la zodiako-signo dil Skorpiono guvernata dal planeto Plutono.

VETERO / Kelkete sunoza vetero, cajorne, en Francilia.

KONCIZE

GERMANIA / MANIFESTO DE STUDENTI
Deki de universitati blokusesis, hiere, en Germania, e manifesti organizesis en la urbegi da studenti qui postulas plu multa moyeni por la universitati. Sur la banderoli, la manifestanti postulis pekunio por "la instrukto prefere kam por la banki". La studenti denuncas anke Europana harmoniigo di la universitatal docado, ico esas revoluciono por Germania ube on darfas frequentar la universitato til 28-29 yari.

RWANDA / ABSOLVO DI SACERDOTO AKUZATA PRI GENTOCIDO
La punisala Tribunalo internaciona por Rwanda (TPIR) absolvis, hiere, katolika sacerdoto, Patro Hormisdas Nsengimana, qua persequesis pro gentocido e krimini kontre la homaro. Ita anciena rektoro dil Kolegio di Kristo-Rejo di Nyanza, il pledabis kom ne-kulpozo. Pasinta-lundie, la TPIR nihiligabis ye apelo la kondamno ye 20 yari de karcero-puniso aplikata unesme a Protais Zigiranyirazo , bofrato dil pasinta prezidanto Juvenal Habyarimana, ilqua liberigesis.

Kordiala interretala saluti ad omni. JM :::-:::

Ye la 17ma di novembro 2009

Dio di santa Elizabeth.

DIO-PROVERBO / Inter du malaji pozita, la minim grandan onu selektez.

ZODIAKO / En la zodiako-signo dil Skorpiono guvernata dal planeto Plutono.

VETERO / Grizeta cielo kun milda temperaturo, cajorne, en Francilia.

KONCIZE

SUDAN / KONSULTI POR LA PACO EN DARFUR
Membri dil civila socio di Darfur kunvenis, hiere, en Qatar ante la komenco dil negociado inter la rebeli e la guvernerio Sudanana, quo balde esas komenconta. La Movado por la yusteso e l'egaleso (JEM), olqua esas la maxim aktiva de la rebela movadi di Darfur , signatis dum februaro pasinta "asento-kontrato di fido" kun la guvernerio di Khartum, tale apertante la voyo al paco en ita regiono di west-Sudan.

CHINIA / BARACK OBAMA REKOMENDAS LA EXPRESO-LIBERESO
Ante irar a Beijing (Pekino) por politikal diskuti, la Usana prezidanto rekomendis, hiere, en Shangai, la libereso di expreso, di kulto e di informo, inkluzite che la interreto. Okazione di lua unesma vizito en Chinia, il quik aludis la homala yuri, responde a questioni da studenti e da interretala naviganti. La oficala situo* dil oficala agenterio Nova Chinia saciesis perpublikigar raporto pri ca evento.

USA / YEMENANA "IMAM" KORESPONDIS KUN LA MORTIGERO DI FORT HOOD
Anwar Al Aulaqui, extremista "imam" suspektata havir ligili kun Al-Qaida, qualifikis kom "heroulo" Nidal Hassan, la psikiatriisto, qua ocidis 13 Usana soldati che militistal provizerio di Texas, ye la pasinta 5ma di novembro. Ita "imam" naskinta en Usa predikis en moskeodi Virginia frequentata da Nidal Hassan, ante irar a Yemen, lu explikas en interviuvo publikigita da la WASHINGTON POST.

Kordiala interretala saluti ad omni. JM :::-:::

Ye la 16ma di novembro 2009

Dio di santa Margarita.

DIO-PROVERBO / L'avaro indijas omno, la povro indijas nemulto, la sajo indijas nulo. (Latina proverbo)

ZODIAKO / En la zodiako-signo dil Skorpiono guvernata dal planeto Plutono.

VETERO / Grizega cielo, cajorne, en Francilia.

KONCIZE

NEDERLANDO / TAXO YE KILOMETRO POR LA VETURI
Nederlando enduktos en 2012 taxo segun la parkurita kilometri. Ita aranjuro mustas diminutar ye duimo la trafik-obstrukti e ye 10% la CO2- forjeti. La mez-nombra preco po kilometro por familiala automobilo esos ye 3 centimi en 2012 til atingar 6,7 centimi en 2018. Inverse, l'imposto pri la posedo di veturoed olta pri la kompro di vehilo, qui reprezentas mez-nombre 25% de la preco di nova automobilo, supresesos.

DOMINIKANA REPUBLIKO / SIGNATO DI JUDICIALA INTERKONSENTO-KONTRATO KUN FRANCIA
La Franca autoritatozi e Dominikana signatis pasinta-venerdie interkonsento-kontrato qua permisos a la karcerani di amba landi efektigar lia puniso en lia origino-lando. Ita aranjuro esus profitoza a 19 Franci enkarcerigita en ita Antili-lando jacanta sur la estala parto dil insulo Hispaniola. La Dominikana Republiko esas la 20ma lando establisanta taspeca partenereso kun Francia.

TAILANDO / MANIFESTO KONTRE L'ANCIENA CHEFA MINISTRO
Dek-e-sep mil "flava kamizi" royalista manifestis, hiere, en Bangkok kontre l'anciena chefa ministro Thaksin Shinawatra, di qui li postulis l'aresto,per protestar kontre lua recenta sejorno en vicina Kambodja. Lu nominesis kom personala konsilanto dil forta statala viro di Kambodja, Hun Sen, e jus pasis ibe kin dii dum multopleskar posturi e deklari provokanta kontre la Tailandana autoritatozi.

Kordiala interretala saluti ad omni. JM :::-:::

Ye la 13ma di novembro 2009

Dio di santa Bricius.

DIO-PROVERBO / Milito e mizero esas jemeli.

ZODIAKO / En la zodiako-signo dil Skorpiono guvernata dal planeto Plutono.

VETERO / Grizeta cielo kun sunoza epizodi e milda temperaturo, cajorne, en Francilia.

KONCIZE

HISPANIA / "PUBLIKA PEKO"
La Hispana deputiti qui votos favore a la lego-projeto pri liberaligo dil abortigo, "esos objektale en stando di publika peko e ne darfos admisesar a la santa komunio", tale asertis pasinta-merkurdie la generala sekretario dil episkopala konfero Hispana, Juan Antonio Martinez Camino. La katoliki ne darfas apogar ita lego-projeto, nek votar favore ad olu, ilu substrekizis, dum tamen savigar ke ico ne signifikas ke li esos exkomunikata, nam "l'exkomuniko previdesas en la Kodexo dil kanonala yuro por ti qui kunlaboras aktivelor la praktiko di abortigo".

AFRIKA / ADVOKO A REPENTADO
La tradicionala chefi Afrikana devus demandar pardono pro la rolo quon lia ancestri pleis koncerne la komerco dil sklavi, tale opinionis publike pasinta-merkurdie organizuri por la defenso dil homala yuri en Nigeria, pos la exkuzi-prizento al Afrikani dal Usana Senato dum junio ed olta dal ex-chefa ministro Britaniana Antonius Blero (Tony Blair). Deko de asociuri dicis pluse : "Ni ne povas pludurigar akuzar la blanka homi dum ke la Afrikani, ed aparte la tradicionala chefi ne esas nereprochebla." Nome li partoprenis la komerco dil sklavi dum "helpar sistematre entraprezar inkursi e rapti (...) en la sendefensa komunaji (...) e pose kambiar li kun Europana, Amerikana e cetera kunlaboranti".

SOMALIA / PROJETATA OPERACO KONTRE LA PIRATI
La Hispana guvernerio volas ke la navala trupi di EU/UE blokusez la portui di Somalia de-ube la granda majoritato del pirati-ataki entraprezesis en l'Indiana Oceano, tale anuncis pasinta-merkurdie la ministro pri Defenso, Carme Chacon. Ma EU/UE ne havas "navala trupi", nek ministro pri Defenso por implikar ol.

Kordiala interretala saluti ad omni. JM :::-:::

Ye la 12ma di novembro 2009.

Dio di santa Josafato.

DIO-PROVERBO / Taurin onu ne povas melkar.

ZODIAKO / En la zodiako-signo dil Skorpiono guvernata dal planeto Plutono.

VETERO / Grizeta e tristeta cielo, cajorne, en Francilia.

KONCIZE

BRAZILIA-LANDO / QUARIMO DE CA LANDO VIVAS EN L'OBSKURESO
Fluo-seko giganta debata a paneo sen precedento che 'hidroelektrala' digo plunjigis en l'obskureso quarimo de la habitantaro di Brazilia-lando vespere pasinta-mardie, tale paralizante la maxim grand urbi di ca lando e pozante en alarmo-stando la policani pro timo de krimini-ondo. 50 milion personi, t.e. quarimo de la habitantaro di Brazilia-lando (195 milion habitanti); subite esis sen elektro, sen interreto e mem kelkafoye sen telefono.

USA / LA "SNIPER" DI WASHINGTON MORTIGESIS
John Allen Muhammad, qua konocigesis en la tota mondo en 2002 kom la "sniper" di Washington pro terorizir ita Usana chefurbo per ocidar segun la chanco dek personi dum periodo de tri semani, mortigesis segun judicio, mardie vespere, per mortiganta injekto en Virginia, est-Usa. La suprega Korto refuzabis, pasinta-lundie, la lasta rekurso di ta nigrulo, evanta 48 yari, kondamnita ye morto-puniso en 2004 en Virginia.

KANADA / KONTRE-MONARKIISTA MANIFESTI
Plu kam 200 personi manifestis, hiere, en Montreal kontre la vizito da princo Karolus (Charles) e di lua spozino Camilla. Ita manifesto organizesis da nacionalista grupeto, "le Reseau de resistance du Quebecois" (la Rezisto-reto di Kebekia), qua asertas motivizesar per la tradiciono historiala di refuzo dil Britaniana dominaco establisita du yarcenti e duimo ante nun.

Kordiala interretala saluti ad omni. JM :::-:::

Ye la 10ma di novembro 2009

Dio di santa Leo.

DIO-PROVERBO / Plu bona esas esar felica en dometo kam desfortunoza en palaco.

ZODIAKO / En la zodiako-signo dil Skorpiono guvernata dal planeto Plutono.

VETERO / Griza cielo e koldeta temperaturo, cajorne, en Francilia.

KONCIZE

BULGARIA / ONDO DE RAPTI
La rapti multopleskas en Bulgaria, segun la direktero dil prikrimina polico, Anguel Antonov. En 2009, la policani ja inquestis pri 23 rapti, de qui adminime sep esis l'objekto di ransono-demando. L'extorso ye rapto anke praktikesas : aferisti minacesis per la rapto di membro di lia familio se li ne pagas pekunio-quanti iranta de 100.000 til 600.000 €.

INDONEZIA / MORTIGERA SISMO
Adminime un persono mortigesis e 88 plusa homi vundesis lor sismo de amplitudo 6,7 qua frapis, hiere, la Indoneziana insulo Sumbawa, este de Bali. Ultre lo, adminime 14 personi mortis lor tereno-glitado en est-Indonezia. Indonezia esas la renkontro-loko di kontinentala plaki, to quo produktas forta sismala aktiveso.

RUSIA-USA / LA RUSA-USANA NEGOCIADO RISTARTAS
La renkontri pri la nukleala senarmigo ristartis, hiere, en Geneve por periodo de un monato. Ita nova negociado destinesas remplasigar la Kontrato pri nombro-diminuto dil strategial armi (START 1) signatita en 1991 e qua finas ye la 5ma di decembro. Ye min kam un monato dil expiro-dato, la partisi savigas ke on progresas pri ica interkonsento, olqua divenis la simbolo di la riimpulso di la Rus-Usana relati cesinta dum la tempo di Bush.

Kordiala interretala saluti ad omni. JM :::-:::

Ye la 9ma di novembro 2009

Dio di santa Theodorus.

DIO-PROVERBO / Pekunion atraktas pekunio.

ZODIAKO / En la zodiako-signo dil Skorpiono guvernata dal planeto Plutono.

VETERO / Tre koldeta temperaturo preske vintrala, cajorne, en Francilia.

KONCIZE

PAKISTAN / ATENTO EFEKTIGIS DEK-E-DU MORTINTI
Dek-e-du personi mortigesis e triadek-e-sis plusa homi vundesis, pasinta-sundie en Peshawar, lor atento di qua la responsiveso revendikesas da islamisti. Ica atento facesis da suocidanta teroristo avan domo apartenanta ad Abdul Malik, komonestro di komono di ca regiono, ilqua mortigesis. La suocidanta teroristo explozigis sua propra bomba automobilo kande la komonestro esis kun viziteri avan sua gasteyo.

ANDORA / LA KRULO DI PONTO EFEKTIGIS KIN MORTINTI
Kin personi mortigesis e sis plusa homi vundesis lor la krulo di ponto dum lua konstrukto en la valo di Massana, nordweste de la princio Andora, pasinta-saturdie ye dimezo. La laboranti, majoritate Portugalani, jus igabis gisar ferizita betono che la konstrukteyo kande eventis ica katastrofo. Sisadeko de laboranti laboris por konstruktar ica ponto.

KOSMO / "MESSENGER" DESKOVRAS LA SEKRETAJI DI MERKURO
La triesma e lasta superflugo dal Usana sondilo "Messenger" cirkum Merkuro, olqua esas la planeto maxim proxima de la Suno, posibligis fotografar 98% de ca astro. Reperesis precipue koliziono-baseno havanta 260 km de diametroe dotizita per samcentra fenduri, olqui esas la rezulto di forta "magma"-ala erupto evanta de un miliard yari, same kam granda quanto de fero e de titan-metalo.

Kordiala interretala saluti ad omni. JM :::-:::

Ye la 6ma di novembro 2009.

Dio di santa Leonardus.

DIO-PROVERBO / On bezonas omnaji por kompozar la mondo.

ZODIAKO / En la zodiako-signo dil Skorpiono guvernata dal planeto Plutono.

VETERO / Griza cielo e pluvema vetero, cajorne, en Francilia.

KONCIZE

YEMEN / SAUDIANA BOMBARDI EN LA INTERNAJO DI CA LANDO
La Saudiana avionaro bombardas depos pasinta mardio pozicioni di shiista rebeli interne di Yemen e la terala trupi povus irar ekpulsar li pos atako da ta rebeli qua mortigis Saudiana gardisto frontierala. Avioni ye la tipi F-15 e Tornado partoprenas aerala inkursi vizanta la shiista rebeli proxim la frontieral areo.

GERMANIA / NOV-NAZISTA ORGANIZURO DESFORTIFIKESIS
La Berlinana autoritatozi anuncis hiere interdiktir nov-nazista organizuro e perquizitir du apartamenti, precipue la habiteyo dil organizero di ca organizuro. La "Frontbann 24" esis la nov-nazista organizuro qua progresis maxim rapide, segun la ministro pri Interna Aferi dil Stata urbo Berlin, nome Ehrhart Körting. La membri di ca organizuro, di qui la nombro evaluesas de 40 til 60, ne hezitis paradar en la stradi, vestizita per uniformo memorigante olta di le SA.

IRAK / NOVA ELEKTALA LEGO CHE LA PARLAMENTO
La Parlamento rezolvis enskribar en lua jorn-ordino di morge la voto di la nova lego, olqua esas jeronta l'elektal elekto dil venonta 16ma di januaro, tale asertis hiere a l'Agenterio France Presse la prezidanto dil Komisiono di la legi, Bahal Al Araji. Malgre presi da Usa e da UN/ONU la deputiti deskonkordas pri la temo dil petrolifant urbo Kirkuk qua esas majoritate Kurda.

Kordiala interretala saluti ad omni. JM :::-:::

Ye la 5ma di novembro 2009.

Dio di santa Silvia.

DIO-PROVERBO / Ta qua furtas ovo furtos bovo.

ZODIAKO / En la zodiako-signo dil Skorpiono guvernata dal planeto Plutono.

VETERO / Pluvoza vetero, cajorne, en Francilia.

KONCIZE

AFGANIA / KIN BRITANIANA SOLDATI MORTIGESIS DAL TALIBANI
La talibani deklaris efektigir l'atako qua produktis, hiere, la morto di kin Britaniana soldati, sis altra soldati esabis vundita, same kam la morto di du Afganiana policani. Semblas ke lo esis Afganiana policano qua unesme pafeskis che barilo en la distrikto Nad Ali, provinco Helmand, en sud-Afgania.

RUMANIA / ITA LANDO DURAS ESAR SEN GUVERNERIO
La Rumaniana Parlamento refuzis, hiere, grantar investo a la guvernerio propozata dal ekonomikisto Lucian Croitoru, tale ajornante la fino dil politikala krizo, qua komencis ye la mezo di oktobro, til pos la prezidantala elekto eventonta ye la 22ma di novembro. Rumania, nun, negocianta kun la FMI, esus subisonta diminuto di sua ekonomio de 8% til 8,5% cayare.

USA / DEK-E-UN KADAVRI EN LA "DOMO DIL HORORO"
Pos ke lu arestesis pasinta-saturdie, du dii pos la deskovro en la internajo di lua domo di Cleveland, ja surnomizita kom "la domo dil hororo" dal Usana informili, Anthony Sowell akuzesis, hiere, pro "mortigi kun plumaliganta cirkonstanci", "violaci" e "rapti". L'inquesto entraprezata cateme evidentigis la prezenteso di dek-e-un kadavri en lua domo.

Kordiala interretala saluti ad omni. JM :::-:::

Ye la 4ma di novembro 2009

Dio di santulo Amans.

DIO-PROVERBO / La similesanti volunte interfrequentas.

ZODIAKO / En la zodiako-signo dil Skorpiono guvernata dal planeto Plutono.

VETERO / Alternante sunoza e pluvoza vetero, cajorne, en Francilia.

KONCIZE

USA / EUROPANA UNIONO APROBAS LA APERTO DIL USANA TERITORIO A LA AIDS/SIDA-IKI
L'Europana Komisitaro salutis aprobante, hiere, la rezolvo dal Usana prezidanto Barack Obama supresar "la 'diskriminacal' aranjuri" kontre personi sufranta pro la AIDS/SIDA-viruso e qui esas deziroza enirar Usa. Ye la komenco di 2010, li povos voyajar libere ad Usa.

VIETNAM / PLU KAM 40 MORTINTI PRO LA TEMPESTO MIRINAE
Ol produktis grava inundi, precipue en la provinci Phu Yen, Binh Dinh e Gia Lai (meza-Vietnam). Adminime 11 personi enskribesas kom desaparinti. La nacionala Komitato pri la inundi e tempesti savigis ke 2600 domi esis domajita o destruktita e ke 1800 agri-hektari inundesis en ica lando. Kelka habitanti esis ankore izolita hiere.

TURISMO / ISLANDO, LONDON E LAS VEGAS ESAS LA MAXIM CHIPA TURISMALA LOKI
L'editero dil guidlibri Lonely Planet, publikigas en lua guidlibro BEST IN TRAVEL 2010, en la Angla patuazo*, la listo de la 10 maxim oportuna destino-loki turismal ye pekuniala vidpunto. Inter oli esas Sud-Afrika, India, Malayia, Mexikia, Bulgaria e Kenia. La mala stando dil ekonomio en Islando havas kom rezulto ke la preco di la vivo-necesaji ibe ne plus esas tam chera kam ol esisolim.

Kordiala interretala saluti ad omni. JM :::-:::

Ye la 3ma di novembro 2009

Dio di santa Hubertus.

DIO-PROVERBO / Fortuno ne igas infalible saja.

ZODIAKO / En la zodiako-signo dil Skorpiono guvernata dal planeto Plutono.

VETERO / Griza e pluvoza veteracho, cajorne, en Francilia.

KONCIZE

GERMANIA / VEHISTACHO APLASTAS GRUPO DE SOLDATI
Dek-e-tri personi vundesis, inter li sep frapesis grave, hiere matine, en kazerno dil Germana armeo en Bald Salzungen, kande soldato tenante la direkto-roto di sua veturo perkutis acidentale grupo de militisti. "Esas sep grave vunditi, ma nulu minacesas per morto", la ministrerio pri Defenso savigis. Semblas ke la vehisto dil automobilo Mercedes ne vidis la grupo de soldati.

KANADA / LA EKOFICESKANTA KOMONESTRO DI MONTREAL RIELEKTESIS
Gerald Tremblay rielektesis, sundie vespere, por triesma ofico-tempo kom chefo di ca Kebekiana urbego ed il deklaris nemediate ke il deziras "inkarnacar la chanjo" e "riganar la fido" di lua administrati. Nome, la Montrealani esabis sukusata per la multopla reveli pri supozata suborno-aferi e pri la koluziono inter ula municipala responsivi e konstrukto-entraprezisti.

LIBIA / LIBERIGO DI FRATULO DI SERVISTO DI HANNIBAL KADHAFI
La Libiana guvernerio liberigis la fratulo di un de la servisti da qua la plendo produktabis l'aresto en Geneve, dum julio 2008, di un de la filiuli di la guidanto Libiana Mwammar Kadhafi. "Isam Morchid Mortada liberigesis ye la 28ma di agosto e lua familio konformis a me lua liberigo ye la 24ma di oktobro. Il retroiris vivar a Maroko", tale explikis Francois Membre advokato di la aludita servisto.

Kordiala interretala saluti ad omni. JM :::-:::

Ye la 2ma di novembro 2009

Dio di santa Iustus.

DIO-CITAJO / Amerika al Amerikani ! (Usana prezidanto Monroe).

ZODIAKO / En la zodiako-signo dil Skorpiono guvernata dal planeto Plutono.

VETERO / Grizeta cielo kun sunoza epizodi, cajorne, en Francilia.

KONCIZE

ITALIA / SILVIO BERLUSCONI HAVAS RENDEVUO KUN LA JUDICIISTI
L'Italiana guverneriestro prizentos su ye la 16ma e 27ma di novembro enkadre di persequi pro fraudo fiskala e suborno . Ico esas la konsequo dil decido di la konstitucala Korto refuzinta la lego qua grantas punisal imuneso a la prezidanto dil Konsilantaro dum lua ofico-tempo. Silvio Berlusconi qua akuzas la judiciisti esar "komunisti", qualifikis ita du procesi kom "autentika farsi" e lu asertis ke il ne demisionos mem kaze di kondamno.

IVORA RIVO / GBAGBO ALUDAS AJORNO DI VOTO
La dato dil 29ma di novembro oficale adoptita por organizor la unesma parto del prezidantal elekto en Ivora Rivo "transiresos" segun deklaro pasinta jovdio dal Ivorana Statestro, Laurent Gbagbo, qua aludis "la realeso dil tereno". Ye min kam un monatoante l'elekto, la elektala listi provizora ne ja afishigesis tra ita lando, dum ke oli devas normale publikigesar "ye adminime 30 dii" ante la voto.

BENGLADESH / MORTIGERA MANIFESTO
Adminime du personi mortigesis e 100 plusa homi vundesis, pasinta-saturdie, inter la mili de laboranti dil konfeciono qui protestis kontre nepagata salarii. La aludita fakti 'okuris' en la industriala areo di Tongi, ye 40 km norde di la lando-chefurbo, Dacca, kande 15.000 laboristi komencis lansar stoni kontre la policani, qui replikis per pafi kun reala kugli. L'industrio dil konfeciono, qua employas 40% del industriala laboranti di ca lando, sufras pro la diminuto dil komendi.

Novajeti Oktobro 2009