Ye la 30ma di oktobro 2009.
Dio di santa Dorotea di Mitau.
DIO-PROVERBO / Povreso ne esas vicio.
ZODIAKO / En la zodiako-signo dil Skorpiono guvernata dal planeto Plutono.
VETERO / Griza e pluvema cielo, cajorne, en Francilia.
KONCIZE
RWANDA / ARTISTO KONDAMNESAS
Famoza autoro ed aktoro di teatro Rwandana, Dismas Mukeshabatware, kondamnesis pasinta-merkurdie ye 19 yari de karcero-puniso en Rwanda pos ke lu agnoskesabis kom kulpinto pro partoprenir la gentocido di 1994. Il akuzesis esir un de la instiganti dil masakri di "Tutsi"-i en la sektoro di Nagoma, sud-Rwanda. Ico raportesis da Radio Rwanda (guverneriala radiofonerio*), ye la morga dio di lua unesma su-prizento, lor qua lu klamabis lua senkulpeso.
YEMEN / ARESTO DI KOMPLICO DI AL-QAIDA
La Yemanana ministro pri Interna Aferi anuncis, hiere, l'aresto en la westo di ca lando di sis Somaliani, de qui un suspektesas havar relati kun Al-Qaida. La Yemenana autoritatozi afrontas fluxo de refujanti Somaliana qui fugas la milito en lia lando e li implikis su en kombato kontre elementi di Al-Qaida qui esas aktiva en kelka arei di lia lando.
MONGOLIA / NOVA CHEFA MINISTRO
La Mongoliana Parlamento elektis, hiere, nova chefa ministro, Sukhbaatar Batbold, qua til nun esis ministro pri Exterlandala Aferi. La nova guverneriestro promisis agar omno quo esas posibla por kombatar la efekti di la mondala krizo en Mongolia. Il anke promisis grantar grand importo a la labor-posiblesi, per informar ke certena projeti pri la mineyi kreos nova labor-perspektivi.
Kordiala interretala saluti ad omni. JM :::-::::
Ye la 29ma di oktobro 2009
Dio di santa Narcisius.
DIO-PROVERBO / Mult enemiki, mult honoro.
ZODIAKO / En la zodiako-signo dil Skorpiono guvernata dal planeto Plutono
VETERO / Sat sunoza vetero, cajorne, en Francilia.
KONCIZE
ITALIA / MANIFESTO DA POLICANI EN ROMA
Preske 30.000 policani manifestis, hiere, en la centro di Roma kontre Silvio Berlusconi por denuncar la budjetala diminutiye un miliard euri, obsoleta equipuri e la neexisto de engaji. La organizeri di ta manifesto, t.e. sis sinistrana e dextrana sindikati, reprezentas aproxime 90% de la policani. La sumo de la budjetala diminuti por la ordino-trupi, la polico ed anke la karabinieri, la forestala gardisti o la finanacal polico, atingas tri miliard euri por periodo de tri yari.
ETIOPIA / LA ELEKTALA KODEXO APROBESAS
La precipua koalisuro dil parlamentala opozantaro en Etiopia aceptis "konduto-kodexo"propozata dal guvernerio lokala por kadrizar la generala elekto di 2010, tale onu saveskis hiere. La politikala direktanti anke konsentis pri projeto di elektal kalendario establisanta ye la 23ma di mayo 2010 la venonta voti.
ONGOLIA / LA PARLAMENTO ACEPTAS LA DEMISIONO DAL CHEFA MINISTRO
Sanjaa Bayar demisionabis pasinta-lundie pro sanesala motivi, apene plu kam un yaro pos lua ridukto kom chefo dil guvernerio. Dum pasinta mayo, lua anciena opozanto Tsakhiagiin Elbegdori (membro dil Demokrata Partiso) obtenis la prezidanteso. Amba partisi ja federabis su che la Parlamento, kontrolata dal PPRM, e realigis preske la sama politiko.
Kordiala interretala saluti ad omni. JM :::-:::
Ye la 27ma di oktobro 2009
Dio di santa Frumentius.
DIO-PROVERBO / Dil diablo la sexualeso esas la domeno.
ZODIAKO / En la zodiako-signo dil Skorpiono guvernata dal planeto Plutono.
VETERO / Bela e sunoza vetero autunala, cajorne, en Francilia.
KONCIZE
INDIA / DEK PERSONI MORTIGESIS LOR ATAKI
Quar policani e sis Maoista militanti mortigesis ye 250 km de Raipur, chefurbo dil Stato Chhattisgarh, qua esas un de la feudi dil extremista sinistrana rebeli ;la autoritatozi savigis hiere. La guvernerio e la armizita trupi preparas operaco kontre la Maoisti, qui plumultigis violentoza agi dum la recenta monati.
LATVIA / POSIBLA FALO DI AEROLITO
Objekto povante esar aerolito falis proxim la vilajo Mazsalaca en nord-Latvia. Ol kavigis kratero ye 15 metri de diametro e ye 5 metri de profundesoed olacendis l'agri, tale savigis hiere dal agenterio France-Presse pumpisti Latviana. Nula kemiala o radioaktiva kontamino konstatesis sur la koncernata loki.
LUXEMBURGIA / NIGRA PANTERO REPERATA
Ica falva bestio qua trakesas en nordest-Francia depos plura semani e videsis lastafoye dum septembro en Belgia, reperesis pasinta-sundie en sudwest-Luxemburgia, la polico di ca lando savigis. Pro ke la cirki e bestii-shirmeyi di la koncernata regiono ne informis pri la perdo di ula falva bestio, la dicita animalo versimile eskapis de la hemo di privato.
Kordiala interretala saluti ad omni. JM :::-:::
Ye la 26ma di oktobro 2009
Dio di santa Dimitrios.
DIO-CITAJO / L'akurateso esas la politeso dil reji. (Rejo Ludovikus XIV di Francia)
ZODIAKO / En la zodiako-signo dil Skorpiono guvernata dal planeto Plutono.
VETERO / Blua e sunoza cielo autunala kun milda temperaturo, cajorne, en Francilia.
KONCIZE
SUDAN / FRANCO-BRITANIANO RAPTESIS EN DARFUR
L'internaciona komitato di la Reda Kruco establisis la kontakto kun la rapteri di lia employato, la Franco-Britaniano Gauthier Lefèvre, ilqua raptesis pasinta-jovdie. Nula ransono demandesis. Nova fakto : la guvernerio di Khartum pagabus 150.000 € por la liberigo di du yunini, nome Irlandanino ed Ugandino, kaptita dum 107 dii, elqui laboris por la Irlandana NGO Goal.
TAILANDO / LA REJO STANDAS PLU BONE
Unesmafoye depos lua acepto en hospitalo, ye la 19ma di septembro, Bhumibol Adulyadej, evo 81 yari, qua esas la maxim anciena monarko en praktikado di lua regno, aparis sur rulanta stulo, che-televizione, quar dii ante nun. Lua sanesala stando nutrabis multa rumori, kelka inter oli anuncabis ke il esas mortanta. La borso di Bangkok esabis severe sukusata dum du dii pasinta-semane konseque di ta rumori.
CHILI / LA PASKO-INSULO DARFOS PLU MULTE KONTROLAR L'ENMIGRADO
La 1300 elekteri di ca insuleto de la 5000 habitanti habitanta ibe, aprobis pre-hiere, ye plu kam 90% de la voteri, reformo dil Chiliana Konstituco. Ita laste dicita grantas a la lokala autoritatozi - ica insulo profitas ja aparta statuto en Chili - plu granda kontrolo pri la enmigrado. Dum pasinta agosto, La Pasko-insulani, di qui la origino esas majoritate Polineziana, "klozabis" lia insulo dum 24 hori, nam la Chiliana migranti esas tro nombroza.
Kordiala interretala saluti ad omni. JM :::-:::
Ye la 23ma di oktobro 2009
Dio di santa Ioannes di Capistran.
DIO-PROVERBO / La oldaro savas ma ne povas, la yunaro povas ma ne savas.
ZODIAKO / En la zodiako-signo dil Skorpiono guvernata dal planeto Plutono.
VETERO / Grizeta cielo, cajorne, en Francilia.
KONCIZE
SOMALIA / VIOLENTOZA KOMBATI EN MOGADISCIO
Adminime 17 civili mortigesis e 58 de li vundesis, hiere, lor violentoza kambii de kanonal pafi inter islamista rebeli e soldati dil paco-trupo di Afrikana Uniono (Amisom) en la Somalian chefurbo. Altralatere, komerco-navo vidigante Panamana flago kun 26 membri de akompananta esquado kaptesis da pirati en l'Indiana Oceano opoze a la Somaliana litoro.
INDIANA / LA DALAI-LAMA VIZITAS STATO KONTESTATA DI INDIA
Malgre l'opozo dal guvernerio di Beijing (Pekino) qua revendikas la posedo di parto de ca teritorio, la dalai-lama iros ye la 8ma di novembro por unsemana sejorno a la Indiana Stato Arunachal Pradesh, en la nordesto di India, e qua esas frontieral an Chinia. Depos kurtatempe durinta konflikto en 1962, nula lineo di milito-ceso establisesis, ma la kalmeso regnas an la frontiero.
HONDURAS / PSIKOLOGIAL PRESI SUR ZELAYA
La autoritotazi kaptinta la povo pos la Statostroko plufortigis lia presi sur la destronizita prezidanto Zelaya, qua refujis a l'internajo dil ambasaderio di Brazil*, per difuzar muziko e animal-krii kun plena son-forteso por impedar lu dormar. Ita operaco eventis kelka hori ante kunveno dal permananta Konsilantaro dil OEA advokante l'amba partisi ristartar dialogo.
Kordiala interretala saluti ad omni. JM :::-:::
Ye la 22ma di oktobro 2009
Dio di santa Elodia.
DIO-CITAJO / Me preferus esar l'unesmo en povra vilajo Alpala kam la duesmo en Roma. (Iulius Caesar)
ZODIAKO / En la zodiako-signo dil Skorpiono guvernata dal planeto Plutono.
VETERO / Grizeta cielo kun milda temperaturo, cajorne, en Francilia.
KONCIZE
IRAN / PROJETO POR KONTRATAL INTERKONSENTO KONCERNE LA PRI-NUKLEALA NEGOCIADO KUN IRAN
La direktero di internaciona Agenterio por la atomal energio, Mohamed ElBaradei, prizentis hiere projeto por interkonsento a la delegitari Iranana, Usana, Rusa e Franca, qui negociadas por la plurichigo exterlande di parto de l'Iranal uranio ye civila uzado. Il propozas a la guvernerio di Teheran konfidar ad ita landi l'uranio feble plurichigita en lua fabrikerio, por li transformez ol a kombusteblo skope di ciencala explorado.
JAPONIA / UN JAPONIANO DE SIS VIVAS SUB LA SOLIO DIL POVRESO
Ico esas un de la procenti maxim alta inter la developita landi, segun studiuro dil ministrerio pri Sociala Aferi. Segun ita inquesto, la unesma eventinta en ica arkipelago, 15,7% de la Japoniani dispozas ye min kam la duimo dil meznombra revenuo yarala di nunepoke, t.e. min kam 1,14 milion "yen"-i (8.500 €).
CHINIA / OPERACO KONTRE LA KORUPTO EN CHONGQING
Sis personi kondamnesis ye morto-puniso, hiere, lor proceso relatanta granda reto de korupto e kriminagado deskovrata en Chongqing, qua esas autonoma municipo havanta 30 milion habitanti, en sudwest-Chinia. Plu kam 1.500 personi arestesabis pro lia supozata impliko en la aktivesi dil organizita kriminanti. Dek-e-quar altaranga responsivi dil polico e dil judiciistaro anke akuzesas.
Por havar vidajo pri Chongqing voluntez "click"-ar sur :
Kordiala interretala saluti ad omni. JM :::-:::
Ye la 21ma di oktobro 2009
Dio di santa Celina.
DIO-CITAJO / La Providenco protektas la idioti, la ebrieri, la infanti ed Usa. (Otto von Bismarck)
ZODIAKO / En la zodiako-signo dil Skorpiono guvernata dal planeto Plutono.
VETERO / Griza cielo e pluvema vetero, cajorne, en Francilia.
KONCIZE
SIRIA / TENSI KUN FRANCIA
Francia "kondamnas l'aresto" en Siria, ye la 14ma di oktobro, di Haytham Al Maleh, advokato e defensero Siriana dil homala yuri, e "demandas a la Siriana autoritatozi lua senfrista liberigo", tale deklaris hiere la Franca ministrerio pri Exterlandala Aferi. L'aresto di ca militanto, evanta 78 yari, esabis anuncata dal Siriana Observatorio por la homala yuri, havanta sideyo en London.
KUWAIT / PASPORTO POR LA MULIERI
La konstitucala Korto di Kuwait donis hiere a la mulieri la yuro obtenar pasporto e voyajar ad-exterlande sen bezonar preliminara permiso da lia spozulo. Tale abrogesis aranjo di lego evanta de 1962.
IRAN / LIBERIGO DI JURNALISTO DI "NEWSWEEK"
Enkarcerigita en Iran depos pasinta junio, la Kanadano Maziar Bahari, jurnalisto di "Newsweek", arivis en London, segun informo, hiere, da ca Usana semanal jurnalo. Sioro Bahari arestesis dum junio kelka dii pos la komenco dil pos-elektal manifesto en Iran. Lua liberigo esabis anuncata, pasinta-saturdie, dal Iranala jurnalar-agenterio Ilna.
Kordiala interretala saluti ad omni. JM :::-:::
Ye la 20ma di oktobro 2009
Dio di sant Adelina.
DIO-CITAJO / La milito esas tro serioza afero por abandonar ol a la militisti. (G. Clemenceau)
ZODIAKO / Iro en la zodiako-signo dil Skorpiono guvernata dal planeto Plutono.
VETERO / Griza cielo e kolda temperaturo, cajorne, en Francilia.
KONCIZE
TAILANDO / LA SANESAL STANDO DIL REJO PLUBONESKAS
Bhumibol Adulyadej, evo 81 yari, qua esas la maxim ancien monarko regnanta en la mondo e qua sejornis en hospitalo de preske un monato, standas plu bone e lua vivo ne minacesas. "Sinioro Rejo parolas e repastas quaze normale", tale asertis de Berlin, una de lua filiini, di qua l'interviuvo transmisesis dal Tailandana televizionerio.
IRAK / BANKALA AGENTERIO REZERVESAS A LA MULIERI
Bankala agenterio jerata da mulieri e rezervita exkluzivead ita klientaro apertesis en la santa urbo shiista Nadjaf, mez-Irak, segun anunco hiere dal direktero dil banko di Babilono. Ica agenterio kontenas 25 employati, inter li esas la direkterino. Nur la tri o quar sekureso-gardisti esas viri.
SOMALIA / PIRATI SIZIS KOMERCO-NAVO CHINIANA
La dicita navo navigis ye la nordesto dil insuli Seychelles, en l'Indiana Oceano, e la pirati unfoye pluse demonstris lia kapableso extensar lia ago-domeno e tale eskapis a la vigilo dil milit-navi sendita dal internaciona komunajo. Lo esas anke en ita areo ke Franca atunpeskanta navi atakesis ye la 10ma e 13ma di oktobro. La Somaliana pirati denun ditenas sis stranjera navi e plu kam 110 maristi.
Kordiala interretala saluti ad omni. JM :::-:::
Ye la 19ma di oktobro 2009.
Dio di santa Renatus.
DIO-PROVERBO / Sen diligenteso nula premio.
ZODIAKO / En la zodiako-signo dil Balanco guvernata dal planeto Venero.
VETERO / Bela blua e sunoza cielo ma kun sempre plu koldeskanta temperaturo, cajorne, en Francilia.
KONCIZE
MACEDONIA-KOSOVO / INTERKONSENTO PRI LA FRONTIERO
Amba landi sucesis redaktar interkonsento-kontrato pri la separo-lineo di lia komuna frontiero, tale li preparas la voyo a la kompleta establiso di diplomacal relati reciproka inter lia rispektiva guvernerii. Ita interkonsento esus aceleronta la adhero-proceso di Macedonia ad Europana Uniono. Ica lando esas kandidato depos 2005, e la Europana Komisitaro propozis, pasinta-merkurdie, la komenco di adhero-negociado.
ITALIA / GRANDA MANIFESTO KONTRE LA RASISMO
Plura dekamili de personi manifestis, pasinta-saturdie, en la historiala mezo di Roma, denuncante la delikto pri nelegala enmigrado institucita per lego dil guvernerio di Silvio Berlusconi.
UNIONITA REJIO /AGO DA EKOLOGIISTI KONTRE KARBONO-PRODUKTERIO
Plura centi de manifestanti siejis, pasinta-saturdie, una de la maxim granda elektro-produkterio di Unionita Rejio, olqua funcionas per karbono. Ita laste dicita konsideresas quale un de la maxim importanta emiseri de CO2 di ca lando. Lo esas la Germana energio-grupo E,ON qua esas proprietero di ca industriala jaceyo en Ratcliffe-on-Soar proxim Nottingham.
Kordiala interretala saluti ad omni. JM :::-:::
Ye la 16ma di oktobro 2009.
Di di santa Maria-Margarita Alacoque.
DIO-PROVERBO / Richeso ne esas malajo.
ZODIAKO / En la zodiako-signo dil Balanco guvernata dal planeto Venero.
VETERO / Tre koldeta vetero autunala, cajorne, en Francilia.
KONCIZE
CHINIA / NOVA KONDAMNI POS LA SEDICII DI URUMQI
La Chiniana judiciisti proklamis, hiere, sis nova morto-punisi kontre sediciinti, tale irigante til 12 la nombro de kondamniti a la maxim severa puniso judiciala. Ico eventas plu kam tri monati pos la trubli en Xinjiang.
CHEKIA / NEGOCIADO PRI LA KONTRATO DI LISBOA
La chefa ministro Chekiana, Jan Fischer, anuncis hiere ke lua oficistaro entraprezas negociado kun prezidanto Vaclav Klaus pri derogo postulata da ica laste dicita por signatar la Europana kontrato di Lisboa.
Kordiala interretala saluti ad omni. JM :::-:::
Ye la 15ma di oktobro 2009
Dio di santa Teresa di Avila.
DIO-CITAJO / Mento sana en korpo sana. (Juvenal)
ZODIAKO / En la zodiako-signo dil Balanco guvernata dal planeto Venero.
VETERO / Sunoza ma sempre plu kolda vetero, cajorne, en Francilia.
KONCIZE
RUSIA / KRITIKO PRI LA HOMALA YURI
La Statala sekretario Usana, Hillary Clinton, vizitante Moskva, exhortis hiere la Rusa autoritatozi agar plu aktive por la respekto dil homala yuri. "Ita enkarcerigi, karcero-sejorni, frapi, mortigi esas doloriganta kande on regardas oli de-extere" elu deklaris che la Moskvala radiofonal* staciono Echo kande el aparte komentis la mortigo dil jurnalistino Anna Politkovskaia.
CHINIA / NOVA PROCESI
Dek-e-quar personi qui akuzesis implikesar en la mortigera sedicii di Urumqi, regionala chefurbo di Xinjiang, komence di julio, judicieskis hiere, du dii pos la sep unesma kondamni, de qui sis esas ye la morto-puniso. Lo esas la unesma procesi pri la violentaji qui efektigis preske 200 mortinti en la chefurbo dil Chiniana regino Xinjiang.
ISRAEL / PLU KAM TRIACENT PALESTINANI ENKARCERIGESAS SEN PROCESO
Segun du Israelana organizuri por defenso dil homala yuri, B'Tselem e Hamoked, 355 Palestinani esus enkarcerigata sen proceso inter la 8.000 Palestinana karcerani en Israel. Ita organizuri denuncis ico kom "violaco dil internaciona lego".
Kordiala interretala saluti ad omni. JM :::-:::
Ye la 14ma di oktobro 2009
Dio di santulo Kalixtes.
DIO-PROVERBO / Fidez nulu, qua evas plu kam triadek yari.
ZODIAKO / En la zodiako-signo dil Balanco guvernata dal planeto Venero.
VETERO / Sunoza ma tre koldeta vetero, cajorne, en Francilia.
KONCIZE
RUMANIA / SENVALIDIGO DIL GUVERNERIO CENTRANA DEXTRANA
Konseque dil adopto, hiere, di propozo pri censuro dal opozantaro, ye min kam un monato e duimo ante la prezidantal elekto, la guvernerio dilchefa ministro Emil Boc senvalidigesis. Entote, 258 deputiti e senatori votis favore ad ita texto e 176 altri votis kontre.Por lua adopto, 236 voti esis necesa. Lo esas la unesma foyo depos 1990 kande Rumaniana guvernerio senvalidigesas konseque di propozo pri censuro.
EUROPANA UNIONO / LA PREZIDANTO DIL KOMISITARO FACAS ADVOKO A LA CHEKIANA PREZIDANTO
Jose Manuel Barroso exhortis, hiere, la Chekiani "efektigar lia obligesi" per signatar la Europana kontrato di Lisboa. Il demandis a li ne inventar "artificala obstakli", pos la blokuso-probi da prezidanto Vaclav Klaus.
MADAGASKAR / NOVA SOMITALA INTERRENKONTRO POLITIKAL
La quar precipua politikal guidanti di Madagaskar - la nuna provizora prezidanto Andry Rajoelina e lua tri precedinti - aceptis interrenkontror plusafoye "ye la fino di ca semano" por probar ekirar la ibea politikala krizo.
Kordiala interretala saluti ad omni. JM :::-:::
Ye la 13ma di oktobro 2009
Dio di santa Geraldus.
DIO-PROVERBO / Oldino yuninin ne prizas.
ZODIAKO / En la zodiako-signo dil Balanco guvernata dal planeto Venero.
VETERO / Kolda autunala vetero e grizeta cielo, cajorne, en Francilia.
KONCIZE
EUROPANA UNIONO / DESAPROBO
La Franca ex-chefa ministro, Edouard Balladur, opinionis, hiere, ke "personale" ne semblis a lu dezirinda" ke l'anciena chefa ministro Britaniana Antonius Blero (Tony Blair) acesez la prezidanteso di Europa Uniono. "Sioro Blair esas Anglo, t.e. il apartenas a lando qua ne partoprenas du granda realiguri Europana, qui esas la Euro-zono unlatere, e Schengen altralatere" tale deklaris ita anciena chefa ministro, invitata dal "talk Orange" - "Le Figaro".
PAKISTAN / PLUSA ATENTO
Adminime 41 personi mortis lor atento vizanta militisti en l'urbo Al-puri en nordwest-Pakistan. La suocidanta teroristo, adolecanto evanta 13 o 14 yari, explozigis su lor la paso di konvoyo de militistal kamioni trairanta merkato plena de homi. Ita suocida atento eventas tri dii pos la morto di adminime 52 personi, ocidata per la explozo di bomba automobilo, en Peshawar. Ye la pasinta 5ma di oktobro, kin employati di UN/ONU mortigesabis en Islamabad.
NORD-KOREA / MISILI-PAFI
La guvernerio di Pyongyang entraprezis, hiere, probo-pafi de 5 'misili' ne havanta granda atingo-povo opoze a la estala litoro di lua lando. Reaktanta ad ita pafi, Hillary Clinton, la Usana Statala sekretario, asertis ke oli ne ekvoyigos la diskuti pri la senarmigo en la Koreana peninsulo.
Kordiala interretala saluti ad omni. JM :::-:::
Ye la 12ma di oktobro 2009
Dio di santa Wilfried.
DIO-PROVERBO / Ho yuneso, printempo di la vivo !
ZODIAKO / En la zodiako-signo dil Balanco guvernata dal planeto Venero.
VETERO / Bela sunoza cielo ma kun tre koldeta temperaturo, cajorne, en Francilia.
KONCIZE
KOSMO / LA NASA STUDIAS LA SULO LUNALA
La Nasa efektigis, pasinta-venerdie, misiono destinata trovor aquo sur la Luno per aplastigar projektilo de 2,3 tuni, olqua akompanesis de proxima disto per sondilo, qua esis analizonta la penacho de fragmenti rezultanta di la koliziono. Centaur shokis la lunala sulo quale ico esabis previdita, e lu sequesis kelkete plu kam quar minuti pose per la sondilo, olqua ante aplastesar luafoye, devis facar fotografuri e rekoliar ciencala donitaji.
IRAN / EFEKTIGO DI MORTO-PUNISO
Iranano evanta 21 yari, Behnud Shojaie, qua kondamnesis ye morto-puniso pro mortigo facita dum ke lu esis ankore minora, mortigesis, hiere matine, per pendo. Ico raportesis dal Iranana agenterii jurnalal. Nome, il facabis ita mortigo lor disputbato, quar yari ante nun, en rezideyo di nord-Teheran. La dicita pendo irigas til 231 la nombro de personi punisita per morto en Iran depos la komenco di ca yaro.
MADAGASKAR / CHANJO DI CHEFA MINISTRO
La chefa ministro "per interkonsento", Eugene Mangalaza nominesis, hiere, per dekreto dal provizora preziderio, kin dii pos la interkonsento pri lua nomo dal precipua politikal partisi Madagaskarana. Tamen, la revokata prezidanto, Marc Ravalomanana, exilita en Sud-Afrika, duras refuzar l'atribuo dil provizora prezidanteso a Andry Rajoelina e postulas nova kunveno dal quar granda guidanti politikal di ca Granda Insulo.
Kordiala interretala saluti ad omni. JM :::-:::
Ye la 9ma di oktobro 2009
Dio di santa Dionisius.
DIO-PROVERBO / Feliceson ne produktas pekunio.
ZODIAKO / En la zodiako-signo dil Balanco guvernata dal planeto Venero.
VETERO / Grizeta cielo kun milda temperaturo, cajorne, en Francilia.
KONCIZE
IRAN / PROTESTERO KONDAMNESAS YE MORTO-PUNISO
Mohammad Reza Ali Zamani, membro dil Asociuro dil monarkio di Iran, qua aparabis ye la 8ma di agosto koram la revolucionera tribunalo di Teheran, informesis pasinta-lundie ke lu kondamnesis ye morto-puniso. Ico raportesas dal sendependa situo* mowjcamp.com. Nula oficala informo-fonto konfirmis ico. "L'anunco di ta rezolvo plu-obskurigas l'imajo dil Iranana rejimo", la porparolanto dil Quai d'Orsay (Franca ministrerio pri Exterlandal Aferi) deklaris hiere, dum savigar la "forta emoco" di Francia.
SIRIA / SAUDIA ARABIA / AMELIORO DIL DIPLOMACAL RELATI
La Siriana prezidanto Bashar Al Assad e rejo Abdallah di Saudia Arabia asertis, pasinta-merkurdie, lia volo plufortigar lia diplomacal relati, lor interrenkontro en Damasko okazione dil unesma oficala vizito dal Saudiana suvereno pos plura yari de nebona diplomacal relati. Li dicis ke li volas "supresar la obstakli qui entravas la developado" dil relati inter la guvernerii di Damasko e Riyad, e li signatis interkonsento-kontrato pri ne-duopla imposto inter lia amba landi.
HISPANIA / BOMBO-ALARMO EN BASKA LANDO
La fervoyala trafiko inter la Hispana Baska urbi Zumarraga ed Irun interruptesis, hiere matine, motivo di bomb-alarmo efektigita ye la nomo dil ETA. La dicita trafiko ristartis ye la dimezo-komenco, pro ke la regionala Baska ministrerio informis ke "nula explozilo trovesis sur la fervoyala lineo". Advoko da homo parolante ye la nomo di casendependista organizuro Baska indikabis la prezenteso di tri explozili.
Kordiala interretala saluti ad omni. JM :::-:::
Ye la 8ma di oktobro 2009
Dio di santa Pelagia.
DIO-PROVERBO / Amo ne povas kompresar.
ZODIAKO / En la zodiako-signo dil Balanco guvernata dal planeto Venero.
VETERO / Alternante grizeta e kelkete sunoza cielo, cajorne, en Francilia.
KONCIZE
SOMALIA / FRANCA MILIT-NAVO ATAKESIS
Somaliana pirati atakis erore, dum la nokto de mardio til merkurdio, opoze a la litoro di Somalia, la komando-navo dil Franca militistal trupi sur l'Indiana Oceano. Kin atakanti kaptesis. Segun la stabo Franca, "la pirati, trompita per la obskureso kredis ke la Franca navo esis komerco-navo e pafeskis segun "kalashnikov-maniero".
POLONIA / GUVERNERIALA MODIFIKO
La liberala chefa ministro, Donald Tusk, anuncis hiere modifiko dil guvernerio en Polonia. Anuncesas precipue la departo dal ministri pri Interna Aferi e pri Judicio konseque di skandalo pri influo-komercacho. Ita afero, revelata dal Oficeyo kontre-suborno, koncernas lego-projeto pri la hazardo-ludi. Ol ja produktis la demisiono dal ministro pri Sporti, pasinta-lundie.
RUSIA / OBLIGATA DETEKTO* DIL NARKOTAJI EN LA GIMNAZII
La Rusa autoritatozi balde instalos obligata e sistematra detekto* dil narkotaj-konsumado che la adolecanti, tale savigis hiere la chefo dil Rusa agenterio kontre la narkotaji, Viktor Ivanov. La aludita analizo facesos lor obligata viziti medikal en la gimnazii ; olua rezultati komunikesos a la genitori dil kontrolata yuni. Rusia kontenas aproxime 2,5 milion konsumeri de narkotaji.
Kordiala interretala saluti ad omni. JM :::-:::
Ye la 7ma di oktobro 2009
Dio di santa Sergius.
DIO-PROVERBO / La audacozin favoras fortuno.
ZODIAKO / En la zodiako-signo dil Balanco guvernata dal planeto Venero.
VETERO / Grizeta kelketa sunoza e varma vetero, cajorne, en Francilia.
KONCIZE
GUINEA / LA OPOZANTARO POZAS KONDICIONI
Un de la guidanti dil Guineana opozantaro, Cellou Dalein Diallo, postulis hiere, kom preliminara kondiciono ad irga negociado kun la militistal guvernerio, la aresto dil militisti qui partoprenis la masakro dil 28ma di septembro en Conakry, qua asertite produktabus 157 mortinti. Multanombra atesti denuncas la adjutanto dil chefo dil militistal guvernerio, kapitano Mussa Dadis Camara, kom l'ordinanto di ca masakro. La prezidanto di Burkina Faso, Blaise Compaore, mediacanto pri la krizo en Guinea, pasinta-lundie, propozabis a la militistal guvernerio ed al opozantaro interrenkontrar en Ouagadougou.
AFGANIA / INTENSA KOMBATI EN NURISTAN
Plu kam 100 talibani mortigesis, pasinta-saturdie, en la provinco Nuristan, est-Afgania, lor kombati ube ok Usana soldati e du Afganiana soldati anke mortis, segun deklaro da NATO/OTAN, hiere. Centi de rebeli, til 700 segun la lokala policani, atakabis du avan-posteni dil Afganiana ed internaciona trupi nefore de la Pakistanana frontiero.
BRAZIL* / OKUPO DIL MAXIM GRANDA ORANJIERI-PLANTACO DA SENSULA RURANI
250 familii dil Movado di la rurala laboristi sensula okupis, hiere, ita tereno plantacita per un milion frukt-arbori en la meza westo dil Stato Sao Paulo. La rurani, qui opinionas ke parolesas pri publika tereno, intencas restar surloke til ke la federala judiciisti decidez ulo. Brazil* esas la unesma mondala produktanto de oranjo-suko.
Kordiala interretala saluti ad omni. JM :::-:::
Ye la 6ma du oktobro 2009
Dio di santa Bruno.
DIO-PROVERBO / Plu bona esas honoro sen oro kam oro sen honoro.
ZODIAKO / En la zodiako-signo dil Balanco guvernata dal planeto Venero.
VETERO / Chanjema vetero kun alternante sunoza e pluvoza epizodi, cajorne, en Francilia.
KONCIZE
PROXIMA-ORIENTO / LA INTERPALESTINANA RIKONCILIO MINACESAS, SEGUN LA HAMAS
La chefo dil guvernerio dil Hamas-partiso en Gaza, Ismail Haniyeh, akuzis, hiere, la prezidanto dil Palestinana Autoritato, Mahmud Abbas, demandir personale la ajorno dil voto pri la Goldstone-raporto di UN/ONU koncerne la milito en Gaza. La islamista direktanto di Gaza avertis ke la decido da Mahmud Abbas minacas la inter-Palestinana rikoncilio. La Konsilantaro pri la homala yuri di UN/ONU rezolvis ajornar til marto 2010 la voto di rezolvo pri la inquesto-raporto dal judiciisto Richard Goldstone, qua akuzis Israel pri "milit-krimini"lor lua atako en Gaza dum decembro 2008.
INDONEZIA / FINO DIL SERCHADO
Kin dii pos la sismo qua frapis la westo dil Indoneziana insulo Sumatra, la serchado por trovar la posvivanti cesis en Padang, ube la prioreso denun esas preventar la epidemii. La sokurso-operaci divenis mem plu desfacila pro forta pluvi. La bilanco di ca katastrofo povus atingar la nombro de 3.000 mortinti.
GUINEA / KOMENCO DI MEDIACO
La Burkinana prezidanto Blaise Compaore arivis, hiere, en Conakry por entraprezar ye la nomo dil Komunajo ekonomial dil Stati di West-Afrika (Cedeao) mediaco inter la militistal guvernerio e la opozantaro, ye un semano pos la sangoza represo di manifesto. La Franca autoritatozi parolis hiere favore a la "developo di Afrikana paco-trupo".
Kordiala interretala saluti ad omni. JM :::-:::
Ye la 5ma di oktobro 2009
Dio di santa Florina.
DIO-PROVERBO / Griza barbo sajeson ne atestas.
ZODIAKO / En la zodiako-signo dil Balanco guvernata dal planeto Venero.
VETERO / Pluvoza vetero, cajorne, en Francilia.
KONCIZE
USA / EVALUO
L'anciena prezidanto dil centrala banko Usana (Fed) Alain Greenspan opinionas ke Usa ristartis havar kreskado ekonomial dum la triesma trimestro cayare, ye ritmo di 2,5%.
HISPANIA / DESAPROBO
Kelke min multa kam du Hispani de tri (61%) desaprobas la aranjuri facita dal guvernerio dil socialisto Jose Luis Zapatero por afrontar la ekonomial e financal krizo, segun opinion-inquesto publikigita en "EL PAIS". 76% de li opinionas ke ita aranjuri facesas tro tarde.
CHINIA / KONKURENCO POR LABORANTI
La Chiniana fabrikerii kombatas pro riengajar la laboranti revokata dum la tempo dil maxim granda forteso dil ekonomial krizo. Ita employati esas necesa por efektigar la Kristnaskal komendi dil exterlandana klienti. Adminime 20 milion migranta laboranti Chiniana retroirabis a lia provinci komence di ca yaro, koaktata agar tale pro la ekonomiala regreso.
SIRIA / DIPLOMACAL RENKONTRO
S-ro Claude Gueant, generala sekretario dil Elizeo-palaco (Franca prezidanterio), e Jean-David Levitte, diplomacala konsilanto di Nikolaos Sarkozius, renkontris hiere en Damasko la Siriana prezidanto Bashar al-Assad e transmisis mesajo di lua Franca kolego a lu. La aludita mesajo koncernas "la evoluciono en Proxima-Oriento". Ica vizito eventas samatempe kam olta dil konsilanto dil Franca prezidanto en Libano, ube ica laste dicita renkontris prezidanto Mikhael Sleiman.
Kordiala interretala saluti ad omni. JM :::-:::
Ye la 2ma di oktobro 2009
Dio di santa Lejerus.
DIO-CITAJO / Ofte politikala falio esas ideologiala vinko. (W. Churchill)
ZODIAKO / En la zodiako-signo dil Balanco guvernata dal planeto Venero.
VETERO / Sunoza vetero kun koldeta temperaturo, cajorne, en Francilia.
KONCIZE
RUMANIA / FALO DIL GUVERNERIALA KOALISURO
La koalisuro inter sociala-demokrati (PSD) e liberala-demokrati (PDL) ye la povo en Rumania explozis hiere, nam omna ministri dil PSD prizentis lia demisiono por protestar kontre la revoko de unu de li. La ministro pri Interna Aferi, Dan Nica, desengajesis pasinta-lundie pos paroli tre kontroversatapri posibla fraudo-probo lor la prezidantala elekto dil 22ma di novembro.
PERU / NOVA KONDAMNO POR FUJIMORI
Alberto Fujimori ja kondamnita ye duadek-e-kin yari de karcero-puniso pro violacir la homala yuri, kondamnesis ultree pasinta-merkurdie a punisode 6 yari karcero pro suborno. Ita anciena prezidanto (1990-2000) apelis pri la kondamno, same kam la prokuratoro, ilqua requizitabis ok yari de karcero-puniso. Alberto Fujimori, evanta 71 yari, esas enkarcerigita depos 2007 pos pasir sep exilo-yari en Japonia.
RUSIA / LA CIENCOLOGIO OBTENAS SIMBOLATRA VINKO
Rusia kondamnesis, hiere, dal Europana Korto pri la homala yuri (CEDH) pro refuzir plurafoye matrikulizar du Eklezii di Ciencologio kom religiala organizuri, en 1994 e 1998. Lu atribuis a la requizitanti 5000 € pro etikala detrimento. Dum aprilo 2007, Rusia ja kondamnesis pro refuzir matrikulizar en 1998 e 2005 la Eklezio di Ciencologio di Moskva.
Kordiala interretala saluti ad omni. JM :::-:::
| 
English
Deutsch
Français
Plusa lingui
