Ye la 30ma di septembro 2009
Dio di santa Hieronimus.
DIO-CITAJO / La Buddhismo esas la unika religio qua esas konciliebla kun la moderna cienco. (Einstein)
ZODIAKO / En la zodiako-signo dil Balanco guvernata dal planeto Venero.
VETERO / Alternante grizeta e sunoza cielo, cajorne, en Francilia.
KONCIZE
NEDERLANDO / L'ANGUIL-PESKO RESTRIKTESAS
Quankam lu tre prizesas en Nederlando, l'anguilo ne plus peskesos ibe dum du monati quik de morge, en la skopo sekurigar la salvo-gardo di ca migranta fisho minacata per extingo. Quik de 2010, la pesko interdiktesos de la 1ma di septembro til la 1ma di decembro, segun decido dal Nederlandana ministrerio pri agrokultivo e ambiento. La ibea guvernerio spensos 700.000 € yarale por indemnizar la koncernata 240 pesko-entraprezeyi.
HISPANIA / MILITANTI DEMANDAS LA "AGROKULTIVAL AZILO"
Duadeko de ekologiista militanti dil Amiki dil Tero, travestiata a maizo-spiki, demandis hiere "la agrokultival azilo" che la ambasaderio di Francia en Madrid, por protestar kontre la kultivo "grandaskale" di maizo 'genale' modifikata en Hispania. Regularo restriktiva impozesis en Francia e plura Europana landi agigas la klauzo pri salvo-gardo kontre la maizo 'genale' modifikata MON 810 dil Usana firmo Monsanto.
ARMENIA / LA PREZIDANTO DI CA LANDO ESOS BALDE EN FRANCIA
Prezidanto Sergius Sarkissian renkontros la influoza Armeniana "diaspora" en quar landi, inter li esas Francia, nam lu serchas susteni por establisor diplomacala relati kun Turkia, ye la 10ma di oktobro. Lua turo duktos il a Paris, New York, Los Angeles, Beyruth e la Rusa urbo Rostov-an-Don, ube vivas importanta komunajo Armeniana.
Kordiala interretala saluti ad omni. JM :::-:::
Ye la 29ma di septembro 2009
Dio di santa Mikhael.
DIO-PROVERBO / Plu bona savar kam nur kredar.
ZODIAKO / En la zodiako-signo dil Balanco guvernata dal planeto Venero.
VETERO / Sunoza cielo, cajorne, en Francilia.
KONCIZE
IRAK / LIBERIGO DI KRISTANA MEDIKO
Ginekologiistino, qua raptesis dum la nokto di saturdio til sundio en lua hemo proxim Mossul, nord-Irak, liberigesis sundie vespere da lua raptinti. Mahassine Bashir ridivenis libera en Baashiqa, nefore de la Kristan urbo Bartala ube el raptesabis. Multanombra Kristani raptesis dum la recenta yari da raptanti postulanta ransono po lia liberigo.
RWANDA / ATENTO EN VILAJO
Adminime quar personi mortigesis ed 52 plusa personi vundesis, pasinta-saturdie lor atento per grenado vizante merkato. Ica atento eventis en la vilajo Karambo, ye aproxime 100 km sude de Kigali. La autoritatozi refuzis parolar pri la potenciala motivizi di ta atento. Ja dum aprilo 2008, grenado mortigis policano surveyanta la Memorialo dil gentocido en Kigali.
SIRIA / SIRIANA MINISTRO EN USA
La Siriana vice-ministro pri Exterlandala Aferi, Faysal Mekdad, invitesis hiere en Washington. Ita vizito, qua esas la unesma depos cirkume kin yari, 'okuras' enkadre dil esforci dal Usana guvernerio skope ameliorar la relati kun Siria. Dum pasinta marto, du altaranga responsivi Usana irabis a Damasko same kam militistala delegitari.
Kordiala interretala saluti ad omni. JM :::-:::
Ye la 28ma di septembro 2009
Dio di santulo Venceslas.
DIO-PROVERBO / Ploranton ni evitas, ridanton ni imitas.
ZODIAKO / En la zodiako-signo dil Balanco guvernata dal planeto Venero.
VETERO / Sunoza cielo kun koldeta temperaturo, cajorne, en Francilia.
KONCIZE
ISRAEL / DEBUTO DIL PROCESO DI EHUD OLMERT
Ita ex-chefa ministro akuzata pri konkusiono, klamis lua senkulpeso dum aparar unesmafoye pasinta-venerdieavan tribunalo di Ierusalem. Ico esas kazo sen precedento en Israel koncerne anciena guverneriestro. Ilu akuzesas precipue pri fraudo, misuzo di fido, uzado de falsaji e fiskala eskapo. Teoriale lu minacesas per karcero-puniso.
UNIONITA REJIO / GORDONUS BRUNO (GORDON BROWN) PROBAS RIAKTIVIGAR LA LABOR-PARTISO
La Britaniana chefa ministro probis, hiere, riinstigar a kombato-mento la Labor-partisani qui esas senkurajigita per la opinion-inquesti, lor la komenco di lia kongreso yarala en Brighton, olqua esas la lasta kongreso ante la deputital elekto expektita dum mayo 2010. La labor-partiso qua esas ye la povo depos 1997 semblas kondamnita remplasesar dal konservemi di David Cameron.
HONDURAS / MANUEL ZELAYA ADVOKAS MARCHAR A TEGUCIGALPA
Tri monati pos lua revoko e lua expulso, ye la 28ma di junio, lor statostroko qua donis la povo a l'anciena prezidanto dil Kongreso Roberto Micheletti, Manuel Zelaya, qua esas refujinta en l'ambasaderio di Brazil* , konstatas ke sempre plu multa homi mobilizas favore a lu. Mili de personi manifestas singladie por postular lua riestabliso, e la internaciona preso kreskas.
Kordiala interretala saluti ad omni. JM :::-:::
Ye la 25ma di septembro 2009
Dio di santa Arminius.
DIO-PROVERBO / Tala esas lamastro, tala esas la servisto.
ZODIAKO / En la zodiako-signo dil Balanco guvernata dal planeto Venero.
VETERO / Sunoza vetero kun agreabla milda temperaturo, cajorne, en Francilia.
KONCIZE
POLONIA / LA RUSI INDIGNAS
La Rusa ministrerio pri Exterlandala Aferi protestis, hiere, kontre la voto dal Polona Parlamento pri rezolvo advokante agnoskar la Stalin-krimini e la "gulag" kom gentocido. La Rusa autoritatozi opinionis ke ita rezolvo frapas per "serioza stroko" la relati inter la guvernerii di Moskva e di Warszawa e ke ol fundamentizesas sur "tendencoza e politizita elementi".
IRAK / DEK-E-KIN ESKAPITI DI AL-QAIDA EN TIKRIT
Granda sercho-operaco agesis, hiere, en nord-Irak por trovor 15 fuganti di Al-Qaida, (inter li esas kin kondamniti ye morto-puniso) eskapinta ye la predio de karcero di Tikrit danke la helpo da komplici interne di la polico, segun informo-fonto interne dil sekureso-trupi. La aludita sekureso-trupi impozis ekiro-interdikto en Tikrit, ye 180 km norde de Baghdad, pos l'eskapo da ca karcerani.
AUSTRALIA / REDA SABLO-TEMPESTO KUSTOZA
La historiala tempesto vehiganta plura milioni de tuni ek polvo e reda sablo veninta de la dezerto e qua falis hiere sur Sydney, povus kustar "plura deki de milioni " dolari pro aktiveso-perdo, tale evaluis la industriala direktanti.
Kordiala interretala saluti ad omni. JM :::-:::
Ye la 24ma di septembro 2009
Dio di santa Thekla.
DIO-CITAJO / Men li odiez se nur men li timas. (Devizo dil tirani dil Antiqua Epoko)
ZODIAKO / En la zodiako-signo dil Balanco guvernata dal planeto Venero.
VETERO / Grizeta cielo kun sunoza epizodi, cajorne, en Francilia.
KONCIZE
POLONIA / SOLENA ADVOKO A RUSIA
La Polona Parlamento advokis, hiere, "omna homi bonvolanta" en Rusia por kondamnar la Stalin-krimini, inter oli tote aparte olta di Katyn, lor rezolvuro adoptita sepadek yari pos la invado dal reda armeo dil teritorii est-Poloniala. La Rusa judiciaro duras refuzar la ristarto di inquesto pri la masakro en Katyn di mili de Polona oficiri da membri dil sekreta polico Sovietala en 1940, segun impero da Josef Stalin.
MAROKO / DESQUIETESKO PRI LA FATO DI JURNALISTO
La Marokana asociuro pri la homala yuri (AMDH, sendependa) expresis lua desquietesko, prehiere en Rabat esar sen informi depos pasinta-jovdie pri la Franca-Marokana jurnalistino Zineb El Rhazoui. Ita laste dicita esabis la organizanto di manifesto-probo da "ne-fastanti" dum la monato Ramadan. Elu kunvokesis dal policani, ma ne venabis.
INDIA / LA MAXIM MALA SIKESO DEPOS 1972
La Indiala musono montrigas cayare pluvometrala deficito ye aproxime 20%, tale konfrontante ica lando a la maxim mala sikeso depos 1972 (la lora deficito esis ye 23%), la meteorologiala servici savigis icohiere. Koncerne la 235 milion Indiana rurani, mala musono havas dizastroza pekuniala konsequi pro la irigacado-indijo en la agri.
Kordiala interretala saluti ad omni. JM :::-:::
Ye la 18ma di septembro 2009
Dio di santa Josefus de Copertino.
DIO-CITAJO / Esas plu bona subisar desyustajo kam facar ol. (Cicero)
ZODIAKO / En la zodiako-signo dil Virgino guvernata dal planeto Merkuro.
VETERO / Sat sunoza cielo, cajorne, en Francilia.
KONCIZE
INDONEZIA / NOORDIN TOP MORTIGESIS
La maxim serchata viro di Indonezia mortigesis lor inkurso entraprezata, hiere, da kontre-terorista trupi ye du monati pos duopla suocida-atento efektiginta non mortinti en Djakarta. Pro ke il esis experto pri explozili, ita Malayo konsideresis kom un de la "cerebri" dil ondo de atenti imputata a la reto Jamaa Islamiya. La maxim mortigera de oli mortigabis 202 personi de qui la plu multi esis turisti, sur la insulo Bali en 2002.
MEXIKIA / SANGOZA SEMANO EN CIUDAD JUAREZ
Armizita kombato-grupo mortigis adminime 10 personi en centro por narkotajiki di Ciudad Juarez, an la frontiero di Texas, Usa. Depos mardie vespere, diskuto-konkluzi inter narkotaj-federuri produktis 25 plusa viktimi, en ita regiono, inter li esas federural policano, ocidita pasinta-merkurdie avan la lokala imoblo dil ministrerio pri Judicio. La milito inter komercachisti pri narkotaji efektigis plu kam 14.000 mortinti depos la enoficesko dil guvernerio di prezidanto Felipe Calderon, dum decembro 2006.
RUMANIA / ARESTO DI FALSIGERIPRI BANKALA KARTI
Reto formacita da triadeko de falsigeri supozata pri bankala karti, qui furiis precipue en Australia, en Jordania ed en Hispania, desfortifikesis hiere en Rumania, tale savigis la polico. Dek-e-sep personi interpelesis lor ita operaco, qua sequas l'aresto, dum la recenta monati, di dekhomi en la tri landi vizata da ita reto. La Rumaniana policani plumultigis depos 2008 la operaci kontre la ciberkriminanti*.
Kordiala interretala saluti ad omni. JM :::-:::
Ye la 17ma di septembro 2009
Dio di santa Renaldus.
DIO-PROVERBO / Plu bona vertuo sen oro kam oro sen honoro.
ZODIAKO / En la zodiako-signo dil Virgino guvernata dal planeto Merkuro.
VETERO / Grizeta cielo kun koldeta temperaturo, cajorne, en Francilia.
KONCIZE
IRAK / VIZITO DA JOE BIDEN
L'Usana vice-prezidanto diskutis, hiere, kun la chefa ministro Nuri Al Maliki e la prezidanto dil autonoma regiono Kurdia, Massud Barzan. Mardie, dum ke atento efektigis du mortinti en ica lando, il asertis ke la suceso dil elekto deputital di 2010 esas "precipua kondiciono por trovar solvo a la politikala questioni nesolvita".
USA / PUNISO POR LA REPUBLIKANO QUA AKUZIS OBAMA ESAS MENTIERO
La Chambro dil reprezentanti adoptis hiere rezolvuro di desaprobo kontre Joe Wilson per 240 voti kontre 179. Ye la 9ma di septembro, lor diskurso pri la reformo dil prisanesa sistemo dal Usana prezidanto koram la Kongreso, ita republikana elektito klamabis "Vu mentias" ye l'instanto kande la prezidanto asertis ke ico ne esos ye la profito dil nelegala enmigrinti.
NEW YORK / PROJETO PRI INTERDIKTO FUMAR SUR LA PARKI E SUR LA PLAJI
La New-Yorkani ja ne darfis fumar tabako en la restorerii, en la publika loki kovrita e che lia laboreyi. Imitante l'exemplo di Los Angeles, la autoritatozi di ca urbo anuncis, mardie, ke li reflektas pri la instalo en balda futuro di "ne-fumera arei sur la publika placi ed en la gardeni e garden-placi di nia urbo".
Kordiala interretala saluti ad omni. JM :::-:::
Ye la 16ma di septembro 2009
Dio di santino Edith.
DIO-PROVERBO / Kontenteso esas plu importanta kam richeso.
ZODIAKO / En la zodiako-signo dil Virgino guvernata dal planeto Merkuro.
VETERO / Grizeta cielo kun koldeta temperaturo, cajorne, en Francilia.
KONCIZE
NEDERLANDO / LA GUVERNERIO VOLAS DIMINUTAR LA SPENSI
Segun la budjeto-projeto prizentata, hiere, dal guvernerio Nederlandana centrana-sinistrana, la publika spensi diminutesos ye 20% quik de 2011. Singla ministrerio komisesos studiar la moyeni realigar 20% de sparado en 20 granda domeni dil publika sektoro, quale la habiteyi, la familiala subvencioni e la prisana sistemo. La konkluzi savigesos dum la miyaro 2010.
JAPONIA / JAPAN AIRLINES SERCHAS PARTENERO
La unesma avionala kompanio anuncabis, hiere, la supreso di 6.800 laborplasi e konfirmis diskutir kun altra kompanii en la skopo obtenar partenereso . L'Usana kompanii Delta ed American Airlines esus tre koncernata per ita negociado.
SOMALIA / CHEFO DIL AL-QAIDA ESIS LA SKOPOPLAKO DI HELIKOPTERAL INKURSO PASINTA-LUNDIE
La extremista islamisti Somaliana, le "Chebab", minacis, hiere, "venjar" la morto di guidanto di Al-Qaida, ocidita la predio lor spektaklatra inkurso helikopterala Usana en sud-Somalia. Ita viro, Saleh Ali Saleh Nabhan, naskinta en Kenia, serchesis depos duopla atento facita ye la 28ma di novembro 2002 en Mombasa, vizanta hotelo kun Israelana kapitali ed Israelana voyaj-aviono.
Kordiala interretala saluti ad omni. JM :::-:::
Ye la 16ma di septembro 2009
Dio di santino Edith.
DIO-PROVERBO / Kontenteso esas plu importanta kam richeso.
ZODIAKO / En la zodiako-signo dil Virgino guvernata dal planeto Merkuro.
VETERO / Grizeta cielo kun koldeta temperaturo, cajorne, en Francilia.
KONCIZE
NEDERLANDO / LA GUVERNERIO VOLAS DIMINUTAR LA SPENSI
Segun la budjeto-projeto prizentata, hiere, dal guvernerio Nederlandana centrana-sinistrana, la publika spensi diminutesos ye 20% quik de 2011. Singla ministrerio komisesos studiar la moyeni realigar 20% de sparado en 20 granda domeni dil publika sektoro, quale la habiteyi, la familiala subvencioni e la prisana sistemo. La konkluzi savigesos dum la miyaro 2010.
JAPONIA / JAPAN AIRLINES SERCHAS PARTENERO
La unesma avionala kompanio anuncabis, hiere, la supreso di 6.800 laborplasi e konfirmis diskutir kun altra kompanii en la skopo obtenar partenereso . L'Usana kompanii Delta ed American Airlines esus tre koncernata per ita negociado.
SOMALIA / CHEFO DIL AL-QAIDA ESIS LA SKOPOPLAKO DI HELIKOPTERAL INKURSO PASINTA-LUNDIE
La extremista islamisti Somaliana, le "Chebab", minacis, hiere, "venjar" la morto di guidanto di Al-Qaida, ocidita la predio lor spektaklatra inkurso helikopterala Usana en sud-Somalia. Ita viro, Saleh Ali Saleh Nabhan, naskinta en Kenia, serchesis depos duopla atento facita ye la 28ma di novembro 2002 en Mombasa, vizanta hotelo kun Israelana kapitali ed Israelana voyaj-aviono.
Kordiala interretala saluti ad omni. JM :::-:::
Ye la 15ma di septembro 2009
Dio di santa Rolando.
DIO-PROVERBO / Venas rido pos minaco, e pacesko pos despaco.
ZODIAKO / En la zodiako-signo dil Virgino guvernata dal planeto Merkuro.
VETERO / Alternante griza e sunoza cielo, cajorne, en Francilia.
KONCIZE
GLOBO / MESAJO DA USSAMA BEN LADEN
Per nova "audio"-mesajo difuzita che interretala situo*, la chefo dil terorista organizuro Al-Qaida advokas l'Usana populo agar presi sur la lojanti dil Blanka Domo por ke li finez la militi en Irak ed Afgania kambie di haltigo di lua ataki. Lua preirinta enrejistruro difuzesabis ye la pasinta 3ma di junio. En ol il refuzis la aperturo da prezidanto Obama a la Mohamedista mondo.
TIBET / PREPARO DIL VOYAJO AD USA DAL DALAI-LAMA
Konsilanti dil Usana prezidanto Barack Obama renkontris la spiritala chefo dil Tibetani en exileyo en Dharamsala, India, tale anuncis hiere lua porparolanto. La Dalai-Lama, qua iris ad Usa dum pasinta mayo, esperas renkontror prezidanto Obama lor lua venonta voyajo dum oktobro.
PAKISTAN / MORTIGERA SHOKPULSO EN KARACHI
Adminime duadeko de mulieri e de neadulta personi mortigesis, hiere, en la ekonomiala chefurbo di Pakistan. Li tramplesis o sufokesislor shokpulso dum distributo de farino, segun dissavigo dal policani. Ultre lo, misilo* pafata da Usana drono* mortigis quar rebeli en Pakistanala loko frontierala an Afgania.
Kordiala interretala saluti ad omni. JM :::-:::
Ye la 14ma di septembro 2009
Dio dil Kruco Glorioza.
DIO-PROVERBO / Povo esas yuro.
ZODIAKO / En la zodiako-signo dil Virgino guvernata dal planeto Merkuro.
VETERO / Grizeta cielo kun koldeta temperaturo, cajorne, en Francilia.
KONCIZE
GREKIA / L'OPOZANTARO PROPOZAS "PROJETO DE 100 DII" POR RIIMPULSAR L'EKONOMIO DI CA LANDO
Georgios Papandreou, chefo dil Pasok, la Greka socialista partiso, prizentis pasinta-saturdie lua programo relate la anticipata deputital elekto dil 4ma di oktobro. Preiranta la dextranaro di Kostas Karamanlis, ye la povo depos 2004, segun la opinion-inquesti, il promisis la salubrigo e "la transparanteso dil publika financizo".
HONDURAS / NUL USANA VISTO POR LA NOVA IMPORTANTA VIRO DI CA LANDO
Robert Michiletti, chefo dil guvernerio naskinta de la stato-stroko eventinta dum la 28ma di junio, e 17 altra importanta oficala personi saveskis dum la pasinta semanofino ke lia visto por Usa supresesis dal guvernerio di Washington. La guvernerio di Tegucigalpa refuzas la projeto por ekirar la krizo propozata da internaciona mediacanti. Ita projeto previdas la retroiro a la povo daldestronizita prezidanto Manuel Zelaya.
NORVEGIA / LA SINISTRANA GUVERNERIO DI CA LANDO MINACESAS
La elekteri komencis votar, hiere, okazione dil deputital elekto qua eventos du dii pos nun. La opinion-inquesti konstatigas ke la nombro-difero dil voti esos tre mikra inter la sinistrana koalisuro qua unionas la labor-partisani, la socialisti e la centristi, e la quar opozanta partisi dextrana. Ica Skandinaviana lando subisis nur kurtatempe duranta ekonomiala desexpanso e posedas nunadie la chomado-procento maxim febla en Europa.
Kordiala interretala saluti ad omni. JM :::-:::
Ye la 11ma di septembro 2009
Dio di santa Adelfo.
DIO-CITAJO / Pano e cirkaji. (Moto dil Romana guvernanti por indikar ke suficas donar talaji a la plebeyani por kontentigar li e guvernar quiete.)
ZODIAKO / En la zodiako-signo dil Virgino guvernata dal planeto Merkuro.
VETERO / Sat sunoza cielo, cajorne, en Francilia.
KONCIZE
ZIMBABWE / EU/UE INTENCAS LIMITIZAR LA PUNISI
Unesmafoye depos l'impozo di punisi en 2002, Europana Uniono sendos dum la venonta semano-fino delegitaro a Zimbabwe, en la skopo organizar eventuala desblokusigo di lua developado-helpo ad ita lando. Renkontri previdesas kun prezidanto Robert Mugabe e Morgan Tsvangirai, ex-opozanto diveninta chefa ministro segun interkonsento pri povo-divido.
TURKIA / PLU KAM 30 MORTINTI LOR LA INUNDI
La bilanco dil inundi qui plagis Istambul e la provinco vicina Tekirdag, en nordwest-Turkia, iris til 32 mortinti hiere, segun l'informilal agenterio Anatolia. Quarteri dil Turka chefurbo dronesis sub du metri de aquo, e chosei submersesis. L'aquo komencis decensar merkurdie vespere, ma plusa pluvo vartesas hodie.
URUGUAY / LA HOMEOSEXUALI DARFOS ADOPTAR INFANTI
La Uruguayana Senato permisis, pasinta-merkurdie, l'adopto di infanti da homeosexuala pari. Ico esas unesmafoya evento en lando di Latinida Amerika. Ita reformo qua esas adoptota dal deputiti, denuncesis dal katolika Eklezio. "Nia poziciono esas ke l'adopto devas eventar enkadre di familio kun paro formacita per viro e muliero", tale deklaris Sinioro Pablo Galimbertti, episkopo dil diocezo di Salto.
Kordiala interretala saluti ad omni. JM :::-:::
Ye la 10ma di septembro 2009
Dio di santa Aubertus.
DIO-PROVERBO / La tempo esas tam rapida kam la fulmino.
ZODIAKO / En la zodiako-signo dil Virgino guvernata dal planeto Merkuro.
VETERO / Komence griza e pluvema cielo, diveninta pose blua e sunoza, cajorne, en Francilia.
KONCIZE
INDIA / KATASTROFAL INUNDI
Preske 400.000 personi esis blokusita per l'inundi en est-India, pos torentatra pluvo qua mortigis adminime du personi, segun dissavigo dal autoritatozi lokala. Quar distrikti dil Stato est-Bengal atingesis per ica kalamitato. Adminime 4000 domi fortranesis e la sokursi devis intervenar por helpar 400.000 habitanti blokusita per la fango.
ALJERIA / LA HCR ESAS SOLIDARA KUN LE SAHRAWI
La Supera-komisario dil Unionita Nacioni por la refujinti (HCR), Antonio Guterres, arivis hiere en Tinduf (extrema sudwesto di Aljeria) por "solidareso-vizito a le refujinta Sahrawi". Plu kam 160.000 Sahrawi vivas enrefujinti-kampeyi proxim Tinduf, segun la Fronto Polisario qua postulas, kun l'apogo da Aljeria, la sendependeso di est-Sahara.
CHINIA / RETRETO-PENSIONO POR LA RURANI
Chinia impulsisretreto-sistemo por la rurani, olqua vizas divenar generala, til 2020, por la 730 milion habitanti dil rurala arei, segun anunco hiere da oficala responsivo. La farmisti evanta 60 yari e trans 60 yari recevos til 55 yuani (5,60 euri) monatale. La rurani evanta de 16 til 60 yuani suskriptos de 100 til 500 yuani yarale taskope, e li helpesos da la lokala guvernerii.
Kordiala interretala saluti ad omni. JM :::-:::
Ye la 9ma di septembro 2009
Dio di santa Alanus.
DIO-PROVERBO / En despropra vazo ne shovez la nazo !
ZODIAKO / En la zodiako-signo dil Virgino guvernata dal planeto Merkuro.
KONCIZE
DEMOKRATIAL REPUBLIKO-KONGOLANDO / DU NORVEGIANI KONDAMNESAS YE MORTO-PUNISO
La Norvegiana guvernerio denuncis, hiere, la kondamno ye morto-puniso pronuncata ye la sama dio en Demokratial Republiko Kongolando kontre du Norvegiana resortisanti, ilqui agnoskesis kom kulpinta pro la mortigo di lia vehisto ye la pasinta 5ma di mayo e pro spionado. "Me denuncas la kondamno ye morto-puniso di du Norvegiana civitani", tale reaktis la chefo dil Norvegiana diplomacistaro, qua refuzas la kondamno pro spionado mantenata kontre la Norvegiani. Ica amba viri servis en pasinta tempo che l'armeo Norvegiana.
CHINIA / MORTIGERA EXPLOZO DI KARBON-GASO
35 ministi mortigesis dum la nokto de lundio til mardio pre explozo di karbon-gaso en mineyo di meza Chinia. Funde di ta mineyo 44 de lia kolegi restis kaptita hiere. 93 personi laboris por la rinovigo di ta karbon-mineyo en la provinco Henan, kande l'explozo eventis. La Chiniana mineyi esas inter le maxim danjeroza en la mondo. Plu kam 3.200 laboranti mortis ibe pasinta-yare, segun la oficala statistiki, ma existas organizuri qui opinionas ke ica nombro esas tre sub-evaluata.
RUSIA / L'"ARTIC SEA" NE TRANSPORTIS MISILI* POR IRAN
La Rusa ministro pri Exterlandal Aferi, Sergei Lavrov, dementiis hiere ke la komerco-navo ARTIC SEA, trovata opoze a l'Afrikana litoropos misterioza desaparo, konvoyis Rusa misili* -de sulo ad aero- S-300 vers Iran, quale asertis lo la Britaniana diala jurnali SUNDAY TIMES ed Austriana SALZBURGER NACHRICHTEN, citanta Israelana informo-fonti. La inquestisti trovis ibe nur ligno segun la Rusa statala advokataro.
Kordiala interretala saluti ad omni. JM :::-:::
Ye la 8ma di septembro 2009
Nasko-dio dil Santa Virgino.
DIO-PROVERBO / Preferez skribar a tro multe lektar !
ZODIAKO / En la zodiako-signo dil Virgino guvernata dal planeto Merkuro.
VETERO / Blua e sunoza cielo, cajorne, en Francilia.
KONCIZE
SUDAN / LA JURNALISTINO JUDICIATA PRO LA SURHAVO DI PANTALONO NE FLOGESOS
Lubna Ahmed Al Hussain ne subisos 40 frapi di flogilo. Tale rezolvis, hiere, la tribunalo di Khartum. Ita yuna Mohamedistino judiciesis pro pantalon-surhavo. La Mohamedistal e militistal rejimo di Khartum do retroiris opoze a la internaciona kampanio, instrumentizita da Lubna Al Hussain ipsa. La dicita jurnalistino tamen kondamnesis pagar amendo equivalanta a 140 € (euri), quan el rezolvis ne pagar. Konseque, elu esos dum un monato enkarcere. Cetere, elu quik enkarcerigesis. Elu entraprezas kampanio por nihiligar l'artiklo 152 dil punisala kodexo di Sudan permisanta ke mulieri flogesez pro surhavir pantalono.
MALDIVIA / PRIVACITA YE SOMITALA INTERRENKONTRO
Maldivia, qua esas un de la landi maxim minacata per l'acenso dil maraquo, ne asistos la mondala konfero pri la klimato dum venonta decembro en Kobenhavnpro pekunio-indijo, tale anuncesis hiere dal prezidanto dica insularo jacanta en l'Indiana Oceano. Ica lando sufras pro publika deficito rekorda ye 34% dil PIB. Acenso dil nivelo dil maraquo ye un metro submersus preske komplete ica arkipelago.
TAIWAN / LA CIKLONO PRODUKTAS LA DEMISIONO DAL CHEFA MINISTRO
La Taiwanana chefa ministro Liu Chao-shiuan prizentis lua demisiono hiere dum asumar la kompleta responsiveso dil tre kritikata jerado di la sokursi lor la ciklono Morakot qua efektigis plu kam 600 mortinti ye la komenco di agosto sur ica insulo. Il remplasesos che ita ofico dal chefo dil partiso ye la povo (t.e. la Kuomingtang), Wu Den-yih, tale savigis porparolanto dil guvernerio lokala.
Kordiala interretala saluti ad omni. JM :::-:::
Ye la 7ma di septembro 2009
Dio di santa Rejina.
DIO-PROVERBO / Eminenta debanto mala paganto.
ZODIAKO / En la zodiako-signo dil Virgino guvernata dal planeto Merkuro.
VETERO / Blua e sunoza cielo, cajorne, en Francilia.
KONCIZE
MACEDONIA-BULGARIA / ITA LANDI TRAURAS
Pos la naufrajo qua perdigis la vivo, pasinta-saturdie, a dek-e-kin turisti Bulgariana sur la lago Ohrid en Macedonia, la Macedoniani havis hiere un dio di nacionala trauro e la Bulgariani esis agonta same cadie por facar homajo a la viktimi, qui venis de est-Bulgaria. La kapitano dil ILIDEN, evo 23 yari, qua esis anke proprietero di la koncernata navo, pozesasen la dispono dil polico.
FILIPINI / MORTIGERA NAUFRAJO
Kin personi mortis ed adminime 63 plusa homi konsideresis kom desaparinta, hiere, en sud-Filipini, proxim la granda insulo sudala Mindanao lor la naufrajo di paromo interne di qua esis preske mil voyajanti e membri di akompananta esquado. La paromo-acidenti, olqua esas transportilo nekareebla en ita arkipelago, esas frequa.
ZIMBABWE / PARLAMENTANI STRIKAS
La 25 membri dil parlamentala komisitaro komisita redaktar nova Konstituco devanta posibligar nova elekto en Zimbabwe, rezolvis strikar konseque di la refuzo dal guvernerio pagar lia salario, tale raportis la lokala informili hiere. Ica strikanta komitato inkluzas membri dil partiso di Robert Mugabe e dil partiso dil chefa ministro, Morgan Tsvangirai.
Kordiala interretala saluti ad omni. JM :::-:::
Ye la 4ma di septembro 2009
Dio di santa Rosalia.
DIO-PROVERBO / Pekunio ne igas la feliceso ma kontributas ye ol.
ZODIAKO / En la zodiako-signo dil Virgino guvernata dal planeto Merkuro.
VETERO / Autunale griza cielo kun sunoz epizodi, cajorne, en Francilia.
KONCIZE
IRAK / NE-PERSEQUO POR L'ANCIENA MINISTRO CHARLES PASQUA EN AFERO PRI PETROLO
Dek-e-un altra personi risendesis a deliktala tribunalo. Ita inquesto orientizesis vers Franca eminenti suspektata recevir ye la komenco dil yari 2000 celata gelti sub formo di subvencioni pri petrol-bareli dal Irakana rejimo di Saddam Hussain tale violacante la programo di UN/ONU "mineral-oleo po nutrivi".
HONDURAS / MANUEL ZELAYA ACEPTESIS DA HILLARY CLINTON
La prezidanto di Honduras revokita depos la pasinta 28ma di junio, Manuel Zelaya, esis renkontronta, hiere, l'Usana Statala sekretariino Hillary Clinton. Lor konfero che l'universitato George-Washington, hiere, il exhortis la guvernerio di Barack Obama kondamnar plu energioze la statostroko qua ekpulsis lu ye la povo ed anke denuncar la violaci dil homala yuri facita, segun il, dal nuna rejimo di lua lando.
CHINIA / NOVA TENSI EN XINJIANG
La policani advokis, hiere, la habitanti di Urumqi restar heme dum ke manifesto eventis en la chefurbo dil regiono Xinjiang, nordwest-Chinia, olqua esabis sukusita dum julio per mortigera trubli. Testi adjuntis ke la policani organizis kontroli pos la debuto di manifesto da plura centi de "Han"-i, t.e. la membri dil majoritatal etno* en Chinia, nam iti plendis ne protektesar kontre la "Uighur"-i dal policani.
Kordiala interretala saluti ad omni. JM :::-:::
Ye la 3ma di septembro 2009
Dio di santa Gregorius.
DIO-PROVERBO / Bone ita sidas, a qua la fato ridas.
ZODIAKO / En la zodiako-signo dil Virgino guvernata dal planeto Merkuro.
VETERO / Autunale grizeta e pluvetoza vetero, cajorne, en Francilia.
KONCIZE
GEORGIA / ABKHAZIA INTENCAS SINKIGAR GEORGIANA NAVI
La prezidanto di Abkhazia, Sergei Bagapsh, imperis hiere a la navaro di ta lando recente sendependigita de Georgia destruktar la Georgiana navi "violacanta la marala teritorio" Abkhaziana. Ita anunco eventas pos la kapto en la Nigra Maro, da Georgia, di du navi komercanta kun Abkhazia malgre la marala blokuso di ta teritorio.
MEXIKIA / LA URAGANO JIMENA RESTAS DANJEROZA
L'uragano Jimena qua esis atingonta, hiere, dum la jornofino, la Mexikiala peninsulo Basa-Kalifornia proxima ad Usa, kelke plufebleskis (210 km/h) e regresis ye la nivelo 2 (de 5) ma reprezentis ankore danjero segun la meteologiisti. La alarmo-stando dekretesis en la tota regiono, olqua ja atingesabis da cikloni dum oktobro 2008.
CHINIA / SEKURESO-GRUPI CIRKUM BEIJING (PEKINO) POR LA SISADEKESMA ANIVERSARIO DI KOMUNISTA CHINIA YE LA 1ma DI OKTOBRO
Ita aranjuri esos ne nur plufortigita en la provinco Hebei, qua inkluzas Beijing (Pekino) ed anke en la quar provinci, cirkondanta Hebei. Pluse, oli esos pluintensigita en la rezistema regioni Xinjiang, nordwest-Chinia, (populizita per Mohamedisti) e Tibet, west-Chinia.
Kordiala interretalasaluti ad omni. JM :::-:::
Ye la 1ma di septembro 2009
Dio di santa Lupus.
DIO-PROVERBO / Plu bona agar kam parolachar.
ZODIAKO / En la zodiako-signo dil Virgino guvernata dal planeto Merkuro.
VETERO / Alternante sturmema e sunoza vetero, cajorne, en Francilia.
KONCIZE
KOLUMBIA / PREZIDANTO ALVARO URIBE ATINGESAS DAL A-GRIPO
La simptomi di ca gripo aparis che la prezidanto, saturdie vespere, lor lua retroveno de Arjentinia, ube il partoprenabis la politikala somito dil Statestri di la Uniono di Sud-Amerika. Lua sanesala stando evolucionas "favoroze" la prezidanterio anuncis, dum adjuntar ke "la prezidanto asumas luataski ma restos en quaranteno dum la tempo necesa a lua risanesko". Pasinta-monate, la prezidanto di Kosta Rika, Oscar Arias anuncabiskaptesir da ca viruso.
VIETNAM / INTERPELO DI BLOGERO PRO MOTIVI DI "NACIONALA SEKURESO"
Bui Thanh Hieu, qua komentabis kontroversata projeto pri mineyi de aluminio-erco e l'aresto di advokato, esis ipsa arestita, hiere savigis membro di lua familio. Ita projeto (pri la mineyi) en la alta planaji di la mezo di Vietnam, kun Chiniana kolokaji, produktis ondo de kritiki denuncanta la riski por l'ambiento e la lokala habitantaro, same kam la posibleso di ekonomiala posedesko dal Chiniani.
ISRAEL / LA KOLONIIGO DI EST-IERUSALEM ACELERESIS YE LA UNESMA SEMESTRO DI 2009
Segun la Israelana NGO Ir Amin (Urbo dil populi), dum la unesma duimo de 2009, la konstrukto-projeti di 150 suplementala habiteyi avancis, ed ico esas posibliganta, en perspektivo di longa periodo, a 750 koloniisti su instalar en la Palestinana quarteri di Est-Ierusalem ube ja vivas 2000 koloniisti. La Usana autoritatozi agas presi por haltigo di ta koloniigo en la okupata teritorii Palestinana.
Kordiala interretala saluti ad omni. JM :::-:::
| 
English
Deutsch
Français
Plusa lingui
