IDO • Linguo Internaciona • Universala • Neutra • Facila


English Deutsch Français Plusa lingui

Novajeti da Sro Martignon


Vu esas la esma
vizitanto di ca ret-situo

Specala ofro

Ido-Situi

Kurseto por Infanti da A. Martinez (Hispania), PDF-file 2Mb

Elektronikala dicionarii

Ido-uzantogrupi

Diversa texti, literaturaji ed Idokursi

Plusa Situi

Idofonduri

Wiki interna

modifikez flanko-bendo

Impressum: / Impreso:

Inhaber der Internetpräsenz www.ido.li:
propietanto dil retsituo www.ido.li

Deutsche Ido-Gesellschaft e.V.
Germana Ido-Societo r.a.
c/o ver.di Berlin
FB 8 / AG Ido
Köpenicker Str. 30
D- 10179 Berlin

Onlinekontakt
Interreta kontaktformulario

Administrator der Internetpräsenz www.ido.li:
administranto dil ret-situo www.ido.li

Frank Kasper
Breitscheidstr. 22
D- 90459 Nürnberg

Onlinekontakt
Interreta kontaktformulario

Novajeti da Sro Martignon

Ye la 29ma di januaro 2010

Di di santa Gildas.

DIO-PROVERBO / Qua ne volas audar, ta mustas sentar.

ZODIAKO / En la zodiako-signo dil Varsero guvernata dal planeto Urano.

VETERO / Grizega e pluvema cielo, cajorne, en Francilia.

KONCIZE

BRAZIL* / LULA ESAS EN HOSPITALO
La prezidanto Brazilana Luiz Inacio Lula da Silva "exhaustata" aceptesis en hospitalo dum la nokto de merkurdio til jovdio en Recife e nihiligis lua voyajo che la ekonomiala forumo mondala di Davos. Il evas 64 yari ed esis risaneskanta de krizo di hipertenso* qua ja koaktabis lu aceptesir en hospitalo. Il esis departontaa Suisia kande lua mediko rekomendis ke lu iras aden hospitalo.

DANIA / ARANJURI KONTRE LA "BURQA"
La liberal-konservema guvernerio rezolvis, hiere, limitizar la surhavo dil "burqa" e dil "niqab" en la publika spaco, ma sen interdiktar ica velo, poslasante la sorgo a la skoli, a l'administrerio ed a la entraprezeyi establisar la reguli itateme. Segun la texto di raporto, la guvernerio deklaris esar kontre generala interdikto qua violacus la konstituco.

JAPONIA / MORTO-MINACI KONTRE LA CHEFA MINISTRO
Kugli e morto-minaci recevesis, hiere, per posto-livrajo che la labor-chambri dil chefa ministro Japoniana Yukio Hatoyama e dil generala sekretario di lua partiso, tale anuncis la policani. La labor-chambro di Ichiro Ozawa, la tre influoza generala sekretario dil Partiso Demokrata di Japonia, koncerne lu, recevis kuverto kontenanta to quo similesas fusil-kuglo.
Yukio Hatoyama

Kordiala interretala saluti ad omni. JM :::-:::

Ye la 28ma di januaro 2010

Dio di santa Tomas di Aquino.

DIO-CITAJO / Inter la maro e la Europana kontinento, ni, Angli, sempre selektos la maro. (Winston Churchill)

ZODIAKO / En la zodiako-signo dil Varsero guvernata dal planeto Urano.

VETERO / Griza cielo e tre humida aero, cajorne, en Francilia;

KONCIZE

GUATEMALA / L'EX-PREZIDANTO PORTILLO ARESTESIS
L'anciena prezidanto Guatemalana, Alfonso Portillo, ye la povo de 2000 til 2004, arestesis e pose enkarcerigesis pasinta-mardie en lua lando, dum vartar ilua posibla extrado ad Usa, ube la judiciisti akuzas lu "sustraktir deki de milioni dolari di publika pekunio". Evanta 58 yari, il povus divenor la unesma anciena prezidanto di ca lando extradesar e kondamnesar.
Alfonso Portillo Cabrera

USA / BARACK OBAMA PRONUNCAS SUA DISKURSO PRI LA STANDO DI USA
L'Usana prezidanto, Barack Obama, esis pronunconta, hiere vespere, koram la Kongreso lua unesma diskurso pri la stando di Usa, dum olqua il devis esforcar rihavar l'inicio, pos subisir desfacila yaro-komenco. La maxim recenta opinion-inquesti montris ke la Usani esas majoritate deskontenta pri la bilanco di ca prezidanto koncerne la ekonomio.

LAOS / "HMONG"-I INSTALESAS EN "DEVELOPO-VILAJI"
Mili de membri dil etno "Hmong"-aekpulsata de Tailando a Laos dum la pasinta monato, inter li 158 havis la statuto di refujinti grantita da Unionita Nacioni, retrovenis a lia anciena domi o rilojigesis en nova vilaji, tale asertis la guvernerio di Vientiane, hiere. La guvernerio di Bangkok esabis akre kritikata pro retrosendir ita 4.500 personi qui vivis en kampeyi.

Kordiala interretala saluti ad omni. JM :::-:::

Ye la 27ma di januaro 2010

Dio di santa Angela. (Nomo-festo dil kancelerino di Germania)

DIO-CITAJO / Me preferus esar la unesmo en mizeroza vilajo Alpala kam la duesmo en Roma. (Iulius Caesar)

ZODIAKO / En la zodiako-signo dil Varsero guvernata dal planeto Urano.

VETERO / Sat klara e sunoza cielo, cajorne, en Francilia.

KONCIZE

VENEZUELA / UN MORTINTO LOR MANIFESTO
Venezuelana studento mortis per kugli lor afronti marjinale di manifesti, pasinta-lundie, kontre la cesigo dil televiziono RCTV, olqua esistre kritikema a la guvernerio. Jasin Carillo, evo 15 yari, militanto dil Partiso socialista ye la povo, mortigesis lor afrontoen la Stato Merida. Plur altra studenti vundesis per kugli lor ita manifesti.
Manifesto favore a la televiziono RCTV en Caracas

SOMALIA / KOMBATI CIRKUM BELEDWEYNE
Violentoza kombati inter por-guverneria milici ed islamista rebeli extremista por la posedesko dil Somalial urbo Beledweyne, en la mezwesto di ca lando, produktis ok mortinti hiere. Ita afronti eruptis konseque di atako da por-guverneria trupi por retroprenar de la rebeli la posedo di ta urbo jacanta ye 300 km norde de Mogadiscio.

EUROPA / LA KOLDESO PRODUKTAS VIKTIMI
La frost-ondo pluduris furiar, hiere, kontre l'esto di Europa. En Polonia, dek personi transmondeskis pasinta-lundie. Parolesas precipue pri senhema personi. En Rumania, la vintro efektigis non plusa mortinti dum la jus pasinta duadek-e-quar hori, lor ke la temperaturo falis til -32°C. En Germania, la koldeso perisigis 14 senhema personi. Tala bilanco ne plus atingesabis depos dek-e-tri yari.

Kordiala interretala saluti ad omni. JM :::-:::

Ye la 26ma di januaro 2010

Dio di santa Timothevs e santa Titus.

DIO-PROVERBO / Homo fidas, fortuno decidas.

ZODIAKO / En la zodiako-signo dil Varsero guvernata dal planeto Urano.

VETERO / Grizega cielo e kolda temperaturo, cajorne, en Francilia.

KONCIZE

GERMANIA / ARESTO-DOKUMENTI KONTRE VIDELA
La Germana judiciisti emisis internaciona aresto-dokumenti kontre la Arjentiniana ex-diktatoro Jorge Rafael Videla, evo 84 yari, ilqua akuzesas pri "mortigo" enkadre dil inquesto pri la desparigo en 1978 di Germano, Rolf Stawowiok, supozata viktimo dil militistala rejimo Arjentiniana. La Germana judiciala oficisti opinionas ke li povas demonstrar, ke ilu fusilagesis. Joerge Rafael Videla direktis la militistal guvernerio Arjentiniana de 1976 til 1981.
Jorge Rafael Videla

VIETNAM / ANCIENA SUVERENO ENTERIGESAS
La mumiigita kadavro di Vietnamana rejo, membro dil dinastio di le "Le" tarda (1428-1789), transmondeskinta tri yarcenti ante nun,en 1731, ripozesis aden la sulo hiere, kinadek yari pos deskovresir acidentale,dum 1958, en la vilajo Bai Trach, jacanta en la nordo di ca lando. Procesiono de adminime 100 veturi eskortesis a la sarko di ca monarko til la vilajo ube lu trovesabis.

TUNIZIA / TAWFIK BEN BRIK RESTAS EN KARCERO
L'apel-korto di Tunis mantenis , pasinta-saturdie, enkarcere la jurnalisto Tawfik Ben Brik, kondamnitalor unesma instanco ye sis monati de karcero-puniso pro violentajo, e lu ajornis la verdikto ye la venonta 30ma di januaro. La advokati di ca Tuniziana jurnalisto denuncas politikala proceso. La korto refuzis la demando por liberigo. Tawfik Ben Brik, evo 49 yari, repetas ke il esas viktimo "pri afero fabrikita dal specala servi".

Kordiala interretala saluti ad omni. JM :::-:::

Ye la 25ma di januaro 2010

Dio di santa Ananias.

DIO-CITAJO / La milito esas tro serioza afero por lasar olu en la manui dil militisti. (G. Clemenceau)

ZODIAKO / En la zodiako-signo dil Varsero guvernata dal planeto Urano.

VETERO / Kelke sunoza cielo, cajorne, en Francilia.

KONCIZE

GERMANIA / OSKAR LAFONTAINE ABANDONAS LA POLITIKALA VIVO
La chefo dil extrema sinistranaro Germana "Die Linke", evo 66 yari, anuncis pasinta-saturdie lua departo de la politikala vivo nacionala motive di lua kancero. Ico privacas la dicita partiso di lua elektala lokomotivo. Ita transfuginto de la partiso sociala-demokrata (SPD), brilanta diskursisto, fondabis "Die Linke" en 2007 kun anciena komunisti di pasinta GDR. Die Linke obtenabis 11,9% de la voti lor la deputital elekto di septembro 2009.

UNIONITA REJIO / KA DEPUTITAL ELEKTO YE LA 6ma DI MAYO ?
La Britaniana ministro por la Defenso furnisis, hiere, la indico maxim preciza til nun pri la dato dil venonta elekto deputital en Unionita Rejio. La elekteri "vekos e maledikos su se li esos kun konservema guvernerio pos la 6ma di mayo", lu explikis. Lokala elekti previdesas ye ita dato e multanombra observeri judikas ke la chefa ministro povus koincidigor la elekti.
Cristina Kirchner

ARJENTINIA / KRIZO YE LA SOMITO DIL STATO
Prezidantino Cristina Kirchner nihiligis elua voyajo a Beijing (Pekino) pro institucala-politikala krizo en elua lando. La aludita voyajo koaktis el absenteskar dum dek dii, t.e. periodo dum qua la vice-prezidanto, Julio Cobos, devis remplasr elu kom Statestro. Or, Julio Cobos, anciena federito e kunlistano dil nuna Statestro lor la prezidantala elekto di 2007, depos ita tempo transiris a la opozantaro.

Kordiala interretala saluti ad omni. JM :::-:::

Ye la 22ma di januaro 2010

Dio di santa Vincentius.

DIO-PROVERBO / Qui amoretas, intervexetas.

ZODIAKO / En la zodiako-signo dil Varsero guvernata dal planeto Urano.

VETERO / Griza cielo, cajorne, en Francilia.

KONCIZE

IRAK / SHIISTA MANIFESTI EN NADJAF E BASSORA
Centi de personi manifestis, hiere, en Nadjaf e Bassora, shiista urbi di Irak, lia apogo a la decido interdiktar a la kandidati akuzata esar ex-membri dil partiso Baas, dil anciene prezidanto sunnista Saddam Hussain, prizentar su por la venonta deputital elekto. Ita decido produktis la iraco dil sunnista komunajo qua opinionas ke olu esas la skopo-plako di ta aranjuro.

UNIONITA REJIO / LA MOHAMEDISTA POLICANI DESQUIETESKAS
Asociuro de Britaniana policani Mohamedista denuncis, hiere, la kontre-terorista strategio dal guvernerio qua kreskigas, segun lu, "l'islamofobio" en ita lando e dividas la komunaji. Lu opinionas ke la programo por preventar la terorismo "stigmatizas" la Mohamedani per koncentrar su pri "la supozata extremismo islamista".
La Mohamedista policani denuncas la kreskanta stigmatizo di lia samreligiani en Unionita Rejio

MEXIKIA / ADMINIME 23 MORTINTI EN KARCERO
Afronti inter karcerani di rivala bandi efektigis adminime 23 mortinti e 20 vunditi, pasinta-merkurdie, en karcero dil urbo Durango, nordwest-Mexikia, en puniseyo kontenanta 1800 kaptiti. La autoritatozi ne ja savas la motivi di ta intershoki. Antea afronto havis kom konsequo, dum agosto 2009, 20 mortinti e 25 vunditi en karcero di Gomez Palacio, proxim Durango.

Kordiala interretala saluti ad omni. JM :::-:::

Ye la 21ma di januaro 2010

Dio di santino Agnes.

DIO-PROVERBO / Ploranton ni evitas, ridanton ni imitas.

ZODIAKO / En la zodiako-signo dil Varsero guvernata dal planeto Urano.

VETERO / Griza cielo kun sunoza epizodi, cajorne, en Francilia.

KONCIZE

IRAN / LA GUVERNERIO DI TEHERAN PRIZENTOS TRI NOVA SATELITI
La guvernerio Iranala diskonocigos tri nova sateliti, ye la komenco di venonta februaro okazione dil aniversario di la islamista revoluciono, tale anuncis la ministro por telekomunikili*, ilqua citesis hiere da la lokal informili. Quankam la Iranani prizentas ita sateliti kom destinota probar telekomunikil-equipuri, la Ocidentani timas ke oli uzesez por militistal skopi.

NEDERLANDO / PROCESO DIL EXTREMISTA DEXTRANA DEPUTITO GEERT WILDERS
La extremista dextrana deputito Neerlandana, evo 46 yari, produktero dil kontre-Mohamedista filmo "Fitna", prizentis su unesmafoye, hiere, avan tribunalo di Amsterdam por preparanta audienco enkadre dil persequi por "instigo a rasala odio ed a diskriminaco*" entraprezata kontre ilu dal Statala advokataro. Il riskas til un yaro de karcero-puniso o 7.600 € de amendo ma ne riskas puniso di neelektebleso.
Geert Wilders

KOSOVO / EUROPANA INQUESTO PRI LA ORGANO-KOMERCACHO
La specala sendito dil Konsilantaro di Europa, Dick Marty, komisita pri l'inquesto koncernanta organo-komercacho supozata en Albania ed en Kosovo en 1999, renkontris hiere en Pristina oficala responsivi por diskuti, cirkondata per la maxim granda diskreteso. Il ja irabis a Beograd e Pristina dum agosto 2009 por inquestar pri ca organo-komercacho organizita da Kosovana "guerillero"-i.

Kordiala interretala saluti ad omni. JM :::-:::

Ye la 20ma di januaro 2010

Dio di santa Fabianus.

DIO-PROVERBO / Facilesas kritikar, desfacil plubonigar.

ZODIAKO / Iro en la zodiako-signo dil Varsero guvernata dal planeto Urano.

VETERO / Griza cielo kun kelka sunoza epizodi, cajorne, en Francilia.

KONCIZE

SUDANO / SEPARO DIL SUDO PER PLEBICITO
Sudano agnoskos la separo di lua Sudo, se ica selekto vinkos lor la decidiganta plebicito previdita dum januaro 2011, tale asertis hiere prezidanto Omar el-Beshir dum diskurso markizante la 5ma aniversaro dil fino di la intercivitana milito inter la Nordo e la Sudo.
Omar el-Beshir

INDONEZIA / MORTO-PUNISOYE L'ANCIENA RESPONSIVO KONTRE LA SUBORNO
La morto-puniso requizitesis, hiere, ye l'anciena chefo dil omnopovanta komisitaro Indoneziana por lukto kontre la suborno. Il judiciesas pro l'asasino di rivalulo koncerne amoroza afero.

KAMBODJA / KONDAMNO DA SUEDO PRO PEDOFILESO*
Ilu kondamnesis dal municipala Korto di Phnom Penh, hiere, ye sis yari e duimo de karcero-puniso pro sexuagar kun tri pueruli evanta min kam 13 yari. Ica akuzato arestesis dum pasinta mayo en Kambodja.

Kordiala interretala saluti ad omni. JM :::-:::

Ye la 19ma di januaro 2010

Dio di santa Marius.

DIO-PROVERBO / Qua bona esas, anke amesas.

ZODIAKO / En la zodiako-signo dil Kaprikorno guvernata dal planeto Saturno.

VETERO / Grizacha cielo kun humidega aero, cajorne, en Francilia.

KONCIZE

CHINIA / LA TELEFONALA MESAJERIO RIESTABLISESIS EN XINJIANG
Chinia riestablis hiere, en la provinco Xinjiang, nordwest-Chinia, la mesajerio-servo per poshtelefonili qua esabis desaktivigita dum pasinta julio pos sangoza interetna* sedicii. Ma la uzanti povas sendar mesaji nur interne di ca lando e li yurizesas nur ye duadek mesaji diale. La interretala servo esas nur partale riestablisita.

NOVA ZELANDO / PRINCO GUGLIELMUS (WILLIAM) AKLAMESIS DA PLURA MILI DE PERSONI
Princo Guglielmus (William), evanta 27 yari e duesma persono en la sucedo-ordino ye la trono di Anglia, efektivigas en Nova-Zelando lua unesma oficala vizito ad-exterlande ye la nomo di rejino Elizabeth II. En ita lando qua esas konstitucala monarkio, di qua la Statestro esas la rejino di Anglia reprezentata en Wellington da generala guberniestro, la eventuala komuto a republiko produktas debato.
Princo Guglielmus (William)

YEMEN / DUBO PRI LA MORTO DI CHEFO DI AL-QAIDA
Dubo mantenesas pri la morto dil militistal chefo di Al-Qaida en la Araba peninsulo, Qassem Al Rimi, quan la guvernerio di Sanaa asertas mortigir lor avionala inkurso pasinta-venerdie en nord-Yemen. Altra Arabi dementias ica informo. Ma la Yemenana ministrerio pri Interna Aferi tamen insistas pri la realeso di ta fakto ed ecepte se la jihadista movado difuzas vivo-pruvo di Qassem Al Rimi, la dubo ne povos desaparar.

Kordiala interretala saluti ad omni. JM :::-:::

Ye la 18ma di januaro 2010.

Dio di santa Priska.

DIO-PROVERBO / Tale esas, tale restas.

ZODIAKO / En la zodiako-signo dil Kaprikorno guvernata dal planeto Saturno.

VETERO / Grizega cielo ed humidega aero, cajorne, en Francilia.

KONCIZE

AFGANIA / LA SITUESO ESAS GRAVA EN KABUL
La talibani impulsis, cadie, 20 suocidanta teroristi por atakar la prezidantala palaco e plura ministrerii en la mezo di Kabul, tale efektigante kin mortinti e 38 vunditi. La ataki esis sat rara en Kabul depos la falo dil rejimo dil talibani ye la fino di 2001, ma oli multopleskas de la recenta monati dum ke la rebeli ganas ye tereno.

CHILI / PINERA RETROVENIGAS LA DEXTRANI YE LA POVO
La multamilionera entraprezisto Sebastian Pinera elektesis, pasinta-sundie, kom prezidanto di Chili, tale markizante la retroveno dal dextrani ye la povo pos duadek yari di sinistrana guvernerio. En la mezo di Santiago, dekamili de Chiliani dextrana decensis aden la stradi dum la jorno pro ke li havis unesmafoye la joyo di vinko per legala elekto e ne per stato-stroko.

Sebastian Pinera

ITALIA / LA KALABRIANA MAFIA EKPULSIS L'AFRIKANI DE ROSARNO
Plu kam 1.000 enmigranti veninta precipue de Ghana ed anke de Mali, Ivora Rivo, Togolando, Burkina Faso, Niger e Sierra Leono mustis fugar por salvar lia vivi pos violentoza afronti qui eruptis ye la 7ma di januaro inter la lokala habitantaro e la migranti di ta komono. Segun informita jurnalisti ico esas la konsequo di revolto dal Afrikani kontre la N'drangheta qua ne toleras ke on protestez kontre lua legi. La futura enmigranti esos est-Europani plu obediema. La Afrikani fuganta per lia propra moyeni iras a Kampania precipue a Castelvolturno e Caserta.

Kordiala interretala saluti ad omni. JM:::-:::

Ye la 15ma di januaro 2010

Dio di santa Remigius.

DIO-PROVERBO / Ube profito, ibe anke merito.

ZODIAKO / En la zodiako-signo dil Kaprikorno guvernata dal planeto Saturno.

VETERO / Grizacha cielo ed humide kolda temperaturo, cajorne, en Francilia.

KONCIZE

IRAK / DEK-E-UN KONDAMNITI YE MORTO-PUNISO PRO L'ATENTO DI AGOSTO 2009
Irakana tribunalo kondamnis, hiere, ye morto per pendigo dek-e-un viri, inter li esas membri di Al-Qaida, pro lia impliko en la duopla atento qua produktis plu kam 100 mortinti e 600 vunditi dum pasinta agosto en Baghdad e subisigis malega stroko a la guvernerio di Nuri Al Maliki. Parolesas pri la unesma kondamni di suspektati arestita pos tri serii de spektaklatra atenti qui frapis la chefurbo di Irak dum la duesma mi-yaro di 2009.

BURMA / PROMISO DI ELEKTO "LIBERA E YUSTA"
Lo esas ito quon la Burmana ministro pri Exterlandala Aferi, Nyan Win, asertis hiere vespere che l'Asociuro dil Unionita Nacioni di Sudest-Azia . Se lu eventus, la voto en Burma esus la unesma depos olta di 1990, ma la elekto dependas de la promulgodi du legi di qua la kontenajo ne konocesas e la dato di ta elekto duras ne anuncesar.

KOREA / POSIBLA RISTARTO DIL VOYAJI A NORD-KOREA
Nord-Korea propozis, hiere, rikomencar, kun la konsento dal guvernerio di Seoul, la organizita voyaji cesita en 2008 pos la morto di Sud-Koreana turistino ocidata da soldato dil komunista rejimo, tale anuncis la oficala informili. La Komito por la paco Azia-Pacifiko, komisita por la inter-Koreana kambii, advokis a kunveno kun Sud-Korea ye la 26ma e 27ma di januaro, segun la oficala informil-agenterio dil Nord-Koreana rejimo, KCNA, aceptata en Seoul.

Kordiala interretala saluti ad omni. JM :::-:::

Ye la 14ma di januaro 2010

Dio di santa Petrus Donders.

DIO-PROVERBO / Plu bon poke ganar kam multe perdar.

ZODIAKO / En la zodiako-signo dil Kaprikorno guvernata dal planeto Saturno.

VETERO / Sunoza cielo e plumildeskanta temperaturo, cajorne, en Francilia.

KONCIZE

YEMEN / DIALOGO KUN "REPENTINTI" DI AL-QAIDA
La Yemanana autoritatozi asertis, hiere, ke lia propozo pri dialogo kun Al-Qaida limitizesas parolar kun "repentinti" di ta terorista reto. Lor klarigo, porparolanto dil ministreriopri Exterlandala Aferi asertis ke la guvernerio di Sanaa nulatempe propozabis dialogo ad omna membri di ca reto ma "nur a la yuni duktata en eroro e rekrutita che la terorista celuli, enkadre di rehabilito-programo."

USA / LA USANI DIVIDESAS PRI BARACK OBAMA
Ye un semano ante la unesma aniversario di lua enoficesko, 45% de la questionita personi havas pozitiva opiniono pri la maniero per qua Barack Obama guvernas li, kontre 45% qui havas opozita opiniono, segun inquesto facita dal universitato Quinnipiac. Dum junio 2009, la procento de aprobo dil unesma prezidanto mestica di Usa esis ankore de 59% kontre 31%.

Barack Obama

PAKISTAN / KINDO* MORTIGESIS PER BOMBO ERORE VIDITA KOM BALONO
Adminime un kindo* mortigesis e kin plusa altri vundesis, hiere, per la explozo di bombo quin li erore vidis kom balono sur ludo-tereno en nordwest-Pakistan, nefore de la tribuala arei ube la armeani kombatas la talibani federita kun Al-Qaida, tale anuncis la policani. La talibani esas responsiva pri senprecedenta ondo de suocida atenti, adminime la plu granda parto de li esas tala. Ita ondo de atenti efektigis preske 3000 mortinti en tota Pakistan depos du yari e duimo.

Kordiala interretala saluti ad omni. JM :::-:::

Ye la 13ma di januaro 2010

Dio di santa Hilarius di Poitiers.

DIO-PROVERBO / Por omna ago venas tempo di pago.

ZODIAKO / En la zodiako-signo dil Kaprikorno guvernata dal planeto Saturno.

VETERO / Grizega cielo kun mildeskanta temperaturo, cajorne, en Francilia.

KONCIZE

TURKIA / NOVA PLUSA TENSI KUN ISRAEL
La relati inter Israel e Turkia subisas nova plumalesko, ye la proxima vizito en Ankara dal Israelana ministro pri Defenso Ehud Barak. Ita situeso debesas a la difuzado en Turkia di televizional filmo judikata kom kontre-Israelana e mem forsan antisemida dal Israelani, ico sequesis per la kunvoko "vexanta" dil Turka ambasadisto en Tel-Aviv e di kritiki dal chefa ministro Turka Recep Tayyip Erdogan.

CHINIA / PROBO DI DEFENSO-SISTEMO AERAL
Chinia anuncis probir sucesoze defenso-sistemo aeral, per haltigar misilo* dum lua flugo. Ita demonstro 'okuras' lor polemiko pri la armi-vendi Usana a Taiwan, olqua vendo agnoskesis pasinta-semane da Usana responsivo, ed ol esabus realigata konseque di interkonsento inter Taiwan ed Usa en 2008.

USA / SARAH PALIN SIGNATAS KUN FOX NEWS
La ex-kandidatino republikana por la vice-prezidanteso di Usa, Sarah Palin, esos komentistino che Fox News, tale anuncis la konservema kanalo dil magnato Rupert Murdoch. La sumo di ca kontrato, "qua koncernas plura yari", ne savigesas. Sarah Palin, evo 46 yari, facos politikal analizi che ita kanalo.

Sarah Palin

Kordiala interretala saluti ad omni. JM :::-:::

Ye la 12ma di januaro 2010

Dio di santa Margarita Bourgeoys.

DIO-PROVERBO / Omna merito donas kredito.

ZODIAKO / En la zodiako-signo dil Kaprikorno guvernata dal planeto Saturno.

VETERO / Grizacha cielo e kolda temperaturo, cajorne, en Francilia.

KONCIZE

CHIPRO / IMPORTANTA NEGOCIADO
La politikala direktanti Chiprana dil nordo e sudo di ca insulo impulsis, hiere, negociado en la skopo abutar, cayare, ad interkonsento por la riunigo di ta insulo. La politikala direktanti di la Republiko Chipro e di la Turka Republiko Nord-Chipro interrenkontris sisadeko de foyi dum periodo de dek-e-kin monati, ma ne sucesas avancar koncerne la sekureso-temi e la spoliadi di proprietaji.

DANIA / KULPIGO PRO PROBO DI TERORISTA AGO
La Somaliano evanta 28 yari, qua probis ocidar ye la 1ma di januaro la Daniana desegnisto Kurt Westergaard, autoro dil tre kontroversata karikaturo di Muhammad en 2005, akuzesis hiere pro "probo di terorista ago", tale savigis la prokuratoro komisita pri la koncernata dokumentaro. La aludita atakinto ja akuzesis pro mortigo-probi kontre la karikatur-desegnisto same kam kontre policano. Ilu riskas kondamnesar "ye enkarcerigo til perpetueso."

Kurt Westergaard

ALJERIA / ALJERIANA KRISTANI IMPEDESAS CELEBRAR OFICIO
Duesmafoye dum periodo de du semani, protestanti apartenanta a la komunajo Tafar ne povis irar, pasinta-saturdie, ad-che la nova protestanta kirko di Tizi-Ouzou, precipua urbo di Kabilia. Ja ye la 26ma di decembro, li impedesis agar tale da grupo de duadeko de islamisti. La aludita protestanta kirko ne ja aceptesis dal autoritatozi di Aljer.

Kordiala interretala saluti ad omni. JM :::-:::

Ye la 11ma di januaro 2010

Dio di santa Paulinus.

DIO-PROVERBO / Ube profito, ibe anke merito.

ZODIAKO / En la zodiako-signo dil Kaprikorno guvernata dal planeto Saturno.

VETERO / Griza cielo e frostoza temperaturo, cajorne, en Francilia.

KONCIZE

GREKIA / BOMBO LANSITA KONTRE LA PARLAMENTO
Atento vizis saturdie vespere la Greka Parlamento sen produktar viktimi. Dum vartar ula organizuro revendikanta ita ago, la kontre-terorista brigado privilejizis la traco-voyo duktanta a grupo di obedio anarkiista, "Konspiro dil faira celuli", ja asertinta efektigir plura deki de senviktima atenti depos 2008.

ISRAEL / DEBUTO DIL PROCESO DI MOSHE KATZAV
La Israelana ex-prezidanto Moshe Katzav komencis audesar hiere dal tribunalo di la distrikto di Tel-Aviv koncernanta la akuzi pri violaco e sexuala molestado facita kontre lu. Ita anciena prezidanto qua pledas kom nekulpozo, demisionis de lua ofico dum junio 2007.

Moshe Katzav

TURKIA / SOKURSITA NELEGALA ENMIGRANTI
La Turka sekureso-trupi kontrolis, pasinta-venerdie, sur la Egea maro, batelo transportanta 155 nelegala migranti Palestinana abandonita surmare da lia transiriganti. La dicita batelo transportis 79 viri, 34 mulieri e 42 kindi*. Konseque di avario di lia navo, la migranti esabis abandonata du dii antee.

Kordiala interretala saluti ad omni. JM :::-:::